Luka 13

Tobı bıkerê

1A waxt, tay mordemi amay, xeberı day İsay kı, eskeranê Wali Pilatusi, Celileyıcan ra iyê kı qurbani serı bırrnay bi, inan ra tayêni kisti bi. Gonia ni mıleti bı gonia qurbanan'a kuti bi têwertı. 2İsay nia vat: “Gorê sıma, niyê kı amay bi kistenı, Celileyıcanê binan ra daa gunakarê. Ay ra na thofanı ame inan ser? 3Nê! Sıma rê vaceri, hini niyo. Feqet ekı sıma tobı mekerê, sıma ki pêro nia mırenê sonê. 4Ya ki, des u heşt mordemê kı suka Yeruşalim Şilohi de key kı qulê dêmdiyay bi ser, kisti bi, sıma saba ninan se vanê? Gorê sıma ni, mıleto bino kı Yeruşalim de, inan ra daa gunakar bi? 5Nê! Sıma rê vaceri, hini niyo. Ekı sıma tobı mekerê, sıma ki nia pêro mırenê sonê.”

Dara kı meywı nêdana

6Bado İsay na mesela inan rê qeşi kerdı: “Baxçê jü mêrıki de, dara hêcirı esti biya. Mêrık amo darı de meywı feteliyo, feqet nêdiyo. 7Reşberi rê vato, ‘Qay, ez hirê serrio ênan, na dara hêcirı de meywı fetelinan, nêvênenan. Na darı bıbırrnı! Çay nıta de ca gêna xo ver?’

8“Reşberi vato, ‘Wayir, emseri ki bıverdı, ez dormı tenê bıkıni, zıbıl cı keri. 9Ekı serrena meywı da, çı rınd; ekı nêda, bıbırrnı.’ ”

İsa Roca Şabati de jü cinıkı keno wes

10Roca Şabati de İsay jü xavra de waaz denê. 11Uca de jü cinıkı esti biye; na cinıkı rüyê jü cıni ra des u heşt serrio kı seqet biye, bi bi bul, qe nêşkiyenê kı xo rast kero. 12İsay kı na cinıkı diye, veng da cı, vat: “Tı nêweşiya xo ra xeleşiyay ra.” 13İsay destê xo nay cinıkı ser. Cinıkı a deqa biye rast, Heqi rê şukır kerd.

14İsay Roca Şabati de na cinıka nêwesı kerdi bi wes. Ay ra idarıkarê xavra İsay rê bi hêrs, mıleti rê nia vat: “Saba guriyayenı şeş roci estê, i rocan de bêrê, bıbê wes. Roca Şabati de mêrê.”

15İsay iy rê nia vat: “Sımayê dı-rüyıni! Sıma Roca Şabati de gayê xo yan hera xo axurı ra nêvecenê teber, awkı nêdanê? 16Ma na cinıkı ki ezbeta İbrahimi rawa, des u heşt serrio kı Seytani dest dera. Ekı Roca Şabati de biya wes, Seytani dest ra xeleşiya ra, nay de çı xırabinı esta?”

17İsay kı nia vat, dısmenanê İsay pêroyini ni qesan dıma serm kerd. Mıleto kı uca de bi pêroyini, çiyê rındekê nanêni kı İsay kerdi bi, saba inan kêf kerd.

Toxımê xerdeli u mirazê nani

18Bado İsay nia vat: “Hukumdariya Heqi manda çıki? Ay senên vaceri? 19Hukumdariya Heqi, toxımê xerdeliyo kı jü mêrık iy baxçê xo de ramıno, manda iy. Toxım beno gırs, beno darı. Çuçıki serê leyanê na darı de halindı vırazenê.”

20İsay ancia vat: “Hukumdariya Heqi manda çıki? 21Hukumdariya Heqi zê mirazê nania, owo kı cinıkı viçkekê gêna, kena wertê mirê xo. No viçgekê miraz mirê leganı pêro keno tırs.”

Kêbero teng

22İsa kı şiyenê Yeruşalim, her sukı u dewı de fındetenê, waaz denê. 23Jüyê İsay ra pers kerd, vat: “Wayir, iyê kı bıxeleşiyê ra, senıkê?”

İsay nia vat: 24“Kêberê Hukumdariya Heqi tengo. Sıma rê vanan: Çık kı destê sıma ra êno, bıkerê kı kêberê tengi ra cı kuyê zerrı. Zaf kes wazeno kı i kêberi ra zerrı kuyo, feqet nêşkinê iy ra ravêrê. 25Jü deqa êna kı wayirê kêyi urceno ra, kêber dano ca. Sıma teber de manê, danê kêber ro, vanê, ‘Wayir, kêber akı!’

“Feqet o sıma rê nia vano, ‘Sıma kamê? Koti ra amê, nêzanan.’

26“Sıma ki iy rê nia vanê, ‘Ma bı to'a pia werd, sımıt. To ray-olağanê ma de waaz da ma.’

27“O ki nia vano, ‘Ez sıma nas nêkenan u nêzanan sıma koti ra amê. Ey sımao kı xırabiyenı kenê, mı ra duri fınderê!’

28“İbrahim, İshaq, Yaqub,#13:28 İbrahim, İshaq, Yaqub: Ni khalıkê Yahudiyan bi, ninan waxtê verênan de weşiya xo ramıtê. jü ki pêxemberi pêro Hukumdariya Heqi de benê, feqet sıma ercinê teber. Ay ra sıma berbenê u hêrs benê#13:28 Sıma hêrs benê: Greki de “Dıdananê xo qırçqırçnenê”. Mana na qesa hêrs biyayena.. 29Her ca ra mordemi ênê: Rocda ra, rocawan ra, zımı u veroc ra. Ni Hukumdariya Heqi de sıfra de nisenê ro. 30Nay bızanerê kı iyê kı peyınê, benê sıfteyın; iyê kı sıfteyınê, benê peyın.”

Zerria İsay saba mıletê Yeruşalimi zan dana

31A sırı de, tay Ferisi amay, inan İsay rê nia vat: “Nıta ra so cayê de bini. Hirodes wazeno kı to bıkisero.”

32İsay inan rê vat: “Sêrê, a lüye rê vacerê, ‘Eyro jü ki sodıra, cınan kenan teber u nêwesan kenan wes. Roca hirêyını de, ez karê xo qedenenan.’ 33Feqet gereko kı ez ancia eyro, sodır, u roca binı raya xo ra sêri; jü pêxember xerca Yeruşalimi cayê bini de bımıro nêbeno!

34“Yeruşalim, Yeruşalim! Tiyay kı pêxemberan kisenay, xeberdaranê Heqi sanay kemeran ver! Senên kı jü kergı çhêlıkanê xo top kena bınê perranê xo, mın ki çend rey wast sıma hini top keri, feqet sıma nêwast. 35Ay ra Heq kê sıma ca verdano, sono. Sıma rê nay vaceri: Hata kı sıma mevacerê, ‘Owo kı bı namê Heqi'a amo, bımbarek bo!’ sıma reyna mın nêvênenê.”

Currently Selected:

Luka 13: kiu

Highlight

Copy