मरकुस 1

शुरुवात

(1:1-13)

मेह्‍णु चुसुणे बाड़े यूहन्ने प्रचार

मत्ती 3:1-12; लूका 3:1-9; 3:15-17; यूहन्ना 1:19-28

1परमेश्वरे कुआ#मत्ती 4:3 यीशु मसीहे खुश खबरी शुरुवात ई भो। 2जीं यशायाह भविष्य वक्ते अपु कताब अन्तर लिखो असु, जे परमेश्वरे यीशु मसीह बारे तस जे बोलो थी कि

“हेर, अउं अपु दूत तोउ केआं अगर लंघान्ता,

जे तोउ जे बथ सुसुर जुढ़ारता#1:2 ए बोक सद यशायाह भविष्य वक्ते नेओथ बोलो, मलाखी भविष्य वक्ता बि बोलो थी।।#मलाखी 3:1; मत्ती 11:10; लूका 7:27

3अरुणि धार अन्तर कोई यक हुशेरि दी दी कइ बोलुण लगो असा, जीं तसे बोकरुआ शुणु लगो असा कि

प्रभु जे बथ बणाण दिए, त तसे बथ सुसुर कइ बणाए।”#यशायाह 40:3; यूहन्ना 1:23

4तीं यूहन्ना नओएं यक मेह्‍णु अरुणि धार अन्तर एई कइ प्रचार करण लगा कि “ओ मेह्‍णुओ! अपु अपु मन बदिल कइ पुओणि अन्तर चुसीण दिए। तोउं तुं पाप माफ भोई घेन्ते।” 5सम्हाई यहूदिया राज्ये त यरुशलेमे शेहरे सोब बसणे बाड़े तेस केईं गे, त अपु अपु पाप मान कइ यरदन दरेउ अन्तर तेस केआं चुसिए।

6यूहन्ना ऊंटी के ऊनि के बणो झिणे लान्‍ताथ त छोड़ी मझीन पिड़ताथ। से टठ त जंगले मखीर खांताथ। #2 राजा 1:8 7त से ईं प्रचार कताथ कि, “मोउं केआं पता जे एणे बाड़ा असा, से मोउं केआं बि ताकतवर असा; में त अति बि औकात नेईं कि उनकुशी कइ तसे बूटि के तसमे खोलुं। 8अउं त तुसी पुओणि अन्तर चुसता, पर से तुसी शुची आत्मा अन्तर चुसता।”#1:8 एसे मतलब असा कि से तुं अन्तर शुची आत्मा छइ कइ तुं दिल मन शुचा कता।#यशायाह 44:3; यूहन्ना 1:33; प्रतिनिधि 1:5; 2:4; 11:16; 19:4-6

यूहन्ने यीशु चुसुण

मत्ती 3:13-17; लूका 3:21-22

9तेन्हि रोजी यीशु गलील राज्ये नासरत ग्रां केआं आ त यरदन दरेउ अन्तर यूहन्ना केईआं चुसिआ।#मत्ती 3:1 10त जिखेईं से पाणि अन्तरा निस कइ बेहीं आ, त तेन झट अम्बर खुलते त अलणी ईं शुची आत्मा अपु पुठे एन्ती काई। 11त अम्बर केआं ईं बोते अवाज शुणी, “तु में ट्यारा कुआ भो, तोउ जोई अउं खुश असा।”#यशायाह 42:1; छुआंरी 2:7; मत्ती 3:17; 12:18; मरकुस 9:7; लूका 3:22

शैतान यीशु लचेरण

मत्ती 4:1-11; लूका 4:1-13

12तोउं शुची आत्माई से अरुणि धार जे नी छड़ा। 13अरुणि धार अन्तर शैताने चढ़ी रोज तकर से लचेरा; त से बण जीवी जोई बिशा, त स्वर्गेदूत तसे सेवा कते रिहे।

गलील राज्य अन्तर यीशु सेवाई कम

(1:14—6:13)

