မ︀တ︀်တ︀ႄး 18

မ︀ိူင︀်းက︀ၢင︀်ႈꩭၢဝ်မ︀ႆ︀ႛၸ︀ႂ်ꩫ︀ႆ︀တ︀ီၵ︀ႅꩫ︀်းယ︀ႂ်

(မ︀ႃက︀ု 9.33-37; လ︀ုက︀ႃ 9.46-48)

1မ︀ိူဝ်ႈဢ︀မ︀ႂ်း တ︀ပ︀ေးꩡ︀ဝ်ႛၵ︀ဝ် ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “မ︀ိူင︀်းက︀ၢင︀်ႈꩭၢဝ်မ︀ႆ︀ႛ ၸ︀ႂ်ꩫ︀ႆ︀ၵ︀ႅꩫ︀်းယ︀ႂ်တ︀ီၵ︀ႃႛꩫ︀ႆ︀ႇ” ꩫ︀ꩬ︀ီꩬ︀ွက︀်ႉဢ︀ူ။ 2မ︀ꩫ︀်းꩡ︀ဝ်ႛယ︀ႃႇ လ︀ၵ︀ႃက︀ူဝ်ႇလ︀ိူင︀်ႈမ︀ႆ︀ႛꩭွင︀်ႇင︀ႆ︀း က︀ꩫ︀်ႛꩫ︀ႃႛၵ︀ဝ်မ︀ႆ︀ႛ ꩭႂ်ႛꩬ︀ဝ်းယ︀ဝ်ႇက︀ီး 3“ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ ꩬ︀ူꩫ︀င︀်လ︀ၵ︀ႃꩫ︀ႆ︀ႇၵ︀ဝ်ꩫ︀က︀ꩫ︀်ႈ ꩡ︀ႂ်ႈပ︀ူဝ်းမ︀ဝ်လ︀ႆ︀ၢႈမ︀ႃးက︀ီး မ︀ိူင︀်းက︀ၢင︀်ႈꩭၢဝ်မ︀ႆ︀ႛ မ︀ိူဝ်ႈလ︀ႂ်ႈက︀ေႃႇ ꩵ︀ႈꩫ︀ႆ︀ႛၵ︀ဝ်ႛ။ 4က︀ူဝ်ႇဢ︀ꩫ︀်ႈꩫ︀င︀်လ︀ၵ︀ႃꩫ︀ႆ︀ႇၵ︀ဝ်ꩫ︀က︀ꩫ︀်ႈ က︀ွမ︀်းꩫ︀ွမ︀်းꩫ︀ႆ︀ႇ မ︀ိူင︀်းက︀ၢင︀်ႈꩭၢဝ်မ︀ႆ︀ႛ တ︀ီပ︀ီꩫ︀်ႈဢ︀ꩫ︀်ႈၵ︀ႅꩫ︀်းယ︀ႂ်ꩫ︀မ︀်။ 5က︀ူဝ်ႇဢ︀ꩫ︀်ႈꩫ︀ူႈꩫ︀ႃႛက︀ဝ်ႈꩬ︀ီ လ︀ၵ︀ႃၸ︀ꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭၢပ︀်ႉဢ︀ဝ်ႈꩫ︀ႆ︀ႇ ဢ︀ꩫ︀်ႈက︀ဝ်ႈမ︀ႆ︀ႛက︀ေႃႇꩭၢပ︀်ႉꩫ︀မ︀်။

လ︀ွင︀်ႈပ︀ိူꩫ︀်ႈမ︀ႆ︀ႛက︀ဝ်းဢ︀ဝ်ႈၸ︀ိတ︀်

(မ︀ႃက︀ု 9.42-48; လ︀ုက︀ႃ 17.1,2)

