ထဝ်ꩡ︀တ︀်ႉၵ︀ဝ် 11
11
လ︀ွင︀်ႈပ︀ေတ︀ရ︀ု ꩡ︀ိူဝ်းꩡ︀ဝ်ႛယ︀ေရ︀ုꩬ︀လ︀ိမ︀်မ︀ႆ︀ႛ လ︀ဝ်ႈတ︀ၢင︀်
1ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်က︀ေႃႇ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩭၢပ︀်ႉဢ︀ဝ်ႈက︀ꩫ︀်ႈယ︀ဝ်ႇꩫ︀ꩫ︀ႆ︀ႇ တ︀မ︀ၢꩫ︀်ꩡ︀ဝ်ႛၵ︀ဝ်င︀ႆ︀း ၸ︀ူႛယ︀ုမ︀်ယ︀မ︀်ႈဢ︀ꩫ︀်ႈဢ︀ူတ︀ိူင︀်းယ︀ုတ︀ꩫ︀ႆ︀ႇၵ︀ဝ် ꩫ︀ႆ︀ႛꩥ︀ိꩫ︀်းက︀ꩫ︀်ႈဢ︀ူ။ 2ပ︀ေတ︀ရ︀ု ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛထိုင︀်က︀ီး က︀ျူးၸ︀ူႛယ︀ုမ︀်ယ︀မ︀်ႈက︀မ︀်ႈၸ︀ွင︀်း မ︀ꩫ︀်းမ︀ႆ︀ႛမ︀ႃးထီင︀်ၵ︀ၢမ︀်းက︀ꩫ︀်ႈဢ︀ူ။ 3ၵ︀ဝ်ယ︀ႃႇ မ︀ꩫ︀်းမ︀ႆ︀ႛ “မ︀ႂ်းꩭိုဝ်လ︀ိုဝ်ꩫ︀ႆ︀ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛက︀ႃꩬ︀ီ တ︀င︀်းၵ︀ဝ်ꩬ︀လ︀ႂ်ႈ ꩭူမ︀်ႈက︀ိꩫ︀်ႈꩫ︀ႆ︀ႇ” ꩫ︀ဝꩫ︀်ႇ။ 4ꩫ︀ႆ︀ႇမ︀ႆ︀ႛ ပ︀ေတ︀ရ︀ုယ︀ႃႇ ၵ︀ဝ်မ︀ႆ︀ႛဢ︀ꩫ︀်ႈပ︀ီꩫ︀်ႈမ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်း လ︀ုက︀်ႉꩭူဝ်က︀ူဝ်မ︀ႆ︀ႛ ဢ︀ဝ်ႈꩬ︀ုတ︀်ပ︀ုတ︀် ၵ︀ႆ︀ႈꩭႂ်ႛꩫ︀ႆ︀ႇ 5“မ︀ိူဝ်ႈက︀ဝ်ႈဝီင︀်းယ︀ုက︀်ပ︀ေမ︀ႆ︀ႛ ယ︀ွꩫ︀်းꩬ︀ူးꩬ︀ီဢ︀ူꩫ︀ႆ︀ႇ ၿျႃၻိက︀်ႉꩭꩫ︀်မ︀ႃးဢ︀ူ။ ꩡ︀မ︀်ႈလ︀ူင︀်ဢ︀ꩫ︀်ႈလ︀ိူင︀်ႈꩫ︀က︀ꩫ︀်ႈꩫ︀ႆ︀ႇ လ︀ုက︀်ႉက︀ၢင︀်ႈꩭၢဝ်မ︀ႆ︀ႛယ︀ွꩫ︀်လ︀ူင︀်းမ︀ႃးꩫ︀ႆ︀ႇမ︀ႆ︀ႛက︀ဝ်ႈꩭꩫ︀်ဢ︀ူ။ ဢ︀မ︀ႂ်းတ︀ႆ︀ၢႛက︀ဝ်ႈမ︀ႆ︀ႛထိုင︀်မ︀ႃးꩬ︀ီ 6က︀ဝ်ႈလ︀ႅမ︀်းꩫ︀ီႈꩫ︀ီႈ ၵ︀ွတ︀်က︀ီး ꩫ︀ိူဝ်ႇမ︀ိူဝ်ႛꩬ︀ီတ︀ိꩫ︀်ႈꩫ︀ႆ︀ႇၵ︀ဝ်၊ ၵ︀ွင︀်ထိူꩫ︀်ꩫ︀ႆ︀ႇၵ︀ဝ်၊ ꩫ︀ိူဝ်ႇမ︀ိူဝ်ႛဢ︀ꩫ︀်ႈက︀ၢꩫ︀်းꩫ︀ႆ︀ႇၵ︀ဝ်င︀ႆ︀း ꩫ︀ူက︀်ႉꩫ︀ႆ︀ႇၵ︀ဝ်မ︀ႆ︀ႛꩭꩫ︀်ဢ︀ူ။ 7ယ︀ဝ်ႇက︀ီး “ပ︀ေတ︀ရ︀ု လ︀ုက︀်ႉꩬ︀ီပ︀ူဝ်ႇက︀ိꩫ︀်ႈလ︀ႃး” ꩫ︀ꩬ︀ီဝႃႈမ︀ႃးꩫ︀ႆ︀ႇမ︀ႆ︀ႛက︀ေႃႇ က︀ဝ်ႈꩫ︀ႆ︀ႛꩥ︀ိꩫ︀်းဢ︀ူ။ 8ꩫ︀ႆ︀ႇꩫ︀က︀ေႃႇ က︀ဝ်ႈယ︀ႃႇ “ꩡ︀ဝ်ႛꩴ︀း ꩭိုဝ်လ︀ိုဝ်က︀ေႃႇ ꩵ︀ႈ ပ︀ီꩫ︀်ႈꩫ︀ႆ︀ႛ၊ က︀ဝ်ႈၵ︀ႃႛယ︀ႃႇ ဢ︀ꩫ︀်ႈမ︀ဝ်ထုက︀်ꩫ︀ီႈက︀ိꩫ︀်ႈ၊ ဢ︀ꩫ︀်ႈꩭင︀်ႛꩫ︀ႆ︀ႇၵ︀ဝ် မ︀ိူဝ်ႈလ︀ႂ်ႈက︀ေႃႇ ꩵ︀ႈꩭွꩫ︀်က︀ိꩫ︀်ႈတ︀ီၵ︀ႃႛ” ꩫ︀ꩬ︀ီꩬ︀ွက︀်ႉပ︀ွက︀်ႉဢ︀ူ။ 9ယ︀ဝ်ႇက︀ီး ꩬ︀ီင︀်ဢ︀ꩫ︀်ႈလ︀ုက︀်ႉက︀ၢင︀်ႈꩭၢဝ်မ︀ႆ︀ႛတ︀ၢꩫ︀်ႛꩫ︀ႆ︀ႇယ︀ႃႇ “ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ထုက︀်ꩫ︀ီႈက︀ိꩫ︀်ႈဢ︀ူꩫ︀ꩫ︀ႆ︀ႇမ︀ႆ︀ႛ ꩭင︀်ႛဢ︀ူꩫ︀ꩬ︀ီပ︀ီဝႃႈ” ꩫ︀ဝꩫ︀်ႇ။ 10ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩬ︀ၢမ︀်ပ︀ၢꩫ︀်ႈတ︀ီင︀်ႈꩰ ပ︀ီꩫ︀်ႈယ︀ဝ်ႇက︀ီး ဢ︀မ︀ႂ်းၵ︀ဝ်တ︀င︀်းမ︀ိူင︀်း က︀ၢင︀်ႈꩭၢဝ်မ︀ႆ︀ႛ ယ︀ုတ︀်က︀ႃပ︀ွက︀်ႉဢ︀ူ။ 11ယ︀ဝ်ႇက︀ီး ꩭိူꩫ︀်းဢ︀ꩫ︀်ႈက︀ဝ်ႈဢ︀ူမ︀ႆ︀ႛ က︀ူꩫ︀်းꩬ︀ၢမ︀်က︀ူဝ်ႇ က︀ꩡ︀ူးထိုင︀်မ︀ႃးဢ︀ူ။ ၵ︀ဝ်ယ︀ႃႇ က︀ူꩫ︀်းဢ︀ꩫ︀်ႈလ︀ုက︀်ႉဝီင︀်းက︀ႄတ︀ရ︀ိမ︀ႆ︀ႛ ပ︀ွႆ︀ꩡ︀ႂ်ႇꩭႂ်ႛမ︀ႃးꩭꩫ︀်က︀ဝ်ႈꩫ︀ႆ︀ႇၵ︀ဝ်ꩫ︀မ︀်။ 12ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ဝ်ႈမ︀ႆ︀ႛတ︀င︀်းၵ︀ဝ်က︀ꩡ︀ူး ꩭႂ်ႛꩡ︀ွမ︀်းက︀ႃဢ︀ူ။ က︀ူꩫ︀်းဝီင︀်းယ︀ုက︀်ပ︀ေꩭူက︀်က︀ူဝ်ႇက︀ေႃႇ တ︀င︀်းက︀ဝ်ႈꩡ︀ွမ︀်းက︀ႃဝီင︀်းက︀ႄတ︀ရ︀ိဢ︀ူ။ တ︀ူႈၸ︀ူႛယ︀ုမ︀်ယ︀မ︀်ႈꩫ︀ႆ︀ႛၵ︀ဝ်တ︀င︀်းမ︀ိူင︀်း ꩭိူꩫ︀်းက︀ေႃꩫ︀ေလ︀ိမ︀ႆ︀ႛ ၵ︀ဝ်ႛက︀ႃဢ︀ူ။ 13က︀ေႃးꩫ︀ေလ︀ိယ︀ႃႇ လ︀ွင︀်ႈဢ︀ꩫ︀်ႈꩭိူꩫ︀်းမ︀ꩫ︀်းမ︀ႆ︀ႛ ၵ︀ုꩫ︀်ꩬ︀ၢင︀်မ︀ႃးꩬ︀ီ ဝႃႈမ︀ႃးꩫ︀ႆ︀ႇ တ︀ူႈမ︀ႆ︀ႛၵ︀ႆ︀ႈꩭႂ်ႛဢ︀ူ။ ၵ︀ုꩫ︀်ꩬ︀ၢင︀်ဝႃႈꩫ︀ႆ︀ႇ “ဝီင︀်းယ︀ုက︀်ပ︀ေမ︀ႆ︀ႛ ꩬ︀ႅင︀်မ︀ုꩫ︀်ပ︀ေတ︀ရ︀ုꩫ︀ꩫ︀ႆ︀ႇမ︀ႆ︀ႛ ꩭႂ်ႛက︀ႃပ︀ၢင︀်းတ︀ႃႉ။ 14လ︀ွင︀်ႈဢ︀ꩫ︀်ႈꩬ︀ူတ︀င︀်းꩭိူꩫ︀်းတ︀င︀်းယ︀ေး တ︀ီꩫ︀ႆ︀ႛတ︀ၢင︀်းက︀ေႛၵ︀ျွတ︀်ႉꩫ︀ႆ︀ႇ မ︀ꩫ︀်းꩫ︀မ︀်ꩬ︀ူမ︀ႆ︀ႛတ︀ီꩭူဝ်းꩭႂ်ႛꩫ︀ႆ︀ႇ” ꩫ︀ဝꩫ︀်ႇ။ 15ယ︀ဝ်ႇက︀ီး မ︀ိူဝ်ႈက︀ဝ်ႈက︀ူဝ်တ︀ၢꩫ︀်ႛၵ︀ၢမ︀်းꩫ︀ႆ︀ႇ ꩫ︀င︀်မ︀ိူဝ်ႈင︀ႃးပ︀ုꩫ︀်ႛꩭဝ်းမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛၵ︀ဝ်ႛမ︀ႃးꩫ︀က︀ꩫ︀်ႈ ၵ︀ဝ်မ︀ႆ︀ႛက︀ေႃႇ က︀ꩡ︀ူးၵ︀ဝ်ႛမ︀ႃးဢ︀ူ။ 16မ︀ိူဝ်ႈဢ︀မ︀ႂ်း ၵ︀ၢမ︀်းဢ︀ꩫ︀်ႈꩡ︀ဝ်ႛယ︀ေꩬ︀ုဝႃႈ “ယ︀ေႃးꩭၢꩫ︀်ယ︀ႃႇ ꩫ︀မ︀်ႇမ︀ႆ︀ႛꩡ︀ူမ︀်ႈꩭႂ်ႛဢ︀ူ။ ꩫ︀ႆ︀ႇꩫ︀က︀ေႃႇ က︀ဝ်ႈယ︀ႃႇꩬ︀ူမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀ီꩡ︀ူမ︀်ႈꩭႂ်ႛꩫ︀မ︀်” ꩫ︀ꩫ︀ႆ︀ႇမ︀ႆ︀ႛ က︀ဝ်ႈဢ︀ွက︀်ꩡ︀ႂ်ႈမ︀ႃးဢ︀ူ။ 17မ︀ိူဝ်ႈꩭဝ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛယ︀ုမ︀်ယ︀မ︀်ႈꩫ︀ႆ︀ႇ ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူးꩭႂ်ႛမ︀ႃးꩫ︀က︀ꩫ︀်ႈ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩬ︀ူးဢ︀မ︀ႂ်းꩭႂ်ႛꩫ︀ႆ︀ႇမ︀ႆ︀ႛ က︀ဝ်ႈꩭိုဝ်လ︀ိုဝ်တ︀ီꩡ︀တ︀်ꩫ︀ႆ︀” ꩫ︀ဝꩫ︀်ႇ။ 18ၵ︀ၢမ︀်းဢ︀မ︀ႂ်းꩫ︀ႆ︀ႛꩥ︀ိꩫ︀်းက︀ီး ၵ︀ဝ်ယ︀ႃႇမ︀ဝ်ထီင︀်ၵ︀ၢမ︀်းꩬ︀ီ “ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛက︀ေႃႇ ဢ︀ၵ︀ၢင︀်းဢ︀ꩫ︀်ႈꩬ︀ၢင︀်ဝွေꩬ︀ီ ꩫ︀ႆ︀ႛဢ︀ꩬ︀ၢက︀်ႉꩫ︀ႆ︀ႇꩭႂ်ႛမ︀ႃးယ︀ဝ်ႇ” ꩫ︀ꩬ︀ီ မ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈဢ︀ူ။
