1 KORINTHU 15
15
Khristu Dam: Daui: To" Li" Ru
1Nga" mao:nhaung: qe we"- ngo naonhaung" re kho" kyo: byid: yang: naonhaung" khae: yu mung: gang: gang: tang tang khyo" lam khug:lo ko" ra" ai: Lau Dao: Gai re ngo naonhaung" re dam: myid: beim: nhao nug: ra". 2Aiwa ngo naonhaung" re kho" kyo" ra" mungdao: ngaui bau" lau dao: ngad: ra"- naonhaung" wa ai: ngaui bau" lau dao: re tang za: zaui" ci ko" ngad: re wa- ai: khyo" yang naonhaung" khyad' yu: ru qhug'li" genae". Airu: mangad: re wa naonhaung" lam khug: ru wa akeim za: ngad: ra".
3Ngo wa ngoyao: qo" khae: yu: ra" akhyag: thao" ra" khyo re naonhaung" jhao" kai" byid' ke' ru ngad: ra". Airu wa Jham: Mugsug' mae tung" to" ru we' dakhyo:- Khristu wa ngonhaung" qhid' mae" shid kham: byid: va" ra". 4Yao: wa nyhab' shaung: pye' ru qhug' mung:- Jham: Mugsug' mae tung" to" ru we' dakhyo:- sam ba thao re yao:wa dam: daui: to" li" nhao: ru qhug' ava". 5Yao: wa Petru re na: qhu" mung:- ai: thao lagyo: daxe: shid' yaug re na: qhu" byid' ra". 6Ai: thao yao: wa yao" thao cao" ko" ra" mo, byu ngo" yo zo: re dalhang: dae na: qhu" byid' ra". Ai bam mae" myo: phyao: ana" ba joe" sho' daui: na: ashiko". Daqhae: kam" wa shid: byaug: avako". 7Amung: ai: thao re Yaku re yao" gaung na: qhu" mung:- ai: thao lagyo: qe alhab' mo; re na: qhu" byid' ra".
8Lo" thao" mae ba na mange; ru khau: li" ra" yaug we' dau: ra" ngo rere: na: qhu" byid' ra". 9Pe"mung:ga"re ngo wa lagyo: qe alhab' mae ngai: thao" ra" yaug ngad: ra". Mao"So: phung: re yhin" lo yaug ngad: ruyang ngo wa lagyo: ein: mhang" nae" lhao" re: man: qi" yaug mangad:- 10Ngadqere: Mao"So: jeju khyo" yang ngo wa ana" ru: boe" na: ru we' yao: ngore byid' ra" nhag' myan" ra" jeju wa- aje amyid maboe" pye' ngad: ra". Ngo wa lagyo: gaje qe tho' qam: ke' yang: mau" zaui: so" ra"- Airu: qo" zaui: so" ru wa- ngoyao" qam: so' khyo" yang mangad:- Mao"So: nhag' myan" ra" jeju khyo" yang za: ngad: ra". 11Airumung: ngokhyo" ngad: re ngad- lagyo: gaje qe yao: bam khyo" ngad: re ngad- ngonhaung" alhab' mo, kho" kyo" ru wa- ceru ngad: ra". Naonhaung" re: ce: rure lam" avako".
