लूका 11
11
यीशु अपु चेली प्रार्थना करण शिचालिण
1तोउं यक रोज यीशु केसे जगाई प्रार्थना करण लगो थिआ। जपल से प्रार्थना कइ बिठा त तेसे चेली बुच यक चेले तस केआं पुछु, “ए प्रभु, जीं यूहन्ने अपु चेली प्रार्थना करण शिचालो असी, तीं तु बि असी शिचाल।”
2त तेन तेन्हि जे बोलु, “जपल तुस प्रार्थना करण लगियेल त बोले,
‘ए में बोउआ,
सम्हाई तें नओं शुचु जाण कइ इज्जत,
धरती पुठ तें राज्य एईए।
3हें दन भइ रौठि हर रोज हेन्धे दिआ करे,
4त हें सोब पाप माफ करे
किस कि असी बि होरे मेह्णु माफ किओ असे, जे हें विरोध कते।
होर असी परीक्षा अन्तर पाप करण केईआं बचाई रखे।’”
प्रार्थना करणे बारे यीशु होरी शिक्षा
5तपल यीशु तेन्हि जे यक बोक लाई कि, “तुसी बुच कोउं असा जेसे कोई यक मितर असा, होर से बुच रात खड़ी कइ अपु मितरी केईं घेई कइ बोता कि ‘छने, मेन्धे टाई रौठि दिए। 6किस कि में यक मितर अओ असा त तेस खिलाण जे मोउं केईं कुछ नेईं।’ 7त से अन्तरा बोता ‘मोउं राति दुख ना दे। दुआर बन्न असु, त अस सम्हाई उंघ गो असे। माफ कर! अभेईं अउं खड़ भोई कइ कुछ दी ना सकता?’ 8अउं तुसी जे बोता कि अगर से तसे मितर भोई कइ बि तसे धे ना दिआल, तोउं बि सोब शरम छड़ कइ बुच रात लगातार रौठि मगण लिए जतु तस लौती ततु से खड़ भुई कइ दी छता। 9त अउं तुसी जे बोता कि मगियेल त तुन्धे दीइन्तु; तोपियेल त तुसी मेई घेन्तु; दुआर घमकाल त तुसी जे उघिड़ घेन्तु। 10किस कि जे बि मगता, तसे धे दीइन्तु; जे बि तोपता तसे मेई घेन्तु; त जे बि घमकान्ता, तस जे दुआ उघिड़ घेन्तु। 11तुसी बुच ई कोउं बोउ असा, जपल तसे गभुर मछली मगियेल त मछली बदले से तेन्के धे कीड़ा दियाल? 12होर अनुण मगाल त तसे धे बिच्छु दियाल? ना, तुस तीं कदी ना कते। 13तोउं, तुस पापी भोई कइ बि अगर अपु गभुर कें धे अब्बल अब्बल चीज देणे जाणते, त तुं स्वर्गे बोउ अपु मगणे बाड़ी कें धे केहि गुणा शुची आत्मा किस ना देन्ता?”
यीशु त बालजेबुल
14फि यीशु यक गुंगी दुष्ट आत्मा बाहर किढ़ि। जपल से दुष्ट आत्मा बाहर निथि त जे से गुंगा थिआ बोलुण लगा; त मेह्णु हैरान भोई गे। 15पर तेन्हि बुच केनि तस पुठ दोष लाई कइ बोलु, “ए त दुष्ट आत्माई के राजा बालजेबुले#11:15 बालजेबुल, शैताने होरु नओं असु। मदत जुए दुष्ट आत्मा बाहर किढ़ता।”#मत्ती 9:34; 10:25 16होरी तसे परीक्षा नेण जे तेस स्वर्गे यक चमत्कारी निशाणी हरालण जे बोलु। #मत्ती 12:38; 16:1; मरकुस 8:11 17पर से तेन्के मने बोक बिझ गा त तेन्हि जे बोलु, “जेस राज्य अन्तर फूट पड़ती, से राज्य उजीड़ घेन्ता। होर जेस गी अन्तर झगड़े भुण लगते, से बरबाद भोई घेन्तु। 18अगर शैतान अपु दुश्माण भोई घेईयाल त तसे राज्य कीं बणता? अउं ए तोउं बोता, किस कि तुस में बारे बोते ‘से शैताने ताकत जुए दुष्ट आत्मा बाहर किढ़ता’। 19अच्छा, अगर अउं शैताने मदत जोई दुष्ट आत्मा नशाणता, त तुं बंदे केसे मदते बेलि नशाणते? तोउं त सेईंए तुं पंची करे। 20पर अगर अउं परमेश्वरे ताकत जुए दुष्ट आत्माई नशाणता त परमेश्वरे राज्य तुं बुछ पूज बि गो असा।”
