मत्ती 27

पिलातुस गै सामै यीसू

1जद दिन उग्यो तो सारा मुख्य याजक अर बुडा लोग यीसू नै मारण गी रे कर ली। 2बां बिनै बांदगे पिलातुस गै हात में दे दियो। 3जद यहूदा नै पतो लागग्यो कै बिनै दोसी बणा दियो तो बो पछतायो अर बे तीस चांदी गा सिका मुख्य याजकां अर बुडा लोगां कनै पाछा ल्यायो अर केयो, 4“मैं एक निरदोस नै पकड़वागे पाप करयो।” बां केयो, “म्हानै के करणो? तूं तेरो काम जाण।” 5जद बो चांदी गा सिका मिन्दर में फेंक गे उड़ग्यो अर जा'गे अपणै आपनै फांसी लगा ली। 6मुख्य याजकां केयो, “आं सिका नै गल्लै में राखणो ठीक कोनी। क्यूंकै ओ एक जणै गी मोत गो मोल है।” 7अर बां सारा रे कर'गे बां सिका ऊं परदेसियां खातर एक मूसाण भूमी गी जिग्यां मोल ली। बो खेत एक कुम्हार गो हो। 8ईंखातर बिं खेत गो नाम आज बी खून गो खेत केवै। 9झिको बचन यिरमयाह परमेसर गी बात बताण आळै गै द्वारा केयो गेयो पूरो होयो। बां बे तीस सिका ऊं ठैरायैड़ मोल ऊं बो खेत ले लियो। 10जिंया मनै प्रभु आग्या दी बिंया मैं बानै कुम्हार गै खेत गो मोल दे दियो।

पिलातुस गा सवाल

11जद यीसू नै पिलातुस गै सामै खड़यो करयो तो बण पूछयो कै, “तूं यहुदियां गो राजा है के?” तो बण केयो कै तूं आप ई केवै है। 12जद मुख्य याजकां अर बुडा लोगां बिं पर दोस लगायो तो बण कोई उतर कोनी दियो। 13ईं पर पिलातुस बिनै केयो, “तनै सुणै है के? तेरै बारै में ऐ लोग किती बातां केण लागरया है।” 14पण यीसू बांगी कोई बात गो जबाब कोनी दियो। ओ देखगे पिलातुस नै भोत अचंभो होयो।

मोत गी सजा गो हुकम

(मरकुस 15:6-15; लूका 23:13-25; यूहना 18:39–19:16)

15पिलातुस कनै अधिकार हो कै बो त्यूंहार में लोगां खातर एक केदी नै छोड़ सकै झिकै नै बो चावै। 16बिं टेम बठै एक मानिजेड़ो बराबा नाम गो आदमी जेळ में हो। 17पिलातुस बठै भेळा होएड़ा नै पूछयो, “अब बताओ, दोना मू थारै खातर किनै छोडूं?” 18पिलातुस आ बात जाणै हो कै बां यीसू नै धोखै ऊं पकड़ायो है। 19पिलातुस गी घराळी बिनै समाचार घाल्यो जद बो न्याय गी कुरसी पर बेठयो हो अर केयो तूं बिं धरमी यीसू गै मामले में जादा हात ना देई। क्यूंकै मैं रात सपनै में भोत दुखी होयी। 20मुख्य याजकां अर बुडा लोगां भेळी होएड़ी भीड़ नै सिखा दियो कै आपां बराबा नै छुडा ल्यां अर यीसू नै मरवा दैयां। 21पिलातुस बानै पूछयो, “थारै खातर किनै छोड़ दैयूं,” बां केयो, “बराबा नै छोड़दैयो।” 22पिलातुस बानै केयो, “बिंगो के करूं झिको यीसू मसी कुहावै।” सारा केयो, “बिनै करूस पर चढा दे।” 23पिलातुस केयो, “बण हिस्यो के गळत काम कर दियो?” पण बे सारा जोर जोर ऊं रोळा मचाण लागग्या कै, “बिनै करूस पर चढाओ।” 24जद पिलातुस देख्यो कै कोई समाधान कोनी होवै अर रोळो बोळो होवै। बण पाणी लेगे सारां गै सामै आपगा हात धोया। अर केयो, “मैं इमै कोई पाप कोनी देख्यो। मैं इंगै बारै में निरदोस हूं। आ थारी जिमेदारी है।” 25सारै लोगां केयो, “इंगी मोत गा जिमेदार म्हे अर म्हारी उळाद होवै।” 26बण बराबा नै बांगै केण पर छोड़ दियो अर यीसू गै कोड़ा मरवागे करूस पर चढाण खातर बांगै हात में दे दियो।

