मारकुस 11
11
यारुसालेम्पि येसु नुःर लॆःॽमिम्पा
(मट्टि २१:१-११; लुका १९:२८-४०; युहान्ना १२:१२-१९)
1ह येसु हाङ् खोम् टिङ्खुबाचि यारुसालेम कॆक्पि टाआमि। खोचि जाइटुन लोमॆ पङ्पङ्मा कॆक्पिऎ बेठफागे हाङ् बेठानिया लोमॆ गाँवाँबि टामा परकामि। हाङ् येसुऎ खोम् हिप्पा टिङ्खुबाचि गर लोमानुङ् खोबाङ् याॽलि पङ्हाङ्सुचि, 2“मिऎ गाँवाँबि खाराचॆ, आक्क गाँवाँबि भॆन्मा अक्सि हढारि आसॆस मॆठाङ्मिम्पा एक्क वॆन्चा गाढा हिक्मिम्पा भॆट्टक्चुना। आक्क हेम्बकाचॆहाङ् गुबि लाटॆटाचॆ। 3आसॆ हाङ्स आन्चिनॆ आक्क गाढा मान्ठा हेनुक्चुनॆ? कामानुङ् सिमाचि हाङ्ग, ग पारभु पाब्डा, खोसॆ सॆॽलन ऎम्पि कामानुङ् लोसाचॆ।”#११:३ एक्क हिच्चि गिरिक् साब्चिराबि “गाढामि टुङ्घङ्पाऎ सॆॽलन पाङ्हाङ्कु” कामानुङ् स लोःडु।
4मसॆ खोचि खाराचि हाङ् एक्क वॆन्चा गाढा एक्क खिम्मि लम्भॆरॆङ्मा कॆक्पिऎ लाम्फुबि हिक्मिम्पा खाङ्टकाचु, हाङ् हेन्पकाचु। 5खोचिऎ हेन्से लॆःॽमार कॆक्पि येॽमिम्पा एक्क हिप्पा याॽमिचिऎ गर कामानुङ् सिमुचि, “आक्क गाढा मान्ठा हेनुक्चुनॆ?” 6हाङ् हिप्पा टिङ्खुबाचिऎ येसुऎ लोसॆचॆ कामानुङ् लोमिम्पा रक्न खानावाँ ऎनाचु। मसॆ याॽमिचिऎ गाढा लाखॆॽमा पिट्टुचि।
7खोचिऎ म गाढा येसुबि लाटॆटाचु हाङ् खोचिऎ टाङ्पाम् बट्टाङ् म गाढा सक्पि लिपिटुचि हाङ् येसु आक्क सक्पि पेना। 8डिरिक् याॽमिचिऎ उम्चि बट्टाङ् लाम्फुबि लिरुचि हाङ् होइढाचिऎ चाइ रोपाबाङ् बाॽवानुङ्मा हागा बक्टॆटुचि हाङ् डिङुचि।#११:८ येसुमि लःबि याॽमिचिऎ टुङ्घङ्पा कामानुङ् निङ् ठेस्से नुःर लॆःॽमार खोम् लाम्फुबि टाङ्पाम् बोट्टाङ् आठावा चेः डिङ्पिॽमॆ चालाना चुआ। 9येसुमि याॽल याॽल हाङ् डॆङ्डॆङ् चुक्मिहा याॽमिचि गर कामानुङ् याकासामि “होसान्ना! पारभु निवाँहाङ्मि निङ्पि टाडॆ आसिका नुङ्मा लॆ। 10कानिम् टुबालाबा डाउडमि आसिका नुङ्मा हाङ्डाम् टामेपाइ। खोम् हाङ्डाम् सङ्पि लिर हाङ् चोब्बाङ् सङ्पिऎ निवाँहाङ्मि निङ् सङ्पि लिर!”
