ထဝ်ꩡ︀တ︀်ႉၵ︀ဝ် 18
18
လ︀ွင︀်ႈဝီင︀်းက︀ေႃးရ︀ီꩫ︀်တ︀ုမ︀ႆ︀ႛ ꩭူဝ်းၵ︀ၢဝ်ႈၵ︀ၢမ︀်းꩫ︀ီႈ
1ဝၢႆ︀းꩫ︀ႆ︀ႇပ︀ေႃလ︀ု လ︀ုက︀်ႉဝီင︀်းဢ︀ႃတ︀ီꩫ︀်မ︀ႆ︀ႛဢ︀ွက︀်ꩬ︀ီ က︀ႃဝီင︀်းက︀ေႃရ︀ိꩫ︀်တ︀ုဢ︀ူ။ 2ဢ︀မ︀ႂ်းမ︀ႆ︀ႛမ︀ꩫ︀်း ဢ︀ႃက︀ုလ︀ꩫ︀ꩫ︀ႆ︀ႇက︀ျူး က︀ူꩫ︀်းမ︀ိူင︀်းပ︀ုင︀်တ︀ုက︀ူဝ်ႇလ︀ိူင︀်ႈင︀ႆ︀း ၸ︀ူႛမ︀ေးမ︀ꩫ︀်းပ︀ီတ︀်က︀ိလ︀ၵ︀ဝ်မ︀ႆ︀ႛꩭꩫ︀်ဢ︀ူ။ ꩡ︀ဝ်ႛꩭူဝ်ꩬ︀ႅင︀်က︀လ︀ေႃတ︀ိယ︀ႃႇ က︀ျူးꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ လ︀ုက︀်ႉမ︀ိူင︀်းရ︀ေႃမ︀မ︀ႆ︀ႛꩭူဝ်ႛဢ︀ွက︀်ꩬ︀ီ မ︀ဝ်ꩭိုင︀်က︀ꩬ︀င︀်မ︀ႆ︀ႛ ꩬ︀ွင︀်ၵ︀ႃလ︀ုက︀်ႉမ︀ိူင︀်းဢ︀ီတ︀လ︀ီမ︀ႆ︀ႛဢ︀ွက︀်မ︀ႃးမ︀ꩫ︀မ︀်။ 3ꩬ︀ွင︀်ၵ︀ႃယ︀ႃႇ ꩫ︀င︀်ပ︀ေႃလ︀ုꩫ︀က︀ꩫ︀်ႈ ၸ︀ူႛꩭီတ︀်ꩬ︀ုမ︀်ႇꩫ︀မ︀်။ င︀ႆ︀းꩬ︀ီပ︀ေႃလ︀ုယ︀ႃႇ ꩬ︀ွင︀်ၵ︀ႃမ︀ႆ︀ႛက︀ႃꩭꩫ︀်င︀ႆ︀း တ︀င︀်းꩬ︀ွင︀်ၵ︀ႃဢ︀ူꩬ︀ီ ꩭူမ︀်ႈꩭီတ︀်ဢ︀မ︀ူးဢ︀ူ။ 4ပ︀ေႃလ︀ုယ︀ႃႇ က︀ျူးꩫ︀ႆ︀ႇၵ︀ဝ်င︀ႆ︀း က︀ရ︀ိက︀်ꩫ︀ႆ︀ႇၵ︀ဝ် ꩭႂ်ႛပ︀ူဝ်းပ︀ွင︀်ꩡ︀ႂ်ႈꩫ︀ႆ︀ႇဝꩫ︀်းက︀မ︀်ႈꩬ︀ိꩫ︀်က︀ူႈဝꩫ︀်း ꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛ တ︀င︀်းၵ︀ဝ်မ︀ူꩫ︀်ႈတ︀ြႃးက︀ꩫ︀်ႈဢ︀ူ။
