मारकुस 10
10
खिम्टाङ्पा नुङ् खिम्टाङ्मा
(मट्टि १९:१-१२; लुका १६:१८)
1आक्क डॆङ्पि येसुऎ आक्क ठवाँ खाइटा हाङ् यारडान हङ्मा मॆआरॆङ्ऎ याहुडामि ठालबि खारा। फेरि सङ्क आक्कुबि डिरिक् याॽमिचि खोम् गॆअङ्मॆअङ् खोम्टि खारामि हाङ् खोसॆ आक्खाचि याॽलिऎ रक्न चिन्पकुचि।
2हाङ् एक्क हिप्पा फरिसिचिऎ येसु याॽमिचिम् लुम्पि ठाःक्मॆ निवाँऎ गरहाङ् सिमुचि, “एक्क खिम्टाङ्पाऎ उम् खिम्टाङ्मानुङ् यायेॽमा रक्न याइमा नुऎ रु फॆन्नॆ?” 3येसुऎ आक्खाचि खानावाँ ऎम्पिसे लोसुचि, “गमि बारेबि मोसाऎ माङ् लोडिहा?” 4हाङ् खोचिऎ लोसुचि, “मोसाऎ ग फाॽलिङ्खॆम्पामि एक्क साब्चिरा साप्पिहाङ्मा हाङ् याइमा नुक् लोकि।” 5हाङ् येसुऎ आक्खाचि लोसुचि, “आन्नॆ निवाँहाङ्ऎ लोमिम्पा माखेम्मिम्पासॆ खोसॆ आक्र साप्पिडानिहा रेम। 6टर सिरिस्टिबि ‘निवाँहाङ्ऎ खोचि वाठाङ्पा नुङ् मेॽनुङ्मा मुसुचि।’ 7मसॆ वाठाङ्पाऎ टाङ्पाम् आपानुङ् आमा याइकुहाङ् टाङ्पाम् खिम्टाङ्मानुङ पेनुक्। 8हाङ् आक्खा हिप्पा एक्क सालुङ् लिःक्चि।#उट्पाटि २:२४ मसॆ खोचि हिच्चि सालुङ् हॆॽनॆ टर एक्कन। 9मसॆ निवाँहाङ्ऎ टङ्मिम्पा याॽमिचि आसॆस ऎफागुचिर।”
10डॆङ्पि खिम् हङ्सि चुमार टिङ्खुबाचिऎ आक्क खानावाँ नुःर वाप्माम् लागि येसु सिमुचि। 11येसुऎ खोचि लोसुचि, “आसॆ उम् खिम्टाङ्मा याइकु हाङ् होइक मेॽनुङ्मा भ्या लॆकु, खोसॆ टाङ्पाम् याॽलऎ खिम्टाङ्मामि बिरुडबि ब्याबिचारा लॆकु। 12हाङ् गरहाङ्न मेॽनुङ्माऎ सङ्क टाङ्पामि खिम्टाङ्पा याइसे होइकनुङ् भ्या लॆटु हाङ्ग, होइढा वाठाङ्पाचिनुङ् इम्चाटिम्पा लि।”
येसु हाङ् पिसाचि
(मट्टि १९:१३-१५; लुका १८:१५-१७)
13इॽया याॽमिचिऎ उम्चि पिसाचि येसुऎ डिन्चासे आसिका पिट्टुर कामानुङ् खोबि लाटॆॽमे पाइटुचि। टर ग खाङुचिहाङ् टिङ्खुबाचिऎ याॽमिचि वोसुचि। 14आक्र लॆःॽमिम्पा येसुऎ खाङ्टकुहाङ् सोम् खॆॽमानुङ् टिङ्खुबाचि लोसुचि, “पिसाचि काङाबि टामा पिट्टाम्चिनॆ, खोचि आऎगाम्चिनॆ, मान्ठाभनॆ निवाँहाङ्मि हाङ्डाम् गरहाचिम्न। 15चाइबान कॆ आन्ना लोकानि, आसॆ निवाँहाङ्मि हाङ्डाम् एक्क पिसाऎर निवाँयुङ् लॆटुनि, आक्क हाङ्डाम् हङ्सि भॆनभॆन्हिनि।” 16हाङ् येसुऎ आक्खा चाचाचि उम् हुगॆ सोप्से आसिका पिट्टुचि।
