मारकुस 9
9
1हाङ् येसुऎ आक्खाचि लोसुचि, “चाइबान कॆ आन्ना लोकानि, गुबि येप्ढाङ्खुबा ऎॽवा याॽमिचिऎ चॆक्मावा नुङ् निवाँहाङ्मि हाङ्डाम् टामिम्पा मॆखाङ्रढारि सिखॆॽमिनि।”
येसुमि रुपा होइकन लिमिम्पा
(मट्टि १७:१-१३; लुका ९:२८-३६)
2आक्कमि ठुक्चि डिना डॆङ्पि येसुऎ पाट्रुस, याकुब नुङ् युहान्ना टेःॽन चिःक्मानुङ् एक्क टःक्म पङ्पङ्माबि लाखॆटुचि। आक्कुबि खोचि टेःॽन चुआमि। आक्कुबि खोचिऎ खाङ्भॆॽमा रक्न येसुमि रुपा होइकन लिसा। 3खोम् चे गर बिॽयाक्ट लिसा, बाखाटेम्पि आसॆस गरक्मा बिइःमा मुहिसुचिनि।
4हाङ् आक्कुबि खोचिनुङ् आरॆॽऎ मोसा नुङ् एलिया खाङ्मुसाचि हाङ् येसु नुङ् खानावाँ इपकाचि। 5ग खाङुहाङ् पाट्रुसऎ येसु लोसु, “चिन्खुबो, काङ्का गुबि लिमिम्पा काम्नुऎ लिसा। काङ्कॆ गुबि सुम्चि गोठ्ठा हेप्कुङ्का। एक्क आनामि लागि, एक्क मोसामि लागि हाङ् एक्क एलियामि लागि।” 6(मान्ठाभनॆ खोसॆ माङ् कामॆ कामानुङ् माङ्स माॽमिट्टहिसु मान्ठाभनॆ खोचि एट्टान किसिमिम्पा लॆटामि)। 7आक्रल खिन्दुमामि लावा टाआहाङ् खोचि डॆक्खॆटुचि। हाङ् खिन्दुमाबाङ् एक्क गरक्मा साम्ला टाआ “ग काङॆ नाम्नाम् पिसिकुङॆ काम् पासा यो, खोसॆ लोमिम्पा खेमाम्नॆ!” 8हाङ् मरक्लन खोचिऎ गरमर खाङुचि टर खोचिऎ येसुबाङ् होइढा आसास माखाङ्टकुचि।
9खोचि पङ्पङ्माबाङ् युमे सिसामिर येसुऎ टिङ्खुबाचि गर कामानुङ् काम्नुःर लोसुचि, “काङा याॽमिमि पासा सिखॆम्पाबाङ् माहिङ्पॽरढारि आन्नॆ ग खानावाँ आसास आलोसाम्चिनॆ।”
10मसॆ खोचि येसुऎ लोमिम्पा खानावाँबि खासिआमि, टर उम्चि टाङ्पा टाङ्पाबि ग सिखॆम्पाबाङ् हिङ्पक्मॆ लोमॆ खानावाँ चाइ माङ्र कामानुङ् खानावाँ इबकामि। 11हाङ् खोचिऎ येसु सिमुचि, “मोसामि यायेॽमा चिन्खुबाचिऎ मान्ठा खिरिस्टबाङ् याॽल एलिया टामान लॆ काग्मिहा?”