11हाङ् येसु यारुसालेम्पि टाआ हाङ् निवाँहाङ्मि खिम् हङ्सि भॆना। खोसॆ निवाँहाङ्मि खिम्पिहा चोब्न ठकाबि खाङु। टर म डिना नाम् किक्खॆम्पासॆ टिङ्खुबाचि नुङ् बेठानिया गाँवाँबि खारा।
उम्चा माऎ छाराक्फुमि सिङ्
(मट्टि २१:१८-१९; लुका १३:६-९)
12वेन्डाक् लाम्पॆ येसु हाङ् खोम् टिङ्खुबाचि बेठानियाबाङ् ऎम्पक्मे पाइटामिर येसु सागॆ सिमिम्पा लॆटा। 13येसुऎ मिःक्म मॆअङ् बाॽवाऎ डॆक्खेॽमिम्पा एक्क छारक्फुमि सिङ् खाङ्टुकु हाङ् उम्चा सिडुवॆ रु मिम्मानुङ् खाङ्सि खारा। टर आक्कबि बाॽव टेःॽन खाङु मान्ठाभनॆ म उम्चा सिमॆ लः मालिमिम्पा लॆटा। 14हाङ् येसुऎ आक्क छाराक्फुमि सिङ् लोसु, “हयॆबाङ् फेरि आनॆ हानाम्स उम्चा आसिसॆ।” खोसॆ लोमिम्पा ग खानावाँ टिङ्खुबाचिऎ खेमुचि।
येसु निवाँहाङ्मि खिम्पि खॆॽमिम्पा
(मट्टि २१:१२-१७; लुका १९:४५-४८; युहान्ना २:१३-२२)
15फेरि येसु टिङ्खुबाचि नुङ् यारुसालेम टाआहाङ् निवाँहाङ्मि खिम् हङ्सि भॆना। हाङ् निवाँहाङ्मि खिम्पि बेप्पारा लेखुबाचि यिक्पहाक्सुचि हाङ् याङ् लॆन्खुबाचिमि याङ् युङ्ठाम् कॽनाम् खोप्लाङ् पिट्टुचि हाङ् उम्चि रप्खॆवा युङ्ठाम् सङ्क टेराहङ् पिट्टुचि। 16हाङ् खोसॆ आसास निवाँहाङ्मि खिम्मि पालुम्पि बेप्पारा लॆःॽमा मापिट्टुचि। 17हाङ् खोसॆ याॽमिचि लोसुचि, “माल निवाँनेन् साब्चिराबि काम् खिम् चोब्न जाटिबिहा याॽमिचिमि लागि पारठानामि खिम् लि कामानुङ् मासाप्टिहे? टर आन्नॆ ग खुसुबाङ्चिम् खिम् मुडाम्नि।” 18ग खानावाँ ढ्या याटाङ्पाचि हाङ् मोसामि यायेॽमा चिन्खुबाचिऎ खेमुचि हाङ् खोचिऎ येसु सेॽमॆ लाम् खाङ्पकुचि मान्ठाभनॆ खोचि येसु नुङ् किसियुक्सामि। डिरिक् याॽमिचि येसुमि खानावाँऎ आक्खॆॽमिम्पा लॆटुचि। मसॆ खोचि किसिमिम्पा लॆटामि। 19नाम् किक्खारा हाङ् येसु नुङ् खोम् टिङ्खुबाचि यारुसालेम हाटाबाङ् खाइटामि।
छाराक्फुमि खानावाँ
(मट्टि २१:२०-२२)
20वेन्डाक् लाम्पॆ नाम्सम खोचि याॽलऎ लाम्न खॆॽमॆ सिसामिर म छाराक्फुमि सिङ् आक्कमि साम्बाङ्न हॆन्खॆमिम्पा खोचिऎ खाङुचि। 21हाङ् येसुऎ लोमिम्पा खानावाँ पाट्रुसऎ मिट्टकुहाङ् येसु लोसु, “चिन्खुबो, खाङ्लॆ, आनॆ चाप्हिमा पिॽमिम्पा सिङ् ग सिखॆडा।” 22हाङ् येसुऎ टिङ्खुबाचि लोसुचि, “निवाँहाङ्पि निवाँयुङ् लॆटानॆ।
