मत्ती 26

यीसू गै बिरोध में योजना

(मरकुस 14:1,2; लूका 22:1,2; यूहना 11:45-53)

1जद यीसू ऐ सारी बातां लोगां नै के दी तो आपगै चेला नै केण लागग्यो। 2थे जाणो हो कै दो दिन गै बाद फसह गो त्यूंहार है अर मिनख गो बेटो करूस पर चढाण खातर पकड़ायो जावैगो। 3जद मुख्य याजकां अर बुडा लोग कैफा नाम गै महा याजक गै आंगणै में भेळा होया। 4बां आपसरी में बात करी कै आपां यीसू नै धोखै ऊं पकड़ागे मरवा दैयां। 5पण बां केयो, “त्यूंहार गो टेम है, इंया ना करां लोगां में इंयाई रोळो मचैगो।”

6जद यीसू समौन कोढी गै घरे बेतनियाह गाम हो। 7तो बठै एक लुगाई पथर गै भांडै में भोत मेंगो सुरम आळो तेल ल्यायी। जद बो रोटी खाण खातर बेठयो तो बिंगै सिर पर ढोळ दियो। 8ओ देखगे चेलां नै रीस आयी अर केण लागग्या, “तेल खराब क्यामी करयो है।” 9इंयूं तो आच्छो हो कै इनै बेचगे पीसा गरीबा नै बांट देवंती। 10ओ सुणगे यीसू केयो, “इनै रोळा ना करो। अण मेरै खातर आच्छो काम करयो है।” 11गरीब तो थारै सागै सदां ई रेवैगा। पण मैं थारै सागै सदां कोनी रेऊंगा।#व्यवस्ता विवरण 15:11 12अर झिको तेल मेरै सरीर पर ढोलै है अण मेरै सरीर नै दफणाण खातर तैयार करयो है। 13मैं थानै साची केऊं, “सारै संसार में जठै बी सुब समाचार गो परचार करयो जावैगो बठै ईं बात नै याद करी जावैगी।”

यहूदा इस्करियोति गो बिस्वास घात

(मरकुस 14:10,11; लूका 22:3-6)

14जद यहूदा इस्करियोति झिको यीसू गो बारा चेला मू एक चेलो हो झिको मुख्य याजक कनै जा'गे केयो। 15“जे मैं यीसू नै पकाड़ाऊं तो थे मनै के देवोगा।” बां केयो, “तीस चांदी गा सिका।” 16अर बो बिं दिन ऊं ई यीसू नै पकड़ाण गो मोको ढूंडण लागग्यो।

चेलां गै सागै फसह गो आखरी भोज

(मरकुस 14:12-21; लूका 22:7-13; यूहना 13:21-30)

17अखमरी रोटी गै त्यूंहार ऊं पेलै दिन चेलां यीसू नै पूछयो, “तूं फसह गी रोटी कठै खाणो चावै।” 18बण केयो, “नगर में एक आदमी कनै जा'गे केओ कै गुरू केवै है, मेरो टेम कनै आ'ग्यो। मैं आपगै चेलां सागै तेरै सागै त्यूंहार मणाणो है।” 19चेलां यीसू गी बात मानी अर फसह गी रोटी बठै तैयार करी।

20जद आथण होई तो बारा चेलां सागै रोटी खाण बेठयो। 21जद बे रोटी खाण लागग्या तो बण केयो, “मैं थानै साची केऊं कै थारै मू एक जणो मनै पकड़ासी।” 22ईं पर बे सारा भोत दुखी हो'ग्या अर केण लागग्या कै गुरूजी बो मैं हूं के? 23बण केयो, “झिकै मेरै सागै थाळी में हात रख राख्यो बो ई मनै पकड़ासी।” 24पवितर सासतर में इंया लिखेड़ो है, मिनख गो बेटो मारयो जावैगो अर बिनै पकड़ाण आळै गी हालत भोत बुरी है। इंऊं आच्छो हो कै बिंगो जन्म ई ना होवंतो। 25जद पकड़ाण आळै बिनै केयो, “प्रभु बो मैं हूं। बण केयो, तूं आप ई के दियो।”

प्रभु भोज

(मरकुस 14:22-26; लूका 22:14-20; 1 कुरुन्थी 11:23-25)

