मट्टि 19
19
खिम्टाङ्पा हाङ् खिम्टाङ्मा याइमा फॆन्नि
(मारकुस १०:१-१२)
1हाङ् येसुऎ आक्खा खानावाँ इसिटु हाङ् गालिलबाङ् खाइटा हाङ् यारडान हङ्मा मॆआरॆङ्ऎ याहुडामि ठालबि खारा। 2हाङ् डिरिक् याॽमिचिऎ खो टिङुचिहाङ् खोसॆ आक्कुबि उम्चि टुक्खाचि नुबक्मिट्टुचि।
3हाङ् एक्क हिप्पा फारिसिचि खोबि टाआमिहाङ् खानावाँबि ठाःक्मा कामानुङ् खो सिमुचि, “माल् एक्क वाठाङ्पॆ उम् खिम्टाङ्मा माङ्हाङ्स एक्क खानावाँबि याइमा नुऎ?” 4टर खोचि खानावाँ ऎम्पिसे लोसुचि, “माल् आन्नॆ निवाँनेन् साब्चिराबि माखाङ्टिटाम्नॆ? ‘निवाँहाङ्ऎ सिरिस्टिब्न आक्खाचि वाठाङ्पा नुङ् मेॽनुङ्मा मुसुचि।’#उट्पाटि १:२७; ५:२ 5हाङ् निवाँहाङ्ऎ लोसुचि, ‘मसॆ वाठाङ्पाऎ टाङ्पाम् आपानुङ् आमा याइकुहाङ् टाङ्पाम् खिम्टाङ्मानुङ पेनुक्, हाङ् आक्खा हिप्पा एक्क सालुङ् लिःक्चि।’#उट्पाटि २:२४ 6मसॆ ह आक्खाचि हिप्पा हॆॽनॆहाचि टर एक्क सालुङ् लिःक्चि। मसॆ निवाँहाङ्ऎ टङ्मिम्पा याॽमिचि याॽमिऎ फाग्मा फॆन्नि।”
7फारिसिचिऎ खो सिमुचि, “मरहाङ्ग मान्ठा एक्क साब्मारा साप्पिॽमा हाङ् खिम्टाङ्मा याइमा नु कामानुङ् मोसाऎ लोमिम्पा टा?” 8खोसॆ आक्खाचि लोसुचि, “आम्नि निवाँ लुङ्कॽवा रक्मा छाक्कॆ लिमिम्पासॆ मोसाऎ खिम्टाङ्माचि याइहिकाम्नि लोडानिहा रेम। टर चाइबान याॽलिन निवाँहाङ्ऎ मिॽमिम्पा चाइ आक्र मान्लॆ। 9कॆ आन्ना लोकानि, ब्याबिचारा लॆःॽमिम्पा योम्पक्बाङ् बाहेका होइढा खानावाँबि आसॆ टाङ्पाम् खिम्टाङमा याइमानुङ् होइक भ्या लॆकु खोसॆ ब्याबिचारा लॆकु।”
10हाङ् टिङ्खुबाचिऎ खो लोसुचि, “खिम्टाङ्पा नुङ् खिम्टाङ्मामि खानावाँ आक्रक्मा लि हाङ्ग भ्या आलॆमान नुऎ लि।” 11येसुऎ आक्खाचि लोसुचि, “ग खानावाँ चोब्न याॽमिचिऎ ग लाहिसुचिनि, टर आसा चाइ पिडार खोसॆ चाइ लाहिकु। 12मान्ठाभनॆ ऎॽवाचि चाइ जान्मालिमारॽन नापुङ्साक लिॽमि, ऎॽवाचि चाइ याॽमिचिऎ मुमिम्पा नापुङ्साक् लिःक्मि हाङ् ऎॽवाचिऎ चाइ पारुमि हाङ्डाम्मि लागि भ्या आलॆखुबा लिःक्मि। आसॆ चाइ ग लॆहिकु खोसॆ लॆटुर।”
येसुऎ पिसाचि आसिका पिॽमिम्पा
(मारकुस १०:१३-१६; लुका १८:१५-१७)
13येसुऎ पिसाचि सक्पि खोम् हुक् युङ्मानुङ् पारठाना लॆपिटुचिर कामानुङ् याॽमिचिऎ पिसाचि खोबि लाटॆटुचि। टर टिङ्खुबाचिऎ ग खाङुचिहाङ् आक्खा याॽमिचि वोसुचि। 14टर येसुऎ आक्खाचि लोसुचि, “पिसाचि काङाबि डाप्मिटाम्चिनॆ, आक्खाचि आऎगाम्चिनॆ मान्ठाभनॆ पारुमि हाङ्डाम् गरहा याॽमिचिम्न।”
15हाङ् खोसॆ आक्खाचि सक्पि हुक् युङ्पिसे आसिका पिट्टुचि हाङ् आक्कबाङ् खाइटा।
चासुम्टाङ्पा याॽमि
(मारकुस १०:१७-३१; लुका १८:१८-३०)
16हाङ् येसुबि एक्क वॆन्चा याॽमि टाआहाङ् सिमु, “चिन्खुबो, कॆ हानाम्स आसिखॆॽमॆ हिङ्खामा टक्चामामि लागि माङ् नुऎ योम्पक् यिक्मालॆङॆ?”
