MATHE 3
3
qid nyhab' Byid' Yaug Yohan Kho" Kyo" Ra" Khyo
(Marku 1.1-8; Luka 3.1-18; Yohan 1.19-28)
1Ai: ayo, mae qid nyhab' byid: yaug Yohan wa Yuda mung" mae" din"pyad' yo khyo joe" li" mung:- 2Myid tha" ge,- pe"mung:ga"re mug:gaung: mung"dan: wa jhao" li" na: ava"- ga: kho" kyo" na: ra". 3Yohan wa Lapa Esaia yang-
Din" pyad' yo mae hug' na: ra" thoe wa
Asang: khyo re nyhang" to: ge,- yao" khyo re din: za: nyhang" jhao" ge, ga: ta" ra" yaug ngad: ra".
4Amung: Yohan wa gola:u mug' yang qo; ra" mai bau: re ve, mung: sho:qid phyid' cui: cui" ci: ra". Yao" zo:ve wa khyag' phaung" we' seyo: byoyhid ngad: ra". 5Yerusalem mae na: ra" mo,- Yuda mung" geim" mae" mo, we' Yodan gyaung: lhang" mae" mo,byu qe alhab' Yohan jhao" ye: mung:- 6Yao: bam: qobo jham yelhang: yu: ru we' Yohan: lo, mae Yodan gyaung: mae qid nyhab' kham: yu: ako".
7Yohan wa Pharishe qe we' Saduke qe myo: sho' mo, qid nyhab' kham: yu nae" ga: li" ko" rure myao lao"- yao: bam re- Lhao maui amyu" qe we"- Joe" lo: na: ra" Mao"So nhag' yo" rumae" qo" phao: loe, nae" naonhaung" re khag' yang li" ta" peim: byid: ko" i? 8Amung: myid tha" ru we' man: qi" ra" ashi: zaui: ge,- 9Abraham wa naonhaung" yao: pho" ngad: ein: naonhaung" yao: yao" aung khug mae damyid: lam: na ge,- ngo naonhaung" re ta" geli"- Mao"So wa ce: laug baui jham mae" Abraham qhid' mae" yao: zo: qe re qo" phan" thug' ke' ra". 10Ana" yao: lhao" sag' gae jham re apan mae" thau: pye' nae" qhid' mae" vozaung: wa jin" jin" ngad: ava". Airu: mung: ashi: gai mazaui" ra" sag' gae khao: ngo" re thau: lhang" ke' mung: myi:khyeim" khug khyo pye' zaui: ke' ra". 11Ngo wa naonhaung" myid tha" va" ga" ru qhid' mae" naonhaung" re qid mae qid nyhab' byid' ra". Ngadqere: nga" thao mae joe" li" nae" ra" yaug wa naonhaung" re Gyang" lho" Byo mae re:- myi: mae re: qid nyhab' li" byid' li" nae". Yao: wa ngo tho' qam: so' je: bo yaug ngad: ra". 12Yao" lo, mae gaug khyo" nae" qhid' mae" gaug khyo" gaung: zhab' ci: ra". Amung: yao: wa gaug nao: jao: mae" gaug bam re vhag' kyang" pye' mung yang: gaug mo jham re wa yao" gaug jhi khug mae gag: zhang: ke' to" li" nae". Gaug seim jham re kam" wa matho' se' ra" myi:khyeim" mae ngha" pye' li" nae"- ga: kho" kyo" ra".
Yesu qid nyhab' Kham: Yu: Ru
(Marku 1.9-11; Luka 3.21-22)
13Ai: thao re Yesu wa Yohan lo, mae qid nyhab' kham: yu nae" qhid' mae" Galile mung" mae" Yodan gyaung: khyo Yohan jhao" joe" lo: ra". 14Ngadqere: Yohan wa Ngo yaug; ni" lo, mae qid nyhab' kham: yu ca" yaug angad: ru nao lam: ngojhao" ali" i? ga: ta" mung: Yesu re lham: tam" ra".
15Alao" Yesu wa yao: re tau: mung:- ana" wa ngore qid nyhab' kham: byid: la,- pe"mung:ga"re ceru: kad' ru wa nyhao: shid' zo: Mao"So myid o: ra" mau" zo" alhab' re zaui" pyang" ru ngad nae" ga:- ta" ra". Alao" Yohan wa gai: ga: tau" ra".
16Yesu qid nyhab' bin: kham: yu we' qid mae" thug' lo: na: au:- qu" wa, mung: gaung go; bung" li" mung: Mao"So: Byo wa phaung" kyug' ru: dao" gyo" li" mung: Yesu dao mae li" no" rure yao: myao: ra". 17Ai: thao re- ceyaug, wa ngo jhid'de; ra" nga" zo: ngad: Yao: re ngo o ngaui: ra" ga: mug:gaung mae" thoe jhau: thug' li" ra".
Currently Selected:
MATHE 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