6ၸ︀ႂ်ꩫ︀က︀ေႃႇ လ︀ၵ︀ႃၸ︀ꩫ︀်းꩫ︀ႆ︀ႇမ︀ႆ︀ႛက︀ဝ်းꩬ︀ီ ꩡ︀ႂ်ႈဢ︀ꩫ︀်ႈက︀ဝ်ႈမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇ ဢ︀ဝ်ႈၸ︀ေႛက︀ႃက︀ီး က︀ူဝ်ႇဢ︀ꩫ︀်ႈက︀ဝ်းဢ︀မ︀ႂ်းမ︀ႆ︀ႛ ꩭိꩫ︀်လ︀ူင︀်ၸ︀ုက︀်ꩡ︀ပ︀်ꩬ︀ီ ꩫ︀မ︀်ႇပ︀ၢင︀်လ︀ၢႆ︀မ︀ႆ︀ႛ ပ︀ိုဝ်တ︀ူက︀်ၵ︀ွတ︀်ꩫ︀ႆ︀ႇၵ︀ႅꩫ︀်းꩫ︀ီႈဢ︀ူ။ 7ꩡ︀ႃႇꩭၢင︀်းက︀ူဝ်ႇဢ︀ꩫ︀်ႈပ︀ိူꩫ︀်ႈမ︀ႆ︀ႛ လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ဝ်ႈပ︀ႅက︀်တ︀ၢင︀်းက︀ႃꩫ︀ႆ︀ႇၵ︀ဝ်ယ︀ႃႇ ၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။ ꩫ︀ႆ︀ႇꩫ︀က︀ေႃႇ ၸ︀ꩫ︀်းဢ︀မ︀ႂ်းယ︀ႃႇ မ︀ိူဝ်ႈလ︀ႂ်ႈက︀ေႃႇ တ︀ီယ︀င︀်းဢ︀ူꩫ︀မ︀်။ ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈꩭီတ︀်လ︀ွင︀်ႈၸ︀ꩫ︀်းဢ︀မ︀ႂ်းၵ︀ဝ်ယ︀ႃႇ တ︀ီꩫ︀ႆ︀ႛၵ︀ၢမ︀်တ︀ၢမ︀်ဢ︀ပ︀ႅတ︀်ႉ ဢ︀ꩫ︀်ႈၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။

8လ︀ႆ︀ၢးပ︀ိူဝ်ႈတ︀ိꩫ︀်ႈမ︀ိုဝ်းꩬ︀ူꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩬ︀ူၸ︀ိတ︀်က︀ီး တ︀ိꩫ︀်ႈမ︀ိုဝ်းဢ︀မ︀ႂ်း တ︀ႅပ︀်ၵ︀ွတ︀်တ︀ႃႉ။ တ︀ႃႇတ︀ိꩫ︀်ႈမ︀ိုဝ်းတ︀င︀်းꩬ︀ွင︀်ပ︀ႃႛက︀ုမ︀်ꩬ︀ီ တ︀ီꩫ︀ႆ︀ႛတ︀ူက︀်င︀ႃးလ︀ႆ︀ၢးယ︀ႃႇ တ︀ိꩫ︀်ႈမ︀ိုဝ်းမ︀ဝ်က︀ုမ︀်ꩬ︀ီ ၵ︀ဝ်ႛမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ၵ︀ႅꩫ︀်းꩫ︀ီႈဢ︀ူ။ 9လ︀ႆ︀ၢးပ︀ိူဝ်ႈတ︀ႃႈꩬ︀ူꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩬ︀ူၸ︀ိတ︀်က︀ီး တ︀ႃႈဢ︀မ︀ႂ်း က︀ွက︀်ၵ︀ွတ︀်တ︀ႃႉ။ တ︀ႃႇတ︀ႃႈတ︀င︀်းꩬ︀ွင︀်ပ︀ႃႛက︀ုမ︀်ꩬ︀ီ တ︀ီက︀ႃင︀ႃးလ︀ႆ︀ၢးယ︀ႃႇ ပ︀ႃႛလ︀ိူင︀်ႈမ︀ဝ်လ︀ွေႛꩬ︀ီ ၵ︀ဝ်ႛမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ၵ︀ႅꩫ︀်းꩫ︀ီႈဢ︀ူ။

ပ︀ုင︀်ၵ︀ိူင︀်ႈၵ︀ၢမ︀်း ပ︀ူႇဢ︀ꩫ︀်ႈꩭႆ︀ၢ

(လ︀ုက︀ႃ 15.3-7)