12येसुऎ लोसुचि, “चाइबान एलिया याॽल टामा लॆ हाङ् फेरि चोब्न खानावाँ नुऎ मुमा लॆ। हाङ् आन्नॆ ग सङ्क मिॽलापाम्नॆ, याॽमिमि पासाऎ एट्टान डुखा आङ्मान लॆ हाङ् चोब्न याॽमिचिबाङ् सिच्चाइखॆॽमा लॆ कामानुङ् मान्ठा निवाँनेन् साब्चिराबि साब्डॆ?” 13टर कॆ आन्ना लोकानि, “एलिया टाखॆडा। हाङ् याॽमिचिऎ खोम् बारेबि निवाँनेन् साब्चिराबि साप्मिम्पा रक्न माङ् लॆःॽमा मिनुचि मरक्न लॆटुचि।”
एक्क वाठाङ्पा पिसा खारिॽमाङ्बाङ् नुबॽमिम्पा
(मट्टि १७:१४-२१; लुका ९:३७-४३)
14येसु हाङ् खोम् सुम्पा टिङ्खुबाचि होइढा टिङ्खुबाचि चुक्मिहा ठालबि उङ्मे सिसामिर होइढा टिङ्खुबाचि ओइर याॽमिचिऎ बुप्खॆम्पा हाङ् एक्क हिप्पा मोसामि यायेॽमा चिन्खुबाचिऎ खोचिनुङ् खानावाँ इढाङ्मिम्पा खाङुचि। 15हाङ् मरक्लन याॽमिचिऎ येसु खाङ्टकुचिहाङ् फोफो आक्खॆटुचि हाङ् स्यामिॽमाम् लागि हिरिरि पिन्मानुङ् कारामि। 16येसुऎ आक्खाचि सिमुचि, “खोचिनुङ् माङ्मि बारेमि खानावाँ इसानिहा?” 17डिरिक् याॽमिचिम् लुम्पाङ् एक्क याॽमिऎ येसु लोसु, “चिन्खुबो, काम् एक्क वाठाङ्पा पिसा यामुहिनॆ खारिॽमाङ्ऎ लाप्मिम्पासॆ यामुहिनि मसॆ कॆ आनाबि लाटॆडुङ। 18आक्कसॆ खो लाबुकुहाङ् बाखाबि चेबुकुहाङ् यङ्मिकु, हाङ् आक्कसॆ याभोरि चवॆक्मा लाबकु हाङ् कॆङ् बाटिखॆकु हाङ् ठेट्ठेॽ लिखॆ। कॆ आनाम् टिङ्खुबाचि आक्क खारिॽमाङ् लाबक्पिॽचिमॆ कामानुङ् लोसुङ्चि टर माहेसुचि।” 19येसुऎ खोचि लोसुचि, “ओ निवाँयुङ् मॆड्डिङ्मा याॽमिचि, काङा आन्नानुङ् हानाम्ढारि लिःॽङॆ? कॆ आन्ना ऎॽवा आङ्मानिहा? आक्क पिसा काङाबि लाटॆटाम्नॆ।” 20खोचिऎ आक्क पिसा येसुबि लाटॆटुचि। आक्क खारिॽमाङ्ऎ येसु खाङ्टॽमा अक्सि आक्क पिसा बाखाबि चेबु। आक्कसॆ याभोरि चवॆक्मा लाबकुहाङ् गरमर डिबका। 21हाङ् येसुऎ आक्क पिसामि उम्पा सिमु, “हानाम्ऎबाङ् ग पिसा गरक्मा लिडॆ?” उम्पॆ लोसु, “मिःछुॽमाबाङ्न। 22आक्क खारिॽमाङ्ऎ ग सेॽमाम् लागि ऎॽवा खेपा मिः नुङ् योवाबि टिडु। टर आनॆ चाइ हेकुना हाङ्ग काङ्का सक्पि नाम्नाम् पिसिचिमॆ हाङ् नुबक्मिट्टॆ।” 23येसुऎ आक्क लोसु, “हेकुना हाङ्ग कामानुङ् आनॆ माङ् लोमिम्पा? मान्ठाभनॆ निवाँयुङ् लॆखुबाचिमि लागि चोब्न खानावाँ लिहि।” 24ग खेम्मा अक्सि आक्क पिसामि आप्पा गरहाङ् कासा “कॆ आना निवाँयुङ् लॆःॽना हस काम् निवाँयुङ् चॆकुवॆ मुबिॽङॆ।”
25होइढा डिरिक् याॽमिचि सङ्क आक्कुबि पिन्से टामे पाइमिहा येसुऎ खाङुचि हाङ् आक्क खारिॽमाङ् वोमानुङ् लोसु, “ओ, खारिॽमाङ्, आना कुबा नुङ् आखेम्खुबा मुखुबा, ग पिसाबाङ् खाइहाङ् इट्टॆ हाङ् हानाम्स खो हङ्सि आभॆनॆ।” 26हाङ् आक्क खारिॽमाङ् याकामानुङ् आक्क पिसा टॆप्रङ्ट टॆःक्मिटुहाङ् यङ्पमिट्टु खाइटा। आक्क पिसा चाइ सिखॆम्पा रक्मान लिसा। डिरिक् याॽमिचिऎ ग खो सिखारा लोसुचि। 27टर येसुऎ खो उम् हुक्पि लाप्मानुङ् येप्पक्मिट्टु।
