Luka 24

İsa merdenı ra vezeno ra

1Roca bazari de lêla rew ra, cinıkan vasê kı boya xo wesa kerdi bi hazır, i gıroti, şi serê mezelı. 2Kemera gırsa kı kêberê mezelı day bi ca, sêr kerdi kı gındır biya hetê. 3İ kuti zerrı, feqet inan meyitê Wayir İsay nêdi. 4Nay ver de sas bi mandi. Xafılde dı mêrıki cı rê aşiyay, kıncê inan zê buluski bereqiyenê. 5Cinıkan tersan ra rüyê xo nay herdi ser. Mêrıkan vat: “Sıma çay owo kı weso, wertê merdan de fetelinê? 6-7O nıta de niyo, merdenı ra peyser ama! Biyarê xo viri, o hona kı Celile de bi bi, sıma rê se vati bi, ‘Lacê Mordemi danê destê gunakaran, iy finê çarmıx, o roca hirêyını de merdenı ra peyser êno.’ ”

8A waxt cinıkan qesê İsay ardi xo viri. 9Cinıki serê mezelı ra gêray ya, owo kı di bi, ni pêro des u jü hawariyan bı telebanê binan rê qeşi kerdi. 10İyê kı hawariyan rê ni qesi berdê, ni bi: Mecdel ra Meyremı, Yohanna, mua Yaqubi Meyremı u i cinıkê binê kı bı ninan'a pia bi. 11Ni qeseyê kı cinıkan vati bi, hawariyan rê zê sanıkı amê. İnan bı cinıkan'a inam nêbiyê. 12Feqet Petrus vast şi serê mezelı. Xo çewt kerd, mezelı ro sêr kerd, kefen ra zobina thaba nêdi. Nay ver de sas bi, uca ra kut duri.

Raya Emmausi de dı telebi

13Roca kı no çi bi bi, a rocı dı telebê İsay suka Yeruşalimi ra şiyenê Emmaus. Na dewı Yeruşalim ra nejdiyê des u jü kilometroy duri biye. 14Teleban mabênê xo de, ni çiyê kı bi bi, qalê inan kerdenê. 15Teleban key kı qalê ni çiyan kerdenê, İsa ama lê inan, bı inan'a pia kut ray. 16İnan İsa di, feqet o nas nêkerd.

17İsay vat: “Sıma ray ra mabênê xo de qalê çıki kerdenê?”

Mêrıkan hurindia xo de fındeti, kêfê inan çini bi. 18Ninan ra Kleopasi vat: “Ez vaceri, çiyê kı ni rocan de Yeruşalim de biyê, kamo kı Yeruşalim dero, i ni pêro eşiyê pê, teyna tı nêeşiyay pê.”

19İsay vat: “Kamci çiyê kı biyê?”

İnan vat: “Çiyê kı amê serê İsayê Nasırayıci. O mêrık çımê Heqi u ê mıleti de, hem bı guriyê xo'a hemı ki bı qesa xo'a, pêxembero de qudretın bi. 20Rayibanê pilan u pilanê ma, o da dest kı ceza merdenı bigêro. Nay dıma, o fitê çarmıx. 21Feqet ma omıd kerdenê kı mordemo kı mıletê İsraili bıxelesno ra, no bi. Jü ki, eyro roca hirêyına ni çi biyê. 22Mabênê ma ra tay cinıkan ma sas kerdım. Na lêla rew ra şiyê mezelı ser, 23feqet inan meyitê İsay nêdiyo. Ni cinıki peyser amay lê ma, inan vat, ‘Tay meleki ma rê aşiyay, ninan vat kı İsa weso.’ 24İyê kı bı ma'wa pia bi, inan ra tayê şiyê serê mezelı; mezelı zê vatena cinıkan diya. İnan ki İsa nêdi.”

25İsay inan rê nia vat: “Sıma çıqa fam-korê, pêxemberan ni pêro verdı ra vati bi. Çay inamê cı nêbenê? 26Gereko Mesih ni decan bancero kı bıreso berciya xo, hini niyo?” 27Bado İsay, Qanunê Musay ra hata kıtabanê pêxemberanê binan, Qesanê Bımbarekan de çiyê kı heqa iy de bi bi, ni pêro inan rê eşkera kerdi.