5တ︀ိလ︀ꩫ︀ၵ︀ႃတ︀ိမ︀ေႃတ︀ေၵ︀ဝ် လ︀ုက︀်ႉမ︀ိူင︀်းမ︀ႃက︀ေတ︀ေႃꩫ︀ိမ︀ႆ︀ႛထိုင︀်မ︀ႃးက︀ီး ပ︀ေႃလ︀ုယ︀ႃႇ က︀ူႈယ︀ၢမ︀်းတ︀ြႃးꩫ︀ႆ︀ၢႈꩬ︀ိုင︀်ꩭူဝ်းꩬ︀ီ မ︀ေꩬ︀ိယ︀ယ︀ႃႇꩡ︀ဝ်ႛယ︀ေꩬ︀ုꩫ︀မ︀်ꩫ︀ꩫ︀ႆ︀ႇ က︀ျူးꩫ︀ႆ︀ႇၵ︀ဝ်မ︀ႆ︀ႛၵ︀ႆ︀ႈꩡ︀ုꩫ︀်ႈꩰꩭႂ်ႛဢ︀ူ။ 6က︀ျူးꩫ︀ႆ︀ႇၵ︀ဝ်မ︀ꩫ︀်းမ︀ႆ︀ႛ ထီင︀်ပ︀ွက︀်ႉꩬ︀ီတ︀ၢꩫ︀်ႛပ︀ုက︀်ႉꩬ︀ုက︀်ႉပ︀က︀်ႉꩬ︀က︀်ႉက︀ီး ပ︀ေႃလ︀ုယ︀ႃႇ “ꩬ︀ူတ︀ၢႆ︀ႈက︀ီးꩫ︀ႃႛတ︀ီႈꩬ︀ူၸ︀ူႛꩡ︀ဝ်ႛꩫ︀မ︀်။ က︀ဝ်ႈယ︀ႃႇꩫ︀ႃႛတ︀ီႈပ︀ေယ︀ဝ်ႇ။ လ︀ꩭႃꩫ︀ႆ︀ႇက︀ဝ်ႈယ︀ႃႇ က︀ႃဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ꩫ︀မ︀်” ꩫ︀ꩬ︀ီ ၸ︀ွင︀်ၵ︀ိူင︀်ႈယ︀ၢင︀်ꩬ︀ီဝႃႈဢ︀ူ။ 7ယ︀ဝ်ႇက︀ီးလ︀ုက︀်ႉဢ︀မ︀ႂ်းမ︀ႆ︀ႛဢ︀ွက︀်က︀ႃꩬ︀ီ ꩭိူꩫ︀်းတ︀ိတ︀ုယ︀ုက︀်တ︀ုမ︀ႆ︀ႛတ︀ူႈက︀ႃꩬ︀ဝ်းဢ︀ူ။ မ︀ꩫ︀်းယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈပ︀ႆ︀ၢႛၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ ꩭိူꩫ︀်းဢ︀မ︀ႂ်းယ︀ႃႇ တ︀ႆ︀ၢႛꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛꩫ︀မ︀်။ 8ၸ︀ူႛင︀မ︀်းꩡ︀ွင︀်းꩬ︀ွꩫ︀်တ︀ြႃးက︀ရ︀ိပ︀်ပ︀ုင︀ႆ︀း က︀ူꩫ︀်းꩭိူꩫ︀်းမ︀ꩫ︀်းၵ︀ဝ်ယ︀ႃႇ တ︀င︀်းꩭိူꩫ︀်းပ︀ီꩫ︀်ႈၸ︀ူႛယ︀ုမ︀်ယ︀မ︀်ႈမ︀ႃးက︀ꩫ︀်ႈဢ︀ူ။ က︀ူꩫ︀်းဝီင︀်းက︀ေႃရ︀ိꩫ︀်တ︀ုတ︀ၢင︀်က︀ူဝ်ႇဢ︀ၢꩫ︀်တ︀ၢꩫ︀်က︀ေႃႇ ၵ︀ၢမ︀်းၸ︀ြႃးꩫ︀ႆ︀ႛꩥ︀ိꩫ︀်းက︀ီး ယ︀ုမ︀်ယ︀မ︀်ႈမ︀ႃးက︀ꩫ︀်ႈꩬ︀ီ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဢ︀ဝ်ႈက︀ꩫ︀်ႈဢ︀ူ။
9ၵ︀မ︀်ႈလ︀ိူင︀်ႈ ပ︀ေႃလ︀ု ꩭꩫ︀်ၿျႃၻိက︀်ႉဢ︀ူ။ က︀ꩫ︀်ႛꩫ︀ႂ်းၿျႃၻိက︀်ႉမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ “က︀ဝ်ႈတ︀င︀်းမ︀ႂ်းယ︀င︀်းဢ︀ူ။ ပ︀ီက︀ူဝ်ႈ။ င︀ႆ︀ႚက︀ေႃႇꩭူဝ်းတ︀ႃႉ။ ပ︀ီꩫ︀ႂ်။ 10ၸ︀ႂ်က︀ေႃႇမ︀ႂ်းမ︀ႆ︀ႛꩭီတ︀်ၸ︀ေးꩵ︀ႈꩫ︀ႆ︀ႛ။ ဝီင︀်းꩫ︀ႆ︀ႇမ︀ႆ︀ႛ က︀ူꩫ︀်းက︀ဝ်ႈဢ︀ၢꩫ︀်တ︀ၢꩫ︀်ယ︀င︀်းဢ︀ူ” ꩫ︀ꩬ︀ီ ပ︀ေႃလ︀ုမ︀ႆ︀ႛဝႃႈဢ︀ူ။ 11င︀ႆ︀းꩬ︀ီမ︀ꩫ︀်း ဝီင︀်းဢ︀မ︀ႂ်းမ︀ႆ︀ႛ ပ︀ီႈပ︀ႆ︀ၢႈꩭူက︀်ꩫ︀ိူꩫ︀်ႈဢ︀ူꩬ︀ီ ၵ︀ၢဝ်ႈၵ︀ၢမ︀်းꩫ︀ီႈꩭူဝ်းꩭႂ်ႛꩬ︀ွꩫ︀်ꩭႂ်ႛဢ︀ူ။
12ꩡ︀ူဝ်ႈမ︀ိူဝ်ႈက︀ႃလ︀ျုင︀် ပ︀ီꩫ︀်ႈꩡ︀ဝ်ႛက︀ႅမ︀်ႈမ︀ိူင︀်းဢ︀ႃၵ︀ႃယ︀ꩫ︀ႆ︀ႇ က︀ျူးꩫ︀ႆ︀ႇၵ︀ဝ်တ︀ုမ︀်ႈက︀ꩫ︀်ႈꩬ︀ီ ပ︀ေႃလ︀ုမ︀ႆ︀ႛꩬ︀ႅဝ်ႛင︀ႆ︀း ပ︀ၢင︀်ႈတ︀ြႃးမ︀ႆ︀ႛဢ︀ဝ်ႈမ︀ႃးဢ︀ူ။ 13ၵ︀ဝ်ယ︀ႃႇ “ꩭႂ်ႛပ︀ူဝ်းက︀ူꩫ︀်းꩫ︀ႆ︀ႇၵ︀ဝ် ꩫ︀ေးဝႆ︀ႈၸ︀ြႃးၸ︀ိတ︀်က︀ꩫ︀်ႈꩫ︀ႆ︀ႇ မ︀ꩫ︀်းꩭူဝ်းလ︀ေဢ︀ူ” ꩫ︀ꩬ︀ီꩬ︀ွက︀်ႉဢ︀ူ။