10က︀ဝ်ႈဝႃႈက︀ွတ︀်။ ꩬ︀ူꩬ︀တ︀ိက︀ꩫ︀်ႈတ︀ႃႉ။ လ︀ၵ︀ႃꩫ︀ႆ︀ႇၵ︀ဝ်မ︀ႆ︀ႛ ပ︀ီဢ︀လ︀ွေႛ။ က︀ၢင︀်ႈꩭၢဝ်မ︀ႆ︀ႛ ၵ︀ုꩫ︀်ꩬ︀ၢင︀်ဢ︀ꩫ︀်ႈပ︀ႂ်ႇၵ︀ဝ် မ︀ိူဝ်ႈလ︀ႂ်ႈက︀ေႃႇ ပ︀ၢင︀်ႈꩫ︀ႃႛပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛဢ︀ူက︀ꩫ︀်ႈꩫ︀မ︀်။ 11က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ၵ︀ေꩬ︀ေက︀ွတ︀်ꩫ︀ꩬ︀ီ က︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်း က︀ျွႃးမ︀ႃးꩫ︀မ︀်။ 12က︀ူꩫ︀်းဢ︀ꩫ︀်ႈပ︀ူႇပ︀ၢက︀်တ︀ူဝ်ႈယ︀င︀်းꩫ︀ႆ︀ႇ တ︀ူဝ်ႈလ︀ိူင︀်ႈꩭႆ︀ၢက︀ႃက︀ီး မ︀ꩫ︀်းတ︀ီꩭလ︀ိုဝ်ꩫ︀ႆ︀။ ၵ︀ꩫ︀်တ︀ႂ်းတ︀ီမ︀ဝ်က︀ႃၵ︀ႃက︀ျႃး။ ပ︀ူႇဢ︀ꩫ︀်ႈက︀ိူတ︀်က︀ဝ်ႛꩬ︀ိပ︀်က︀ဝ်ႛတ︀ူဝ်ႈꩫ︀ႆ︀ႇ င︀ွꩫ︀်းပ︀ႃယ︀ႃႛမ︀ႆ︀ႛလ︀ႃႈဝႆ︀ႇꩬ︀ီ တ︀ူဝ်ႈဢ︀ꩫ︀်ႈꩭႆ︀ၢဢ︀မ︀ႂ်းမ︀ႆ︀ႛ တ︀ီက︀ႃၵ︀ႃꩬ︀ႃး။ 13ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ ပ︀ူႇဢ︀မ︀ႂ်းမ︀ႆ︀ႛ မ︀ꩫ︀်းꩭꩫ︀်မ︀ႃးက︀ီး ꩡ︀ႃႇပ︀ူႇဢ︀ꩫ︀်ႈမ︀ဝ်ꩭႆ︀ၢ က︀ဝ်ႛꩬ︀ိပ︀်က︀ဝ်ႛတ︀ူဝ်ႈဢ︀မ︀ႂ်းမ︀ႆ︀ႛလ︀ိူမ︀်ꩬ︀ႃꩬ︀ီ ꩡ︀ႃႇပ︀ူႇတ︀ူဝ်ႈလ︀ိူင︀်ႈဢ︀ꩫ︀်ႈꩭꩫ︀်ပ︀ွက︀်ႉမ︀ႃးဢ︀မ︀ႂ်းꩬ︀ိုင︀် တ︀ီၵ︀ႅꩫ︀်းꩡ︀ူမ︀်းꩬ︀ႃး။ 14ꩫ︀င︀်ꩫ︀ႆ︀ႇꩫ︀က︀ꩫ︀်ႈ ပ︀ူဝ်က︀ၢင︀်ႈꩭၢဝ်ꩬ︀ူက︀ေႃႇ လ︀ၵ︀ႃဢ︀ွꩫ︀်ꩫ︀ႆ︀ႇၵ︀ဝ် က︀ူဝ်ႇလ︀ိူင︀်ႈꩫ︀ႆ︀ၢႈက︀ေႃႇ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ ꩵ︀ႈၵ︀ႂ်ႈꩭႂ်ႛꩭႆ︀ၢက︀ႃ။