28आक्क डॆङ्पि येसु एक्क खिम् हङ्सिॽयु भॆना हाङ् आक्कुबि खोचि टेःॽन चुक्मार टिङ्खुबाचिऎ येसु सिमुचि, “काङ्कॆ चाइ मान्ठा आक्क खारिॽमाङ् मान्लाबहिसुम्कॆ?” 29येसुऎ आक्खाचि लोसुचि, “गरक्मा खालॆ खारिॽमाङ् चाइ पारठानाऎ टेःॽन लाबहि।”
फेरि येसुऎ खो सिखॆॽमॆ खानावाँ इमिम्पा
(मट्टि १७:२२-२३; लुका ९:४३-४५)
30ह येसु हाङ् खोम् टिङ्खुबाचिऎ आक्क ठाल याइडाउचिहाङ् गालिलबि खाइमा परकामि। ग खानावाँ आसॆस आलेटकुचिर कामानुङ् येसुऎ मिन्मिम्पा लॆटु। 31मान्ठाभनॆ येसुऎ खोम् टिङ्खुबाचि चिन्से लोसुचि, “याॽमिमि पासा सिच्चाखुबा याॽमिचिम् हुक्पि पिइएछ, हाङ् खोचिऎ खो सेरुकुचि, हाङ् खो सिखॆम्पा सुम्चि डिना डॆङ्पि फेरि हिङ्प।” 32टर टिङ्खुबाचिऎ ग खानावाँ मावाप्हिसुचि हाङ् सिम्मा सङ्क किसिआमि।
आसा टुङ्घङ्पा?
(मट्टि १८:१-५; १०:४२; लुका ९:४६-४८)
33येसु हाङ् खोम् टिङ्खुबाचि कफारनुहुम हाटाबि टाआमि हाङ्खिम् हङ्सि भॆनामि। हाङ् येसुऎ टिङ्खुबाचि सिमुचि, “लाम्फुबि आन्ना माङ् खानावाँ इमे पाइटानिहा?” 34टर खोचि यङ् उक्खॆटुचि मान्ठाभनॆ खोचिऎ लाम्फुबि कानि हङ्सिबि आसा चाइ टुङ्घङ्पा कामानुङ् खानावाँ इमिम्पा लॆटामि। 35हाङ् येसु खोचि चिन्माम् लागि पेनाहाङ् एपङ्हि टिङ्खुबाचि खोम् गॆअङ्मॆअङ् सेःरुचिहाङ् लोसुचि, “आसॆ आन्नाबि चोब्बाङ् टुङ्घङ्पा लिमा मिनुकु, आक्कसॆ चोब्बाङ् मिःछुॽमा लॆङ्मानुङ् चोब्नमि योम्पक् मुमा लॆ।” 36हाङ् खोसॆ उम्चि कॆक्पि एक्क चाचा लाटॆटुहाङ् डिन्चासे टिङ्खुबाचि लोसुचि, 37“आसॆ काम् निङ्पि गरक्मा चाचाचि नुःर लॆकुचि खोसॆ काङान नुःर लॆःॽङा, हाङ् आसॆ काङा नुःर लॆःॽङा खोसॆ काङा हॆॽनॆ, टर काङा पाङ्हाङ्खुबा निवाँहाङ् आपा नुःर लॆकु।”
38युहान्नाऎ येसु लोसु, “चिन्खुबो, एक्क याॽमिऎ आनाम् निङ्पि खारिॽमाङ् लाबक्ढाङ्पा काङ्कॆ खाङ्टकुङ्का हाङ् गरक्मा योक्पक् आयिगॆ कामानुङ् लोसुङ्का, मान्ठाभनॆ खो कानिम् याॽमि हॆॽनॆ।” 39टर येसुऎ लोसु, “खो आक्रक्मा योम्पक् आयिगॆ आलोसाम्नॆ, मान्ठाभनॆ काम् निङ्पि चॆक्मावाऎ योम्पक् यिक्खुबॆ सॆॽलन काम् निङ्पि काइसॆ खानावाँ इहिसुनि। 40मान्ठाभनॆ आसॆ कानि काइसॆ लोसिनि खो कानिम् याॽमिन। 41मान्ठाभनॆ चाइबान कॆ आन्ना लोकानि आसॆ आन्ना खिरिस्टमि याॽमि काग्मि हाङ् काम निङ्पि मिःक्म योवा टेःॽन हाङ्स डुङ्मा पिकानि, आक्कसॆ उम् आसिका हानाम्स माइटुनि।”
हिङ्वाबाङ् मान्टहाङ् हिङ्चामॆ?