Ngonhaung" Nho: Dam: Daui: To" Li" Nae" Khyo
12Ana" Khristu wa shid: rumae" dam: daui: to" li" ra" khyo re ngonhaung" mungdao: kho" kyo" na: re- naonhaung" mae" daqhae: wa- shid: ra" mo, dam: daui: to" li" nae" khyo majo,- ga: khoru: mung: ta" na ko" i? 13Ai: khyo gaigai: dang: ngad: re wa Khristu wa shid: rumae" dam: daui: to" li" nhao ru maqhug' shingad: ra". 14Yesu wa shid: rumae" dam: daui: to" li" nhao: ru maqhug' shingad: re wa- ngonhaung" kho" kyo: nae" pe" majo; ru we' naonhaung" lam" nae" re: pe" majo, ngad: ra". 15Aitho' mago" shid: ra" mo, wa dam: daui: to" li" nhao: ru majo, ga" ra" dao: dang: ngad: re wa- Mao"So wa Khristu re shid: rumae" dam: daui: to" li" nhao nae" mangad:- Airumung: Mao"So wa Khristu re shid: rumae" dam: daui: to" li" nhao ava" ga:- kho" kyo: mo, ngonhaung" wa Mao"So: khyo re mhug' ta" ra" mo, ngad: ru de: de: ngad: ra". 16Pe"mung:ga"re shid: ra" mo, dam: daui: to" li" nhao: ru maqhug' ngad: re wa- Khristu re: dam: daui: to" li" nhao: ru qhug' nae" mangad:. 17Khristu wa dam: daui: to" li" nhao: ru maqhug' ngad: re wa- naonhaung" lam khug: rure: shad' nghung" ru we' naonhaung" wa naonhaung" yao" qobo khug mae nab; jo; ashiko". 18Ailao"- Khristu re lam khug yang: shid: lo" byaug ra" mo, re: jeim" byaug va" ga" ra" lajheim: thug' ra". 19Ngonhaung" wa- ana" ce: pyad mae za: Khristu khug mae myid: lao" nae" khyo qo" bam: ngad: re wa- mug: myid dao mae" byu gaje yaug khao: ngo" tho' mae jeyang: sho: jhin: ra" mo, ngad: ra".
20Ngadqere: dangman" ru wa- Khristu wa shid: rumae" dang za: dam: daui: to" li" nhao: ru qhug' ava"- amung: Khristu mae yab; pyo" jo; ra" mo, re: dam: daui: to" li' nae" ngad:- ga" rure pakham: qo" nhao: ra". 21Pe"mung:ga"re shid: ru wa byu dayaug: mathao mae boe" li" ru we' dakhyo:- byu dayaug: mathao mae shid: rumae" dam: daui: to" li" ru boe" li" ra". 22Byu alhab' mo; wa Adam: we' dadang: dalam: za: doe, geyang:- shid ko" ru we' dakhyo:- Khristu we' dadang: dalam: za: doe, ko" ra" khyo" yang alhab' mo; wa shid: rumae" dam: daui: to" li" nhao: ru qhug' li" genae". 23Ngadqere: yaug khao: ngo" wa yao: yao" agu ang: ra" khyo" daui: to" li" nhao: ru qhug' li" genae". Khristu wa sao qhid' mae daui: to" li" mung:- ai: thao re Khristu dam: joe" li" ra" ba na mae wa yao: we' sin" ra" yao" byu qe dam: daui: to" li" genae" ngad: ra". 24Ai: thao re- lo" thao" ba na joe" li" li" nae". Ailao"- Khristu wa eib: na: ra" byo jham alhab'- kheim: so' qo" ra" mo, alhab'- qam: so' bo: ra" mo, alhab' re aung doe; pye' mung:- Mung"dan: re Mao"So: lo, khyo ab byid' li" nae". 25Pe"mung:ga"re Mao"So wa gyevo alhab' re aung: pye' yang:- yao: bam re Khristu nho: khyid vo: qao: mae to: byid' ra" ba na joe" sho' Khristu eib: na ca" ra". 26Lo" thao" khyo" aung: pye' nae" ra" gyevo wa- shid: ru ngad: ra". 27Pe"mung:ga"re- jham: mugsug' mae Mao"So wa ja: khao: ngo" re yao" khyid qao: mae ke' to: byid' ra"- ga: bo: ra". Ja: khao: ngo" ga" ra" dao: mae- ja: khao: ngo" re Khristu khyid qao: mae ke' byid' ra" Mao"So yao: yao: mabobo: ru wa de: de: za: ngad: ra". 28Ngadqere: ja: khao: ngo" re Khristu eib: ra" qao: mae to: byid: thao re Yao: Zo: yao: yao: re: ja: khao: ngo" re yao" khyid qao: mae ke' byid' ra" Mao"So: qao: mae na mung:- Mao"So wa alhab' dao mae bin sho' eib: na: li" nae".
