मारकुस 7
7
आरेॽऎ चालाना
(मट्टि ५:१-९)
1इॽया यारुसालेमबाङ् टामिम्पा फारिसिचि हाङ् मोसामि यायेॽमा चिन्खुबाचि येसुमि गॆअङेमॆअङ् खोम्टि खारामि। 2हाङ् एक्क हिप्पा येसुमि टिङ्खुबाचिऎ हुक् मासक्ले चामा चामिम्पा खाङ्टकुचि। 3मान्ठाभनॆ फारिसिचि नुङ् होइढा चोब्न याहुडिचिऎ उम्चि टुबालाबाचिबाङ् हुक् सःक्मॆ चालाना रक्न हुक् मासक्पा चामिनि। 4हाङ् खोचि हाटाबाङ् टाःक्मिहाङ् सङ्क टाङ्पॆ टाङ्पान सःक्मानुङ् सॆङ्सॆङॆ मामुरे माङ्स चामिनि हाङ् होइढा डिरिक् चालाना सङ्क मुःक्मि। पोरोम्, ठाला खङ्खरॆ हाङ् पिट्टालामि खङ् सःक्मानुङ् सॆङ्सॆङॆ मामुरे फॆरुचिनि।#७:४ चोब्बाङ् याॽलऎ गिरिक् साब्चिराबि “लिःॽमारा” लोमॆ खानावाँ सङ्क चु। टर ऎॽवा गिरिक् नुङ् आङ्गेरेजिबि चाइ माआ।
5मसॆ फरिसि हाङ् मोसामि यायेॽमा चिन्खुबाचिऎ येसु सिमुचि, “मान्ठा आनामि टिङ्खुबाचि टुबालाबाचिम् चालाना आनुसारॆ मापाइमिम्पा टर सॆङ्सॆङॆ मामुम्पा हुगॆ चाक्मिहा?” 6येसुऎ आक्खाचि लोसुचि, “यासाइया लोमॆ निवाँहाङ्मि खानावाँ लोखुबाऎ आन्ना रक्मा हुन्नहा याॽमिचिम् बारेबि गरहाङ् नुःरक्न लोसु, ‘याऎ ग इघा याॽमिचिऎ काङा ठेरुॽङामि, टर उम्चि निवाँ काबाङ् एट्टान मिउ चु।#यासाइया २९:१३
7खोचिऎ हुन्न काङा चुङ्खाङ्ङामि, मान्ठाभनॆ खोचिऎ चिन्मिम्पा खानावाँ ग याॽमिचिम् चालाना टेःॽन यो।’
8गरहाङ्न आन्नॆ सङ्क निवाँहाङ्ऎ लोमिम्पा खानावाँ याइमानुङ् याॽमिचिम् चालाना टिङुकाम्नि।”
9हाङ् येसुऎ हस लोसुचि, “आन्नॆ टाङ्पाम् चालाना फॆॽमाम् लागि चेन्टुबावाँ लिमानुङ् निवाँहाङ्मि खानावाँ चेनुकाम्नि। 10मान्ठाभनॆ मोसा लोमॆ याॽमिऎ गरहाङ् लोसु, ‘आन्नामि आप्पा नुङ् आमा नुःर लॆटाम्नॆ हाङ् खाङाम्नॆ हाङ् चाप्हिमा पिक्खुबा चाइ सेॽमान लॆ।’#पारास्ठान २०:१२; २१:१७; यायेॽमा ५:१६; लेबि २०:९
11“टर आन्नॆ चिन्मार चाइ टेराङ्गॆ चिनुकाम्नि। एक्क याॽमिऎ उम्पा हाङ् उम्मा पिॽमा लॆऎ ठका चाइ कुर्बन अठावा निवाँहाङ्मि निङ्पि सङ्टिम्पा रेम कामानुङ् लोसु हाङ्ग, 12आन्नॆ खोम् उम्पा नुङ् उम्मामि लागि माङ्स लॆमा पिट्टाम्निनि। 13गरहाङ् आन्नॆ आम्नि टुबालाबाचिऎ मुकॆम्पा योम्पक् टिङ्ढाङ्डानि हाङ् निवाँहाङ्मि खानावाँ चाइ हुन्नऎ मिकाम्नि। गरहाङ्न आन्नॆ होइढा डिरिक् योम्पक् मुमे पाइकाम्नि।”