सिपाईयां यीसू गी बेजती करी

(मरकुस 15:16-20; यूहना 19:2,3)

27जद पिलातुस गै सिपाईयां यीसू नै किलै में ले जा'गे सारी भीड़ नै बिंगै च्यारूंमेर भेळी करी। 28यीसू गा गाबा खुलवागे बिनै चमकिलै लाल रंग गो चोळो पिरायो। 29कांटा गो मुकुट बिंगै सिर पर रख्यो अर बिंगै दाहिणै हात में सरकण्डो दियो अर बिंगै आगै गोडा टेकगे बिंगी मजाक उड़ाण लागग्या अर केयो, “हे यहुदियां गा राजा निमस्कार।” 30अर बिं पर थूक्यो, बो सरकण्डो लेगे बिंगै सिर पर मारण लागग्या। 31जद बां बिंगी मजाक कर ली तो बो चमकिलै लाल रंग गो चोळो खुलवागे बिंगा आपगा गाबा पिरा दिया अर बिनै करूस पर चढाण खातर ले चाल्या।

यीसू गो करूस पर चढायो जाणो

(मरकुस 15:21-32; लूका 23:26-43; यूहना 19:17-27)

32बारै निकळतांई बानै एक समौन नाम गो कुरैनी आदमी मिल्यो। बां बिनै केयो, “इंगो करूस चकले चाल।” 33बे बिनै गुलगुता झिकै गो मतलब है खोपड़ी गी जिग्यां, बिनै बठै ले गया। 34बिनै दाखरस में खारो रस रळागे दियो, बण चाख'गे कोनी पीओ। 35फेर बां बिनै करूस पर चढायो अर परची घालगे गाबा बांट लिया। 36अर बठै बेठगे बिंगी रुखाळी करण लागग्या। 37अर दोस पत्र लिखगे बिंगै सिर गै उपर करूस पर लगायो। बिंगै उपर इंया लिखेड़ो, कै “ओ ई यीसू है, यहुदियां गो राजा।” 38जद बिंगै सागै दो डाकू बी करूस पर चढाया, एक दाहिणै पासै अर एक खबै पासै। 39आण जाण आळा लोग सिर हिलागे बिंगी मजाक करा। 40अर बिनै केवा हा, ओ मिन्दर नै ढाण आळा, अर तीन दिन में बणाण आळा। अपणै आपनै बचा। जे तूं परमेसर गो बेटो है तो करूस पर ऊं निचै उतरईआ। 41इंयाई सारा मुख्य याजक अर नेम सिखाण आळा अर बुडा लोग मजाक कर'गे केवा हा। 42अण ओरा नै तो बचाया अर अपणै आपनै कोनी बचा सकै। ओ तो इसराएल गो राजा है। जे ओ करूस पर ऊं निचै उतर जावै तो म्हे इंगो बिस्वास करल्यांगा। 43अण परमेसर पर भरोसो राख्यो है। जे बो चावै तो अब छुड़ाल्यै क्यूंकै अण आप ई केयो मैं परमेसर गो बेटो हूं। 44इंयाई बिंगै सागै डाकू बी करूस पर चढाएड़ा हा बे बी बिंगी निंदा करा।