29Shid: ra" mo; qhid' mae" gaung tha"- qid nyhab' kham: yu: ra" mo; khyo wa khoru i? Pe" akyu" qo" nae" qhid' mae" yao: bam myid: lao" yang:- airu: kad' ako" i? Su daqhae: ta" ko" ru we' dakhyo:- shid: ra" mo, wa madam: daui: to" li" lo genae"- ga" ra" dao: dang: ngad: re wa- shid: ra" mo; qhid' mae" gaung tha"- yao: bam pe"mung: qid nyhab' kham: yu ko" laug i? 30Ngonhaung" yao: ngonhaung" re qu" gelang: ga" re pe"mung: yo, qug khao: ngo" mae- kao so' re dan: pye' yang: shid gyan nogyan re thaung" qhug' na zo" re" qam: ke' na geli" i? 31Nga" mao:nhaung: qe we"- ngo wa shid ru we' ba khao: ba ngo" thaung" qhug' na: ra". Ngonhaung" Asang Khristu Yesu we' dadang: dalam: za: doe; ra" kao so' daui khyo mae ngo naonhaung" mathao mae qo" phug: ruyang cedao: ta" ru ngad: ra". 32Ngo wa byu xao su: shad' khyo" ta" gelang: ga" re- Ephesu vogaung: mae gug'nyhug' lae" we' ngo jho" se' ru wa- pe" akyu" bo nae" i? Shid: ra" mo, madam: daui: to" li" nae" ngad: re wa- dao: khyo: we' dakhyo:- Zo: gelang:- shaug' gelang:- ngonhaung" ne, mo" ba shid zai ngad:-
33Damyid: nghung: ge,- magai ra" byin cao: qe wa gai: ra" ave, akyang re phyo' qheim" pye' byid' ako". 34Dam: beim: so: ge,- Qobo lo, mau" jham re thang: pye' ge,- naonhaung" mae" damyo" wa Mao"So re maba ngad: ako". Naonhaung" gyo" qho' geshao:- ein: ngo ceru: ta" ru ngad: ra".
Dam: Daui: To" Li" Ra" Gaung Khyao
35Dayaug yaug wa- Aire- shid: ra" mo, khoru: qo" dam: daui: to" li" nae" i? Yao: bam khoru" ra" gaung khyao we' ngad genae" i? ga: myid' li" nae". 36Ago we"- myid gaung mae nao qho" ke' ra" myug: shi: wa- maqeim: lo" byaug: re wa maqo" yaug: thug' li" ngad: ra". 37Nao qho" ke' ra" myug: shi: wa- jung: gaug shi:- mangad: lao"- gatau qhovo: shi: daja: ja: za: ngad: ra"- thao re yaug: li" nae" ra" agae re yao: nao maqho: ngad: ra". 38Mao"So wa ai: myug: shi: re yao: myid: o: ra" agae azang byid' ra". Yao: wa myug: shi: ce' khao: ngo" re yao: we' dau: ga" ra" agae azang byid' ra".
39Gaung sho: bo yang: daui: na: ra" ja: na mana alhab' wa sho: daja: za: mangad: ngad: ako". Xao su byu qe: sho: daja:- gug'nyhug' jham: sho: daja:- ngho' jham: sho: daja:- ngo: sho: wa gatau daja: ngad: ra".
40Amung:- mug:gaung we' sin" ra" gaung khyao jham we' myid gaung we' sin" ra" gaung khyao jham ga:- jo; ra". Mug:gaung we' sin" ra" gaung khyao jham: yaung" shab: ru we' myid gaung we' sin" ra" gaung khyao jham yaung" shab ru majho" dau ngad: ako". 41Ba yaung" shab: ru dakhyo"- lho" yaung" shab: ru daja:- kyi jham: yaung" shab: ru wa gatau daja: ngad: ra". Kyi jham: phaung mae lhao" re:- dace' we' dace' yaung" shab: ru majho" dau ngad: ako".