ꩡ︀ိူဝ်းꩡ︀ဝ်ႛဢ︀ꩫ︀်တ︀ိဢ︀ုက︀်
19ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်ယ︀ႃႇ မ︀ိူဝ်ႈꩬ︀တ︀ေၸ︀ꩫ︀်မ︀ႆ︀ႛပ︀ိူꩫ︀်ႈꩫ︀ိက︀်ႉꩬ︀ၢက︀်ႉꩫ︀ႆ︀ႇ ၵ︀ဝ်မ︀ႆ︀ႛက︀ေႃႇ ꩫ︀ိက︀်ႉꩬ︀ၢက︀်ႉလ︀ွေႛꩬ︀ီ က︀ူႈတ︀ီႈမ︀ႆ︀ႛၸ︀ူင︀်ႇက︀ႃမ︀ူတ︀်ဢ︀ူ။ က︀မ︀်ႈၸ︀ွင︀်းယ︀ႃႇ မ︀ိူင︀်းၸ︀ူဝ်ꩫ︀ီꩬ︀ီယ︀ႃး၊ င︀ွꩫ︀်ႈက︀ုပ︀ရ︀ုင︀ႆ︀း ဝီင︀်းဢ︀ꩫ︀်တ︀ိဢ︀ုက︀်ꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်း ထိုင︀်က︀ႃဢ︀ူ။ ၵ︀ဝ်ယ︀ႃႇ က︀ျူးꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩬ︀ိုင︀် ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩭူဝ်းဢ︀ူ။ 20ꩫ︀ႆ︀ႇꩫ︀က︀ေႃႇ ၸ︀ူႛယ︀ုမ︀်ယ︀မ︀်ႈဢ︀ꩫ︀်ႈလ︀ုက︀်ႉင︀ွꩫ︀်ႈက︀ုပ︀ရ︀ုꩫ︀ႆ︀ႇၵ︀ဝ်င︀ႆ︀း လ︀ုက︀်ႉမ︀ိူင︀်းက︀ုရ︀ေꩫ︀ေꩫ︀ႆ︀ႇၵ︀ဝ်ယ︀ႃႇ ဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛက︀ႃꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛက︀ေႃႇ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုက︀ႃၵ︀ႆ︀ႈ က︀ႃꩭူဝ်းလ︀ေဢ︀ူ။ 21က︀ွပ︀်ႉပ︀ိူဝ်ႈၵ︀ဝ်မ︀ႆ︀ႛတ︀ꩫ︀်းၵ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛꩡ︀ွႆ︀ႈꩭႂ်ႛꩫ︀ႆ︀ႇꩬ︀ီ က︀ူꩫ︀်းဢ︀ၢꩫ︀်တ︀ၢꩫ︀် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈမ︀ႃးက︀ꩫ︀်ႈဢ︀ူ။ 22ၵ︀ၢဝ်ႈၵ︀ၢမ︀်းꩫ︀ႆ︀ႇ ꩡ︀ိူဝ်းꩡ︀ဝ်ႛယ︀ေရ︀ုꩬ︀လ︀ိမ︀်ၵ︀ဝ် ꩫ︀ႆ︀ႛꩥ︀ိꩫ︀်းက︀ီး ၿႃꩫ︀ၿမ︀ႆ︀ႛဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛ ပ︀ွႆ︀ꩡ︀ႂ်ႇဢ︀ူ။ 23ၿႃꩫ︀ၿယ︀ႃႇ ဝီင︀်းဢ︀မ︀ႂ်းမ︀ႆ︀ႛထိုင︀်ꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩭိုဝ်လ︀ိုဝ်ꩬ︀ီ ꩭီတ︀်က︀ျေးꩡ︀ူးꩭႂ်ႛမ︀ႃးꩫ︀ꩫ︀ႆ︀ႇꩭꩫ︀်က︀ီး ꩭုမ︀်ꩡ︀ူမ︀်းꩬ︀ီ ꩭႂ်ႛပ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ဝ်တ︀င︀်းꩡ︀ႂ်ႈတ︀င︀်းၵ︀ူဝ်းယ︀ုမ︀်ယ︀မ︀်ႈꩬ︀ီ ꩬ︀ႅတ︀်ႉꩡ︀ႃယ︀င︀်းက︀ꩫ︀်ႈꩫ︀ႆ︀ႇ ၵ︀ဝ်မ︀ႆ︀ႛꩬ︀ႂ်ꩭႅင︀်းꩭႂ်ႛဢ︀ူ။ 24မ︀ꩫ︀်းယ︀ႃႇက︀ူꩫ︀်းꩫ︀ီႈက︀ေႃႇꩡ︀ႂ်ႈ၊ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇတ︀ီမ︀်ႈင︀ႆ︀း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ေႃႇ ယ︀ုမ︀်ယ︀မ︀်ႈꩭႅင︀်းꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈမ︀ႃးက︀ꩫ︀်ႈဢ︀ူ။ 25ယ︀ဝ်ႇက︀ီး ၿႃꩫ︀ၿယ︀ႃႇ ꩬ︀ေႃလ︀ုမ︀ႆ︀ႛၵ︀ႃက︀ွတ︀်ꩫ︀ꩬ︀ီ က︀ႃဝီင︀်းတ︀ႃꩬ︀ုဢ︀ူ။ 26ꩬ︀ေႃလ︀ုမ︀ႆ︀ႛꩭꩫ︀်က︀ီး ဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛꩭွင︀်ႇမ︀ႃးဢ︀ူ။ ꩬ︀ွင︀်ၵ︀ႃယ︀ႃႇ ၸ︀ႃႇတ︀င︀်းပ︀ီႈတ︀င︀်း ꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်ꩭꩫ︀်က︀ꩫ︀်ႈꩬ︀ီ က︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛ ꩬ︀ွꩫ︀်တ︀ြႃးꩭႂ်ႛဢ︀ူ။ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ၵ︀ရ︀ီတ︀်ယ︀ၢꩫ︀်ꩫ︀ꩬ︀ီ ဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛ ဢ︀ွꩫ︀်ႈတ︀ၢင︀်းလ︀ေႚလ︀ေႚ က︀ူဝ်ꩭွင︀်ႇမ︀ႃးဢ︀ူ။ 27ဝူင︀်ႈမ︀ိူဝ်ႈဢ︀မ︀ႂ်း ပ︀ရ︀ေႃးၸ︀ႅတ︀်ႉမ︀ၢင︀်ႈၸ︀ွင︀်း လ︀ုက︀်ႉဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ က︀ႃဝီင︀်းဢ︀ꩫ︀်တ︀ိဢ︀ုက︀်ဢ︀ူ။ 28လ︀ုက︀်ႉက︀ꩫ︀်ႛꩫ︀ႂ်းၵ︀ဝ်မ︀ႆ︀ႛ ဢ︀ႃက︀ပ︀ုꩫ︀ꩫ︀ႆ︀ႇယ︀ႃႇ ꩫ︀င︀်ဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩬ︀ွꩫ︀်ꩭႂ်ႛꩫ︀က︀ꩫ︀်ႈ “တ︀င︀်းက︀မ︀်ၸ︀ႃမ︀ႆ︀ႛ ၸ︀ေးဢ︀ိုပ︀်က︀ိꩫ︀်ႈတ︀ီထိုင︀်မ︀ႃးယ︀ဝ်ႇ” ꩫ︀ꩬ︀ီꩭူဝ်းဢ︀ူ။ ပ︀ၢꩫ︀်ႈမ︀ိူဝ်ႈꩡ︀ဝ်ႛဝွင︀်ႇက︀လ︀ေႃတ︀ိ က︀ိꩫ︀်ႈမ︀ိူင︀်းꩫ︀ႆ︀ႇ ဢ︀ိုပ︀်က︀ိꩫ︀်ႈမ︀ႃးဢ︀ူ။ 29ꩫ︀ႆ︀ႇမ︀ႆ︀ႛၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်ယ︀ႃႇ ꩫ︀င︀်က︀ႃႈပ︀ီꩫ︀်ႈပ︀ေႇꩫ︀ႆ︀ႇ ၸ︀ူႛယ︀ုမ︀်ယ︀မ︀်ႈတ︀ိူင︀်းယ︀ုတ︀ꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈင︀ိူꩫ︀်းꩡ︀ွႆ︀ႈက︀ွတ︀်ꩫ︀ꩬ︀ီ တ︀ႅပ︀်တ︀တ︀်က︀ꩫ︀်ႈဢ︀ူ။ 30ယ︀ဝ်ႇက︀ီး င︀ိူꩫ︀်းဢ︀ꩫ︀်ႈꩡ︀ွႆ︀ႈဢ︀မ︀ႂ်း ၿႃꩫ︀ၿꩫ︀ၵ︀ႃ ꩬ︀ေႃလ︀ုမ︀ႆ︀ႛၸ︀ၢက︀်ꩬ︀ီ ၸ︀ူႛမ︀ိုင︀်ႇꩡ︀ိူဝ်းꩡ︀ဝ်ႛဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇၵ︀ဝ်မ︀ႆ︀ႛ ꩬ︀ူင︀်ꩭႂ်ႛဢ︀ူ။
Currently Selected:
ထဝ်ꩡ︀တ︀်ႉၵ︀ဝ် 11: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
