YouVersion Logo
Search Icon

ထဝ်ꩡ︀တ︀်ႉၵ︀ဝ် 13

13
လ︀ွင︀်ႈၿႃꩫ︀ၿꩫ︀ၵ︀ႃꩬ︀ေႃလ︀ုမ︀ႆ︀ႛꩡ︀ိူဝ်းꩡ︀ဝ်ႛပ︀ွႆ︀ꩡ︀ႂ်ႇ
1ꩡ︀ိူဝ်းꩡ︀ဝ်ႛဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛ ပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်၊ ꩬ︀ြႃꩫ︀ႆ︀ႇၵ︀ဝ်ယ︀င︀်းဢ︀ူ။ ၵ︀ဝ်ယ︀ႃႇ ၿႃꩫ︀ၿ၊ ꩬ︀ုမ︀ွင︀်ဢ︀ꩫ︀်ႈꩭွင︀်ႇꩫ︀ိက︀ႃ၊ လ︀ုက︀ိက︀ူꩫ︀်းမ︀ိူင︀်းက︀ုရ︀ေꩫ︀ေ၊ မ︀ႃႈꩫ︀ီꩫ︀် ၸ︀ူႛတ︀ႆ︀းက︀ူဝ်ႇက︀ဝ် ꩡ︀ဝ်ႛၸ︀ႃႇꩭေရ︀ုတ︀်ဢ︀ꩫ︀်တ︀ိပ︀င︀ႆ︀း ꩬ︀ေႃလ︀ုၵ︀ဝ်ꩫ︀မ︀်။ 2မ︀ိူဝ်ႈၵ︀ဝ် ဝႆ︀ႈၸ︀ြႃးပ︀ီꩫ︀်ႈꩡ︀ဝ်ႛင︀ႆ︀း ꩭႅတ︀်ႉတ︀ွင︀်ႇင︀ႆ︀း ယ︀ွꩫ︀်းꩬ︀ူးꩬ︀ီဢ︀ူꩫ︀ႆ︀ႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ “ꩬ︀ေႃလ︀ုꩫ︀ၵ︀ႃၿႃꩫ︀ၿၵ︀ဝ်မ︀ႆ︀ႛ ꩡ︀ႃႇꩭၢင︀်းꩭီတ︀်ဢ︀မ︀ူးက︀ဝ်ႈ က︀ွႆ︀းက︀ွႆ︀းလ︀ိူက︀်ႉမ︀ႆ︀ၢဝႆ︀ႇတ︀ႃႉ” ꩫ︀ꩬ︀ီဝႃႈဢ︀ူ။ 3ၵ︀ဝ်က︀ေႃႇ ꩭႅတ︀်ႉတ︀ွင︀်ႇꩬ︀ီ ယ︀ွꩫ︀်းꩬ︀ူးပ︀ွက︀်ႉယ︀ဝ်ႇက︀ီး ၿႃꩫ︀ၿꩫ︀ၵ︀ႃꩬ︀ေႃလ︀ုၵ︀ဝ်မ︀ႆ︀ႛ မ︀ိုဝ်းတ︀ၢင︀်ꩭႂ်ႛဢ︀ူ။ ယ︀ဝ်ႇက︀ီးꩬ︀ွင︀်ၵ︀ႃမ︀ႆ︀ႛ ပ︀ွႆ︀ꩡ︀ႂ်ႇꩭႂ်ႛက︀ႃꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛဢ︀ူ။
လ︀ွင︀်ႈင︀ွꩫ︀်ႈက︀ုပ︀ရ︀ုမ︀ႆ︀ႛꩭီတ︀်ꩬ︀ႃꩬ︀ꩫ︀ႃ
4ၿႃꩫ︀ၿꩫ︀ၵ︀ႃꩬ︀ေႃလ︀ုက︀ေႃႇ ဢ︀ꩫ︀်ႈꩫ︀င︀်ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩫ︀ေꩭႂ်ႛꩫ︀ႆ︀ႇꩫ︀က︀ꩫ︀်ႈ ဝီင︀်းတ︀ေလ︀ုက︀ိမ︀ႆ︀ႛက︀ႃဢ︀ူ။ လ︀ုက︀်ႉဝီင︀်းဢ︀မ︀ႂ်းမ︀ႆ︀ႛ ၵ︀ီꩬ︀ၢင︀်ႈၸ︀ူဝ်းꩬ︀ီ က︀ႃင︀ွꩫ︀်ႈက︀ုပ︀ရ︀ုဢ︀ူ။ 5ၵ︀ဝ်ယ︀ႃႇ ဝီင︀်းꩬ︀ျႃလ︀မ︀ိမ︀ႆ︀ႛထိုင︀်က︀ီး ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛ က︀ႃꩭူဝ်းၵ︀ၢဝ်ႈၵ︀မ︀်းꩫ︀ီႈဢ︀ူ။ ယ︀ေႃးꩭၢꩫ︀်မ︀ႃက︀ုယ︀ႃႇ ၵ︀ဝ်မ︀ႆ︀ႛက︀မ︀်ႇꩡ︀ွႆ︀ႈꩭႂ်ႛဢ︀ူ။
6ၵ︀ဝ်ယ︀ႃႇ င︀ွꩫ︀်ႈဢ︀မ︀ႂ်းမ︀ႆ︀ႛၸ︀ႃက︀ႃꩬ︀ီ ဢ︀ဝ်ႈထိုင︀်ဝီင︀်းပ︀ႃၸ︀ုၸ︀ႆ︀ၢႛက︀ႃဢ︀ူ။ ဝီင︀်းဢ︀မ︀ႂ်းမ︀ႆ︀ႛ ၿႃယ︀ေꩬ︀ုꩫ︀ꩫ︀ႆ︀ႇ က︀ျူး ꩡ︀ဝ်ႛမ︀ူဝ်ၸ︀ီက︀ူဝ်ႇလ︀ိူင︀်ႈမ︀ႆ︀ႛꩭꩫ︀်ဢ︀ူ။ 7မ︀ꩫ︀်းယ︀ႃႇ ၸ︀ူႛတ︀ႆ︀းက︀ူဝ်ႇ ꩡ︀ဝ်ႛက︀ႅမ︀်ႈမ︀ိူင︀်း တ︀ေရ︀က︀ိပ︀ေႃလ︀ုꩫ︀မ︀်။ ꩡ︀ဝ်ႛက︀ႅမ︀်ႈမ︀ိူင︀်းဢ︀မ︀ႂ်းယ︀ႃႇ က︀ူꩫ︀်းဢ︀ꩫ︀်ႈပ︀ိင︀်ꩥ︀ႃꩬ︀တ︀ိယ︀င︀်းꩫ︀မ︀်။ မ︀ꩫ︀်းယ︀ႃႇ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛၵ︀ႂ်ႈꩫ︀ႆ︀ႛꩥ︀ိꩫ︀်းꩬ︀ီ ၿႃꩫ︀ၿꩫ︀ၵ︀ႃ ꩬ︀ေႃလ︀ုမ︀ႆ︀ႛပ︀ၢင︀်းဢ︀ူ။ 8ꩫ︀ႆ︀ႇꩫ︀က︀ေႃႇ ꩡ︀ဝ်ႛမ︀ူဝ်ၸ︀ီ ဢ︀ꩫ︀်ႈဢ︀ဝ်ႈၵ︀ၢမ︀်းက︀ရ︀ိက︀်ꩭွင︀်ႇဝႃႈ ဢ︀ေလ︀ုမ︀ꩫ︀ꩫ︀ႆ︀ႇ ယ︀ႃႇ ဢ︀ꩫ︀်ႈꩬ︀ေႃလ︀ုၵ︀ဝ်ဝႃႈမ︀ႆ︀ႛ ꩭႂ်ႛပ︀ူဝ်းꩡ︀ဝ်ႛက︀ႅမ︀်ႈမ︀ိူင︀်းမ︀ဝ်ယ︀ုမ︀်ယ︀မ︀်ႈꩫ︀ႆ︀ႇ ꩬ︀ွင︀်ၵ︀ႃမ︀ႆ︀ႛ ဢ︀ဝ်ႈပ︀ိင︀်ꩥ︀ႃမ︀ꩫ︀်းၵ︀ီင︀်ဢ︀ူ။ 9ꩫ︀ႆ︀ႇမ︀ႆ︀ႛ ꩬ︀ေႃလ︀ုဢ︀ꩫ︀်ႈꩭွင︀်ႇဝႃႈပ︀ေႃလ︀ုယ︀ႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛတ︀ီမ︀်ႈင︀ႆ︀းꩬ︀ီ ꩡ︀ဝ်ႛမ︀ူဝ်ၸ︀ီမ︀ႆ︀ႛက︀ိုဝ်ႈꩫ︀ူႈꩬ︀ီဝႃႈꩫ︀ႆ︀ႇ 10-11“ꩭိူဝ်း ၸ︀ူႛလ︀ုက︀်ႉၵ︀ုꩫ︀်ꩬ︀ူင︀် ဢ︀ꩫ︀်ႈၸ︀ႅတ︀်ႉၸ︀ၢင︀်းပ︀ိူꩫ︀်ႈလ︀ေ လ︀ꩫ︀်ꩬ︀ူဢ︀ꩫ︀်ႈၸ︀ႅက︀်ႉတ︀ၢင︀်းꩫ︀ီႈက︀ူႈလ︀ွင︀်ႈꩴ︀း မ︀ႂ်းယ︀ႃႇမ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ တ︀ြႃးၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩬ︀ိုဝ်ႈꩫ︀ꩫ︀်ႈမ︀ႆ︀ႛ ဢ︀ဝ်ႈလ︀ိက︀်ဢ︀ဝ်ႈင︀ွက︀်ဢ︀ူ။ င︀ႆ︀ႚတ︀ေႇတ︀ေႇမ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ုက︀်ႉꩬ︀ီ တ︀ႃႈမ︀ႂ်းတ︀ီမ︀ွတ︀်ꩬ︀ႃး။ တ︀ိူက︀်ႉꩡ︀ူဝ်ႈလ︀ိူင︀်ႈယ︀ႃႇ မ︀ႂ်းက︀ၢင︀်ႈဝꩫ︀်းမ︀ႆ︀ႛ တ︀ီမ︀ဝ်ꩫ︀ႆ︀ႛꩭꩫ︀်ꩬ︀ႃး” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛꩡ︀ဝ်ႛမ︀ူဝ်ၸ︀ီꩫ︀ႆ︀ႇ ၵ︀တ︀်ႉၵ︀ႅင︀်းတ︀ႃႈမ︀ꩫ︀်း ꩫ︀မ︀်ႈꩬ︀ိင︀်တ︀ိက︀်ႉꩰမ︀ႃးꩬ︀ီ က︀ူꩫ︀်းဢ︀ꩫ︀်ႈမ︀ꩫ︀်းမ︀ႆ︀ႛ တ︀ီꩡ︀ုင︀်ႈမ︀ိုဝ်းꩭႂ်ႛမ︀ႆ︀ႛၵ︀ႃလ︀ေဢ︀ူ။ 12ꩡ︀ဝ်ႛက︀ႅမ︀်ႈမ︀ိူင︀်းယ︀ႃႇ ဢ︀မ︀ႂ်းမ︀ႆ︀ႛꩭꩫ︀်က︀ီး ယ︀ုမ︀်ယ︀မ︀်ႈမ︀ႃးꩬ︀ီ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩫ︀ႆ︀ႛꩥ︀ိꩫ︀်းက︀ီး ဢ︀ၢမ︀်းတ︀ႆ︀ၢႈꩰဢ︀ူ။
လ︀ွင︀်ႈ ဝီင︀်းပ︀ိတ︀ိၻိ မ︀ိူင︀်းဢ︀ꩫ︀်တ︀ိဢ︀ုက︀်မ︀ႆ︀ႛ ꩭူဝ်းၵ︀ၢဝ်ႈၵ︀ၢမ︀်းꩫ︀ီႈ
13ပ︀ေႃလ︀ုင︀ႆ︀း ၸ︀ူႛလ︀ွေႛမ︀ꩫ︀်းꩫ︀ႆ︀ႇၵ︀ဝ်ယ︀ႃႇ လ︀ုက︀်ႉဝီင︀်းပ︀ႃၸ︀ုမ︀ႆ︀ႛ ၵ︀ီꩬ︀ၢင︀်ႈၸ︀ူဝ်းꩬ︀ီ မ︀ိူင︀်းပ︀မ︀်ၸ︀ုလ︀ိ ဝီင︀်းပ︀ေရ︀က︀ေမ︀ႆ︀ႛထိုင︀်က︀ႃဢ︀ူ။ မ︀ိူဝ်ႈဢ︀မ︀ႂ်း ယ︀ေႃးꩭၢꩫ︀်မ︀ႃက︀ုယ︀ႃႇ လ︀ုက︀်ႉၵ︀ဝ်မ︀ႆ︀ႛၸ︀ၢက︀်ႉꩬ︀ီ မ︀ိူဝ်းဝီင︀်းယ︀ေရ︀ုꩬ︀လ︀ိမ︀်ဢ︀ူ။ 14ပ︀ေႃလ︀ုၵ︀ဝ်လ︀ုက︀်ႉဝီင︀်းပ︀ေရ︀က︀ေမ︀ႆ︀ႛဢ︀ွက︀်က︀ႃꩬ︀ီ မ︀ိူင︀်းပ︀ိတ︀ိၻိ ဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛ ထိုင︀်က︀ီး ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ က︀ႃꩫ︀င︀်ႈꩡ︀ွင︀်းꩬ︀ွꩫ︀်တ︀ြႃးဢ︀ူ။ 15က︀ျမ︀်းꩬ︀ိꩫ︀်မ︀ေႃꩬ︀ေꩫ︀ၵ︀ႃ က︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်ဢ︀ၢꩫ︀်ယ︀ဝ်ႇက︀ီး ၸ︀ူႛမ︀ိုင︀်ႇꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်ယ︀ႃႇ ၸ︀ူႛꩡ︀ႂ်ႇပ︀ွႆ︀ꩬ︀ီ “ပ︀ီႈꩫ︀ွင︀်ႇၵ︀ဝ်ꩴ︀း ၵ︀ၢမ︀်းဢ︀ꩫ︀်ႈၵ︀ႂ်ႈꩬ︀င︀်ꩬ︀ွꩫ︀်ယ︀င︀်းက︀ီး ꩬ︀င︀်ꩬ︀ွꩫ︀်ꩭႂ်ႛမ︀ႃးတ︀ႃႉ” ꩫ︀ꩬ︀ီပ︀ေႃလ︀ုၵ︀ဝ်မ︀ႆ︀ႛဝႃႈဢ︀ူ။
16ပ︀ေႃလ︀ုယ︀ႃႇလ︀ုက︀်ႉတ︀ီႈꩫ︀င︀်ႈမ︀ႆ︀ႛလ︀ုက︀်ႉꩬ︀ီ ၵ︀ဝ်မ︀ႆ︀ႛမ︀ိုဝ်းယ︀ူက︀်ႉပ︀ျႃးင︀ႆ︀း “ပ︀ူဝ်မ︀ေပ︀ီႈꩫ︀ွင︀်ႇဢ︀ီတ︀်ꩬ︀ြေးၵ︀ဝ်တ︀မ︀ိူင︀်း၊ ပ︀ူဝ်မ︀ေပ︀ီႈꩫ︀ွင︀်ႇဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈပ︀ႆ︀ၢႛဝႆ︀ႈၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်တ︀မ︀ိူင︀်း ထွမ︀်က︀ꩫ︀်ႈတ︀ီၵ︀ႃႛမ︀ႃးတ︀ႃႉ။ 17ၸ︀ြႃးပ︀ီꩫ︀်ႈꩡ︀ဝ်ႛၸ︀ꩫ︀်းဢ︀ီတ︀်ꩬ︀ြေးꩭဝ်းယ︀ႃႇ ပ︀ူလ︀ီꩫ︀်ꩭဝ်းၵ︀ဝ်မ︀ႆ︀ႛလ︀ိူက︀်ႉဝႆ︀ႇꩬ︀ီ မ︀ိူဝ်ႈၵ︀ဝ်မ︀ိူင︀်းဢ︀ီက︀ျီပ︀်မ︀ႆ︀ႛ ꩭီတ︀်ပ︀ီႈꩫ︀ွင︀်ႇꩬ︀ီ ꩬ︀ွꩫ︀်ႈဢ︀ူꩫ︀ႆ︀ႇ ၵ︀ဝ်မ︀ႆ︀ႛဢ︀ဝ်ႈပ︀ီꩫ︀်ႈၸ︀ꩫ︀်းက︀ူꩫ︀်းယ︀ႂ်မ︀ႃးဢ︀ူ။ ယ︀ဝ်ႇက︀ီးမ︀ꩫ︀်းꩡ︀ဝ်ႛ ၵ︀ဝ်မ︀ႆ︀ႛလ︀ုက︀်ႉမ︀ိူင︀်းဢ︀ီက︀ျီပ︀်မ︀ႆ︀ႛ ဢ︀ဝ်ႈတ︀ꩫ︀်းၵ︀ူဝ်းလ︀ူင︀်ꩭွင︀်ႇဢ︀ွက︀်မ︀ႃးဢ︀ူ။ 18ꩡ︀ူဝ်ႈတ︀ၢင︀်းထိူꩫ︀်ꩭႅင︀်ႛမ︀ႆ︀ႛက︀ေႃႇ ꩬ︀ီꩬ︀ိပ︀်ပ︀ီႈတ︀ၢင︀်ႈꩰၵ︀ဝ်မ︀ႆ︀ႛꩬ︀ေးၵ︀ၢမ︀်မ︀ႃးဢ︀ူ။ 19ၸ︀ꩫ︀်းက︀ူꩫ︀်းမ︀ိူင︀်းၵ︀ႃꩫ︀ၢꩫ︀် ꩡ︀ီတ︀်ၸ︀ꩫ︀်းမ︀ႆ︀ႛ မ︀ꩫ︀်းꩡ︀ဝ်ႛဢ︀ဝ်ႈလ︀ူႇပ︀ႅက︀်ႉꩬ︀ီ က︀ူꩫ︀်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈပ︀ီꩫ︀်ႈꩡ︀ဝ်ႛမ︀ိူင︀်းၵ︀ႃꩫ︀ၢꩫ︀်မ︀ႃးဢ︀ူ။ 20ဢ︀ဝ်ႈထိုင︀်မ︀ိူဝ်ႈဢ︀မ︀ႂ်းꩫ︀ႆ︀ႇ ꩬ︀ီပ︀ၢက︀်ꩭႃႛꩬ︀ိပ︀်ပ︀ီႈတ︀ၢင︀်ႈꩰꩭိုင︀်မ︀ႃးဢ︀ူ။ က︀ꩫ︀်ႛလ︀င︀်ဢ︀မ︀ႂ်း က︀ႃႈပ︀ရ︀ေႃးၸ︀ႅတ︀်ႉꩬ︀မ︀ွေလ︀မ︀ဝ်ပ︀ူဝ်မ︀ႃးယ︀ႃႇ ၵ︀ဝ်မ︀ႆ︀ႛꩡ︀ဝ်ႛတ︀ြႃးꩫ︀ႆ︀ႇၵ︀ဝ် ဢ︀ဝ်ႈပ︀ူဝ်ꩭႂ်ႛမ︀ႃးဢ︀ူ။ 21က︀ꩫ︀်ႛလ︀င︀်ဢ︀မ︀ႂ်း ၵ︀ဝ်ယ︀ွꩫ︀်းꩡ︀ဝ်ႛꩭူဝ်ၵ︀မ︀်းက︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ေႃလ︀ုၸ︀ူႛလ︀ုက︀်ႉက︀ိꩬ︀ျၸ︀ꩫ︀်းၿိင︀်ယ︀ႃမ︀ိင︀်မ︀ႆ︀ႛ တ︀ၢင︀်ꩭူဝ်ၵ︀မ︀်းꩭႂ်ႛဢ︀ူ။ ꩬ︀ေႃလ︀ုက︀ေႃႇꩬ︀ီꩬ︀ိပ︀်ပ︀ီႈတ︀ၢင︀်ႈꩰဢ︀ုပ︀်ႉပ︀ိုင︀်မ︀ႃးဢ︀ူ။ 22ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ဝ်ႛꩭူဝ်ၵ︀မ︀်းꩬ︀ေႃလ︀ုမ︀ႆ︀ႛ ဢ︀ဝ်ႈလ︀ူင︀်းယ︀ဝ်ႇက︀ီး ၻႃဝိမ︀ႆ︀ႛတ︀ၢင︀်ꩭူဝ်ၵ︀မ︀်းဝႆ︀ႇဢ︀ူ။ “ၻႃဝိၸ︀ူႛလ︀ုက︀်ႉယ︀ေꩬ︀ႄးယ︀ႃႇ က︀ူဝ်ႇဢ︀ꩫ︀်ႈက︀ဝ်ႈꩥ︀ႃးꩡ︀ႂ်ႈ က︀ူဝ်ႇဢ︀ꩫ︀်ႈတ︀ီꩭီတ︀် ꩡ︀ွမ︀်းꩡ︀ႂ်ႈက︀ဝ်ႈꩫ︀မ︀်ꩫ︀ꩫ︀ႆ︀ႇ က︀ဝ်ႈꩭꩫ︀်ယ︀ဝ်ႇ” ꩫ︀ꩬ︀ီၸ︀ြႃးပ︀ီꩫ︀်ႈꩡ︀ဝ်ႛ လ︀ွင︀်ႈၻႃဝိဝႃႈဝႆ︀ႇဢ︀ူ။
23ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩫ︀င︀်မ︀ꩫ︀်းꩡ︀ဝ်ႛက︀တ︀ိꩭႂ်ႛဝႆ︀ႇꩫ︀က︀ꩫ︀်ႈ လ︀ုက︀်ႉၵ︀ိူဝ်းꩡ︀ဝ်ႛꩭူဝ်ၵ︀မ︀်းၻႃဝိမ︀ႆ︀ႛꩬ︀ိုင︀် ꩡ︀ဝ်ႛၵ︀ေꩬ︀ေ ꩡ︀ႃႇၵ︀ိူဝ်းဢ︀ီတ︀်ꩬ︀ြေးၵ︀ဝ် ဢ︀ဝ်ႈဢ︀ွက︀်ꩭႂ်ႛမ︀ႃးꩫ︀မ︀်။ က︀ူဝ်ႇဢ︀မ︀ႂ်းယ︀ႃႇ ꩡ︀ဝ်ႛယ︀ေꩬ︀ုꩫ︀မ︀်။ 24မ︀ိူဝ်ႈꩡ︀ဝ်ႛယ︀ေꩬ︀ု ꩵ︀ႈပ︀ႆ︀က︀ူဝ်ꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇ ꩬ︀ြႃယ︀ေႃးꩭၢꩫ︀်ယ︀ႃႇ က︀ူꩫ︀်းꩫ︀ႆ︀ႇၵ︀ဝ် ꩭႂ်ႛပ︀ူဝ်းလ︀ုက︀်ႉဢ︀ပ︀ႅတ︀်ႉမ︀ႆ︀ႛꩬ︀ၢင︀်ဝွေꩬ︀ီ ꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩫ︀ႆ︀ႇ ဢ︀ီတ︀်ꩬ︀ြေး တ︀င︀်းမ︀ိူင︀်းမ︀ႆ︀ႛꩭူဝ်းမ︀ႃးဢ︀ူ။ 25မ︀ိူဝ်ႈꩬ︀ြႃယ︀ေႃးꩭၢꩫ︀်ꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛတ︀ီယ︀ဝ်ႇꩫ︀ႆ︀ႇ မ︀ꩫ︀်းယ︀ႃႇက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ “ꩬ︀ူက︀ဝ်ႈမ︀ႆ︀ႛၵ︀ꩫ︀်တ︀ႂ်းၸ︀ႂ်ꩫ︀ႆ︀၊ ၵ︀ꩫ︀်တ︀ႂ်းꩡ︀ဝ်ႛမ︀ေꩬ︀ိယ︀ဢ︀ꩫ︀်ႈꩬ︀ူတ︀ႂ်းꩫ︀ႆ︀ႇက︀ျႃး။ ꩵ︀ႈꩡ︀ႂ်ႈ၊ မ︀ꩫ︀်းꩡ︀ဝ်ႛယ︀ႃႇက︀ꩫ︀်ႛလ︀င︀်က︀ဝ်ႈမ︀ႆ︀ႛꩫ︀မ︀်တ︀ီမ︀ႃးꩫ︀ႆ︀ႇ၊ က︀ဝ်ႈယ︀ႃႇက︀ူမ︀်ႛꩬ︀ီ ꩬ︀ႆ︀ၢၵ︀ႅပ︀်တ︀ိꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀ီက︀ေႛလ︀ွꩫ︀်ႛꩭႂ်ႛꩫ︀ႆ︀ၢႈက︀ေႃႇꩵ︀ႈထႅက︀်ႉ။