42Shid: ra" mo, dam: daui: to" li" nhao: rumae re:- ce we' dakhyo: ngad: li" nae". Gaung khyao wa nyhab' pye' ru qhug' ra" au:- shid ba: ra" gaung khyao ngad: ra". Dam: daui: to" li" nhao: ru qhug' lao" wa- shid maba: ra" gaung khyao ngad: li" nae". 43Nyhab' ke' ra" au: wa- qu" cae: qu" yao ngad: ru we' qam: nang" ra". Dam: daui: to" li" nhao lao" wa- yaung" shab: ru we' qam: bo: ru ngad: li" nae". 44Nyhab' ke' ra" au: wa- gaung sho: gaung khyao ngad: ra". Dam: daui: to" li" lao" wa- byo gaung khyao ngad: li" nae". Gaung sho: gaung khyao jo; ru we' dakhyo:- byo gaung khyao re: jo, nae" ngad: ra". 45Pe"mung:ga"re jham: mugsug' mae- sao qhid' mae" byu Adam: wa kao so' daui: ra" byu boe" li" ra"- ga: ta" to" ra". Thao mae" Adam: wa kao so' byid' ra" Byo ngad: ra". 46Byo we' sin" ra" gaung khyao shi" sao qhid' boe" ru mangad:- gaung sho: we' sin" ra" gaung khyao shi" sao qhid' boe" mung:- thao re byo we' sin" ra" gaung khyao boe" ru ngad: ra". 47Sao qhid' Adam re wa myid zhai" yang phan" to: mung:- myid gaung mae" li" ra". Thao mae" Adam wa mug:gaung: mae" li" yaug ngad: ra". 48Ai: myid gaung we' sin" ra" byu qe wa- myid zhai" yang phan" to" ra" yaug we' dau: ako". Mug:gaung we' sin" ra" byu qe wa- mug:gaung mae" li" ra" yaug we' dau: ako". 49Ngonhaung" wa myid zhai" yang phan" to" ra" yaug we' dau: ra" akhyao re zhaung" ve; ci: ru we' dakhyo:- mug:gaung mae" li" ra" yaug we' dau: ra" akhyao rere: ngonhaung" zhaung" ve; cili" nae" ngad: ra".
50Mao:nhaung: qe we"- ngo naonhaung" re ta" geli". Sho: we' sa: wa Mao"So: mung"dan: re maqo" sang: yu ngad: ra". Shid: qeim: lo" ba: ra" akhyao wa shid: qeim: lo" maba: ra" akhyao re maqo" sang: yu ngad: ra".
51Ce: no; thao" ra" dangman" ra" khyo re tae" gyo" yu ge,- ngonhaung" alhab' wa- mashid nae"-
52Lo" thao" ra" labo" myang: thug' li" lao"- damyo, nyag mae ngonhaung" alhab' mo, wa tha" lo" byaug nae" ngad: ra". Pe"mung:ga"re ai: labo" thoe myang: thug' li" lao"- shid: ra" mo, wa dam: daui: to" li" nhao: ru qhug' mung:- khonhae" re: madam: shid logenae". Ngonhaung" alhab' wa tha" lo" byaug nae" ngad: ra". 53Pe"mung:ga"re bab: qeim: lo" ba: ru wa- maba: bab: qeim: lo" ru khyo- shid ba: ru wa- maba: shid: ru khyo tha" lo" li" nae". 54Bab: qeim: lo" ba: ru wa- maba: bab: qeim: lo" ru khyo- shid ba: ru wa- shid: maba: ru khyo tha" lo" byaug lao"- shid: ru wa aung doe; ruyang myug: pye' ru qhug' ava"- ga: ta" ra" jham: dao: jab byang" lo: li" nae".
55Shid: ru we"- ni" aung doe; ru wa khai: mae i?
Shid: ru we"- ni" daug wa khai: mae ngad: ra" i?
56Shid: ru: nho: daug wa qobo ngad: ra". Qobo wa kham" to" ra" tarha" mae" qam: so' qo" yu: ra". 57Ngadqere: Asang Yesu Khristu khyo" yang ngonhaung" re aung doe; ru byid' ra" Mao"So: jeju wa qi" qhang: jo; ra" wo".
58Airumung: nga" jhid'de; ra" mao:nhaung: qe we"- gang: tang za: ye; jo, ge,- Asang: nho: mau" zo" re vin vo; ru wa- aje amyid mangad' rure beim: mung:- Asang: qhid' mae" khonhae" re: qam: ke' na ge,.
Currently Selected:
1 KORINTHU 15: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