26जद बे खाण गै टेम बेठया तो यीसू रोटी ली अर आसिस मांगगे तोड़ी अर चेलां नै देगे केयो खाओ ओ मेरो सरीर है। 27फेर बण लोटै में दाखरस लियो अर धन्यवाद करयो अर बानै देगे केयो, थे सारा इमूं पीओ। 28ओ दाखरस मेरै लोइ गै वायदै नै याद करावै। ओ वायदो परमेसर अर लोगां गै बीच में है। अर झिको भोत सारां गै पापां गी माफी खातर बहायो जावैगो। 29मैं थानै साची केऊं कै, दाख गो ओ रस बिं दिन तांई कदी कोनी पीऊंगा जद तांई थारै सागै आपगै पिता गै राज में नुओ दाखरस ना पीऊं। 30जद बे फसह त्यूंहार गा गीत गागे जेतुन प्हाड़ पर उड़ग्या।

पतरस गै इनकार गी परमेसर गी बात

(मरकुस 14:27-31; लूका 22:31-34; यूहना 13:36-38)

31जद यीसू केयो, “थे सारा आज गी रात मेरै बारै में ठोकर खावोगा क्यूंकै पवितर सासतर में इंया लिखेड़ो है, मैं गुआळिया नै मारूंगा अर भेड़ां गो माल न्यारो न्यारो होज्यासी।”#जकरिया 13:7 32पण मैं आपगै जी उठण गै बाद थारूं पेलां गलील में जाऊंगा। 33ईं पर पतरस बोल्यो, जे सारा तेरै बारै में ठोकर खावै तो मैं कदी कोनी खाऊंगा। 34यीसू बिनै केयो, “मैं तनै साची केऊं कै आज गी रात कुकड़ गै बोलण ऊं पेलां तूं मेरो तीन बारी इनकार करैगो।” 35पतरस केयो, “जे मनै तेरै सागै मरणो बी पडै़ तो बी मैं तेरो कदी इनकार कोनी करूंगा।” इंया सगळा चेला केयो।

गतसमनै में पराथना

(मरकुस 14:32-42; लूका 22:39-46)

36जद यीसू आपगै चेलां गै सागै गतसमनै नाम गी एक जिग्यां में आयो अर चेला नै केयो, “थे अठै बेठया रेओ। मैं जा'गे पराथना करूं।” 37बो पतरस अर जबदी गै दोनां बेटा नै सागै लेगे गेयो। अर उदास अर दुखी होण लागग्यो। 38जद यीसू बानै केयो, “मेरो मन भोत उदास है अर मेरो प्राण निकळण लागरयो है। थे अठै ठेरो अर मेरै सागै जागता रेओ।” 39फेर बो थोड़ो सो आ'गै चालगे मुंदो पड़ग्यो अर आ पराथना करी, “हे पिता जे हो सकै तो ओ दुख मेरूं टळज्यै। पण फेर बी मेरी नई तेरी इच्छा पूरी होवै।” 40फेर बो चेला कनै आयो तो बे सूत्या पड़ैया। बण पतरस नै केयो, “थे लोग मेरै सागै थोड़ी देर ई कोनी जाग सक्या। 41जागता रेओ अर पराथना करता रेओ कै थे परीक्सा में ना पड़ो। आत्मा तो तैयार है पण सरीर कमजोर है।” 42फेर दुसर जा'गे आ पराथना करी, “हे पिता जे ओ दुख मेरै कनूं कोनी हट सकै तो तेरी इच्छा पूरी होवै।” 43जद बो पराथना कर'गे आयो तो बे फेर बानै सूत्या देख्या। 44बानै छोड़गे बो फेर उड़ग्यो अर बिं बात गी तीसर पराथना करी। 45जद बण चेला कनै आ'गे केयो, “अब सूत्या रेयो अर आराम करो। बा घड़ी आ'गी। माणस गो बेटो पापियां गै हातां में पकड़ाईजण आळो है। 46उठो, चालो, मनै पकड़ाण आळो कनै आग्यो है।”

यीसू नै धोखै ऊं पकड़यो जाणो

(मरकुस 14:43-50; लूका 22:47-53; यूहना 18:3-12)

