मट्टि 20
20
योम्पक् मुखुबाचिम् काठा
1“मान्ठाभनॆ पारुमि हाङ्डाम एक्क बाखामि टुङ्घङ्पा रक्मा यो, खो नाम्समाक्मि टाङ्पामि आङ्गुर बारिबि याॽमिचि योम्पक् मुमिॽमाम् लागि खारा। 2हाङ् खोसॆ आन्नॆ इॽयाक् मुमिम्पा योम्पक्मि नाम्याक् पिक्खानि कामानुङ् याॽमिचि योम्पक् मुमाम् लागि खोम् बारिबि पाङ्हाङ्सुचि। 3हाङ् खो नाङ्चि बाजे रः बाहिरा आम्पका हाङ् खोसॆ ऎॽवा याॽमिचि हाटाबि योम्पक् मॆड्डिङ् मरक्न येप्डाङ्मिम्पा खाङुचि। 4हाङ् खोसॆ आक्खा याॽमिचि लोसुचि, ‘आन्ना स काम् आङ्गुर बारिबि योम्पक् मुसि खारानॆ। कॆ आन्ना काम्नुःर नाम्याक् पिख्खानि।’ 5आक्खाचि योम्पक्बि खारामि। हाङ् फेरि सङ्क खो एपङ्हि नुङ् सुम्चि बाजे फेरा बाहिरा खाराहाङ् याॽलऎ रक्न याॽमिचि योम्पक्बि खोम्टॆटुचि। 6फेरि खो ङाचि बाजे रः बाहिरा खॆॽमार हस होइडा याॽमिचि योम्पक् मॆड्डिङ् येप्डाङ्मिम्पा चुब्सिटुचि। हाङ् खोसॆ आक्खाचि सिमुचि, ‘आन्ना मान्ठा लेल्लेन् हुन्न येप्डाङ्कानिहा?’ 7आक्खाचिऎ खो खानावाँ ऎम्पिटुचि, ‘खोइ काङ्का ग आसॆस योम्पक्पि माटिटिॽमि।’ हाङ् खोसॆ आक्खाचि लोसुचि, ‘आक्रहाङग आन्ना सङ्क कामि आङ्गुर बारिबि योम्पक् मुःसि खारानॆ।’
8“हाङ् नाम् किक्खारा हाङ् आङ्गुर बारिमि टुङ्घङ्पाऎ खोम् योम्पक्पि पाइबाक्खुबा एक्क सेःरुहाङ् लोसु, ‘योम्पक् मुखुबाचि सेःरेचॆहाङ् डॆङ्पि टाखुबाचिबाङ् ठाबाक्से खोचिऎ टक्चामॆ नाम्याक् पिट्टॆचॆ।’ 9हाङ् ङाचि बाजे योम्पक् मुःसि टाखुबाचि टाआमि हाङ् खोचि चोब्पासॆ आक्क डिनामि नाम्याक् टक्चाउचि। 10हाङ् चोब्बाङ् याॽल योम्पक्पि टिमिम्पाचि टाआमि हाङ् काङ्कॆ चाइ डॆङ्पि टामिम्पाचिऎबाङ् डिरिक् टक्चाकुङ्का मिनामि। टर खोचिऎ सङ्क आक्क डिनाऎ मरक्न नाम्याक् टक्चाउचि। 11आक्खाचिऎ टाटाङ्पाम् नाम्याक् लासुचिहाङ् टुङ्घङ्पा नुङ् काबकामि। 12खोचिऎ टुङ्घङ्पा लोसुचि, ‘आक्खा डॆङ्पि टाखुबाचिऎ ग एक्क घान्टा टेः योम्पक् मुसामि। टर आनॆ खोचि काङ्का लेन्लेन् पाइसे नाम्पि हिट्टिखॆक्खुबाचिम् रक्न नाम्याक् पिट्टुचिना।’ 13टर टुङ्घङ्पॆ आक्खाचिबाङ् एक्क याॽमि लोसु, ‘खाङॆ लाङ्काम्, काङॆ आना माङ्स काइर मालॆटिॽना। मान्ठाभनॆ इॽयाक्मि नाम्याक्पि आना योम्पक् मुःङा कामानुङ् खासिडानॆ हॆॽनॆ? 14आनॆ टक्चाकुनॆ नाम्याक् लाखॆटॆहाङ् खारॆ। डॆङ्पि टाखुबा सङ्क कॆ आना पिॽमिम्पा रकॆन पिॽमा मिकुङ। 15माल् काम् याङ् कॆ माङ् लॆःॽमा मिकुङ्र म लॆटॽङानिहॆ? अठावा कॆ होइढा याॽमिचि नाम्नाम् पिसिम्पाबि आना मान्ठा सोम् खेरुॽनॆ’।” 16हाङ् येसुऎ लोसु, “गरहाङ्न डॆङ्पिहाचि चाइ याॽलि लिःक्मि हाङ् याॽलिहाचि चाइ डॆङ्पि लिःक्मि।”
येसुऎ होइखेपा सङ्क खो सिखॆॽमॆ खानावाँ इमिम्पा
(मारकुस १०:३२-३४; लुका १८:३१-३४)
