लूका 23

पिलातुसे अगर यीशु

मत्ती 27:1-22; मरकुस 15:1-5; यूहन्ना 18:28-38

1तोउं पूरी टजोट खड़ी कइ यीशु रोमी राज्यपाल पिलातुस अगर घिन गई। 2से ईं बोल कइ तस पुठ दोष लाण लगे कि “असी ए मेह्‍णु जे गलत शिक्षा देण, कैसरे धे मामला ना देण त अपफ जे ‘मसीह’ मतलब ‘राजा’ बोते शुणो असा।” 3पिलातुसे तस केईआं पुछु, “कि तु यहूदी के राजा भो ना?” तेन तस जे बोलु, “एस सवाल तु अपफ पुछुण लगो असा ना कि होरी बझई जुए?”#यूहन्ना 18:35 4तस हउ बि होरे सवाल पुछुण केईआं पता, पिलातुसे मुख्य पुजारे त होरे मेह्‍णु जे बोलु, “मोउं इस मेह्‍णु अन्तर कोई दोष ना केते।” 5पर से हउ जोर जोई बोलुण लगे, “ए गलील राज्य केआं शुरु कर कइ पूरी यहूदिया राज्य त यरुशलेम तकर घूम घूम कइ मेह्‍णु रोमी राज्ये खिलाफ चुखि देण लगो असा।” 6ए शुण कइ पिलातुसे पुछु, “ए मेह्‍णु कि गलील राज्ये भो ना?” 7तेन्हि केआं पता लाई कइ कि से हेरोदेस राजे रिहासते भो, त से हेरोदेस राजा जे लंघाई छड़ा, किस कि तेन्हि रोजी से बि यरुशलेम अन्तर थिआ।

हेरोदेसे साम्हणे यीशु

8हेरोदेस राजा यीशु हेर कइ सुआ खुश भुआ, किस कि से सुआ रोजी केआं तस हेरण चहन्ताथ, किस कि तेन तसे बारे शुणो थी त तस केआं कुछ निशाण#23:8 लूके लिखो इस कताब अन्तर “निशाण” मतलब “बीमार ठीक करण, दुष्ट आत्मा नशाणिण, तुफान बन्न करण, मुओ मेह्‍णु दुबारी जीआण” बगैरा बगैरा असा। हेरणे चहन्ताथ। 9से तस केआं सुआ बोके पुछता रेहा, पर तेन तस जे कोई जवाब न दिता। 10मुख्य पुजारे त धर्मशास्त्री खड़ भोई कइ तस पुठ सुआ दोष लान्ते रिहे। 11तोउं हेरोदेसे अपु सपाही जुए तसे बेज्जती कर कइ मखोल बणा त यक चिल-चिलान्ते झिणे#23:11 तेन्हि रोज सद राजा, राणी त जे सुआ अमीर भुन्तेथ से इ अब्बल ईं झिणे लान्‍तेथ। हेरोदेसे यीशु ई झिणे डबाई कइ मजाक बणा। डबाई कइ पिलातुस केईं जे लंघाई छड़ा। 12तेस रोज केआं खड़ पिलातुस त हेरोदेस मितर बणि गे। इस केआं पेहले तेन्हि दुहिए बुच अणबण थी।

यीशु मरणे सज्जा मेण

मत्ती 27:15-26; मरकुस 15:6-15; यूहन्ना 18:39—19:16

13पिलातुसे मुख्य पुजारे, यहूदी नेते त होरे मेह्‍णु भिआई कइ तेन्हि जे बोलु, 14“तुसी ई मेह्‍णु चुखि देणे बाड़ा समझ कइ मोउं केआं अण्हतो असा। त हेरे, मेईं तुं सम्हाणि एसे जांच किओ असी पर जेन्हि बोकी के तुसी एस पुठ दोष लोओ असा, तेन्हि बोकी के बारे मेईं एस अन्तर कोई दोष ना का, 15होर ना हेरोदेसे। किस कि तेनि से हें धे वापस लंघो असा। त हेरे, एसे बेलि कोई ईं कम नेईं भो कि तस मरणे सज्जा मियेल। 16-17तोउं त अउं तेस चाबुके बइ मडाई कइ छड़ देन्ता।” 18पर से सोब मी कइ लियार देण लगे त बोलु, “एस मार छड़ त असी जे बरअब्बा छड़ दे।”#23:18 त्योहारे टेमी रोमी राज्यपाले यक रिवाज थिआ कि से यहूदी मेह्‍णु के पसंदे कैदी तेन्हि जे छड़ देण। ईं कर कइ रोमी अधिकारी यहूदी मेह्‍णु के रोमी राज्ये बारे लेहेर कम करणे कोशिश कतेथ। 19से केसे शेहर अन्तर झगड़े, मेह्‍णु चुखि देणे त केसे मारणे बझई जुए जेहेल अन्तर छो थिआ। 20पर पिलातुसे यीशु छड़ देणे इच्छा रख कइ मेह्‍णु फिर समझाए। 21पर तेन्हि लियार दी कइ बोलु, “एस क्रूस#23:21 क्रूस - रोमी मेह्‍णु दोषी सज्जा देण जे ए तरीका बड़ो थी। क्रूस जीं यक जुड़ुणे निशाण + ईं कठोड़े ठेली बेलि बणान्तेथ। त दोषी मेह्‍णु हतेउ त खुर पुठ मीख लाई कइ ढनाई छतेथ। मेह्‍णु बिचारा तठि ढनाओ अशी एन्तीथ त से मर घेन्तेथ। पुठ ढनाए, क्रूस पुठ”। 22तेन टेके लिंगि तेन्हि जे बोलु, “किस, तेन की गुनाह किओ असा? मेईं तेस अन्तर मरणे सज्जा पाणे लेएक कोई बोक ना काई। तोउं त अउं तस मडाई कइ छड़ देन्ता।” 23पर से हउ बि लियार दी दी कइ तस क्रूस पुठ मारण जे बोलु लगे त जोर देण लगे। त अखिरकार पिलातुस हार मनी गा त तेन्के इच्छा पूरा करण जे ठीक किआ। 24त तेन यीशु जे मारणे सज्जा शुणाई छइ। 25पिलातुसे से मेह्‍णु, जे झगड़ीणे त मारणे बझई जुए जेहेल अन्तर थिआ, त जेस से मगतेथ, से छड़ दिता त यीशु तेन्के इच्छाई हिसाब जुए तेन्के धे दी छड़ा।

यीशु क्रूस पुठ ढनाण

मत्ती 27:32-44; मरकुस 15:1-32; यूहन्ना 19:17-27

26जिखेईं रोमी सेना यीशु नेण लगो थिए, तिखेईं तेन्हि शमौन नओएं यक कुरेन शेहरे#23:26 कुरेन जिला उत्तर अफ्रिका देश अन्तर असा, जेस जे एचेल लीबिया देश बोते। मेह्‍णु भेएड़ ग्रां केआं शेहर एन्ता का। त तेन्हि से टाइ कइ से थम डिलुण जे तेस पुठ छइ छड़ी जेस पुठ यीशु ढनाण थिआ#23:26 शयद यीशु चाबुके मार खाई कइ एतु कमजोर भोई गो थिआ कि तस केआं क्रूस बि ना उछिन्ताथ।। 27सुआ हुसुड़ा तसे पतोती हंटण लगो थिए। तस अन्तर सुआ जिल्हाणु बि थी जे यीशु हाल हेर कइ तस जे लियार दी दी कइ रोलुण लगो थी। 28त यीशु तेन्के कना खिरक कइ बोलु, “ए यरुशलेमे जिल्हाणुओ, मोउं जे ना रोले; पर अपफ जे त अपु गभुर जे रोले। 29किस कि हेरे! से रोज एन्ते, जपल मेह्‍णु बोते, ‘तेस शन्हि जिल्हाणु सुआ सुख असा, जेन कदी गभुर नेईं जमाणो। सुख तस असा जेसे पेट ना कदी गभुर बड़ो असु, होर ना जेसे चिचि गभुर पिओ असी।’ 30तपल सुआ कष्टी बझई जुए सोब मेह्‍णु फाटी जे बोते ‘असी पुठ झड़े’ त पलण जे बोते ‘असी पथि छड़।’ 31किस कि से जपल में ईं हरे बुटे#23:31 यीशु बोलुणे मतलब “में ईं नरदोष मेह्‍णु जे अगर ईं कते त जे पापी असे, तेन्हि जोई की की ना कते।” जुए ईं कते त शुके बुटी जोई की की ना कते?”