ၸ︀ူႛယ︀ုမ︀်ယ︀မ︀်ႈဢ︀ꩫ︀်ႈꩬ︀ူမ︀ႆ︀ႛၸ︀ိတ︀်မ︀ႆ︀ႛ ꩭလ︀ိုဝ်ဝႃႈꩭီတ︀်ꩫ︀ႆ︀

15ꩬ︀ူမ︀ႆ︀ႛၸ︀ူႛယ︀ုမ︀်ယ︀မ︀်ႈက︀ူဝ်ႇလ︀ိူင︀်ႈၸ︀ိတ︀်မ︀ႃးက︀ီး မ︀ꩫ︀်းမ︀ႆ︀ႛက︀ႃꩬ︀ီ ဢ︀ပ︀ႅတ︀်ႉမ︀ꩫ︀်းꩡ︀ိုဝ်ႇပ︀ျႃးတ︀ႃႉ။ ꩫ︀ႆ︀ႇꩫ︀က︀ေႃႇ ၸ︀ႂ်မ︀ႆ︀ႛက︀ေႃႇပ︀ီꩭႂ်ႛတ︀ွင︀်း။ ꩬ︀ွင︀်ၵ︀ိူဝ်ၸ︀ူႛꩡ︀ဝ်ႛꩫ︀ႆ︀ၢႈဝႃႈက︀ꩫ︀်ႈတ︀ႃႉ။ မ︀ꩫ︀်းꩬ︀ၢင︀်ဝွေမ︀ႃးက︀ီး တ︀င︀်းမ︀ꩫ︀်းထုက︀်က︀ꩫ︀်ႈပ︀ွက︀်ႉယ︀ဝ်ႇ။ 16ꩬ︀င︀်ဝႃႈမ︀ꩫ︀်းမ︀ဝ်ꩬ︀ၢင︀်ဝွေက︀ီး “ၵ︀ၢမ︀်းဢ︀ꩫ︀်ႈမ︀ႂ်းꩡ︀ိုဝ်ဢ︀ပ︀ႅတ︀်ႉꩫ︀ႆ︀ႇ ဢ︀ဝ်ႈꩬ︀ၢက︀်ႉꩬ︀ေꩬ︀ွင︀်ꩬ︀ၢမ︀်က︀ူဝ်ႇ ဝႃႈဢ︀ဝ်ႈၵ︀ိူင︀်ဢ︀ူꩫ︀ꩬ︀ီ ꩫ︀င︀်က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ꩬ︀ၢက︀်ႉꩬ︀ေက︀ူဝ်ႇလ︀ိူင︀်ႈ ꩬ︀ွင︀်က︀ူဝ်ႇꩭွင︀်ႇက︀ႃတ︀ႃႉ။ 17ꩬ︀င︀်ဝႃႈမ︀ꩫ︀်းမ︀ဝ်ꩬ︀ၢင︀်ဝွေက︀ီး လ︀ွင︀်ႈဢ︀ꩫ︀်ႈမ︀ꩫ︀်းၸ︀ိတ︀်မ︀ႃးꩫ︀ႆ︀ႇ ꩡ︀ိူဝ်းမ︀ႆ︀ႛၵ︀ႆ︀ႈꩭႂ်ႛတ︀ႃႉ။ င︀ႆ︀းꩬ︀ီက︀ေႃႇ မ︀ꩫ︀်းမ︀ဝ်ꩬ︀ၢင︀်ဝွေက︀ီး မ︀ꩫ︀်းမ︀ႆ︀ႛꩫ︀င︀်က︀ူꩫ︀်းက︀ꩫ︀်ႛꩫ︀ွက︀်ႉꩡ︀ိူဝ်းꩫ︀က︀ꩫ︀်ႈ ꩫ︀ႆ︀ႇမ︀ဝ်ꩡ︀ႂ်ႈက︀ီး ꩫ︀င︀်ၸ︀ူႛမ︀ၢပ︀်ႉလ︀ုပ︀်ႉꩫ︀က︀ꩫ︀်ႈမ︀တ︀်ႉၵ︀ွတ︀်တ︀ႃႉ။ 18ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ ဢ︀ꩫ︀်ႈꩬ︀ူမ︀ိူင︀်းက︀ၢင︀်ႈမ︀ႆ︀ႛ ꩭၢမ︀်ႛဝႆ︀ႇꩫ︀ႆ︀ႇ မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ေႃႇ ꩭၢမ︀်ႛဢ︀ူ။ ဢ︀ꩫ︀်ႈꩬ︀ူမ︀ိူင︀်းက︀ၢင︀်ႈမ︀ႆ︀ႛ ဢ︀ၵ︀ၢင︀်းꩭႂ်ႛဝႆ︀ႇꩫ︀ႆ︀ႇ မ︀ိူင︀်းက︀ၢင︀်ႈꩭၢဝ်မ︀ႆ︀ႛက︀ေႃႇ ဢ︀ၵ︀ၢင︀်းꩭႂ်ႛဢ︀ူ။ 19ꩡ︀ႃႇလ︀ိူင︀်ႈ ꩬ︀ူꩬ︀ွင︀်က︀ူဝ်ႇလ︀ိူင︀်ႈ ဢ︀မ︀ႆ︀ႚꩫ︀က︀ေႃႇ ꩡ︀ႂ်ႈၵ︀ူမ︀်က︀ꩫ︀်ႈꩬ︀ီꩭူမ︀်ႈယ︀ွꩫ︀်းꩬ︀ူးက︀ီး ဢ︀ꩫ︀်ႈꩫ︀င︀်ꩬ︀ူယ︀ွꩫ︀်းꩫ︀ႆ︀ႇ ပ︀ူဝ်က︀ၢင︀်ႈꩭၢဝ်က︀ဝ်ႈꩭီတ︀်ꩭႂ်ႛဢ︀ူ။ 20က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀မ︀ႆ︀ႚꩫ︀က︀ေႃႇ ꩬ︀ူꩡ︀ိုဝ်ႈက︀ဝ်ႈမ︀ႆ︀ႛꩭီတ︀်င︀ဝ်ႛꩬ︀ီ ꩬ︀ွင︀်ꩬ︀ၢမ︀်က︀ူဝ်ႇ တ︀ုမ︀်ႈက︀ꩫ︀်ႈက︀ီး တ︀ီႈဢ︀မ︀ႂ်းမ︀ႆ︀ႛ က︀ဝ်ႈတ︀င︀်းၵ︀ဝ်ယ︀င︀်းꩬ︀ီꩫ︀မ︀်” ꩫ︀ဝꩫ︀်ႇ။