14ပ︀ေႃလ︀ုတ︀ွပ︀်ၵ︀ၢမ︀်းက︀ွတ︀်ꩫ︀က︀ီး က︀ႃလ︀ျုင︀်ယ︀ႃႇ “က︀ျူးၵ︀ဝ်ꩴ︀း ꩬ︀င︀်ဝႃႈဢ︀မ︀ူးꩫ︀ႆ︀ႇ ဢ︀မ︀ူးဢ︀ꩫ︀်ႈၸ︀ိတ︀်ပ︀ိူင︀်ႈတ︀ေႇတ︀ေႇꩫ︀မ︀်ꩫ︀က︀ီး ꩬ︀ူမ︀ႆ︀ႛက︀ဝ်ႈထုက︀်ꩫ︀ီႈက︀ꩫ︀်ႛဢ︀ူ။ 15ꩫ︀ႆ︀ႇꩫ︀က︀ေႃႇဢ︀ꩫ︀်ႈꩫ︀ႆ︀ႇယ︀ႃႇ ဢ︀မ︀ူးဢ︀ꩫ︀်ႈထီင︀်ၵ︀ၢမ︀်းလ︀ွင︀်ႈတ︀ြႃးꩬ︀ူၸ︀ူႛꩡ︀ဝ်ႛꩫ︀ႆ︀ၢႈꩫ︀မ︀်။ လ︀ုက︀်ႉၵ︀ၢမ︀်းꩫ︀ၵ︀ႃ ꩡ︀ိုဝ်ႈဢ︀ꩫ︀်ႈꩬ︀ူထီင︀်က︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛလ︀ႅမ︀်းက︀ီး တ︀င︀်းပ︀ိူင︀်ႈတ︀ြႃးꩬ︀ူၸ︀ူႛꩡ︀ဝ်ႛꩫ︀ၢႆ︀းꩬ︀ိုင︀်ꩬ︀ႅင︀်ꩫ︀ႆ︀ႇꩬ︀ီ ꩬ︀ူၸ︀ူႛꩡ︀ဝ်ႛꩬ︀ိုင︀် ပ︀ႅတ︀်ႉတ︀ြႃးတ︀ႃႉ။ က︀ဝ်ႈꩵ︀ႈတ︀တ︀်ယ︀ဝ်ႇ” ꩫ︀ဝႃႈꩬ︀ီ 16က︀ျူးꩫ︀ႆ︀ႇၵ︀ဝ်မ︀ႆ︀ႛ လ︀ုက︀်ႉပ︀ၢင︀်ႈတ︀ြႃးမ︀ႆ︀ႛꩭႂ်ႛဢ︀ွက︀်က︀ႃဢ︀ူ။ 17ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ ၸ︀ူႛင︀မ︀်းꩡ︀ွင︀်းꩬ︀ွꩫ︀်တ︀ြႃးꩬ︀ေႃတ︀ီꩫ︀်မ︀ႆ︀ႛꩬ︀ႅဝ်ႛꩬ︀ီ က︀ꩫ︀်ႛꩫ︀ႃႛပ︀ၢင︀်ႈတ︀ြႃးမ︀ႆ︀ႛတ︀ုက︀်ႉဢ︀ူ။ ꩫ︀ႆ︀ႇꩫ︀က︀ေႃႇ က︀ႃလ︀ျုင︀်ယ︀ႃႇ ၵ︀ဝ်မ︀ႆ︀ႛမ︀ိတ︀်ႉလ︀ိူင︀်ႈꩫ︀ၢႆ︀ႈက︀ေႃႇ ꩵ︀ႈꩡ︀ၢပ︀်ႉ၊ ꩵ︀ႈꩡ︀ၢႆ︀။
လ︀ွင︀်ႈပ︀ေႃလ︀ု ပ︀ွက︀်ႉက︀ႃဝီင︀်းဢ︀ꩫ︀်တ︀ိဢ︀ုက︀်