(मट्टि ८:६-९; लुका १७:१-२)
42येसुऎ गर सङ्क लोसुचि, “काङाबि निवाँयुङ् लॆखुबा गरक्मा मिॽमिॽहाचि आसॆ हिङ्वा लॆःॽमिकु, आक्कमि पॆॽलाबि एक्क ढ्या यिःॽलुङ् कॆङ्टिहाङ्माहाङ् पॆरॆरॆमाबि कक्ढाङ्मान नुऎ लि। 43हाङ् गरढारि स लॆटानॆ, आम्नि एक्क हुक्ऎ हिङ्वाबि सिॽमिटानि हाङ्ग, आक्क डाङ्लाम्साम्नॆ। मान्ठाभनॆ हिच्चि हुक् नुङ् हानाम्स मिः आसिखॆखुबा ठाल नाराक्पि खॆॽमाबाङ्ग एक्क हुक् मॆड्डिङ हानाम्स आसिखॆखुबा हिङ्खामाबि खॆॽमा नुऎ लि। 44(आक्कबि ग हानाम्स सिङ्किपाचि सङ्क सिखॆॽमिनि हाङ् मिः सङ्क सिखॆॽनि)। 45हाङ् आम्नि एक्क लाङ्ऎ हिङ्वाबि सिॽमिटानि हाङ्ग, आक्क डाङ्लाम्साम्नॆ, मान्ठाभनॆ हिच्चिन लाङ् नुङ् नाराक्पि खॆॽमाबाङ्ग एक्क लाङ् मॆड्डिङ् हानाम्स सिखॆॽनॆ हिङ्खामाबि खॆॽमा नुऎ लि। 46(आक्कबि ग हानाम्स सिङ्किपाचि सङ्क सिखॆॽमिनि हाङ् मिः सङ्क सिखॆॽनि)। 47हाङ् गरहाङ्न आनामि मिक्ऎ आना हिङ्वा लॆःॽमि हाङ्ग आक्क, आक्क लाबहाक्साम्नॆ, मान्ठाभनॆ हिच्चिन मिक् नुङ् नाराक्पि खॆॽमाबाङ्ग एक्क मिक् मॆड्डिङ् निवाँहाङ्मि हाङ्डामपि खॆॽमा नुऎ लि। 48(आक्कबि ग हानाम्स सिङ्किपाचि सङ्क सिखॆॽमिनि हाङ् मिः सङ्क सिखॆॽनि)।
49“मान्ठाभनॆ मान्टहाङ् चोब्न सङ्टिम्पा खानावाँ युम्पॆ लि, मरहाङ्न चोब्न काङा टिङ्खुबाचि डुखामि मिःबाङ् लाम्ढुम्मि। 50युम् नुऎ ठका रेम टर आक्कसॆ उम् युम्पॆ लिमॆ खानावाँन माइटु हाङ्ग फेरि आक्क मान्टहाङ्र युम्पॆ मुमॆ? युम् रक्मान नुऎ टिङ्खुबाचि लिसानॆ हाङ् सान्टिबि पेनानॆ।”
Currently Selected:
मारकुस 9: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