17खोसॆ आक्क याॽमि लोसु, “मान्ठा आनॆ काङा नुऎ खानावाँमि बारेबि सिम्ङानॆ? नुऎ ग एक्क टेःॽन चु। आनॆ हानाम्स आसिखॆॽमॆ हिङ्खामा टक्चामा मिन्ना हाङ्ग निवाँहाङ्मि यायेॽमा रक्न पाइटॆ।”
18आक्क याॽमिऎ सिमु, “हाम्पिहा खानावाँ चाइ?” येसुऎ लोसु, “आनॆ याॽमि आसेरे, ब्याबिचारा आलॆटॆ, ऎखुसॆ हाङ् हुन्नहा चुमॆक्सङ् आपिट्टॆ लोमॆ खानावाँ, 19हाङ् टाङ्पामि आपा हाङ् आमा नुःर लॆमॆ हाङ् टाङ्पामि गॆअङ् मेअङ्हाचि चाइ टाङ्पा रक्न नाम्नाम् पिसिटॆ लोमॆ खानावाँ रेम।”#पारास्ठान २०:१२-१६; यायेॽमा ५:१६-२०; लेबि १९:१८
20आक्क वेन्चा याॽमिऎ खो लोसु, “इघा खानावाँ ग काङॆ चोब्न मुकॆडुङ्न। हस होइक योम्पक् कॆ माङ् यिक्मा लॆऎ?”
21येसुऎ आक्क याॽमि लोसु, “आना चाइबान निवाँहाङ्मि ङारिङ्पि काम्नुऎ लिमा यःक्ना हाङ्ग, खारॆ हाङ् आनानुङ् चुहा चोब्न चासुम् इन्चोऎ हाङ् आक्कबाङ् टामिम्पा याङ् माङ्स ऎचुखुबा याॽमिचि हाबिटॆचॆ। हाङ् डाबॆहाङ् काङा टिङ्ङॆ।”
22हाङ् आक्क वॆन्चा याॽमिऎ ग खानावाँ खेमु हाङ् निवाँबि चाइखॆॽमानुङ् खाइटा, मान्ठाभनॆ खोम् डिरिक् चासुम् चुआ।
23हाङ् येसुऎ खोम् टिङ्खुबाचि लोसुचि, “चाइबान कॆ आन्ना लोकानि, चासुम्टाङ्पा याॽमि पारुमि हाङ्डाम् हङ्सि भॆन्मा सार लॆ। 24फेरि कॆ आन्ना लोकानि, चासुम्टाङ्पा याॽमि निवाँहाङ्मि हाङ्डाम् हङ्सि भॆम्माबाङ् ग साःमिक्मि खि लेन्ठामबाङ् अन्युक लेन्मा हेकु।” 25ग खानावाँ खेमुचिहाङ् टिङ्खुबाचिऎ आक्टिखॆॽसे सिमुचि, “आक्रहाङ्ग आसा चाइ हिङ्चाहिऎ?” 26येसुऎ आक्खाचि खाङ्से लोसुचि, “ग योम्पक् याॽमिबाङ् ग लिहिनि, टर निवाँहाङ्बाङ् चाइ चोब्न खानावाँ लिहि।”
27हाङ् पाट्रुसऎ खो लोसु, “खाङॆ, काङ्कॆ ग चोब्न ठका याइसे आना टिङ्डाचिम्। काङ्कॆ चाइ माङ् टक्चाकुम्कॆ?” 28येसुऎ खोचि लोसुचि, “चाइबान कॆ आन्ना लोकानि, चोब्न खानावाँ उम्चङ्ऎ लिमार याॽमिमि पासा टाङ्पामि निङ्लावा नुङ् हाङ्पेन्ठाम् ठालबि पेनुक्। आक्रल काङा टिङ्खुबा आन्ना सङ्क एपङ्हि हाङ्पेन्ठाम् ठालबि पेनुकानि, हाङ् इस्साएलमि एपङ्हि सामॆक् सक्पि हाङ्डाम् लॆकाम्नि। 29हाङ् आसॆ काम् लागि टाङ्पाम् खिम्, बुबुनानुसाचि, आपा आमा, पासाचि हाङ् बाखा याइडु, आक्कसॆ आक्खा खानावाँ एक्क खेपाबाङ् डिरिक् टक्चाकु हाङ् हानाम्स आसिखॆॽमॆ हिङ्खामा टक्चाकु। 30टर गरक्ल याॽल लिखुबाचि डॆङ्पि लिःक्मि हाङ् डॆङ्पि लिखुबाचि चाइ याॽल लिःक्मि।”
Currently Selected:
मट्टि 19: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