यीशु अपु कम शुरु करण

मत्ती 4:12-17; लूका 4:14-15

14हेरोदेस राजा यूहन्ना टोवाण केआं पता यीशु गलील राज्य एई कइ परमेश्वरे खुश खबरी प्रचार किआ। 15त बोलु, “टेम पूरा भोई गा त परमेश्वरे राज्य नीड़ा एई गो असा। अपु अपु पाप केआं मन बदलीण दिए त खुश खबरी पुठ विश्वास कर कइ बच घिए।”#मत्ती 3:2

यीशु अपु पेहले चेले भिआण

मत्ती 4:18-22; लूका 5:1-11

16पता यक रोज, गलीले तथे औत पुठ घेन्त पेंत यीशु शमौन त तसे भाई अन्द्रियास तठि जाल छते काए। से मछवारे थिए। 17यीशु तेन्हि जे बोलु, “में पता एईए; अउं तुसी शिचालता की मेह्‍णु में चेला कीं बणाण।”#1:17 मूल भाषा अन्तर “मेह्‍णु के मछवारे बणान्ता” लिखो असु। 18त से तिखेईंए जाल छड़ दी कइ तसे पता पता घेई गे।

19तठिआ धिक अगर घेई कइ यीशु याकूब त तसे भाई यूहन्ना अपु बोउ जबदी जुओई नाव पुठ जाल जुढ़ेरते काए। 20तेन तिखेईंए से बि भिए। त से अपु बोउ जबदी मजूरी जोई नाव पुठ छड़ दी कइ, तसे पता पता घेई गे।

यीशु दुष्ट आत्माई के भुंजो मेह्‍णु ठीक करण

लूका 4:31-37

21तोउं यीशु त तसे चेले कफरनहुम शेहर आए, त जपल भक्ति करणे रोज आ त से अराधनालय अन्तर घेई कइ शिचालुण लगा। 22त मेह्‍णु तसे शिक्षाई बेलि हैरान भोई गे; किस कि से तेन्हि धर्मशास्त्री के ईं ना, बल्कि अधिकारी के ईं पूरे हक जुए शिचालताथ।#मत्ती 7:28,29

23तेस टेम, तेन्के अराधनालय अन्तर यक मेह्‍णु थिआ, जेस अन्तर दुष्ट आत्मा थी। 24तेन जोरी जोई बोलु, “ए नासरत ग्रांए यीशु, असी तोउ जोई की कम? कि तु असी खतम करुण जे अओ असा ना? अउं तोउ जाणती, तु कोउं भो। तु परमेश्वरे शुचा मनख भो!” 25यीशु तेस जे डराई कइ बोलु, “चुप बिश; त एस अन्तरा नश गा।” 26तिखेईंए दुष्ट आत्मा तेस बुमोरि कइ, त जोरी जोई लियारी दी कइ तसे अन्तरा नश गई। 27ईं हेर कइ सोब मेह्‍णु हैरान भोई कइ अपफ बुच बोक विचार करुण लगे, “ए कि बारा? ए केस किस्मी नोई शिक्षा भुई! ए त हक जोई दुष्ट आत्मा जे बि निआंग देन्ता, त से तसे निआंग मानती।” 28त तसे कमी के खबर झट गलील राज्ये औत-कोते सोबी इलाके अन्तर फैल गई।

यीशु सुआ बीमार मेह्‍णु सुसुर करुण

मत्ती 8:14-17; लूका 4:38-41

29तोउं यीशु अराधनालय अन्तरा निस कइ, याकूब त यूहन्ना जोई साते शमौन त अन्द्रियास गी गा। 30शमौने शशु सेक भुओ थिआ। त तेन्हि तसे बारे यीशु जे बोलु। 31तोउं से तसे भेएड़ गा त तसे हतेउ टाइ कइ से खड़ की; त तसे सेक मुक गा। तोउं से तसे सेवा करण लगी।

32झवादी टेम जिखेईं दिस ओली गोउ त मेह्‍णु सोबी बीमार मेह्‍णु त जेन्हि अन्तर दुष्ट आत्मा थी, तेन्हि तेस केईं घिन आए। 33त पूरे शेहरे मेह्‍णु तसे दुआर पुठ किठे भोई गे। 34त तेन सुआ बीमार मेह्‍णु सुसुरेरि छड़े जे हर किस्मी बीमारी बेलिए कष्ट अन्तर थिए। तेन सुआ मेह्‍णु केआं दुष्ट आत्मा बाहर किढ़ि, त तेन्हि बोलुण न दुतु, किस कि से तेस पिछाणतीथ।

यीशु पथवारी दुआ करीण

मत्ती 4:23; लूका 4:42-44

35होउस पथवारी, दिस निसण केआं पेहले ईं, यीशु खड़ी कइ नठा, त रुण घेई कइ तठि दुआ करण लगा। 36पता शमौन त तसे साथी तेस तोपुण लगे। 37जपल से मेईंया, त तेस जे बोलु, “ए गुरु, सोब मेह्‍णु तुसी तोपुण लगो असे।” 38पर तेन तेन्हि जे बोलु, “एईए! अस कोठि होर जगाई औत-कोत बइ ग्राईं घेन्ते, ताकि अउं तठि बि प्रचार करुं, किस कि अउं असेरी लिए अओ असा”। 39त से पूरे गलील राज्ये अराधनालय अन्तर घेई घेई कइ शिचालता रिहा त मेह्‍णु केआं दुष्ट आत्मा नशाणता रिहा।#मत्ती 4:23; 9:35

यीशु यक कोढ़ी सुसुर करण

मत्ती 8:1-4; लूका 5:12-16

40यक लिंग यक कोढ़ी यीशु भेएड़ आ। तेन तसे सामणि उटेऊ बिश कइ छनेअरे कते कते बोलु, “ए गुरुजी! अगर तु चहाल त मोउं शुचा कइ सकता”।#1:40 इस्राएली मेह्‍णु कोढ़ी जे जुठा त अशुचा मानतेथ त जपल तकर तसे बीमारी ठीक ना भोई घेन्तीथ, तेन्हि ग्रां केईआं बखरे रखतेथ। इठि कोढ़ी यीशु शुचा करण जे बोलुणे मतलब से बीमारी केआं सुसुर करण जे बोता ताकि से अपु ग्रां वापिस घेई बटियेल। 41इ बोक शुण कइ यीशु तेस पुठ दाह एई गई त तेन अपु हतेउ बइ तस छुई कइ बोलु, “अउं चहन्ता कि तु शुचा भोई गा।” 42त झट तसे कोढ़े बीमारी मुक गई, त से शुचा भोई गा। 43-44तोउं तेन से समझा त ई बोल कइ लंघाई छड़ा, कि “हेर केसे जे किछ न बोलुण, पर घेई कइ अपफ पुजारी हराल, त अपु सुसुर भुणे बारे जे भकत चढ़ाण जे मूसे#1:43-44 मूसा, पुराणे जमाने यक भविष्य वक्ता थिआ, जेसे बेलि परमेश्वरे इस्राएले मेह्‍णु कें धे होरी होरी निआंग दुतो थी। तेन्हि अन्तर अपफ केस बीमारी केआं कीं शुचा भुण असु, तेस बारे बि बोलो असु। बोलो असु तेस भकत चढ़ा, ताकि तस हेर कइ मेह्‍णु पता लगियाल कि तु शुचा भोई गो असा।” 45पर तेन बाहरी घेई कइ एतु मेह्‍णु जुए अपु बोके लाई कि यीशु शरेआम शेहर घेई न बटा, पर बाहरी रुण अन्तर बिशा; तोउं बि चोहरोई कनारा मेह्‍णु तेस केईं एन्ते रिहे।

Currently Selected:

मरकुस 1: pgg

Highlight

Copy