21तोउं तेन तेन्हि होरी यक बोक इ बोते लाई कि “जपल ताकतवर मेह्णु हथियार नी कइ अपु गीहे देखभाल कता, त तसे धन संपत्ति बचती। 22पर जपल तस केआं बि बोडा कोई ताकतवर मेह्णु तसे गी घेई कइ तेस केआं जीतता, त जेस हथियार पुठ तेस विश्वास थिआ तस नी छता त से अराम जुए तसे धन संपत्ति लूट कइ बांट छता। 23जे मोउं जोई नेईं से में खिलाफ असे, होर जे मोउं जोई साते न बेह्ढ़ते, से छिंगेई छते।”#मरकुस 9:40
यीशु जुए ना मीणे बेलि विपत्ती
24यीशु हउ बोलु, “जपल जुठी आत्मा यक मेह्णु अन्तरा निस घेन्ति, त से हर जगाई सुख त अराम तोपती, पर जपल तस ना मेती त बोती, ‘अउं अपु तेस पुराणे गी घेन्ति, जेठिआ बाहर किढ़ो थी।’ 25होर एई कइ तेस से साफ सुथरा त सजाओ मेता। 26तिखेईं से घेई कइ अपफ केआं बि ज्यादी बुरी सत जुठी आत्मा घिन एन्ती, त पासर बंठ कइ तठि बिश्ति। तोउं तेस मेह्णु दशा पेहले केआं बि ज्यादा बुरी भोई घेन्ति।”
धन्य कोउं असा?
27जपल यीशु इ बोलुण लगो ई थिआ त हुसुड़ा केआं यक जिल्हाणु जोरी जुए बोलु, “धन्य से खानदान असा, जेस खानदान केआं तु अओ असा।” 28तेन बोलु, “आं, पर ज्यादा धन्य से असे जे परमेश्वरे वचन शुणते त तस मानते।”
स्वर्गे यक निशाण तोपुण
मरकुस 8:12
29जपल हउ बि सुआ मेह्णु कठे भुए त यीशु बोलु, “इस जुगे मेह्णु बुरे असे, से बोडे बोडे निशाणी तोपते; पर योने #11:29 योना यक भविष्य वक्ता थिआ जे परमेश्वरे नीनवे देश लंघो थिआ त से मछली पेट अन्तर टाई रोज तकर थिआ। से मछली पेट अन्तर मरी गो थिआ, पर परमेश्वर टाई रोज पता तस फिर जीन्ता किआ त तेन मछली से उतार कइ बाहर फटा। योना 2:5-6 भविष्य वक्ते निशाण छड़ दी कइ होर कोई निशाण न हरालीन्ता।#मत्ती 16:4; मरकुस 8:12 30जीं योना नीनवे शेहरे मेह्णु लिए निशाणी थिआ, तिरुह ईं मनखे कुआ बि इस जुगे मेह्णु जे यक निशाण भुन्ता।#मत्ती 12:40 31दखण देशे राणी #1 राजा 10:1-10; 2 इति 9:1-12 न्याय करणे रोज खड़ भोई कइ इस जुगे मेह्णु पुठ दोष लान्ती, किस कि से राजा सुलैमाने ज्ञान शुणुण जे धरती यक कुणे केआं आई। पर, हेरे! इठि त राजा सुलैमान केआं बि बोडा असा। 32नीनवे शेहरे मेह्णु न्याय करणे रोज खड़ भोई कइ इस जुगे मेह्णु पुठ दोष लान्ते, किस कि तेन्हि योना भविष्य वक्ते समाचार शुण कइ अपु मन बदलो थिए। पर, हेरे! इठि त योना केआं बि बोडा असा।”
जिसमे टगड़ियार
मत्ती 5:15; 6:22-23
33त यीशु बोलु “कोई बि मेह्णु दीया जाई कइ ना अलमारी अन्तर रखता, होर ना लेंसुड़ पड्डे रखता। पर से तस तुबारि पुठ रखता, ताकि अन्तर एणे बाड़ी टगड़ियार मेईंयेल।#मत्ती 5:15; मरकुस 4:21; लूका 8:16 34जिसमे दीया टीर भो। तोउं त, अगर तें नजर ठीक असी त तें पूरा जिसम बि टगड़ा भुन्ता। पर जपल से बुरे भुन्ते, तपल तें जिसम पुठ अन्हारु भोई घेन्तु 35तोउं त, चौकाने रिहे ताकि जे टगड़ियारी तें अन्तर असी, से अन्हारी न भो। 36त अगर तें पूरा जिसम पुठ टगड़ियार असी, होर कोठि बि अन्हारु नेईं त से टगड़ियारी बेलि भरी घेन्ता त दीये ईं चमकुण लगता।”
फरीसी त धर्मशास्त्री पुठ दोष लाण
लूका 20:45-47