26ပ︀ူဝ်မ︀ေပ︀ီႈꩫ︀ွင︀်ႇဢ︀ီတ︀်ꩬ︀ြေး ဢ︀ꩫ︀်ႈၸ︀ူႛပ︀ီꩫ︀်ႈၵ︀ိူဝ်းဢ︀ႃပ︀ြႃꩭၢမ︀်ꩫ︀ႆ︀ႇၵ︀ဝ်င︀ႆ︀း ပ︀ီႈꩫ︀ွင︀်ႇဢ︀ꩫ︀်ႈက︀ျူးမ︀ဝ်ꩡ︀ႂ်ႈ ၸ︀ူႛက︀ူဝ်ႈယ︀မ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ဝ်တ︀င︀်းမ︀ိူင︀်း ထွမ︀်က︀ꩫ︀်ႈတ︀ီၵ︀ႃႛမ︀ႃးတ︀ႃႉ။ ၵ︀ၢဝ်ႈၵ︀ၢမ︀်းလ︀ွင︀်ႈက︀ေႛၵ︀ျွတ︀်ႉꩫ︀ႆ︀ႇယ︀ႃႇ ꩡ︀ႃႇꩭၢင︀်းꩭဝ်းꩫ︀မ︀် ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛမ︀ႃးꩫ︀ႆ︀ႇ။ 27က︀ူꩫ︀်းဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇၵ︀ဝ်င︀ႆ︀း ꩭူဝ်က︀ေၵ︀ဝ်ꩫ︀ႆ︀ႇၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ꩡ︀ဝ်ႛၵ︀ေꩬ︀ေꩫ︀ꩫ︀ႆ︀ႇꩵ︀ႈတ︀ွင︀်း။ ၵ︀ၢမ︀်းပ︀ရ︀ေႃးၸ︀ႅတ︀်ႉဢ︀ꩫ︀်ႈꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛ ဝꩫ︀်းက︀မ︀်ႈꩬ︀ိꩫ︀် က︀ူႈဝꩫ︀်းမ︀ႆ︀ႛ ၵ︀ဝ်ဢ︀ၢꩫ︀်မ︀ႃးꩫ︀ႆ︀ႇက︀ေႃႇ ၵ︀ဝ်ꩵ︀ႈပ︀ွင︀်ꩡ︀ႂ်ႈ။ ꩫ︀ႆ︀ႇꩫ︀က︀ေႃႇꩡ︀ဝ်ႛယ︀ေꩬ︀ုမ︀ႆ︀ႛꩭႂ်ႛတ︀ၢမ︀်တ︀ႆ︀ၢႈꩬ︀ီ ၵ︀ၢမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်ꩭႂ်ႛပ︀ူဝ်း ပ︀ီꩫ︀်ႈမ︀ႃးတ︀ေႇတ︀ေႇꩫ︀ႆ︀ႇယ︀ႃႇ ၵ︀ဝ်ꩭီတ︀်မ︀ႃးယ︀ဝ်ႇ။ 28င︀ႆ︀းꩬ︀ီၵ︀ဝ်ယ︀ႃႇꩡ︀ဝ်ႛယ︀ေꩬ︀ုမ︀ႆ︀ႛ လ︀ွင︀်ႈဢ︀ꩫ︀်ႈတ︀ီꩭႂ်ႛတ︀ၢမ︀်တ︀ႆ︀ၢႈ ၵ︀ႃမ︀ဝ်ꩭꩫ︀်ꩫ︀က︀ေႃႇ ꩡ︀ဝ်ႛၵ︀ုꩫ︀်ပ︀ိလ︀ၢတ︀်မ︀ႆ︀ႛ ယ︀ွꩫ︀်းဢ︀ၵ︀ၢင︀်းꩬ︀ီ မ︀ꩫ︀်းꩡ︀ဝ်ႛမ︀ႆ︀ႛꩭႂ်ႛဢ︀ဝ်ႈတ︀ႆ︀ၢႈမ︀ႃးယ︀ဝ်ႇ။ 29ꩫ︀င︀်က︀ျမ︀်းလ︀ိက︀်ႉမ︀ႆ︀ႛ ဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈတ︀င︀်းမ︀ိူင︀်း ၵ︀ဝ်ꩭီတ︀်ယ︀ဝ်ႇက︀ီး ꩡ︀ဝ်ႛယ︀ေꩬ︀ုမ︀ႆ︀ႛ လ︀ုက︀်ႉက︀ꩫ︀်ႛꩫ︀ိူဝ်ꩬ︀ဝ်ဝႃးမ︀ိုဝ်းမ︀ႆ︀ႛ ဢ︀ဝ်ႈလ︀ူင︀်းꩬ︀ီ ထမ︀်ႛပ︀ႃꩡ︀ႃႇမ︀ႆ︀ႛꩬ︀ၢင︀်းၵ︀ိဝ်ဝႆ︀ႇယ︀ဝ်ႇ။ 30ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဢ︀ဝ်ႈꩫ︀ိပ︀်ပ︀ွက︀်ႉꩭႂ်ႛမ︀ႃးယ︀ဝ်ႇ။ 31ယ︀ဝ်ႇက︀ီး က︀ူꩫ︀်းဢ︀ꩫ︀်ႈလ︀ုက︀်ႉက︀ႃလ︀ိလ︀ႄးမ︀ႆ︀ႛ ဢ︀ဝ်ႈထိုင︀်ဝီင︀်းယ︀ေရ︀ုꩬ︀လ︀ိမ︀် တ︀င︀်းမ︀ꩫ︀်းꩡ︀ဝ်ႛ ꩭူမ︀်ႈပ︀ႆ︀ႈတ︀ၢင︀်းမ︀ႃးꩫ︀ႆ︀ႇၵ︀ဝ်မ︀ႆ︀ႛ က︀ီလ︀ႆ︀ၢဝꩫ︀်းပ︀ျႃးတ︀ူဝ်ႈꩭႂ်ႛဢ︀ူ။ ၵ︀ဝ်ယ︀ႃႇ င︀ႆ︀ႚဢ︀ီတ︀်ꩬ︀ြေးꩭဝ်းꩫ︀ႆ︀ႇၵ︀ဝ်မ︀ႆ︀ႛ ꩭီတ︀်ꩬ︀ၢက︀်ႉꩬ︀ေꩡ︀ဝ်ႛယ︀ေꩬ︀ုꩬ︀ီဢ︀ူဢ︀ူ။
32-33က︀ျမ︀်းꩬ︀ႃလ︀ၢံၵ︀ွက︀်ႉꩬ︀ွင︀်မ︀ႆ︀ႛ
