मरकुस 15

पिलातुस यीशु पंची करीण

मत्ती 27:1-2; 27:11-14; लूका 23:1-5; यूहन्ना 18:28-38

1भ्यागे भुन्ते ईं मुख्य पुजारे, धर्मशास्त्री, टजे स्याणे त यहूदी मेह्‍णु के टजोट अपफ बुच सलाह कर कइ यीशु बन्हा त नी कइ राज्यपाल पिलातुसे हवाले किआ। 2पिलातुसे तेस केआं पुछु, “तु यहूदी के राजा भो ना?” तेन तेस जे जवाब दिता, “तु अपफ बोलुण लगो असा।” 3मुख्य पुजारे तेस पुठ सुआ बोकी के दोष लाण लगो थिए। 4पिलातुसे तेस केआं दुबारी पुछु, “तु किस कुछ जवाब न देन्ता? हेर, ई तोउ पुठ कत बोकी के दोष लाण लगो असे?” 5तोउं बि यीशु कोई जवाब न दिता। इस पुठ पिलातुस यकदम हैरान भोई गा।

यीशु मरणे सज्जा मेण

मत्ती 27:15-26; लूका 23:13-25; यूहन्ना 18:39—19:16

6पिलातुस हर साल, बचणे त्योहारे बुच तेस कैदी छड़ देन्ताथ, जेस मेह्‍णु चहन्तेथ। 7कैदी बिच बरअब्बा नओएं यक मेह्‍णु थिआ, जेन बगावत अन्तर मेह्‍णु मरो थिए। 8त हुसुड़ा पिलातुस केईं घेई कइ तेसे छनेअरे करण लगा, “जीं तु हें लिए हर साल कता तिहांणि इस साल बि कर।” 9-10पर किस कि पिलातुस जाणताथ कि मुख्य पुजारे तस हेर जड़ कइ से टाओ असा, त तेन तेन्हि केआं पुछु, “तुस कि चहन्ते ना कि अउं तुं लिए यहूदी के राजा छड़ दिउं?” 11पर मुख्य पुजारे ई बोलुण जे मेह्‍णु बेहकाइ छड़े कि “असी जे सद बरअब्बा छड़ दिए।” 12त पिलातुसे फि तेन्हि केआं पुछु, “त जेस जे तुस ‘यहूदी के राजा’ बोते, तेस जोई मोउं की करुं?” 13त से सम्हाई जोरी जोई बोलुण लगे, “तेस क्रूस पुठ ढनाई छड़े!” 14पिलातुसे तेन्हि जे बोलु, “किस! अनि की बुरे कम किओ असे?” पर से टेठु चीर चीर कइ बोलुण लगे, “एस क्रूस पुठ ढनाई छड़े!” 15तोउं पिलातुस मेह्‍णु खुश करुण जे बरअब्बा छड़ दिता, त यीशु चाबुके बइ मडवाई कइ रोमी सपाही के हवाले किआ कि से क्रूस पुठ ढनाई छड़े।

सपाही यीशु मजाक बणाण

मत्ती 27:27-31; यूहन्ना 19:2-3

16त सपाही यीशु राजवाड़ी अन्तर घिन गे (जेस जे प्रीटोरियम बोते), त पूरी पलटन भिआई कइ किठे भुए। 17तोउं तेन्हि तस कच्चे काए रंगी झिणे डबे त कंटि के मुकुट बणाई कइ तसे मगिर पुठ लाई छड़ा, 18त तसे मखोल बणाण ईं बोल कइ कि “ए यहूदी के राजीया, तें जइ भो” तस जे सलामी देण लगे। 19से तसे मगिर पुठ लठि बइ देन्तेथ, तेस पुठ थूकतेथ त उटेऊ बिश कइ तेस जे प्रणाम करणे ढंग कते रिहे। 20जपल से तसे मखोल बड़ाई बिशे, त से कच्चे काए रंगे झिणे खुलाई कइ तसेरी झिणे डबाई छड़े; तोउं तेस क्रूस पुठ ढनाण जे बाहर घिन गे।

यीशु क्रूस पुठ ढनाण

मत्ती 27:32-44; लूका 23:26-43; यूहन्ना 19:17-27

21तपल शमौन नओएं यक मेह्‍णु ग्रां केआं तेनबाई एणे लगो थिआ। से कुरेन शेहरे थिआ त सिकन्दर त रुफुसे बोउ थिआ। तेन्हि तस जुए जब्बरदस्ती कइ तेस थम डिलुण जे बोलु, जेस पुठ यीशु ढनाण थिआ। 22से यीशु “गुलगुता” नओएं जगाई पुठ जे अण्हते, जेसे मतलब “म्युकुड़ु जगाह” असी। 23तोउं से तसे धे पितकाड़ु मिओ अराख देण लगे, पर तेन न पिआ। 24तोउं तेन्हि से क्रूस पुठ ढना त तसे झिणि के लखिर छइ कि केस की मेतु। तोउं तेन्हि से झिणे अपफ बुछ बांट छड़े। 25जपल तेन्हि से क्रूस पुठ ढना, तपल भ्यागे लगभग नउ बज गो थिआ। 26तोउं तेन्हि तसे दोष “यहूदी के राजा” पट्टि पुठ लिख कइ तसे पुठे लाई छड़ा। 27तेन्हि तेस जोई साते दुई डाकु, यक तसे देहणा कना त यक तसे बउंआ कना क्रूस पुठ ढनाई छड़े। [28तोउं त धरमे कताबे से बोक कि

“मेह्‍णु तस अपराधी ईं समझते”

से पूरी भुई।]#यशायाह 53:12

29एन्ते घेन्ते सोब जेईं अपु अपु मगिर हिलाई हिलाई त ईं बोल बोल कइ तसे बेज्जती की कि, “ओ देहेर टोड़ कइ टाई रोज अन्तर दुबारी बणाणे बाड़ा!#मरकुस 14:58; यूहन्ना 2:19 30क्रूस पुठा भीं एई कइ अपफ बचाण दे।” 31इहांणि मुख्य पुजारे बि धर्मशास्त्री जुए ई बोक लाई कइ तसे मखोल बणा कि “अनि होरे बचाए, पर अपफ बच ना बटा। 32इस्राएले राजा, मसीह, अभेईं क्रूस पुठा भीं एई घियाल त हेर कइ एस पुठ विश्वास करुं।” त जे तेस जोई साते क्रूस पुठ ढनाओ थिए, तेन्हि बि तसे बेज्जती की।

यीशु मरुण

मत्ती 27:45-56; लूका 23:44-49; यूहन्ना 19:28-30

33दिसाई बाराह बज केआं पूरे देश अन्तर अन्हारु भोई गोउ, त टाई बज तकर अन्हारु रेहु। 34तोउं टाई बज यीशु जोरी जोई ईं बोलु, “इलोई, इलोई, लमा शबक्तनी?” जेसे मतलब,

“ए में परमेश्वरा, ए में परमेश्वरा! तेईं अउं किस छड़ दिता?”#छुआंरी 22:1

35त जे भेएड़ खड़ खड़ थिए, तेन्हि अन्तरा आधी ई शुण कइ बोलु, “हेरे, ए एलिय्याह भविष्य वक्ता जे हक देण लगो असा।” 36तोउं यक जेईं दौड़ दी कइ यक स्पंज#15:36 स्पंज शेवा ईं भुन्ता त पुओणि चुशुण जे मेह्‍णु एसे इस्तेमाल कतेथ। नओएं यक चीज सिरके अन्तर सेली, त यक लठि पुठ रख कइ तेस केआं चुशा त बोलु, “चुप बिशे! चले हेरते कि एलिय्याह एस भीं किढ़ण जे एन्ता कि न एन्ता।” 37तोउं यीशु जोरी जोई लियार दी कइ मर गा। 38त देहरे चादुर#15:38 यरुशलेम देहेर अन्तर शुची जगाह त तीं शुची जगाह बि असी, जेस अन्तर नियमे सन्नूक भुन्ता। तस बखरे रखण जे यक मोटा परदा भुन्ता। इस जगाई बोडा पुजारा साल अन्तर सिर्फ यक लिंगि घेन्ताथ त होरे मेह्‍णु एस अन्तर घेणे इजाजत ना भुन्तीथ। बेहिआं बुन्ह तकर चीरी कइ दुई टुकुड़ भोई गा। 39सुबेदार,#15:39 सुबेदार सौ सपाही के सेनापति भुन्ताथ। जे तसे सामणि खड़ खड़ थिआ, जपल तेन ईं लियारी देण त मरुण काउ, त तेन बोलु, “सच्चे, ए मनख परमेश्वरे कुआ थिआ।”

40इ घटना कुछ जिल्हाणु दूरा हेरी बिशो थी : तेन्हि अन्तर मगदला ग्रांए मरियम, मठुड़ याकूब त योसेसे ई मरियम, त सलोमी थी।#लूका 8:2,3 41जपल यीशु गलील इलाके थिआ त ए जिल्हाणु तसे पता पता घेन्तीथ त तसे सेवा कतीथ; एन्हि जोई होरी बि सुआ जिल्हाणु थी, जे यीशु जोई साते यरुशलेम शेहर अओ थी।

यीशु पथण

मत्ती 27:57-61; लूका 23:50-56; यूहन्ना 19:38-42

42ई घटना भक्ति करणे रोजे पेहलकण रोज भुई जे कि भक्ति करणे रोजे तेयारी करणे दन थिआ। जपल झवादी भुई, 43त अरिमतिया शेहरे#15:43 अरिमतिया शेहर यरुशलेम शेहर केआं कोई 32 किलोमिटर उत्तर-पश्चिम दिशा अन्तर थिआ। यूसुफ आ। से यहूदी समिति यक इज्जतदार सदस्य थिआ त अपफ परमेश्वरे राज्य एणे भाड़ बिश्ताथ। से हिम्मत कर कइ राज्यपाल पिलातुस केईं गा त यीशु लाश मगी। 44त पिलातुसे शुणु कि यीशु झट मर गा, त से हैरान भोई गा। तोउं तेन सुबेदार भिआई कइ पुछा, “सच्चे, से मर गा ना?” 45त तेस सुबेदार केआं पूरा पता लग गा त तेन यीशु लाश यूसुफे धे दी छड़ी। 46तोउं यूसुफे यक हच्छा कपड़ा खरीदा, त लाश भीं किढ़ कइ तेस अन्तर लपेटी, त यक कब्रे कुड अन्तर रखी, जे फाट पुठ कोरो थी। त कब्रे दुआर पुठ यक बोडा पठ दी छड़ा। 47मगदला ग्रांए मरियम त योसेसे ई मरियम हेरण लगो थी कि से कोठि छो असा।

Currently Selected:

मरकुस 15: pgg

Highlight

Copy