याॽमि काइसॆ मुखुबा खानावाँ
(मट्टि १५:१०-२०)
14आक्क डॆङ्पि येसुऎ फेरि याॽमिचि खोम् गॆअङ्मॆअङ् सेःरुचिहाङ् लोसुचि, “आन्ना चोप्पसॆ कॆ लोमिम्पा खानावाँ नुःर खेमाम्नॆ हाङ् वाबाम्नॆ। 15याबाङ् याॽमि हङ्सिॽयु भॆन्खुबा माङ् ठकाऎ सङ्क याॽमि सॆङ्सॆङॆ मॆड्डिङ्मा मुसुनि। टर याॽमि हङ्सिॽयुबाङ् आम्पऎ खानावाँऎ याॽमि सॆङ्सॆङॆ मॆड्डिङ्मा मुकु। 16[आन्नामि खेम्मॆ नाबाक् चु हाङ्ग नुःर खेमाम्नॆ।”]#७:१६ ग पद याॽलहा साब्चिराबि चाइ माआ।
17इघा काठा इसिटु हाङ् येसुऎ याॽमिचि याइडाउचि हाङ्खिम् हङ्सिॽयु भॆना हाङ् खोम् टिङ्खुबाचिऎ ग काठाऎ लोमा यकुवॆ खानावाँ माङ्र कामानुङ् सिमुचि। 18येसुऎ आक्खाचि लोसुचि, “माल् आन्नॆढारि सङ्क मॆवाबाम्नॆ? माल् बाहिराबाङ् हङ्सि भॆनुऎ ठकाऎ याॽमि सॆङ्सॆङॆ मॆढ्डिङ्मा मुसुनि कामानुङ् लेसाम्निनॆ?” 19मान्ठाभनॆ आक्क ग निवाँ हङ्सि हॆॽनॆ टर बःक्पि खॆःहाङ् सालुङ्बाङ् बाहिरा आम्पखॆ। (गरहाङ् येसुऎ चोब्न चामा ठका सॆङ्सॆङॆ लि कामानुङ् लोसु)।
20हस येसुऎ लोसु, “हङ्सिॽयुबाङ् बाहिरा आम्पऎ खानावाँऎ रे याॽमि सॆङ्सॆङॆ मॆड्डिङ्मा मुकु। 21मान्ठाभनॆ याॽमिमि निवाँबाङ्न काइसॆ खानावाँ, इम्चामिॽमॆ निवाँऎ खाङ्मॆ निवाँ हाङ् याॽमि सेॽमॆ, 22किसिमिस्से इम्मिॽमॆ, खिट्टुबाङ्, काइसॆ योम्पक् यिक्मॆ, बङ्चामॆ, छाडा, याॽमिमि काम्नुऎ योम्पक्पि सोम् खॆॽमॆ, इचामॆ, कायङ्पा हाङ् निवाँ मॆड्डिङ्मा खानावाँ टा।
23“गरक्मा चोब्न काइसा खानावाँ निवाँ हङ्सिॽयुबाङ् आम्प हाङ् याॽमि सॆङ्सॆङॆ मॆड्डिङ्मा मुकु।”
हॆॽनिबारेक् मेॽनुङ्मामि निवाँयुङ्
(मट्टि १५:२१-२८)
24आक्क डॆङ्पि येसु हाङ् खोम् टिङ्खुबाचिऎ आक्क ठाल याइडाउचिहाङ् टुरोस नुङ् सिडोन लोमॆ ठालमि कॆक्पि खारामि। हाङ् एक्क याॽमिमि खिम् हङ्सि भॆनामि। ग खानावाँ आसॆस आलेटकुचिर कामानुङ् येसुऎ मिन्मिम्पा लॆटु। टर याॽमिचिऎ लेटखॆट्टुचि। 25मरक्लन एक्क मेॽनुङ्माऎ येसुमि बारेबि खेमु, हाङ् टाआहाङ् येसुमि लाङ्पि स्यामिटु। आक्क मेॽनुङ्मामि नाम्नाम् पिसिम्पा साम्सामा खारिॽमाङ्ऎ लाॽमिम्पा लॆटा। 26आक्क मेॽनुङ्मा चाइ सिरियामि फोनिकॆ लोमॆ ठवाँबि जन्म लिमिम्पा हॆॽनिबारेक्बिऎ गिरिक् लॆटा। खोसॆ काम् साम्सामा खारिॽमाङ्बाङ् नुबक्मिट्टॆ कामानुङ् येसु नुःर लोसु।
