मारकुस 8
8
येसुऎ रिबङ् याॽमिचि चामिॽमिम्पा
(मट्टि १५:३२-३९)
1आक्खा डिनाबि फेरि होइढा ओइर याॽमिचि खोम्टि खारामि। खोचिनुङ् चामॆ ठका माङ्स मॆचु, मसॆ येसुऎ खोम् टिङ्खुबाचि खोम् कॆक्पि खोम्टि खॆॽमिटुचिहाङ् लोसुचि, 2“इघा याॽमिचि कॆ डिरिक् नाम्नाम् पिसिकुङ्चि, मान्ठाभनॆ खोचि कानुङ् पेन्मिम्पा आइ सुम्चि डिना याक्खॆटु हाङ् खोचिनुङ् माङ्स चामा ठका माआ। 3इघाचि साक्मेन्चा खिम्पि पाङ्हाङ्सुङ्चि हाङ्ग लाम्फुब्न सिखॆॽमा ना हिङ्चामा लिक्मि। ऎॽवाचि ग एट्टान मॆॽयङ्बाङ् लाम्ढुमानुङ् गुबि टाॽडामि।” 4हाङ् टिङ्खुबाचिऎ येसु लोसुचि, “टर ग आसास पेन्मिनिहा ठालबि गर लॆःॽलि याॽमिचिऎ चामॆ चारेपा हाम्पा टाऎ?” 5टर येसुऎ आक्खाचि सिमुचि, “आन्नानुङ् ऎॽवा चारेपा चुहा?” खोचिऎ लोसुचि, “वाङ्चि वाटा।”
6हाङ् येसुऎ आक्खा याॽमिचि बाखाबि पेन्मिटुचि। हाङ् खोसॆ आक्खा वाङ्चि चारेपा लासुहाङ् निवाँहाङ् ओहाक् पिट्टु हाङ् योबु हाङ् याॽमिचि हाबिटाम्चिनॆ कामानुङ् टिङ्खुबाचि पिट्टुचि। 7हाङ् खोचिनुङ् मिॽमिॽहा मिःक्म ङा सङ्क चुआ। येसुऎ आक्कमि लागि सङ्क ओहाक् पिट्टुहाङ् याॽमिचि हाबिटाम्चिने कामानुङ् टिङ्खुबाचि पिट्टुचि। 8आक्कुबि चुखुबा चोप्पसॆ बखार चाउचि हाङ् खोचिऎ योप्से टुप्लाहाङ्पा टिङ्खुबाचिऎ खोम्मार वाङ्चि बचॽवार लिसा। 9आक्कुबि रिबङ्र याॽमिचि चुआमि। आक्क डॆङ्पि येसुऎ आक्खा याॽमिचि उम्चि खिम्पि पाङ्हाङ्सुचि। 10हाङ् मरक्लन येसु नुङ् खोम् टिङ्खुबाचि सिङ्खङ्पि ठाङामिहाङ् डलमानुठा#८:१० ग डलमानुठा लोमॆ ठाल हाबि ह कामानुङ् लेनि। टर डिरिक् निवाँटाङ्पाचिऎ ग ठाल मगडान लोमॆ हाटा यो काग्मि। ग हाटा चाइ गालिल टोम्पॽलिॽवामि नामडाॽवा पोट्टा चुआ लोमॆ ठालबि खारामि।
फरिसिचिऎ येसु आक्खॆॽमॆ योक्पक् खाङ्मिचिमॆ लोमिम्पा
(मट्टि १६:१-४)
11हाङ् एक्क हिप्पा फरिसिचि येसुबि टाआमिहाङ् खोम् निवाँ ठाःक्मॆ निवाँऎ गर लोसुचि, “काङ्का पारुबाङ् एक्क चिन्ना खाङ्मिचिमॆ।” 12सक्माऎ खुइया लॆसे येसुऎ लोसु, “आच्चेलाहा याॽमिचिऎ मान्ठा चिन्ना खाङ्मिचिमॆ काग्मिहा? चाइबान कॆ लोकानि, हहा याॽमिचिऎ माङ्स चिन्ना खाङ्मा टककुचिनि।” 13हाङ् खोसॆ आक्खाचि याइडाउचि हाङ् फेरि सिङ्खङ्पि ठाङामि हाङ् मॆआरॆङ् पोट्टा खाइटामि।
फारिसि नुङ् हेरोडमि खाबॆक्
(मट्टि १६:५-१२)