एक्क चासुम्टाङ्पा वॆन्चा
(मट्टि १९:१६-३०; लुका १८:१८-३०)
17हाङ् येसु आक्क ठालबाङ् लङ्पॽमा अक्सि एक्क याॽमि पिन्टाआ हाङ् स्यामिसे लोसु, “नुऎ चिन्खुबो, कॆ हानाम्स आसिखॆॽमॆ हिङ्खामा टक्चामाम् लागि माङ् लॆःॽमा लॆऎ?” 18येसुऎ आक्क लोसु, “आनॆ काङा मान्ठा नुऎ लोःॽङानॆ? निवाँहाङ्बाङ् होइक आसास नुऎ लॆःॽमिनि। 19यायेॽमाबि याॽमि सेॽमा फॆन्नि, ब्याबिचारा लॆःॽमा फॆन्नि, खुमा फॆन्नि, हुन्नऎ खानावाँ इमा फॆन्नि, याॽमिचि फोप्सिॽमा फॆन्नि हाङ् आपा नुङ् आमाऎ लोमिम्पा खेम्मा लॆ लोमिम्पा खानावाँ ग लेकुनान।” 20खोसॆ येसु लोसु, “चिन्खुबो, इघा योम्पक् ग कॆ पिसाबाङ्न मुकॆडुङ।” 21हाङ् येसुऎ आक्क नाम्नाम् पिसिसे खाङुहाङ् लोसु, “हस आनॆ एक्क योम्पक् यिक्मा लॆःक्ना, खारॆहाङ् आम् चुहा चोब्न चासुम् इन्चोऎ हाङ् माङ्स माआमिहाचि हाबिटॆचॆ। हाङ् काङा टिङ्ङॆ हाङ् आम् चासुम् पारुबि लि।” 22टर ग खानावाँ खेमुहाङ् उम् ङाचिक् माइऎ मुसु। हाङ् चाइखॆॽमानुङ् खाइटा, मान्ठाभनॆ खो एट्टान चासुम्टाङ्पा लॆटा।
23हाङ् येसुऎ गरमर खाङुहाङ् खोम् टिङ्खुबाचि लोसुचि, “चासुम्टाङ्पा याॽमि निवाँहाङ्मि हाङ्डाम् हङ्सिॽयु भेन्मा ऎट्टान सार लि!” 24येसुमि खानावाँ खेमुचिहाङ् टिङ्खुबाचि आक्खॆटुचि। टर येसुऎ फेरि सङ्क लोसुचि, “पिसाचि, निवाँहाङ्मि हाङ्डाम् हङ्सिॽयु भेन्मा एट्टान सार लॆ! 25चासुम्टाङ्पा याॽमि निवाँहाङ्मि हाङ्डाम् हङ्सिॽयु भेन्माबाङ्ग साःमिःक्मि नाबुक्बाङ् अन्युक् लेन्मा खाराब टा।” 26ग खानावाँऎ टिङ्खुबाचि याॽलऎ बाङ्स सङ्क एट्टान आक्खॆटुचि हाङ् उम्चि टाङ्पा टाङ्पाबि कासामि, “मरहाङ्ग आसा चाइ हिङ्चाहिऎ?” 27येसुऎ आक्खाचि खाङुचिहाङ् लोसुचि, “गग याॽमिचिबाङ् लिहिनॆ योम्पक् रेटा, टर निवाँहाङ्बाङ् चाइ लिहि, मान्ठाभनॆ निवाँहाङ्बाङ् चोब्न योम्पक् लिहि।”