28Key kı amay nejdiyê dewa kı sonê cı, İsay hini kerd kı say kı o raya xo ra sono. 29Feqet inan zor kerd, vat: “Bı ma'wa pia bımanı. Naw sano, waxto kı tici sêro.” İsa bı inan'a pia kut zerrı kı lê inan de bımano.

30İsa ki bı inan'a pia serê nani de bi, nan gırot, şukır kerd, dıma ki nan kerd letı, da inan. 31A deqa çımê inan bi ya, inan İsa nas kerd. Feqet İsa verê çımanê inan ra bi vindi. 32İnan jübini rê nia vat: “Key kı ray ra ma de qeşi kerdenê, Qesê Bımbareki ma rê eşkera kerdenê, zerria ma senên biyenê sa, nekı?”

33Dı telebi a deqa usti ra, gêray ya Yeruşalim. İnan sêr kerd kı des u jü hawari u iyê kı lê inan derê, pêro top biyê. 34Hawariyan u i binan vat: “Wayirê ma rastiye ki merdenı ra peyser amo! Simuni rê aşiyo!” 35Dı telebi çiyê kı ray de bi bi, jü ki key kı İsay nan letı kerd, inan o senên nas kerd, i qeşi kerdi.

İsa des u jü hawariyanê xo rê aşino

36İnan key kı ni qeşi kerdenê, İsa mabênê inan de fındet. İnan rê nia vat: “Sıma rê sılametiye bıbo!”

37Teleban qa vatê kı roê jü merdi vênıtê, ay ra tersay, xof kut zerria inan. 38İsay inan rê nia vat: “Sıma çay hente tersay? Zerria sıma çay inam nêkena? 39Dest u nınganê mı ro sêr kerê, rastiye ki ezan. Dest mı ra nê u bıvênerê. Gost u astıkê roan nêbeno, feqet sımawo vênenê, ê mın estê.”

40Ni qesi kı qeşi kerdi, dest u nıngê xo muskıti inan. 41Teleban hini kêf kerd kı hona nêşkiyenê pê cı inam kerê. Telebi sas bi mandi. İsay vat: “Nıta de sıma de saba werdenı thaba esto?” 42Letê masiya kı sur kerdê, inan a dê cı. 43İsay a gırotı, verê çımanê inan de werdı.

44Bado inan rê nia vat: “Ez hona kı lê sıma de biyan, mın sıma rê ni vati bi, ‘Qanunê Musay de, kıtabê pêxemberanê binan de, jü ki Zebur#24:44 Qanunê Musay, kıtabê pêxemberanê binan, jü ki Zebur, ni pêro Kıtabê Bımbarekê kı Yahudi qebul kenê, iyê. de çiyê kı heqa mın de amay bi vatenı, gereko kı i pêro bêrê hurindi.’ ”

45İsay famê telebanê xo kerd ya kı i Qesanê Bımbarekan fam bıkerê. 46İnan rê nia vat: “Kıtabo Bımbarek nia vano: Mesih decan anceno, roca hirêyını de merdenı ra peyser êno; 47bı namê Mesih'a veng dino, ‘Tobı bıkerê kı gunê sıma ef bêrê’. No vengdayış Yeruşalim ra baslı keno, reseno mıletê dina pêroyinı. 48Sıma ni çiyê kı biyê, inan pêroyini rê sayidinı kenê. 49Ezi ki, owo kı Piyê mıno kı asmên de wad kerdo, iy rusnenan sıma rê. Hata kı qeweta kı cor ra êna kuna sıma ser, sukı de bımanê.”

İsa ancino asmên

50İsay telebê xo berdi teberê sukı, nejdiyê Beytania. Destê xo dardi we, i bımbarek kerdi. 51İsay key kı i bımbarek kerdenê, lê inan ra bırriya ya, anciya asmên. 52Telebê xo amay çhokan ser, bado kı bı kêf u kelbut'a gêray ya Yeruşalim. 53Ni telebi her waxt şiyenê Mabedı, uca de Heqi rê şukır kerdenê.

Currently Selected:

Luka 24: kiu

Highlight

Copy