14सिङ्खङ्बि टिङ्खुबाचिऎ खोचिम् लागि खेःॽल चारेपा खिन्खॆॽमा मिखॆटुचॆ रछ। खोचिऎ एक्क टेःॽन चारेपा लाटॆॽमिम्पा लॆटुचि। 15हाङ् येसुऎ आक्खाचि गरहाङ् नुःर लोसुचि, “फारिसि नुङ् हेरोडमि खाबॆक्बाङ्#८:१५ ग फरिसि नुङ् हेरोडमि खाबॆक् लोमिम्पा चाइ याॽमिचिम् लुम्पिऎ उम्चि खानावाँ रेम। मिउन पेनानॆ।” 16हाङ् टिङ्खुबाचि चाइ काङ्कॆ चारेपा मान्लाटॆम्पासॆ खोसॆ गर लोमिम्पा ये कामानुङ् उम्चि टाङ्पा टाङ्पाबि खानावाँ इपकामि। 17उम्चि खानावाँ खेमुहाङ् येसुऎ आक्खाचि लोसुचि, “चारेपा माऎसॆ आक्र लोमिम्पा ये कामानुङ् मान्ठा आन्ना काकानिहा? माल आन्नॆ हढारि सङ्क माखाङ्टिॽङानॆ हाङ् मावाप्टिङानॆ? हाङ् माल् हस आन्नामि निवाँ माहेन्टिऎ? 18माल आन्नामि मिक् हाङ् नाबाक् सक्टिखॆडॆ? आन्नॆ लेकाम्निन, 19कॆ ङाचि चारेपाऎ ङाबङ् याॽमिचि खेःॽमिटुङ्चि हाङ् योप्खॆसे एम्पम्पा चारेपा आन्नॆ ऎॽवा बचॽवा खोमाम्नॆ?” खोचिऎ लोसुचि, “एपङ् बचॽवा।” 20हाङ् येसुऎ सिमुचि, “काङॆ वाङ्चि चारेपाऎ रिबङ् जाना याॽमिचि खेःॽमिॽमार आन्नॆ योप्खेसे एम्पम्पा ऎॽवा बचॽवा चारेपा खोमाम्नॆ?” खोचिऎ लोसुचि, “वाङ्चि बचॽवा।” 21येसुऎ आक्खाचि लोसुचि, “माल् हस आन्नॆ मावाप्टिटाम्नॆ?”
येसुऎ मिक् खाङ्नॆ एक्क याॽमि नुबक्मिॽमिम्पा
22आक्क डॆङ्पि येसु नुङ् खोम् टिङ्खुबाचि बेठसेडा लोमॆ गाँवाँबि टाआमि। आक्कुबि याॽमिचिऎ येसुबि मिक् खाङ्नॆ एक्क याॽमि नुबक्मिॽमाम् लागि डिन्चाबिॽमा कामानुङ् नुःर लोसुचि। 23हाङ् येसुऎ आक्क मिक् खाङ्नॆ याॽमि हुक्पि लाॽमानुङ् गाँवाँ बाहिरा लाखेटु। हाङ् उम् मिक्पि डुःक्पिटु हाङ् खो सक्पि हुक् युङु हाङ् सिमु, “माल् माङ्माङ् खाङ्टकुनॆ?” 24खोसॆ गरमर खाङुहाङ् लोसु, “एम, कॆ याॽमिचि खाङ्मॆ पाइकुङ्चि, टर खोचि सिङ्लुङ् लाम्ढुम्पार रे खाङ्सिकुङ्चि टा।” 25होइखेपा सङ्क येसुऎ खोम् मिक्पि उम् हुक्ऎ डिन्चाउ हाङ् आक्कसॆ नुःर खाङु हाङ् उम् मिक् ओबका हाङ् काम्नुःर खाङ्हिखुबा लिसा। 26हाङ् येसुऎ गर लोमानुङ् खिम्पि पाङ्हाङ्सु, “गाँवाँबि माभॆन्रे खारॆ।”
पाट्रुसऎ येसु आना खिरिस्ट ना लोमिम्पा
(मट्टि १६:१३-२०; लुका ९:१८-२१)
27आक्क डॆङ्पि येसु खोम् टिङ्खुबाचि नुङ् काइसेरिया फिलिप्पि लोमॆ हाटामि गॆअङ्मॆअङ्हा गाँवाँफेरा आम्पकामि। लाम्फुबि खॆॽसे लॆःॽमार येसुऎ टिङ्खुबाचि लोसुचि, “याॽमिचिऎ काङा आसा लोॽङामिहा?” 28टिङ्खुबाचिऎ लोसुचि, “कोइचिऎ बाप्टिस्मा पिक्खुबा युहान्ना, हाङ् होइढाचिऎ चाइ एलिया हाङ् ऎॽवाचिऎ चाइ निवाँहाङ्मि खानावाँ लोखुबाचिबाङ् एक्क ये काग्मि।” 29हाङ् येसुऎ आक्खाचि सिमुचि, “टर आन्नॆ चाइ काङा आसाङा लोॽङानिहा?” पाट्रुसऎ लोसु, “आना फाक्खुबा खिरिस्ट ना।” 30हाङ् येसुऎ आक्खाचि ग खानावाँ आसास आलोसाम्चिनॆ कामानुङ् काम्नुःर लोसुचि।