28हाङ् पाट्रुसऎ येसु लोसु, “खाङॆ, काङ्कॆ ग चोब्न याइडुङ्का हाङ् आना टिङ्डाचिम्।” 29येसुऎ लोसुचि, “चाइबान कॆ आन्ना लोकानि, काम् नुङ् नुऎ खानावाँमि लागि टाङ्पामि आपा आमा, पासाचि, बुबुनुसाचि, नानुसाचि हाङ्खिम् नुङ् रोपा बारि याइखुबॆ, 30डुखा नुङ् सोरि सोरि डिरिक्बाङ् डिरिक्#१०:३० ग खानावाँ याॽलऎ साब्चिराबि चाइ एगक् बाङ्स डिरिक् लोमॆ चु। आपा, आमा, बुबुनुसाचि, नानुसाचि, खिम् हाङ् रोपा बारि भॆट्टकु। हाङ् टाऎ लःबि चाइ हानाम्स आसिखेखुबा हिङ्खामा टक्चाकु। 31टर गरक्ल याॽल लिखुबाचि डॆङ्पि लिःक्मि हाङ् डॆङ्पि लिखुबाचि चाइ याॽल लिःक्मि।”
फेरि सङ्क येसुऎ खो सिःखॆॽमॆ खानावाँ इमिम्पा
(मट्टि २०:१७-१९; लुका १८:३१-३४)
32येसु हाङ् खोम् टिङ्खुबाचि यारुसालेम्पिटु खॆॽमॆ पाइमार येसु चाइ टिङ्खुबाचिबाङ् याॽलि याॽलि चुआ। टिङ्खुबाचि आक्खॆम्पा लॆटामि हाङ् डॆङ्डॆङ् टाखुबाचि चाइ किसिम्पा लॆटामि। फेरि सङ्क येसुऎ खोम् एपङ्हि टिङ्खुबाचि मॆअङ् लाखेटुचि हाङ् खो सक्पि माङ् लिऎ लोमॆ खानावाँ इबिटुचि। 33खोसॆ आक्खाचि लोसुचि, “खेमानॆ, कानि यारुसालेम्पिटु खॆॽमे पाइकि। आक्कुबि याॽमिमि पासा लाबुॽङामि हाङ् ढ्या याटाङ्पाचि हाङ् मोसामि यायेॽमा चिन्खुबाचिम् हुक्पि पिःॽङामि। हाङ् खोचिऎ ग सेॽमा लॆ कामानुङ् हॆॽनिबारेक्चिम् हुक्पि टॆःॽङामि। 34हाङ् आक्खाचिऎ खो इचाकुचि, डुःगुकुचि, कोर्रा टिकुचि हाङ् सेरुकुचि। टर सिःखॆॽमिम्पा सुम्चि डिना डॆङ्पि खो हिङ्प।”
याकुब नुङ् युहान्नामि खानावाँ
(मट्टि २०:२०-२८)
35आक्क डॆङ्पि जाब्डियामि पासाचि याकुब नुङ् युहान्ना लोमॆ हिप्पा पासाचि येसुम् कॆक्पि टाआचि हाङ् लोसाचु, “चिन्खुबो, काचिगॆ मिॽलाम्पा खानावाँ लॆपिचिमॆ कामानुङ् लोखाचिम्।” 36येसुऎ आक्खाचि सिमुचि, “इसॆचॆ, माङ् लॆपिॽमाचिनॆ?” 37खोचिऎ लोसाचु, “आनाम् निङ्लावाबि काचिगा एक्क चुप्ठिङ् पोट्टा हाङ् एक्क बॆङ्सिङ् पोट्टा पेन्मा पिच्चिमॆ।” 38टर येसुऎ आक्खाचि लोसुचि, “आन्चिनॆ माङ् ङाग्मॆ पाइचुनॆ कामानुङ् लेचुनानि। माल् कॆ डुङ्कुङॆ खरॆबाङ् डुङ्हिक्चुनॆ? हाङ् कॆ लाकुङॆ बाप्टिस्मा लाहिक्चुनॆ?” 39खोचिऎ येसु लोसाचु, “हेक्चुगा।” हाङ् येसुऎ आक्खाचि लोसुचि, “आन्चिनॆ कॆ डुङ्कुङॆ खरॆबाङ् डुङ्चुना हाङ् कॆ लाकुङॆ बाप्टिस्मा लाक्चुनान। 40टर काम् चुप्ठिङ् नुङ् बॆङ्सिङ् पोट्टा पेन्मा पिॽमॆ खानावाँ चाइ काम् हॆॽनॆ। गग आसाचिम् लागि मुडा, म चाइ खोचिम्न।”
41याकुब नुङ् युहान्नामि आक्रक्मा खानावाँ खेमुचिहाङ् होइढा एपङ् टिङ्खुबाचि चाइ सिर्डे याक्चाउचि। 42हाङ् येसुऎ आक्खाचि चोब्न खोम् कॆक्पि सेःरुचिहाङ् लोसुचि, “आन्नॆ लेकाम्नि, हॆॽनिबारेक्चि सक्पि हाङ्डाम् लॆखुबाचिऎ याॽमिचि सक्पि ढुप्पाट्ट फॆकुचि हाङ् खोचि सक्पि चाइ उम्चि टुङ्घङ्पाचिऎ ढुप्पाट्ट लॆकुचि। 43टर आन्ना चाइ आक्रक्मा याॽमि लिमा फॆन्नि, मान्ठाभनॆ आन्नाबि आसा चाइ टुङ्घङ्पा लिमा मिनुकु, आक्कसॆ चोब्नमि योम्पक् मुमान लॆ। 44हाङ् आन्ना लुम्पि आसा चोब्बाङ् ढ्या लिमा यगुक्, खो चोब्नबाङ् मिःछुपा लॆङ्मा लॆ। 45मान्ठाभनॆ याॽमिमि पासा सङ्क होइढाचिबाङ् योम्पक् टक्चासि हॆॽनॆ, टर खोचिम् योम्पक् यिक्मा हाङ् फाक्बक्मा कामानुङ् टाङ्पामि हिङ्खामा डिरिक्चिम् लागि सङ्टिॽसि टाडिङ।”
मिक् खाङ्नॆ बारटिमाइ
(मट्टि २०:२९-३४; लुका १८:३५-४३)
46आक्क डॆङ्पि येसु हाङ् टिङ्खुबाचि यरिहो लोमॆ हाटाबि टाआमि। खोनुङ् खोम् टिङ्खुबाचिऎ आक्क हाटा याइडामार डिरिक् याॽमिचि खोचिनुङ् सोरि टाआमि। आक्रलन एक्क टिमाइ लोमॆ याॽमिमि पासा बारटिमाइ मिक् खाङ्नॆ लाम्फुबि ङाःग्चासि पेन्मिम्पा लॆटा। 47खोसॆ नासाराटमि येसु डाॽमे पाइमिम्पा खेमु, हाङ् गरहाङ् याकाबका, “डाउडमि पासा येसु#१०:४७ येसु डाउडमि पासान चाइ हॆॽनॆ टर खोम् सामॆक्बिऎ चाइ। , काङा सक्पि नाम्नावाँ लॆःॽङॆ।”
48डिरिक् याॽमिचिऎ आना यङ् उगॆ कामानुङ् वोसुचि। टर खो याॽलऎबाङ् सङ्क ढ्या साम्लाबि गरहाङ् कासा, “डाउडमि पासा येसु, काङा नाम्नाम् पिसिॽङॆ।” 49येसुऎ आक्कमि साम्ला खेम्टकुहाङ् येप्टिखारा हाङ् लोसुचि, “आक्क सेःराम्नॆ।” मसॆ खोचिऎ आक्क मिक् खाङ्नॆ याॽमि सेःॽमानुङ् लोसुचि, “चेन्चासे आम् लाङ्पि सिक्से येप्पकॆ, खोसॆ आना सेःॽमेपाइ।” 50हाङ् खो उम् खाम्ठाम् कॽहाङ्मानुङ् चेःसे येसुबि टाआ। 51हाङ् येसुऎ आक्क सिमु, “आनाम् लागि माङ् लॆपिॽमानॆ?” खोसॆ लोसु, “काङा मिक् खाङ्हिङार।” 52येसुऎ आक्क लोसु, “ह आना खारॆ, आनाम् निवाँयुङ्ऎ आना नुःबक्खॆडाना।” मरक्लन खो मिक् खाङ्खुबा पिक्खारा हाङ् येसु टिङ्पकु।
Currently Selected:
मारकुस 10: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