“မ︀ႂ်းယ︀ႃႇလ︀ုက︀်ႉꩡ︀ႆ︀ၢးက︀ဝ်ႈꩫ︀မ︀်။
မ︀ိူဝ်ႈꩫ︀ႆ︀ႇတ︀ေႇတ︀ေႇ မ︀ႂ်းမ︀ႆ︀ႛဢ︀ဝ်ႈပ︀ီꩫ︀်ႈလ︀ုက︀်ႉက︀ဝ်ႈယ︀ဝ်ႇ”
ꩫ︀ꩬ︀ီဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛဢ︀ဝ်ႈꩫ︀ိပ︀်ပ︀ွက︀်ႉꩬ︀ီ က︀တ︀ိဢ︀ꩫ︀်ႈပ︀ူလ︀ီꩫ︀်ꩭဝ်းၵ︀ဝ်မ︀ႆ︀ႛꩭႂ်ႛဝႆ︀ႇꩫ︀ႆ︀ႇ ꩭဝ်းၸ︀ူႛပ︀ီꩫ︀်ႈလ︀ုက︀်ႉလ︀ၢꩫ︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈပ︀ီꩫ︀်ႈꩭႂ်ႛမ︀ႃးယ︀ဝ်ႇ။ တ︀ူႈယ︀ႃႇ ၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇ ꩬ︀ူꩡ︀ဝ်ႛမ︀ႆ︀ႛ ၵ︀ႆ︀ႈꩭႂ်ႛက︀ွတ︀်ꩫ︀ꩬ︀ီ ထိုင︀်မ︀ႃးꩫ︀မ︀်။ 34ယ︀ဝ်ႇက︀ီး လ︀ွင︀်ႈဢ︀ꩫ︀်ႈꩡ︀ဝ်ႛယ︀ေꩬ︀ုမ︀ႆ︀ႛ က︀ꩫ︀်ႛꩫ︀ႂ်းပ︀ႃꩡ︀ႃႇမ︀ႆ︀ႛ မ︀ဝ်ဢ︀ဝ်ႈꩫ︀ဝ်ႈꩬ︀ီ လ︀ုက︀်ႉက︀ꩫ︀်ႛꩫ︀ႂ်းပ︀ႃꩡ︀ႃႇမ︀ႆ︀ႛ တ︀ီဢ︀ဝ်ႈꩫ︀ိပ︀်ပ︀ွက︀်ႉꩫ︀ႆ︀ႇက︀ေႃႇ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇဢ︀ူ။
“က︀ျေးꩡ︀ူးတ︀ူဝ်ꩡ︀ဝ်ႛ ဢ︀ꩫ︀်ႈက︀ဝ်ႈꩭႂ်ႛက︀ွတ︀်ꩫ︀ꩬ︀ီ
ၻႃဝိမ︀ႆ︀ႛဝႆ︀ႇက︀တ︀ိꩫ︀ႆ︀ႇ ꩬ︀ူမ︀ႆ︀ႛတ︀ီꩭႂ်ႛꩫ︀မ︀်”
ꩫ︀ꩬ︀ီၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇဢ︀ူ။ 35က︀ျမ︀်းꩬ︀ႃလ︀ၢံတ︀ီႈလ︀ိူင︀်ႈမ︀ႆ︀ႛက︀ေႃႇ “ၸ︀ူႛꩡ︀ႂ်ႇမ︀ႂ်းꩡ︀ဝ်ႛဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းမ︀ႆ︀ႛယ︀ႃႇ ၵ︀ိင︀်းတ︀ူဝ်ꩡ︀ဝ်ႛပ︀ႃꩡ︀ႃႇမ︀ႆ︀ႛ ꩵ︀ႈဢ︀ဝ်ႈꩫ︀ဝ်ႈ” ꩫ︀ꩬ︀ီဝႃႈဝႆ︀ႇဢ︀ူ။ 36ၻႃဝိယ︀ႃႇ ꩡ︀ူဝ်ႈပ︀ၢꩫ︀်ႈမ︀ꩫ︀်းမ︀ႆ︀ႛ ဢ︀ꩫ︀်ႈꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛꩬ︀ၢင︀်ꩭႂ်ႛꩫ︀ႆ︀ႇꩭီတ︀်ယ︀ဝ်ႇက︀ီး တ︀ႆ︀ၢႈက︀ႃꩬ︀ီ မ︀ꩫ︀်းမ︀ႆ︀ႛပ︀ႃꩡ︀ႃႇပ︀ူလ︀ီꩫ︀်မ︀ꩫ︀်းၵ︀ဝ်မ︀ႆ︀ႛ ꩬ︀ၢင︀်းၵ︀ိဝ်ဝႆ︀ႇဢ︀ူ။ ꩭၢင︀်ႈတ︀ၢႆ︀ႈမ︀ꩫ︀်း ပ︀ႃꩡ︀ႃႇမ︀ႆ︀ႛꩫ︀ဝ်ႈက︀ႃယ︀ဝ်ႇ။ 37ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈꩡ︀ဝ်ႛၸ︀ြႃး ဢ︀ဝ်ႈꩫ︀ိပ︀်ပ︀ွက︀်ႉꩫ︀ႆ︀ႇယ︀ႃႇ ပ︀ႃꩡ︀ႃႇမ︀ႆ︀ႛꩵ︀ႈꩫ︀ဝ်ႈ။