32से दुई होरे मेह्‍णु जे डाकु थिए से बि तस जुए साते मरण जे नीओ थिए। 33जिखेईं से तेस जगाई पुजे जेस जे खोपड़ी बोतेथ, तठि तेन्हि से डाकु बि यीशु देहणा त बउंआ कना क्रूस पुठ ढनाई छड़े।#यशायाह 53:12 34तिखेईं यीशु बोलु, “बोउआ, अन्हि माफ कर। किस कि एन्हि नेईं पता कि ए यक मासूम मरण लगो असे।”#23:34 यीशु ए बोक दुई किस्मी मेह्‍णु लिए बोलुण लगो असा। पेहले त ए बोक तेन्हि सपाही जे लगो असा, किस कि से तस दोषी समझ कइ बोडी बेदर्दी जुए मारण लगो असे। दोका, तेन्हि जे लगो असा जे यीशु मारण जे मेझर किओ थिए, त फरीसी त धर्मशास्त्री के सात दुतो थिए। त तेन्हि सपाही लखिर छइ कइ तसे झिणे बांट छड़े।#छुआंरी 22:18

35मेह्‍णु खड़ खड़ हेरण लगो थिए। तेन्हि बुच यहूदी नेते मखोल बणाई कइ बोलुण लगे, “एन होरे मेह्‍णु बचाए। अगर ए परमेश्वरे लंघो मसीह भो होर तेन चुणो असा त अपु अपफ बि बचाल।” 36सपाही बि भेएड़ एई कइ से फूल बणाण जे तसे धे पितकाड़ु मिआओ दछि रस दिते, त हस कइ बोते, 37“अगर तु यहूदी के राजा भो त अपु अपफ बचा!” 38फि तसे मगिरि पुठे यक फटा बि ला जेस पुठ लिखो थी, “ई यहूदी के राजा भो।”#यूहन्ना 19:19-22

मन बदलणे बाड़ा डाकु

39जे डाकु तठि क्रूस पुठ ढनओ थिए, तेन्हि बुच यकी तसे बुराई कर कइ बोलु, “तु मसीह ना भो ना? त अपफ त असी बि बचाण दिए।” 40ई शुण कइ होरे तेन तस जे लेहरी कइ बोलु, “कि तु परमेश्वर हेरी बि ना डरता ना कि से तें पापी के फल कीं देन्ता? तोउ बि त सेईंए सज्जा मेओ असी। 41असी त हिसाब जुए सज्जा मेण लगो असी। असी हें कमे ईं बुरे फल मेण लगो असे। पर एन कोई गलत कम नेईं किओ।” 42तोउं तेन बोलु, “ए यीशु, जपल तु अपु शान त राज्य अन्तर घेईयेल, त मोउं धिक याद कर।” 43तेन तस जे बोलु, “अउं तोउ जे बोता कि आजे तु मोउं जोई स्वर्ग#23:43 यीशु मसीह एई कइ पंची करण तकर जेठि विश्वासी बिश्ते तस जे इठि स्वर्ग बोलो असु। अन्तर भुन्ता।”

यीशु मरुण

मत्ती 27:45-56; मरकुस 15:33-41; यूहन्ना 19:28-30

44तोउं लगभग दिसाई बाराह बज केआं टाई बज तकर पूरे देश अन्तर अन्हारु भोई गोउ। 45दिसे टगड़ियार घट भुन्ति गई त देहेर अन्तर जे चादुर#23:45 यरुशलेमे देहेर अन्तर शुचा त सुआ शुचा जगाह असी। ए दुई जगाह अलग करुं जे बुच यक परदा लगो भुन्ता। सुआ शुची जगाह अन्तर परमेश्वरे सन्नूक भुन्ता त साल अन्तर सद यके लिंग बोडा पुजारा तठि घेन्ता। असा से बुच केआं चीर कइ दुई टुकुड़ भोई गा। 46त यीशु लियार दी कइ बोलु, “ए बोउआ, अउं अपु प्राण तें हवाले कता।”#1 पतरस 2:23; यूहन्ना 10:17-18 त ईं बोल कइ मरी गा। 47सुबेदारे, जे कुछ भु से सोब हेर कइ परमेश्वरे महिमा की त बोलु, “जरूर ए मेह्‍णु धर्मी थिआ।” 48त जे हसुड़ा एस हेरण जे किठिए थिआ, एस हेर कइ रोलते रोलते वापिस घेई गा।#23:48 ए मेह्‍णु से थिए, जे यीशु साथ ना देन्तेथ त शयद फरीसी जुए मी कइ पिलातुस अगर यीशु मारणे प्रस्ताव रखो थिआ। पर अभेईं यक मेह्‍णु अनोखी मौत हेरी कइ तेन्हि अपु पापे पता चल गा त से बोडे दुख जुए मन बदलाई कइ रोलते रोलते अपु अपु गी जे वापिस घेई गे। 49#लूका 8:2,3पर जे मेह्‍णु यीशु जान पेहचान थिए त गलील केआं जे जिल्हाणु अओ थी से दूर खड़ी कइ ई सोब हेरी बिशो थी।

यीशु पथण

मत्ती 27:57-61; मरकुस 15:42-47; यूहन्ना 19:38-42

50-51तठि यहूदी समिति अन्तर यूसुफ नओएं यक मेह्‍णु थिआ। से यहूदिया राज्ये अरिमतिया नओएं यक शेहर केआं थिआ। त से बधिया त धर्मी थिआ। त से बोडा पुजारा त तसे टजोटी साथी यीशु मारणे योजना त कम पुठ राजि ना थिआ। पर, से परमेश्वरे राज्य भाड़ण लगो थिआ। 52तेन घेई कइ पिलातुस केआं यीशु लाश मगी। 53त पिलातुसे इजाजत मेण केईआं पता यीशु लाश भीं किढ़ कइ यक हच्छे कपड़े अन्तर लपेटी, त यक कब्र अन्तर छइ छइ, जे पलण अन्तर कोरो थिआ।#23:53 ए पलण, जेस पुठ कब्र कोरो थी, से शयद नरम ईं थी जेसे बेलि तेस पुठ कोरुण सुख्ती थी त तेस अन्तर भाड़ा बि ना झड़ताथ। त तेस अन्तर कदी कोई नेओथ छओ। 54ए भक्ति करणे रोज केआं पेहलकण रोज थिआ त भक्ति करणे रोज शुरु भुणे बाड़ा थिआ। 55तेन्हि जिल्हाणु, जे यीशु जुओई गलील इलाके केआं अओ थी, तेन्के पता पता घेई कइ से कब्र हेरी कइ लाश बि हेरी कि से कीं रखो असी। 56तोउं तेन्हि शेहर वापिस एई कइ अब्बल मुश्कदार चीजे त तेल बणा#23:56 यहूदी मेह्‍णु मुओ मेह्‍णु अब्बल मुश्कदार चीजे त तेल लाई लुई कुड अन्तर रखतेथ ताकि से सुआ रोज तकर सुसुर बिश्ता। तोउं से कुडी दुआ यक बोडे पठे बइ घट छतेथ ताकि कोई अन्तर घेई ना सकियेल।; त नियमे हिसाब जुए भक्ति करणे रोज तेन्हि अराम किआ।

Currently Selected:

लूका 23: pgg

Highlight

Copy