17हाङ् येसु यारुसालेमपिटु खॆॽमॆ पाइटार लाम्फुबि खोम् एपङ्हि टिङ्खुबाचि टेः मॆअङ् चिःक्खॆटुचिहाङ् लोसुचि, 18“खाङानॆ, कानि यरुसालेम खॆॽमॆ पाइकि। आक्कुबि याॽमिमि पासा ढ्या याटाङ्पाचि हाङ् मोसामि यायेॽमा चिन्खुबाचिम् हुक्पि पिइऎछ। हाङ् आक्खाचिऎ खो सेॽमॆ आब्डिक् टिकुचि। 19हाङ् खोचिऎ खो होइढा हॆॽनिबारेक्चिम् हुक्पि पिकुचि हाङ् आक्खाचिऎ खो इचाकुचि, कर्रा टिकुचि हाङ् कुरुसाबि कॆङ्सिकुचि। टर आक्कमि सुम्चि डिनाबि खो फेरि सिखॆमिम्पाबाङ् हिङ्प।”
आमाऎ उम् पासाचिम् लागि येसु नुङ् ङाःक्मिम्पा
(मारकुस १०:३५-४५; लुका २२:२४-२७)
20हाङ् जाब्डियाहमि हिप्पा पासाचि उम्चि आमाऎ येसुबि चिःक्टॆटुचि हाङ् खोसॆ खोम् लाङ्पि स्यामिसे ङागा। 21खोसॆ आक्क मेॽनुङ्मा सिमु, “लु इसॆ आनाम् लागि माङ् लॆपिॽमानॆ?” आक्क मेॽनुङ्मॆ लोसु, “आनाम् हाङ्डाम्पि काम् इघा हिप्पा पासाचि एक्क आम् चुप्ठिङ् हुक् पोट्टा हाङ् होइक बॆङ्सिङ् हुक् पोट्टा पेन्टक्चिर।” 22टर येसुऎ आक्खाचि खानावाँ ऎम्पिटुचि, “आन्नॆ माङ् ङाःक्मे पाइकानिहा लोमॆ खानावाँ लेसाम्निनि। माङ् कॆ आङ्कुङॆ डुखामि खरॆबाङ् आन्चिनॆ डुङ्हिक्चुनॆ?” खोचिऎ लोसाचु, “हेक्चुगा।” 23हाङ् खोसॆ लोसुचि, “चाइबान आन्नॆ कामि डुखामि खरॆबाङ् डुङ्काम्नि, टर काम् चुप्ठिङ् नुङ् बॆङ्सिङ् पाट्टा पेम्मिॽमॆ खानावाँ चाइ काम् हुक्पि माआ। आक्क ग आसाम् लागि काम् आपॆ मुडु खोन पिकु।” 24होइढा एपङ् टिङ्खुबाचिऎ ग खानावाँ खेमुचि हाङ् खोचि हिप्पानुङ् सोम् खेरामि। 25टर येसुऎ आक्खाचि चोब्न सेःरुचिहाङ् लोसुचि, “आन्नॆ लेकाम्निन, होइढा हॆॽनि बारेक् हाङ्चिऎ याॽमिचि सक्पि माङ्माङ् लॆःॽमा मिन्मिर ममन लॆःॽमि हाङ् टुङ्घङ्पाचिऎ चाइ उम्चि खुक्माबि चुक्मिहाचि सक्पि ढुप्पाट्ट लॆःॽमि। 26आन्नामि लुम्पिचाइ आक्र लिमा फॆन्नि, टर आसा चाइ आन्नाबि टुङ्घङ्पा लिमा मिनुकु खोसॆ चोब्नबाङ् मिःछुपा लिमा लॆ। 27हाङ् आन्ना लुम्पि आसा चोब्बाङ् ढ्या लिमा यगुक्, खो चोब्नबाङ् मिःछुपा लिमा लॆ। 28आक्रहाङ्न याॽमिमि पासा स होइडाचिऎ नुःर लॆःॽङामि कामानुङ् हॆॽनॆ टर खोचि नुःर लॆसि हाङ् डिरिक् याॽमिचि फाक्बक्सि खोम् सक्मा पिस्सि टाडिङ।”
येसुऎ हिप्पा मिक्सुरुम्पाचि नुबक्मिॽमिम्पा
(मारकुस १०:४६-५२; लुका १८:३५-४३)
29येसु हाङ् खोम् टिङ्खुबाचि यरिहो हाटाबाङ् खॆॽमॆ सिसामिर डिरिक् याॽमिचिऎ टिङ्पकुचि। 30हाङ् लाम्फु कॆक्पि हिप्पा मिक्सुरुम्पाचि पेन्ढाम्पा लॆटाचि। येसु इग लाम्फुबान खॆॽमॆ पाइ कामानुङ खेमाचुहाङ् ढ्या साम्लाबि गरहाङ् कासाचि, “ओ पारभु, डाउडमि पासा, काचिगा नाम्नाम् पिसिचिमॆ!” 31याॽमिचिऎ यङ् उगाचॆ कामानुङ् वोसुचि, टर आक्खाचि याॽलऎ बाङ्स ढ्या साम्लाबि कासाचि, “ओ पारभु, डाउडमि पासा, काङ्का नाम्नाम्पिस्सिचिमॆ!” 32हाङ् येसु येप्टिखाराहाङ् आक्खाचि सेःरुचिहाङ् लोसुचि, “आन्चिनामि लागि कॆ माङ् लॆपिॽमाचिनॆ?” 33आक्खाचिऎ येसु लोसुचि, “पारभु, काचिगा मिक् खाङ्हिखुबा मुचिमॆ।” 34येसुमि निवाँ नाम्नावॆ चेप्खेटुहाङ् खोसॆ आक्खाचिम् मिक् डिन्चाबिट्टुचि हाङ् मरक्लन मिक् खाङ्खुबा लिसाचि हाङ् खो टिङ्पकाचु।
Currently Selected:
मट्टि 20: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