37जपल यीशु बोक करुण लगो थिआ त केनि फरीसी तेस जे बोलु, “में गी रौठि खाण जे आई।” त से तसे गी अन्तर घेई कइ रौठि खाण जे बिठा।#11:37 यहूदी मेह्णु खाणे टेम बिश कइ ना खांतेथ, पर से मन्जा पुठ सैलि कइ खांतेथ। सुआ मेह्णु भुन्तेथ त खांजे बुच रख कइ तसे चोउर कना मन्जे पुठ बिशतेथ। 38फरीसी ई हेर कइ हैरान भुआ कि तेन रौठि खाण केआं पेहले अपु हथ खुर ना धुए। 39यीशु तस जे बोलु, “ए फरीसी, तुस कटेउ त मंगाई बाहर बइ मजते, पर तुं अन्तर लोभ त बुराई भरिए असी। 40ए मुर्खो! जेनि बाहरी हेस्सा बणो असा, तेन कि अन्तरी हेस्सा नेईं ना बणो? 41पर हाँ, अगर तुस अपु सच्चे दिल जुए धरते त दान दक्षिणा बि कते त तुं लिए सोब शुचु भोई घेन्तु, होर तुसी बार बार हथ धूणे जरूरत ना भुन्ति।”
42“पर ओई फरीसीओ, तुं खेया खाट भोई घेन्तु, तुस पुदिना त ब्राह्मी त जड़िबुटी के दसवाँ हेस्सा त परमेश्वरे नओं पुठ देन्ते, पर तुस अपु भेयाड़ जोई परमेश्वरे खरी न्याय त सच्चा परेम ना हरालते। भुओ ई लौतुथ कि तुसी तेन्हि बजन छड़णे एन्हि करुण जरूरी असु। 43ओई फरीसीओ, तुं खेया खाट भोई घेन्तु! तुस अराधनालय अन्तर अब्बल जगाह तोपते त बाजार अन्तर नमस्ते तोपते। 44तुं खेया खाट भोई घेन्तु, किस कि तुस जीं तेन्हि मुओ मेह्णु बइ भरिए तेन्हि पथिए कब्री के ईं असे जेस पुठ मेह्णु त हंटते, पर तेन्हि पता नेईं कि से मुओ मेह्णु बुच हंटण लगो असे।”
45तपल यक धर्मशास्त्री तस जे बोलु, “ए गुरु, ईं बोक कर कइ तुस हें बुराई करण लगो असे।” 46त तेन बोलु, “ओई धर्मशास्त्री, तुं खेया खाट भोई घेन्तु! तुस गरकु भरोठु ईं नियम कानुन मेह्णु के पिठ छते, जे उछिन्तु ई नउ। पर तस मनुण जे तुस अपु अंगुल बि हिलाण न चहन्ते। 47तुं खेया खाट भोई घेन्तु! तुस तेन्हि भविष्य वक्ती के कब्र बणान्ते जे कि तुं बाव दादु मरो थिए। 48त तुस उगाह असे त अपु बाव दादु कमी पुठ राजि असे। किस कि तेन्हि भविष्य वक्ती के बोके नेओथ शुणो त से मार छो थिए। त तुस बि तेन्के बोक ना मानते पर तेन्हि जे अब्बल अब्बल कब्रे बणान्ते। 49तोउं त परमेश्वरे बुद्धि बि तुं बारे ई बोलो असु, ‘अउं तेन्के भेएड़ भविष्य वक्ती त प्रतिनिधि लंघान्ता जेन्हि बुचा से केहि मार छते, त केहि परेशान कते।’ 50इए शुणे, जतु बि भविष्य वक्ते इस धरती बणण केआं मारो असे, तेन्हि सोबी के लेखाजोखा इस जुगे मेह्णु केआं नेण असा। 51हाबिले मारुण केआं त जकराये मौत तकर जे देहेर त कुण्ड बुच भुओ थी, अउं तुसी जे सच्चु बोता कि इन्हि सोबी के लेखाजोखा इस जुगे मेह्णु केआं नीण असा। 52तुं खेया खाट भोई घेन्तु, ओई धर्मशास्त्रीओ! तुस बुद्धि कुंजुड़ त नीओ असु, पर न त तुस अपफ अन्तर गे, होर ना तुस घेणे बाड़ी अन्तर घेण देन्ते।”
53जपल से तठिआ घेण लगा त धर्मशास्त्री त फरीसी सुआ तसे खिलाफ भोई गे, त होरी होरी चीजी के बारे तेस केईआं उमुल-सुमुल पुछुण लगे। 54तोउं त से तसे बोक बोडे ध्यान जुए शुणुण लगे कि तसे मुंह केआं कोई बुरी बोक निसेल।
Currently Selected:
लूका 11: pgg
Highlight
Share
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