38က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ပ︀ူဝ်မ︀ေပ︀ီႈꩫ︀ွင︀်ႇၵ︀ဝ်ꩴ︀း ထွမ︀်က︀ꩫ︀်ႈတ︀ီၵ︀ႃႛမ︀ႃးတ︀ႃႉ။ ၵ︀ၢဝ်ႈၵ︀ၢမ︀်းဢ︀ꩫ︀်ႈတ︀ူႈꩭူဝ်းꩫ︀ႆ︀ႇယ︀ႃႇ လ︀ႆ︀ၢးပ︀ိူဝ်ႈ ꩡ︀ဝ်ႛယ︀ေꩬ︀ုꩬ︀ီ ဢ︀ပ︀ႅတ︀်ႉꩭဝ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛပ︀ွႆ︀လ︀ွတ︀်ႉꩭႂ်ႛဢ︀ူꩫ︀ꩫ︀ႆ︀ႇꩫ︀မ︀်။ 39ၸ︀ူႛဢ︀ꩫ︀်ႈယ︀ုမ︀်ယ︀မ︀်ႈꩡ︀ဝ်ႛယ︀ေꩬ︀ုက︀ူႈက︀ူဝ်ႇမ︀ႆ︀ႛ ဢ︀ပ︀ႅတ︀်ႉက︀ႃႈꩫ︀င︀်ယ︀င︀်း ဢ︀ꩫ︀်ႈဢ︀ဝ်ႈက︀ျမ︀်းꩬ︀ိꩫ︀်မ︀ေႃꩬ︀ေပ︀ွႆ︀ꩭႂ်ႛမ︀ဝ်ꩫ︀ႆ︀ႛꩫ︀ႆ︀ႇၵ︀ဝ်တ︀င︀်းမ︀ိူင︀်း ၸ︀ြႃးပ︀ီꩫ︀်ႈꩡ︀ဝ်ႛပ︀ွႆ︀လ︀ွတ︀်ႉꩭႂ်ႛဢ︀ူ။ 40-41က︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛဝႃႈꩫ︀ႆ︀ႇ
“က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ꩫ︀ၢပ︀်ႉမ︀ဝ်ၵ︀ၢꩫ︀်းꩫ︀ႆ︀ႇၵ︀ဝ်ꩴ︀း
ထွမ︀်က︀ꩫ︀်ႈတ︀ႃႉ။ ဢ︀ၢမ︀်းꩬ︀ီတ︀ႆ︀ၢႈက︀ꩫ︀်ႈတ︀ႃႉ။
ဢ︀ꩫ︀်ႈမ︀ိူဝ်ႈꩫ︀ႆ︀ႇက︀ဝ်ႈꩬ︀ူမ︀ႆ︀ႛ တ︀ီꩭီတ︀်ꩫ︀ႆ︀ႇ
ပ︀ိူꩫ︀်ႈၵ︀ႆ︀ႈပ︀ျႃးꩫ︀က︀ေႃႇ ꩬ︀ူတ︀ီမ︀ဝ်ပ︀ွင︀်ꩡ︀ႂ်ႈꩬ︀ႃး”
ꩫ︀ꩬ︀ီဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ၵ︀ၢမ︀်းဢ︀မ︀ႂ်း ꩭႂ်ႛပ︀ူဝ်း ꩬ︀ူမ︀ႆ︀ႛမ︀ဝ်ထုက︀်ꩫ︀ႆ︀ႇ ꩬ︀တ︀ိက︀ꩫ︀်ႈတ︀ႃႉ” ꩫ︀ꩬ︀ီꩭူဝ်းဢ︀ူ။
42ပ︀ေႃလ︀ုꩫ︀ၵ︀ႃၿႃꩫ︀ၿလ︀ုက︀်ႉꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛ ꩬ︀ၢင︀်ဢ︀ွက︀်က︀ႃက︀ီး က︀ူꩫ︀်းꩫ︀ႆ︀ႇၵ︀ဝ်ယ︀ႃႇ ꩬ︀ွင︀်ၵ︀ႃမ︀ႆ︀ႛပ︀ၢင︀်းꩬ︀ီ ဝꩫ︀်းက︀မ︀်ႈꩬ︀ိꩫ︀်က︀ꩫ︀်ႛꩫ︀ႃႛမ︀ႆ︀ႛက︀ေႃႇ လ︀ွင︀်ႈꩫ︀ႆ︀ႇၵ︀ဝ်ꩭႂ်ႛမ︀ႃးၵ︀ႆ︀ႈဢ︀ိက︀်ဢ︀ူ။ 43ပ︀ႆ︀ၢႛၸ︀ြႃးယ︀ဝ်ႇက︀ီး က︀ျူးꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈၵ︀ဝ်ႛၸ︀ႃꩬ︀ႃက︀ျူးꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် က︀ꩫ︀်ႛလ︀င︀်ꩬ︀ွင︀်ၵ︀ႃမ︀ႆ︀ႛ ꩡ︀ွမ︀်းမ︀ႃးက︀ꩫ︀်ႈဢ︀ူ။ ꩬ︀ွင︀်ၵ︀ႃက︀ေႃႇ ꩭႂ်ႛပ︀ူဝ်းၵ︀ဝ် က︀ꩫ︀်ႛꩫ︀ႂ်းက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛဢ︀ူၵ︀ိူင︀်ꩰꩫ︀ႆ︀ႇ ၵ︀ဝ်မ︀ႆ︀ႛꩬ︀ႂ်ꩭႅင︀်းꩭႂ်ႛဢ︀ူ။
44ꩫ︀င︀်ပ︀ၢတ︀်ႉမ︀ိူဝ်ႈꩭုက︀်ႉ ꩡ︀ဝ်ႛတ︀င︀်းဝီင︀်းꩫ︀က︀ꩫ︀်ႈ မ︀ႃးထွမ︀်းၵ︀ၢမ︀်းၸ︀ြႃးက︀ꩫ︀်ႈဢ︀ူ။ 45ꩭူဝ်က︀ေက︀ျူးꩫ︀ႆ︀ႇၵ︀ဝ်ယ︀ႃႇ ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛꩭꩫ︀်က︀ီး တ︀ႃႈꩫ︀ႅင︀်ႈက︀ꩫ︀်ႈꩬ︀ီ ပ︀ေႃလ︀ုꩫ︀ၵ︀ႃၿႃꩫ︀ၿမ︀ႆ︀ႛ ထီင︀်ၵ︀ၢမ︀်းင︀ႆ︀း တ︀ၢꩫ︀်ႛပ︀ုက︀်ႉꩬ︀ုက︀်ႉပ︀က︀်ႉꩬ︀က︀်ႉက︀ꩫ︀်ႈဢ︀ူ။ 46ꩫ︀ႆ︀ႇမ︀ႆ︀ႛ ꩬ︀ွင︀်ၵ︀ႃယ︀ႃႇ ꩬ︀ီင︀်ဢ︀ေႈၵ︀ႅꩫ︀်းဢ︀ဝ်ႈꩭႅင︀်းꩬ︀ီ “ဢ︀ꩫ︀်ႈတ︀ေႇတ︀ေႇက︀ီး ꩬ︀ူမ︀ႆ︀ႛꩫ︀မ︀် ၵ︀ၢမ︀်းၸ︀ြႃးဝႃႈꩭူဝ်း ဢ︀ွꩫ︀်ႈꩫ︀ႆ︀ႇ။ ꩫ︀ႆ︀ႇꩫ︀က︀ေႃႇ ဢ︀ꩬ︀ၢက︀်ႉထႃဝရ︀ꩫ︀ႆ︀ႇ တ︀င︀်းꩬ︀ူꩵ︀ႈထႅက︀်ႉꩫ︀ꩬ︀ီ ꩬ︀ူၸ︀ူႛꩡ︀ဝ်ႛပ︀ႆ︀ၵ︀ွတ︀်ယ︀ဝ်ႇ။ လ︀ႃႉꩫ︀ႆ︀ႇယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် တ︀ူႈတ︀ီက︀ႃꩭူဝ်းꩫ︀မ︀်။ 47ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ
“ꩭႂ်ႛပ︀ူဝ်းက︀ူꩫ︀်းတ︀င︀်းက︀မ︀်ၸ︀ႃ ꩫ︀ႆ︀ႛဢ︀ꩬ︀ၢက︀်ႉထႃဝရ︀ꩫ︀ႆ︀ႇ က︀ဝ်ႈꩬ︀ူမ︀ႆ︀ႛ
ꩡ︀ႃႇꩭၢင︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ဢ︀ဝ်ႈပ︀ီꩫ︀်ႈဢ︀ꩫ︀်ႈလ︀ႅင︀်းယ︀ဝ်ႇ”
ꩫ︀ꩬ︀ီတ︀ူႈမ︀ႆ︀ႛ ဢ︀မ︀ိင︀်းꩭႂ်ႛဝႆ︀ႇဢ︀ူ” ꩫ︀ဝꩫ︀်ႇ။ 48ၵ︀ၢမ︀်းꩫ︀ႆ︀ႇမ︀ႆ︀ႛ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ꩫ︀ႆ︀ႛꩥ︀ိꩫ︀်းက︀ီး ꩭုမ︀်ꩰꩡ︀ူမ︀်းꩰꩬ︀ီ ၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ူဝ်းယ︀ွင︀်ႛက︀ꩫ︀်ႈဢ︀ူ။ က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ၢႆ︀ဝႆ︀ႇ ꩭၢင︀်းꩫ︀ႆ︀ႛဢ︀ꩬ︀ၢက︀်ႉထႃဝရ︀ꩫ︀ႆ︀ႇၵ︀ဝ်ယ︀ႃႇ ယ︀ုမ︀်ယ︀မ︀်ႈမ︀ႃးက︀ꩫ︀်ႈဢ︀ူ။ 49င︀ႆ︀းꩬ︀ီ ၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ တ︀ိူင︀်းဢ︀မ︀ႂ်းမ︀ႆ︀ႛꩭူင︀်က︀ႃဢ︀ူ။
50ꩫ︀ႆ︀ႇမ︀ႆ︀ႛ က︀ျူးꩫ︀ႆ︀ႇၵ︀ဝ်ယ︀ႃႇ ၸ︀ူႛယ︀ိင︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈၵ︀ဝ်ႛၸ︀ႃꩬ︀ႃက︀ျူး ဢ︀ꩫ︀်ႈꩫ︀ႃႛယ︀ႂ်ꩫ︀ႆ︀ႇၵ︀ဝ်င︀ႆ︀း က︀ူꩫ︀်းꩫ︀ႃႛဝီင︀်းꩫ︀ႆ︀ႇၵ︀ဝ်မ︀ႆ︀ႛယ︀ူဝ်ႇꩬ︀ီ ပ︀ေႃလ︀ုꩫ︀ၵ︀ႃၿႃꩫ︀ၿမ︀ႆ︀ႛ ꩭႂ်ႛꩫ︀ိက︀်ႉꩬ︀ၢက︀်ႉဢ︀ူ။ ၵ︀ဝ်ယ︀ႃႇ ꩬ︀ွင︀်ၵ︀ႃမ︀ႆ︀ႛ လ︀ုက︀်ႉꩫ︀ႅꩫ︀်ႈၵ︀ဝ်မ︀ႆ︀ႛ ꩭူဝ်ႛဢ︀ွက︀်ၵ︀ွတ︀်ဢ︀ူ။ 51ꩫ︀ႆ︀ႇမ︀ႆ︀ႛꩬ︀ွင︀်ၵ︀ႃယ︀ႃႇ ၸ︀ွင︀်တ︀ိꩫ︀်ႈတ︀ွႆ︀ꩬ︀ီ လ︀ုက︀်ႉဢ︀မ︀ႂ်းမ︀ႆ︀ႛ ဢ︀ွက︀်က︀ႃဝီင︀်းဢ︀ိက︀ေႃꩫ︀ိဢ︀ူ။ 52ၸ︀ူႛယ︀ုမ︀်ယ︀မ︀်ႈဝီင︀်းဢ︀ꩫ︀်တ︀ိဢ︀ုက︀်ꩫ︀ႆ︀ႇၵ︀ဝ်ယ︀ႃႇ ꩭုမ︀်ꩰꩡ︀ူမ︀်းꩰက︀ꩫ︀်ႈင︀ႆ︀း ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛတ︀ီမ︀်ႈက︀ꩫ︀်ႈဢ︀ူ။

Highlight

Share

Copy

None

Want to have your highlights saved across all your devices? Sign up or sign in