ပ︀ုင︀်ၵ︀ိူင︀်ႈၵ︀ၢမ︀်းၸ︀ူႛꩡ︀ႂ်ႇဢ︀ꩫ︀်ႈပ︀ိူꩫ︀်ႈမ︀ႆ︀ႛ မ︀ဝ်ပ︀ွႆ︀ဢ︀ပ︀ႅတ︀်ႉ

21ယ︀ဝ်ႇက︀ီး ပ︀ေတ︀ရ︀ုယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “ꩡ︀ဝ်ႛꩴ︀း ꩬ︀င︀်ဝႃႈက︀ဝ်ႈၵ︀ႃႛမ︀ႆ︀ႛ ၸ︀ူႛယ︀ုမ︀်ယ︀မ︀်ႈက︀ူဝ်ႇလ︀ိူင︀်ႈ ꩬ︀မ︀်ႇꩬ︀ႃႉꩬ︀မ︀်ႇꩬ︀ႃႉၸ︀ိတ︀်မ︀ႃးက︀ီး မ︀ꩫ︀်းမ︀ႆ︀ႛ က︀ဝ်ႈၵ︀ႃႛက︀ီပ︀ၢꩫ︀်ႈတ︀ီၵ︀ႃႛꩫ︀ႆ︀ ဝႃႈပ︀ွႆ︀ဢ︀ၵ︀ၢင︀်းꩭႂ်ႛတ︀ီၵ︀ႃႛꩫ︀ႆ︀ႇ။ ꩡ︀ီတ︀်ပ︀ၢꩫ︀်ႈဝႃႈဢ︀ဝ်ႈထူꩫ︀်ႛတ︀ီၵ︀ႃႛက︀ျႃး” ꩫ︀ꩬ︀ီꩬ︀ွက︀်ႉဢ︀ူ။ 22ꩡ︀ဝ်ႛယ︀ေꩬ︀ုယ︀ႃႇ “ꩵ︀ႈꩶ︀ႚ။ ꩡ︀ီတ︀်ပ︀ၢꩫ︀်ႈꩵ︀ႈက︀ႃး။ ꩡ︀ီတ︀်ꩬ︀ိပ︀်ပ︀ၢꩫ︀်ႈꩡ︀ီတ︀်ꩡ︀ူးပ︀ုꩫ︀်ႛ ဝႃႈပ︀ွႆ︀ꩭႂ်ႛꩫ︀မ︀်။ 23က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ိူင︀်းက︀ၢင︀်ႈꩭၢဝ်ယ︀ႃႇ ꩫ︀င︀်ꩡ︀ဝ်ႛꩭူဝ်ၵ︀မ︀်းပ︀ႃးလ︀ိူင︀်ႈ ꩡ︀ႅပ︀်ႉꩡ︀လ︀ၢင︀်းꩫ︀ီႛၸ︀ူႛꩡ︀ႂ်ႇမ︀ꩫ︀်းꩡ︀ဝ်ႛၵ︀ဝ်ꩫ︀က︀ꩫ︀်ႈꩫ︀မ︀်။ 24မ︀ွင︀်းက︀ူဝ်ꩡ︀ႅပ︀်ႉယ︀ႃႇ က︀ူဝ်ႇဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ င︀ိူꩫ︀်းဢ︀ၢꩫ︀်တ︀ၢꩫ︀်လ︀ူင︀်ပ︀ႃႉꩫ︀ီႛမ︀ႆ︀ႛ ꩭႂ်ႛꩭွင︀်ႇမ︀ႃးဢ︀ူ။ 25က︀ူဝ်ႇဢ︀မ︀ႂ်း ꩬ︀ႆ︀ၢႛꩫ︀ီႛမ︀ဝ်ပ︀ီꩫ︀်ႈꩫ︀ႆ︀ႇꩬ︀ီ ꩡ︀ဝ်ႛꩭူဝ်ၵ︀မ︀်းယ︀ႃႇ မ︀ꩫ︀်းမ︀ႆ︀ႛ တ︀ူဝ်ႈမ︀ꩫ︀်းၸ︀ူႛꩡ︀ဝ်ႛတ︀မ︀ိူင︀်း၊ မ︀ေးလ︀ုက︀်ႉမ︀ꩫ︀်းၵ︀ဝ်င︀ႆ︀း ဢ︀ꩫ︀်ႈက︀ႃႈꩫ︀င︀်မ︀ꩫ︀်းမ︀ႆ︀ႛယ︀င︀်းꩫ︀ႆ︀ႇ ꩭႂ်ႛၵ︀ႆ︀ၢꩬ︀ီ ꩭႂ်ႛꩬ︀ႆ︀ၢႛꩫ︀ီႛဢ︀ူ။ 26ꩫ︀ႆ︀ႇမ︀ႆ︀ႛ ၸ︀ူႛꩡ︀ႂ်ႇဢ︀မ︀ႂ်းယ︀ႃႇ ꩡ︀ဝ်ႛꩭူဝ်ၵ︀မ︀်းမ︀ႆ︀ႛ ၵ︀ုပ︀်ႉၵ︀ဝ်ꩬ︀ီ “ၵ︀ႅꩫ︀်းꩫ︀က︀ွတ︀် ဢ︀ီꩫ︀ူႈꩬ︀ီထႃႛဢ︀ိက︀်ꩭႂ်ႛတ︀ီၵ︀ႃႛမ︀ႃးတ︀ႃႉ။ က︀ဝ်ႈၵ︀ႃႛꩬ︀ေႈꩡ︀ႃႉꩬ︀ီ ꩫ︀ီႛတ︀င︀်းမ︀ိူင︀်း ꩬ︀ႆ︀ၢႛꩭႂ်ႛပ︀ွက︀်ႉတ︀ီၵ︀ႃႛက︀ွတ︀်” ꩫ︀ꩬ︀ီဝွꩫ︀်းꩰၵ︀ႅꩫ︀်းꩰဢ︀ူ။ 27ꩫ︀ႆ︀ႇမ︀ႆ︀ႛ ꩡ︀ဝ်ႛꩭူဝ်ၵ︀မ︀်းꩫ︀ႆ︀ႇ မ︀ꩫ︀်းမ︀ႆ︀ႛဢ︀ီꩫ︀ူႈလ︀ူင︀်က︀ႃꩬ︀ီ ꩫ︀ီႛမ︀ꩫ︀်းတ︀င︀်းမ︀ိူင︀်း က︀ေႛလ︀ိတ︀်ႉꩭႂ်ႛꩬ︀ီ မ︀ꩫ︀်းမ︀ႆ︀ႛပ︀ွႆ︀လ︀ွတ︀်ႉလ︀ေႚလ︀ေႚꩭႂ်ႛဢ︀ူ။ 28ၸ︀ူႛꩡ︀ႂ်ႇဢ︀မ︀ႂ်းဢ︀ွက︀်က︀ႃက︀ီး ၸ︀ူႛꩡ︀ႂ်ႇဢ︀ꩫ︀်ႈပ︀ီꩫ︀်ႈၸ︀ူႛတ︀ႆ︀းက︀ူဝ်ႇမ︀ꩫ︀်း ဢ︀ꩫ︀်ႈမ︀ꩫ︀်းမ︀ႆ︀ႛ ꩫ︀ီႛꩡ︀ွꩫ︀်တ︀က︀ိလ︀ိူင︀်ႈပ︀ႃႉမ︀ႆ︀ႛꩥ︀ႃးဢ︀ူ။ ꩫ︀ႆ︀ႇမ︀ႆ︀ႛမ︀ꩫ︀်းယ︀ႃႇ တ︀ႆ︀းက︀ူဝ်ႇဢ︀မ︀ႂ်းမ︀ႆ︀ႛ မ︀ိပ︀်ၵ︀ူဝ်းꩬ︀ီ “ꩫ︀ီႛက︀ဝ်ႈꩬ︀ႆ︀ၢႛမ︀ႃႉ” ꩫ︀ဢ︀ူ။ 29ၸ︀ူႛတ︀ႆ︀းက︀ူဝ်ႇမ︀ꩫ︀်းယ︀ႃႇ “ၵ︀ႅꩫ︀်းꩫ︀က︀ွတ︀် ဢ︀ီꩫ︀ူႈꩬ︀ီထႃႛꩭႂ်ႛတ︀ီၵ︀ႃႛမ︀ႃးတ︀ႃႉ။ ꩫ︀ီႛမ︀ႂ်းꩡ︀ဝ်ႛတ︀င︀်းမ︀ိူင︀်း ꩬ︀ေႈꩡ︀ႃႉꩬ︀ီꩬ︀ႆ︀ၢႛꩭႂ်ႛပ︀ွက︀်ႉက︀ွတ︀်” ꩫ︀ꩬ︀ီဝွꩫ︀်းꩰၵ︀ႅꩫ︀်းꩰဢ︀ူ။ 30ꩫ︀ႆ︀ႇꩫ︀က︀ေႃႇ မ︀ꩫ︀်းယ︀ႃႇꩵ︀ႈꩡ︀ူး။ က︀ႃႈꩫ︀ီႛမ︀ꩫ︀်းမ︀ဝ်ꩬ︀ႆ︀ၢႛယ︀ႃႇ တ︀ႆ︀းက︀ူဝ်ႇမ︀ꩫ︀်းမ︀ႆ︀ႛ က︀ႃꩬ︀ႂ်ထွင︀်ဝႆ︀ႇဢ︀ူ။ 31လ︀ွင︀်ႈꩫ︀ႆ︀ႇမ︀ႆ︀ႛ ၸ︀ူႛꩡ︀ႂ်ႇတ︀ၢင︀်က︀ူဝ်ႇꩫ︀ႆ︀ႇၵ︀ဝ်ꩭꩫ︀်က︀ီး ၵ︀ၢမ︀်မ︀ဝ်ꩫ︀ႆ︀ႛၸ︀ႅဝ်ꩬ︀ီ လ︀ွင︀်ႈဢ︀မ︀ႂ်းတ︀င︀်းမ︀ိူင︀်း ꩡ︀ဝ်ႛꩭူဝ်ၵ︀မ︀်းမ︀ႆ︀ႛ က︀ႃၵ︀ႆ︀ႈဢ︀ူ။ 32ꩫ︀ႆ︀ႇမ︀ႆ︀ႛ ꩡ︀ဝ်ႛꩭူဝ်ၵ︀မ︀်းယ︀ႃႇ ၸ︀ူႛꩡ︀ႂ်ႇဢ︀မ︀ႂ်းမ︀ႆ︀ႛ ꩭွင︀်ႇပ︀ွက︀်ႉယ︀ဝ်ႇက︀ီး “ꩭိူဝ်း ၵ︀ႃႛၸ︀ွက︀်၊ မ︀ႂ်းဝွꩫ︀်းၵ︀ႅꩫ︀်းꩬ︀ီ ꩫ︀ီႛမ︀ႂ်းတ︀င︀်းမ︀ိူင︀်း က︀ဝ်ႈပ︀ူဝ်းပ︀ွႆ︀ꩭႂ်ႛမ︀ႃးက︀ေႃႇ၊ 33ꩫ︀င︀်မ︀ႂ်းမ︀ႆ︀ႛ က︀ဝ်ႈဢ︀ီꩫ︀ူႈꩭႂ်ႛꩫ︀က︀ꩫ︀်ႈ ꩭီတ︀်က︀ꩬ︀င︀်ꩫ︀ႆ︀မ︀ႂ်း တ︀ႆ︀းက︀ူဝ်ႇမ︀ႂ်းမ︀ႆ︀ႛ မ︀ဝ်ဢ︀ီꩫ︀ူႈꩭႂ်ႛꩫ︀ႆ︀ႇ” ꩫ︀ယ︀ဝ်ႇက︀ီး 34ꩡ︀ဝ်ႛꩭူဝ်ၵ︀မ︀်းꩫ︀ႆ︀ႇ ဢ︀ၢꩫ︀်တ︀ၢꩫ︀်ၵ︀ႂ်ႈꩡ︀ႃႇꩬ︀ီ က︀ႃႈꩫ︀ီႛမ︀ꩫ︀်းတ︀င︀်းမ︀ိူင︀်း မ︀ဝ်ꩬ︀ႆ︀ၢႛယ︀ႃႇ မ︀ꩫ︀်းမ︀ႆ︀ႛ ꩫ︀ႂ်းမ︀ိုဝ်းၸ︀ူႛင︀မ︀်းထွင︀်ဢ︀ꩫ︀်ႈꩭႆ︀ၢႇꩰꩡ︀ႃႇꩰꩫ︀ႆ︀ႇၵ︀ဝ်မ︀ႆ︀ႛ ဢ︀ၢပ︀်ႉꩭႂ်ႛၵ︀ွတ︀်ဢ︀ူ” ꩫ︀ဝꩫ︀်ႇ။ 35ꩬ︀ူက︀ေႃႇ ဢ︀ပ︀ႅတ︀်ႉပ︀ိူꩫ︀်ႈမ︀ႆ︀ႛ မ︀ဝ်ပ︀ွႆ︀လ︀ွတ︀်ႉꩭႂ်ႛတ︀ေႇတ︀ေႇက︀ီး ꩬ︀ူမ︀ႆ︀ႛက︀ေႃႇ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ပ︀ူဝ်က︀ၢင︀်ႈꩭၢဝ်က︀ဝ်ႈ တ︀ီꩭႂ်ႛတ︀ၢမ︀်ꩫ︀မ︀်။

Currently Selected:

မ︀တ︀်တ︀ႄး 18: kht

Highlight

Copy