Kèʼlo 16

Hagar dzəə́ Ishmael

1Saray woo wiiy Abram‑eè dzə̀, a bó wù yòʼ dzəə, a wù kér wánlè wiíy ji kwàn, a dzə̀ wan wìr Ejiv, a yír rəə́‑əə̀ dzə̀ ji Hagar. 2Saray nèn lò sùúy e Abram jii, «Ku yuùrí e yù, Nyùy Tàr yiì ne, m wáa dzə là wán. Lì kwàn wómé, é vèn wun shiíy, kìn mo‑óò koóy wán woo lò fo wun.» Abram biímé kinyo ke Saray suuyin. 3Wun woo Saray woo wiiy Abram nèn lì Hagar woo kwàn və́ woo wan wìr Ejiv və̀y, e fò e lum və Abram ji wíiy və wùmòʼ. Kinyo kìn ki‑iì kooy bèy, a Abram dzə́ʼə́m ne e wòŋ Kanan kiyá e ghvə̀m. 4Abram shiíy wùn Hagar, wù bóŋ bvəm. Mo wù kiiyin ji wun sì á e bvə́me, e nèn a koʼór wún, a gumér shuu wùn Saray wo wù‑uù lim fo fo.

5Saray nèn sùúy e Abram jii, «Yiì wò, é bo Hagar wáa nə̀ʼsì mo. Mò‑oò fò kwàn wóm ji wú kóytí wò, wú yén, a wú sì e bvə́me, e nèn a ŋway mo. Kù yíi tinén Nyùy nsaʼ yèsò.»

6Á bèy, Abram suúy e Saray jii, «Yén, kù kér wò vitaáví fo kwàn wóo, á yiì sho mo à yenen.» Saray nèn a nyàvrì sho, wù túmnín, a leʼ.

7Nshìylav Nyùy Tàr yén wun e woʼ, a wù dzə́ e ghaa dàn, e dzəə ye yì du e Shur, 8e dzə̀r jii, «Hagar woo kwǎn Saray, à wiy fo feé, aà du fèé?»

Wù bìnèr jii, «M léʼ Saray wo m lim fo wun.»

9Nshìylav Nyùy Tàr nèn sùúy sho jii, «Á kfən e bàm, e dù yèn Saray, a yu fo fo.» 10Yì kfən sùúy jii, «M wíy yiì, é rám yée wáa dzə nyanyày ye bó yòʼ dzə̀ á tàŋ, e tòʼ.»

11Nshìylav Nyùy Tàr nèn kfə̀n sùúy sho jii, «Yuúrí, e yù, à sì e bvə́me, aà wíy dzəə́ wán lumèn. À wíy shù yír rə́ ji Ishmael#16.11: Ishmael: Nsàv yìr rən dzə̀ é Lǎm Hibru ji «Nyùy yú.», bìʼ fo Nyùy yuun ne tóŋ yé. 12Wù wíy a dzə kilámákwaʼ, a tàʼ melaà wùn à wíri, é wíri wáa tàʼ sa melaà wùn áwune. A bó wù yòʼ wíy a tatí wùn aàfə́r vəə́.»

13Hagar nèn a ghay wún jii, «M yèn ne rú Nyùy, e gòʼ e tin à?» Wù nèn yòŋ yír Nyùy Tàr wo wù‑uù suŋnin e wun jii, «Nyùy wo wù yén mo.» 14Á kinyo ke kí‑iì yiìn, é bo á wáa yòŋ dàn və̀y, wo wù dzəə̀n é kintìntìn ke Kadesh wùn Bered ji «Dàn Ŋgaà wo wù dzəə̀n e tin, wo wù yén mo.»#16.14: Yír dàn woo shooyi dzə̀ é Lǎm Hibru ji Beer Lahay Roy.

15Hagar nèn dzə̀ə́ wán lumèn wùn Abram. Abram yòŋ yír wan və ji Ishmael. 16Abram‑eè dzə̀ viyá nshòv ntuùfú e mwaamé (86) e ghan sin se Hagar‑iì dzəən Ishmael.

Currently Selected:

Kèʼlo 16: LNB

Highlight

Copy