18ပ︀ေႃလ︀ုယ︀ႃႇ တ︀င︀်းၸ︀ူႛယ︀ုမ︀်ယ︀မ︀်ႈဝီင︀်းက︀ေႃးရ︀ီꩫ︀်တ︀ုꩫ︀ႆ︀ႇၵ︀ဝ် လ︀ႆ︀ၢဝꩫ︀်းဢ︀ူယ︀ဝ်ႇက︀ီး တ︀င︀်းပ︀ီတ︀်က︀ိလ︀ꩫ︀ၵ︀ႃဢ︀ႃက︀ုလ︀ၵ︀ဝ် ၵ︀ီꩬ︀ၢင︀်ႈၸ︀ူဝ်းꩬ︀ီက︀ႃမ︀ိူင︀်းꩬ︀ီရ︀ီယ︀ႃးဢ︀ူ။ မ︀ိူဝ်ႈလ︀ုက︀်ႉဝီင︀်းက︀ီꩫ︀်ၵ︀ျေမ︀ႆ︀ႛ ꩵ︀ႈပ︀ႆ︀ဢ︀ွက︀်ꩫ︀ႆ︀ႇ ꩫ︀င︀်မ︀ꩫ︀်းꩡ︀ဝ်ႛ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛဝႆ︀ႇꩬ︀ႅတ︀်ႉꩡ︀ႃမ︀ႃးꩫ︀ႆ︀ႇꩫ︀က︀ꩫ︀်ႈ ထႃꩭူဝ်ဢ︀ူ။ 19ဝီင︀်းဢ︀ေၸ︀ႅတ︀်မ︀ႆ︀ႛထိုင︀်က︀ီး ပ︀ေႃလ︀ုယ︀ႃႇ ပ︀ီတ︀်က︀ိလ︀ꩫ︀ၵ︀ႃဢ︀ႃက︀ုလ︀မ︀ႆ︀ႛ ဝီင︀်းမ︀ႆ︀ႛꩭႂ်ႛဢ︀ူင︀ႆ︀း မ︀ꩫ︀်းၸ︀ူႛꩡ︀ဝ်ႛယ︀ႃႇ ꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛၵ︀ဝ်ႛꩬ︀ီ တ︀င︀်းက︀ျူးꩫ︀ႆ︀ႇၵ︀ဝ် မ︀ူꩫ︀်ႈတ︀ြႃးက︀ꩫ︀်ႈဢ︀ူ။ 20က︀ူꩫ︀်းꩫ︀ႆ︀ႇၵ︀ဝ်ယ︀ႃႇ မ︀ꩫ︀်းမ︀ႆ︀ႛတ︀င︀်းၵ︀ဝ်ꩭႂ်ႛပ︀ူဝ်းဢ︀ူꩭိုင︀်ꩫ︀ႆ︀ႇ ဝွꩫ︀်းၵ︀ႅꩫ︀်းꩫ︀က︀ေႃႇ ပ︀ေႃလ︀ုယ︀ႃႇꩵ︀ႈꩬ︀ူႛ။ 21“ၸ︀ြႃးပ︀ီꩫ︀်ႈꩡ︀ဝ်ႛဢ︀လ︀ၢင︀်းယ︀င︀်းက︀ီး က︀ဝ်ႈပ︀ွက︀်ႉမ︀ႃးက︀ွတ︀်” ꩫ︀ယ︀ဝ်ႇက︀ီး လ︀ုက︀်ႉဝီင︀်းဢ︀ေၸ︀ႅတ︀်မ︀ႆ︀ႛ ၵ︀ီꩬ︀ၢင︀်ႈၸ︀ူဝ်းက︀ႃဢ︀ူ။
22ပ︀ေႃလ︀ု ဝီင︀်းက︀ႄတ︀ရ︀ိမ︀ႆ︀ႛထိုင︀်က︀ီး လ︀ုက︀်ႉꩬ︀ၢင︀်ႈၸ︀ူဝ်းမ︀ႆ︀ႛလ︀ူင︀်းင︀ႆ︀း ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ႃꩬ︀ီ ꩡ︀ိူဝ်းꩡ︀ဝ်ႛမ︀ႆ︀ႛက︀ႃꩭꩫ︀်ဢ︀ူ။ ယ︀ဝ်ႇက︀ီး က︀ႃဝီင︀်းဢ︀ꩫ︀်တ︀ိဢ︀ုက︀်ဢ︀ူ။ 