यीसू गा प्राण छोडणा

(मरकुस 15:33-41; लूका 23:44-49; यूहना 19:28-30)

45दोफारै बारा बजे ऊं लेगे तीन बजे तांई सारै देस में अंधेरो छायो रेयो। 46लगभग तीन बजे यीसू जोर गी आवाज में केयो, “एली एली लमा सबकतानी।” इंगो मतलब, हे मेरा परमेसर थे मनै क्यामी छोड़ दियो?#भजन संगिता 22:1 47झिका लोग बठै खड़या बां ओ सुणगे केयो, “बो एलियाह नै बुलावै।” 48बां लोगां मू एक जणो भाजगे लोगड़ लाठी गै आगै बांदगे सिरकै में डबोगे बिंगै मूं में देगे चुसायो। 49अर लोग इंया केवा अर देखां इनै एलियाह बचाण आवै है के? 50फेर यीसू जोर गी आवाज में रोळो मचागे प्राण त्याग दिया। 51अर मिन्दर गो पड़दो उपर ऊं लेगे निचै तांई पाटगे दो भाग हो'ग्यो अर धरती हालगी। अर चटान पाटगी। 52अर कबरा मू भोत सारा पवितर लोगां गी ल्हासां जी उठी। 53अर बे जींवता होगे कबरां ऊं बारै निकळगे पवितर नगर में गेया अर भोत सारा लोगां नै दिख्या। 54जद सुबेदार अर बिंगै सागै यीसू गी रुखाळी करण आळा, भुचाळ अर झिको कीं होयो बिनै देखगे डरग्या। अर केयो, “साची है ओ तो परमेसर गो बेटो हो।” 55बठै भोत सारी लुगाईयां झिकी गलील ऊं यीसू गी सेवा करती बे बिंगै सागै आयी अर दूर खड़ी देखण लागरी। 56बामै मरियम मगदलीनी, अर याकूब अर योसेस गी मां मरियम अर जबदी गै बेटै गी मां ही।

57जद आथण होई तो युसुफ नाम गो अरिमतिया गो एक अमीर आदमी झिको यीसू गो चेलो हो। 58बो पिलातुस कनै जा'गे यीसू गी ल्हास मांगी तो पिलातुस बिनै ले जाण गी आग्या दे दी। 59युसुफ यीसू गी ल्हास ले ली अर नुई चादर में लपेट ली। 60अर बिनै आपगी एक नुई कबर में राखी झिकी बण एक चटान में खुदवाई अर कबर गै मू आ'गै एक मोटो पथर लगा दियो। 61मरियम मगदलीनी अर मरियम दूसरी बठै कबर गै सामै बेठी।

कबर गी रुखाळी

62दूसरै दिन झिको सबत गो दिन हो, मुख्य याजक अर फरीसी पिलातुस कनै भेळा होया अर केयो, 63हे महाराजा, म्हानै याद है कै बो भटकाण आळो जद जींवंतो हो बण केयो मैं तीन दिनां गै बाद जींवंतो हो जाऊंगा। 64थे आग्या दैयो कै तीन दिनां तांई कबर पर पेरो लगायो जावै। कठै इंया ना होवै कै बिंगा चेला आ'गे ल्हास गी चोरी कर ल्यै अर लोगां नै केवै बो मरेड़ा मू जींवंतो हो'ग्यो। म्हे पेलां ईं बात गो बंदोवस्त करणो चावां। 65पिलातुस बानै केयो, “थारै कनै आदमी है। थे जा'गे आपगी समझ ऊं बिंगी रुखाळी करो।” 66अर बे रुखाळी करण आळा नै आपगै सागै लेग्या अर पथर पर निसानी लगागे कबर गी रुखाळी करी।

Currently Selected:

मत्ती 27: BGQ

Highlight

Copy