23“चाइबान कॆ आन्ना लोकानि, आसॆ निवाँयुङ् लॆकु हाङ् उम् निवाँबि मिःक्म सङ्क गरमर मामिन्ले खोसॆ ‘ग पङ्पङ्मा मिउ पॆरॆरॆमाबि खारॆहाङ् हॆढ्ढिन्टॆ’ लोसु हाङ्ग, आक्कसॆ लोमिम्पा खेम्कु। 24मसॆ कॆ आन्ना लोकानि, पारठानाबि आन्नॆ माङ् ङागुकाम्नि, म भॆट्टडुङ्का कामानुङ् निवाँयुङ् लॆटाम्नॆ। हाङ् आन्नॆ ङाग्मिम्पा ठका टक्चाकाम्नि। 25हाङ् आन्ना पारठाना लॆःॽमा परक्मार आसानुङ् सोम् खेडानि हाङ्ग खो यङ्निटाम्नॆ। हाङ् पारुबि पेन्खुबा निवाँहाङ् आपाऎ सङ्क आन्नामि हिङ्वा यङ्निटानिर। 26#११:२६ ग पद याॽलिहा चोब्बाङ् काम्नुहा साब्चिराबि चाइ माआ, टर साप्मिम्पा खानावाँ चाइ डॆङ्पि म येप्टिम्पा रेम। (टर आन्नॆ होइढा याॽमिचि यङ्निटाम्निनि हाङ्ग, पारुबिऎ निवाँहाङ् आपाऎ सङ्क आन्नामि हिङ्वा यङ्निटानिनि)।”
येसुमि ढुप्पाट्टमि खानावाँ
(मट्टि २१:२३-२७; लुका २०:१-८)
27येसु फेरि सङ्क खोम् टिङ्खुबाचि नुङ् यारुसालेमपि टाआ। हाङ् निवाँहाङ्मि खिम्मि पालुम्पि लाम्ढुमे पाइटामिर ढ्या याटाङ्पाचि हाङ् टुङ्घङ्पाचि हाङ् मोसामि यायेॽमा चिन्खुबाचि खोबि टाआमि। 28हाङ् सिमुचि, “आनॆ हाम्पा गरक्मा ढुप्पाट्ट टक्चाउनॆ? हाङ् आसॆ आना गरक्मा योम्पक् यिक्मॆ ढुप्पाट्ट पिट्टॆ?” 29टर येसुऎ सङ्क आक्खाचि लोसुचि, “कॆ सङ्क आन्ना एक्क खानावाँ सिम्कानि, आक्क खानावाँ ऎम्पिॽङानॆ। हाङ् कॆ हाम्पॆ ढुप्पाट्टबाङ् योम्पक् यिगुक्ङॆ लोमॆ खानावाँ इकानि। 30लु लोङानॆ, बाप्टिस्मा पिक्खुबा युहान्नाऎ बाप्टिस्मा पिॽमॆ ढुप्पाट्ट निवाँहाङ्बाङ् टक्चाउवॆ रु याॽमिबाङ्?” 31ग खेमुचिहाङ् उम्चि टाङ्पाटाङ्पाबि गर कासामि, “ह कानिऎ माङ् लोमॆ? निवाँहाङ्बाङ् लोमा सङ्क आन्नॆ मान्ठा खो निवाँयुङ् मालॆटाम्नॆ टाः लोकि। 32टर याॽमिबाङ् लोमा सङ्क मान्टक्ल लोमॆ?” आक्र कामा खोचि किसिआमि। मान्ठाभनॆ डिरिक् याॽमिचिऎ बाप्टिस्मा पिक्खुबा युहान्ना निवाँहाङ्मि खानावाँ लोखुबा कामानुङ् लोयुक्सुचि।
33मसॆ खोचिऎ येसु लोसुचि, “काङ्कॆ लेसुङ्कानि।” हाङ् येसुऎ सङ्क लोसुचि, “मरहाङ्ग कॆ सङ्क हाम्पॆ ढुप्पाट्टबाङ् इघा योम्पक् यिगुकुङॆ कामानुङ् आन्ना लोसानिनि।”
Currently Selected:
मारकुस 11: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