23ဝီင︀်းဢ︀မ︀ႂ်းမ︀ႆ︀ႛ ဢ︀ၢꩫ︀်တ︀ၢꩫ︀်ဢ︀ူယ︀ဝ်ႇက︀ီး မ︀ိူင︀်းက︀လ︀ႃတ︀ိꩫ︀ၵ︀ႃ မ︀ိူင︀်းၸ︀ျုက︀ိမ︀ႆ︀ႛက︀ၢပ︀်က︀ႃꩬ︀ီ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ꩬ︀ႂ်ꩭႅင︀်းဢ︀ဝ်ႈၵ︀ိူင︀်ꩭႂ်ႛဢ︀ူ။
လ︀ွင︀်ႈဢ︀ႃပ︀ေႃလ︀ု ဝီင︀်းဢ︀ေၸ︀ႅတ︀်ꩫ︀ၵ︀ႃဝီင︀်းက︀ေႃရ︀ီꩫ︀်တ︀ုမ︀ႆ︀ႛ ꩭူဝ်းၵ︀ၢဝ်ႈၵ︀ၢမ︀်းꩫ︀ီႈ
24မ︀ိူဝ်ႈဢ︀မ︀ႂ်း ဢ︀ႃပ︀ေႃလ︀ုꩫ︀ꩫ︀ႆ︀ႇက︀ျူး က︀ူꩫ︀်းဝီင︀်းဢ︀ႃလ︀ေꩡ︀ꩫ︀်တ︀ြိယ︀က︀ူဝ်ႇလ︀ိူင︀်ႈ ဝီင︀်းဢ︀ေၸ︀ႅတ︀်မ︀ႆ︀ႛထိုင︀်မ︀ႃးဢ︀ူ။ မ︀ꩫ︀်းယ︀ႃႇꩭူဝ်းꩡ︀ၢင︀်ႈတ︀ၢꩫ︀်ႛꩡ︀ၢင︀်ႈꩬ︀ီ က︀ျမ︀်းလ︀ိက︀်ႉက︀ေႃႇ ꩡ︀ၢင︀်ႈလ︀ူင︀်ꩫ︀မ︀်။ 25လ︀ွင︀်ႈꩡ︀ဝ်ႛယ︀ေꩬ︀ုက︀ေႃႇ ꩬ︀ွꩫ︀်ဝႆ︀ႇက︀ုမ︀်ꩰမ︀ႃးဢ︀ူ။ မ︀ꩫ︀်းယ︀ႃႇလ︀ွင︀်ႈꩡ︀ဝ်ႛယ︀ေꩬ︀ု တ︀င︀်းꩡ︀ႂ်ႈတ︀င︀်းၵ︀ူဝ်း ꩬ︀ိုဝ်ႈꩰထက︀်ꩰꩭူဝ်းꩭႂ်ႛ ꩬ︀ွꩫ︀်ꩭႂ်ႛဢ︀ူ။ ꩫ︀ႆ︀ႇꩫ︀က︀ေႃႇမ︀ꩫ︀်းယ︀ႃႇ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇ ဢ︀ꩫ︀်ႈꩬ︀ြႃယ︀ေႃးꩭၢꩫ︀်ꩫ︀ၢႆ︀ႈꩫ︀မ︀်တ︀ွင︀်းꩫ︀ႆ︀ႇ။ 26မ︀ꩫ︀်းယ︀ႃႇ ꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛ ꩭတ︀်ꩰꩭၢꩫ︀်ꩰꩭူဝ်းဢ︀ူ။ ပ︀ီတ︀်က︀ိလ︀ꩫ︀ၵ︀ႃဢ︀ႃက︀ုလ︀ယ︀ႃႇ ဢ︀ꩫ︀်ႈမ︀ꩫ︀်းꩭူဝ်းꩫ︀ႆ︀ႇꩫ︀ႆ︀ႛꩥ︀ိꩫ︀်းက︀ီး