Luka 15

Miya kı biya vindi

1 Taşildari u gunakari amay bi kı gos bıderê qesanê İsay ser. 2Ferisiyan u ilimdaranê itıqati key kı na diye, inan nia vat: “No mêrık gunakaran rê rındo, bı inan'a pia nan weno!”

3Nay dıma, İsay inan rê na mesela qeşi kerdı: 4“Vacım, mabênê sıma ra ê jüyê se tenı miyê xo estê, ninan ra jüyê biya vindi. A waxt wayirê miyan se keno? Neway u new tenan mergan de ca nêverdano, a miya kı biya vindi hata kı ay mevênero, ay dıma nêsono? 5Key kı ay bıvênero, bı kêf'a gêno serê hermanê xo. 6Key kı gêra ya kê xo, veng dano havalanê xo u cirananê xo, inan rê vano, ‘Bı mın'a pia kêf bıkerê, miya mına kı bi bi vindi, mın a diye!’ 7Sıma rê nay vaceri: Asmên de ki hinio. Jü gunakar kı saba guna xo tobı bıkero, saba iy asmên de kêfo de gırs beno. Neway u new mordemê kı rastê, cı rê tobı kerdenı lazım niya, saba inan na hente kêf nêbeno.”

Perıo kı biyo vindi

8İsay nia dewam kerd: “Vacım, ê jü cinıkı des perê xoyê simıni estê, ninan ra jüyê kı vindi kero jü çıla nêfina cı? Hata kı i peri mevênero, her cayê kêyi geji nêkena? Her ca ro sêr nêkena? 9Key kı perı di ki, veng dana havalanê xo, cirananê xo vana, ‘Bêrê, bı mın'a pia kêf bıkerê, mın perıo kı vindi kerdi bi, o di!’ 10Sıma rê nay vaceri: Jü gunakari kı tobı kerd, melekê Heqi ki nia kêf kenê.”

Laceko kı biyo vindi

11İsay vat: “Ê jü mêrıki dı lacê xo esti biyê. 12Rocê, ninan ra owo kı qıco vano, ‘Bao, çiyê to ra owo kı kuno hêsa mın, iy bıdı mın.’ Pi ki çiyê xo mabênê dı lacanê xo de parı keno.

13“Hirê-çar roci ra tepia, laceko qıckek her çiyê xo dano arê, sono welatê de duri. Uca de perıo kı dest dero, i pêro gorê kêfê xo zay keno. 14Her çiyê xo kı qedıno, a welat de vêsania de gıranı veciya; no lacek pırtıkê nani rê biyo motac. 15Nay sera, no lacek, ni welati de sono, kuno bınê xızmeta jü mêrıki. No mêrık laceki rusneno kı hêgan de sêro xozan ver. 16No lacek vêsaniyê ra çiyo kı xozi wenê, iy rê ki rajiyo; ancia ki qe kes thaba nêdano ni laceki.

17“En peyniye de, aqlê laceki êno serı, nia vano, ‘İyê kı lê piyê mın de gurinê, saba werdi xeylê çiyê inan esto; ezi ki nıta de vêsaniyê ra mırenan! 18Ezo ravezeri, sêri lê piyê xo, iy rê vaceri: Bao, mın Heqi bı to rê gunay kerdê. 19Ez hente hewl niyan kı tı endi vacerê: No lacê mıno. İyê kı lê to de gurinê, mın ki inan ra jüyê say kı.’

20“Urceno ra, sono lê piyê xo. Lacek bıxo hona kı duriyo, piyê xo iy vêneno, zerria xo cı rê vêsena, vazeno sono, pırêşino lacê xo ra, phaçi keno. 21Lacê xo cı rê nia vano, ‘Bao, mın Heqi bı to rê gunay kerdê. Ez endi heq nêkenan kı tı vacerê: No lacê mıno.’

22“Piyê xo xızmetkaranê xo rê nia vano, ‘Rew kıncanê en rındekan biyarê, iy ra derê. Henguluskı bêçıkı ra kerê, çarıxan nıngan ra derê. 23Gukê en rındi biyarê, bıbırrnê, borım, kêf bıkım! 24Çıkı no lacê mın merdi bi, feqet merdenı ra peyser ama! Bi bi vindi, feqet nıka ama diyayenı!’ Ni qesan dıma kêf u kelabut kenê.

25“Laco pil ki hêga de biyo. Key kı reseno nejdiyê kêyi, vengê kay u kêfi eşino pê. 26Veng dano xızmetkaran ra jüyê, cı ra pers keno, vano, ‘Se biyo, no çı vengo?’

27“Xızmetkar vano, ‘Bıraê to peyser ama, piyê to wes u war rest iy. Ay ra, guko kı en rındo, o bırrna.’

28“Laco pil hêrs beno, nêwazeno sêro zerrê kêyi. Piyê xo vecino teber, cı rê mınetı keno. 29Lacê xowo pil vano, ‘Qay, ez çend serrio zê xızmetkaran to rê gurinan. Qe qesa to ra nêvecinan, feqet to jü bızêk bilı nêda mın kı bı havalanê xo'a kêf bıkeri. 30Ni lacê to çiyê to ciniyanê xırabınan de werd, nıka ki peyser amo, to saba iy guko en rınd serı bırrno!’

31“Pi vano, ‘Lacê mın, tı her waxt lê mın deray, çıkê mın kı esto, ê towo. 32Feqet gereko kêf bıkım, sa bıbım. Bıraê to merdi bi, peyser ama; bi bi vindi, ama diyayenı.’ ”

Currently Selected:

Luka 15: kiu

Highlight

Copy