27टर येसुऎ आक्क लोसु, “चोब्बाङ् याॽल पिसाचि#७:२७ पिसाचि लोमिम्पा चाइ याहुडिचि रेम। बखार चामा पिट्टाम्चिने, मान्ठाभनॆ पिसाचिम् चामा ठका हुॽवाचि पिॽमा मर काम्नुऎ योम्पक् हॆॽनॆ।”
28आक्क मेॽनुङ्माऎ लोसु “एम चिन्खुबो, आक्र हाङ्स पिसाचिऎ चाठाम्बाङ् चिःक्लाम्पा भाग ग हुॽवाचिऎ चाटकुचि।”
29हाङ् येसुऎ आक्क लोसु, “आनॆ गरक्मा खानावाँ इमिम्पासॆ नुःर खारॆ, आम् साम्सामा खारिॽमाङ्बाङ् नुबखॆडा।”
30खो खिम्पि खॆॽमार साम्सामा लिःॽमाराबि इम्चाढाङ्पा लॆटा। खो खारिॽमाङ्बाङ् नुबखॆॽमिम्पा लॆटा।
येसुऎ एक्क कुबा नुबक्मिॽमिम्पा
31येसु नुङ् खोम् टिङ्खुबाचिऎ टुरोस लोमॆ ठाल याइडाउचिहाङ् सिडोन लोमॆ हाटा लिसे गालिल नुङ् डेकापोलिसबि#७:३१ डेकापोलिस लोमिम्पा चाइ एपङ वटा हाटा लोमॆ यो। युसामि। 32हाङ् याॽमिचिऎ नाबाक् एखेम्खुबा एक्क कुबा खोबि लटॆटुचि। हाङ् नुःबक्मिॽमाम् लागि खो सक्पि हुक् युङ्पिचिमॆ कामानुङ् नुःर लोसुचि। 33आक्क डॆङ्पि येसुऎ खो याॽमिचिबाङ् मिःक्म मॆअङ् खो टेःॽन लाखॆटु। हाङ् उम् नाबाक्पि हुक्खॆरॆॽवासि टिसु हाङ् डुःगुहाङ् आक्क याॽमिमि लेन् डिन्चाउ। 34हाङ् येसुऎ पारु पोट्टा खाङ्मानुङ् सक्माऎ टक्भॆऎ सक्मा सासॆ लोसु, “इफ्फाटा” ग लोमिम्पा चाइ “हेम्बखारॆ” लोमिम्पा यो। 35मरक्लन आक्क याॽमि नाबाक् खेम्खुबा हाङ् काम्नुःर यामुहिखुबा लिसाहाङ् यामुबक्का।
36येसुऎ खोचि ग खानावाँ आसास आलोसाम्चिनॆ कामानुङ् लोसुचि। टर ऎॽवा खोसॆ आलोसाम्नॆ कामानुङ् लोसुचि, मरक्न याॽमिचिऎ खोम् खानावाँ फुबकुचि। 37हाङ् ग खानावाँ खेम्खुबाचि चोब्न फोफो आक्खॆटुचि हाङ् कासामि, “खोसॆ चोब्न काम्नुऎ योम्पक् मुकु। नाबाक् आखेम्खुबाचि खेम्खुबा हाङ् कुबाचि याटाखुबा मुकुचि।”
Currently Selected:
मारकुस 7: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