မ︀ꩫ︀်းမ︀ႆ︀ႛꩭွင︀်ႇꩬ︀ီ ꩭိူꩫ︀်းမ︀ႆ︀ႛလ︀ွင︀်ႈၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈꩡ︀ုꩫ︀်ႈꩰဢ︀ဝ်ႈထက︀်ꩰꩬ︀ီ ꩬ︀ွꩫ︀်ဢ︀ိက︀်ꩭႂ်ႛꩫ︀ီႈꩫ︀ီႈ ဢ︀ူ။ 27ဢ︀ႃပ︀ေႃလ︀ု မ︀ိူင︀်းဢ︀ႃၵ︀ႃယ︀မ︀ႆ︀ႛၵ︀ႂ်ႈက︀ႃꩫ︀ႆ︀ႇꩬ︀ီ ၸ︀ူႛယ︀ုမ︀်ယ︀မ︀်ႈဝီင︀်းဢ︀ေၸ︀ႅတ︀်ꩫ︀ႆ︀ႇၵ︀ဝ်ယ︀ႃႇ ꩭႂ်ႛပ︀ူဝ်းမ︀ꩫ︀်းမ︀ႆ︀ႛ ၸ︀ူႛယ︀ုမ︀်ယ︀မ︀်ႈမ︀ိူင︀်းဢ︀ႃၵ︀ႃယ︀ꩫ︀ႆ︀ႇၵ︀ဝ်ꩭၢပ︀်ႉꩫ︀ႆ︀ႇ ၵ︀ဝ်မ︀ႆ︀ႛ လ︀ိက︀်ႉက︀ၢပ︀်က︀ၢႆ︀ꩡ︀ႃႇမ︀ꩫ︀်း တ︀ႅမ︀်ႛꩭႂ်ႛဢ︀ူ။ မ︀ိူင︀်းဢ︀ႃၵ︀ႃယ︀မ︀ႆ︀ႛ မ︀ꩫ︀်းထိုင︀်က︀ႃက︀ီး က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭီတ︀်က︀ျေးꩡ︀ူးꩬ︀ီ ယ︀ုမ︀်ယ︀မ︀်ႈမ︀ႃးꩫ︀ႆ︀ႇၵ︀ဝ်မ︀ႆ︀ႛ ဢ︀ၢꩫ︀်တ︀ၢꩫ︀်ꩡ︀ွႆ︀ႈꩭႂ်ႛဢ︀ူ။ 28မ︀ꩫ︀်းယ︀ႃႇ ပ︀ၢင︀်ႈက︀ုမ︀်ႈလ︀ူင︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈတ︀ွꩫ︀်ႈက︀ျမ︀်းလ︀ိက︀်ႉꩫ︀ႆ︀ႇၵ︀ဝ် ꩡ︀ီႇꩬ︀ီ ꩡ︀ဝ်ႛမ︀ေꩬ︀ိယ︀ꩫ︀ꩫ︀ႆ︀ႇꩡ︀ဝ်ႛယ︀ေꩬ︀ုꩫ︀မ︀်ꩫ︀ꩬ︀ီ တ︀င︀်းက︀ျူးꩫ︀ႆ︀ႇၵ︀ဝ် ထီင︀်ၵ︀ၢမ︀်းက︀ꩫ︀်ႈဢ︀ူ။
Currently Selected:
ထဝ်ꩡ︀တ︀်ႉၵ︀ဝ် 18: kht
Highlight
Share
Copy

Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.