येसुऎ खो सिखॆॽमॆ खानावाँ इमिम्पा
(मट्टि १६:२१-२३; लुका ९:२२)
31हाङ् येसुऎ टिङ्खुबाचि खोम् बारेबि गर कामानुङ् चिन्पकुचि, “काङा याॽमिमि पासाऎ एट्टान डुखा आङ्मान लॆ। हाङ् टुङ्घङ्पाचि, ढ्या याटाङ्पाचि हाङ् मोसामि यायेॽमा चिन्खुबाचिबाङ् सिच्चोइखॆॽमा हाङ् सिखॆॽमा लॆ। टर सिखॆॽमिम्पा सुम्चि डिना डॆङ्पि खो फेरि हिङ्प।” 32येसुऎ ग खानावाँ वाप्मॆ गारि इसु। हाङ् पाट्रुसऎ येसु मेअङ् चिक्खॆटुहाङ् गर आकासॆ कामानुङ् वोसु। 33टर येसु खोम् टिङ्खुबाचि पोट्टा ऎम्पकाहाङ् गर कामानुङ् पाट्रुस वोसु, “आक्क साइटानबाङ् टामिम्पा निवाँ काबाङ् मॆअङ् खाइटॆ! मान्ठाभनॆ आनाम् निवाँ निवाँहाङ्बाङऎ हॆॽनॆ टर याॽमिबाङ्ऎ लॆ।”
टिङ्खुबाचिऎ यिक्मॆ योम्पक्
(मट्टि १६:२४-२८; लुका ९:२३-२७)
34आक्क डॆङ्पि येसुऎ डिरिक् याॽमिचि स टिङ्खुबाचि नुङ् सोरि खोम् कॆक्पि सेःरुचिहाङ् लोसुचि, “आसा काम् टिङ्खुबा लिमा मिनुक्, आक्कसॆ टाङ्पा नाम्नाम् पिसिॽमा याइमा लॆ हाङ् टाङ्पामि कुरुसा खिम्मानुङ्#८:३४ आक्रल रोमि चालाना रक्न टिलिङ्गाचिऎ काइसॆ योम्पक् यिक्खुबा याॽमि डान्डामि लागि एक्क ढ्या कुरुसा खिम्मि युक्सुचि। हाङ् आक्क कुरुसाबि कॆङ्मानुङ् आक्क याॽमि सेॽयुक्सुचि। खो ठालढारि सेॽमा टुम्चाखुबॆन आक्क कुरुसा खिन्से म ठालढारि टॆःॽमॆ चालाना चुआ। काङा टिङ्मा लॆ। 35मान्ठाभनॆ आसॆ टाङ्पामि सालुङ्मि हिङ्खामा नाम्नाम् पिसिकु, आक्कसॆ हानाम्स आसिखॆखुबा हिङ्खामा माइकु, टर काम् नुङ् नुऎ खानावाँमि लागि सालुङ्मि हिङ्खामा माइखुबॆ हानाम्स आसिखॆखुबा हिङ्खामा भॆट्टकु। 36मान्ठाभनॆ याॽमिऎ चोब्न बाखाटेम टाङ्पामि हुक्पि युङ्कु हाङ्स, टाङ्पामि चाइबानऎ हिङ्खामा माइटु हाङग खो माङ् नुऎ लिसॆ र? 37मान्ठाभनॆ आक्कुबि आनाम् लावाबाङ् सङ्क ढ्या माल् चुऎ? 38हाङ् गरक्लहा हिङ्वा हाङ् ब्याबिचारि याॽमिचिम् लुम्पि आसा काङाम् टिङ्खुबा लिमा हाङ् खानावाँ खेम्मा ङेसि, काङा याॽमिमि पासा सङ्क निवाँहाङ्मि निङ्लावा नुङ् सॆङ्सॆङॆ निवाँखाटॆखुबाचि नुङ् टामार आक्कनुङ् ङेसिङा।”
Currently Selected:
मारकुस 8: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