47बो अजे इंया केण ई लागरयो हो। इतै में यहूदा झिको बारा मू एक हो बो आयो। बिंगै सागै मुख्य याजकां अर बुडा लोग अर एक मोटी भीड़ तलवार अर लाठियां लेगे आया। 48यहूदा बानै हिसारो करयो झिकै गो मैं लाड करूं बो ई है। बिनै थे पकड़ल्यो। 49बिं टेम यहूदा यीसू कनै आयो अर बोल्यो, “हे रब्बी निमस्कार” अर बिंगा लाड करण लागग्यो। 50यीसू बिनै केयो, “झिकै काम खातर तूं आयो है बो कर ले।” जद बां कनै आ'गे यीसू नै पकड़ लियो। 51यीसू गै चेला मू एक जण तलवार काडी अर महा याजक गै दास गो कान बाड दियो। 52यीसू बिनै केयो, “आपगी तलवार म्यान में राख झिका तलवार चलावै बानै तलवार ऊं नास करया जावैगा। 53तूं कोनी जाणै कै जे मैं केऊं तो मेरो पिता भोत सारा सुरगदूतां नै मेरी रक्सा खातर भेज दैयगो। 54क्यूंकै पवितर सासतर गी बातां इंया पूरी होणी जरूरी है।” 55जद यीसू भीड़ नै केयो, “मैं के कोई डाकूं हूं? झिको थे मनै पकड़ण खातर लाठियां अर तलवारां लेगे आया हो। मैं बो ई हूं झिको हर रोज मिन्दर में उपदेस देऊं जद तो मनै कोनी पकड़यो।” 56पण ओ सारो कीं जद होयो कै परमेसर गी बात बताण आळा गो केयेड़ो पूरो होवै। जद सारा चेला छोडगे भाजग्या।

57जद बे लोग यीसू नै पकड़गे कैफा नाम गै महा याजक कनै लेग्या जठै नेम सिखाण आळा अर बुडा लोग भेळा होयड़ा हा। 58पतरस सगळा ऊं लारै महा याजक गै आंगणै तांई गेयो। अर मा जा'गे आखरी फेंसलै गी बात देखण खातर बां लोगां सागै बेठग्यो। 59अब मुख्य याजक अर सारी पंचायत गा लोग यीसू नै मारण अर बिंगै बिरोध में झूठी गवाई देण खातर तैयार हा। 60पण भोतसा लोग बिं पर गवाई कोनी दे सक्या। फेर दो जण आया। 61बां केयो, “अण केयो है, मैं परमेसर गै मिन्दर नै ढा दैयूंगा अर तीन दिनां में फेर बणा दैयूंगा।” 62जद महा याजक खड़यो होगे यीसू नै पूछण लागग्यो, “तेरै पर लोग दोस लगाण लागरया है अर तनै कीं उतर देणो है के?” 63पण यीसू कीं कोनी बोल्यो। जद महा याजक बिनै केयो, “मैं तनै जींवतै परमेसर गी सोगन खुवाऊं, जे तूं परमेसर गो बेटो मसी है तो म्हानै बता दे।” 64यीसू बिनै केयो, “थे खुद आप ई के दियो अर मैं थानै ओ बी केऊं। अब माणस गै बेटै नै परमेसर गै दाहिणै पासै बेठयो अर आकास गै बादळां पर आवंता देखोगा।” 65ईं पर महा याजक आपगा गाबा पाड़या अर केयो, “ओ परमेसर गी निंदा करै। अब म्हानै गवा गी जरूरत कोनी, थे सगळा आप बी इंगी बात सुणी है।” 66बण पंचायत नै पूछयो कै, “थे इंगै बारै में के सोचो?” बां उतर दियो, “बो मारण गै लायक है।” 67जद बां बिंगै मूं पर थूक्यो अर बिंगै मूका मारया, अर कणैई थपड़ मारया अर केयो, 68“जे तूं मसी है तो बांगी बात कर'गे बता कै तेरै कण मारी?”

पतरस गो इनकार

(मरकुस 14:66-72; लूका 22:56-62; यूहना 18:15-18,25-27)

69जद पतरस आंगणै में बेठयो तो एक दासी आ'गे बिनै केयो, “तूं बी यीसू गलीली गै सागै हो।” 70पतरस केयो, “मैं कोनी जाणूं, तूं के केवै।” बण सारा गै सामै इनकार कर दियो। 71जद बो बारै आयो तो दूसरी दासी बिनै देख्यो अर लोगां नै केयो, “ओ यीसू नासरी गै सागै हो।” 72बण केयो, “मैं सोगन खा'गे केऊं, मैं ईं आदमी नै कोनी जाणूं।” 73झिका लोग बठै खड़या, बां केयो, “म्हानै तेरी बोली ऊं लागै, तूं बामू एक है।” 74जद पतरस केयो, “नइ अर सोगन खाण लागग्यो कै मैं बिं आदमी नै कोनी जाणूं।” बिं टेम कुकड़ो बोल्ग्यो। 75जद पतरस नै बा बात याद आयी कै तूं कुकड़ बोलण ऊं पेलां, मेरो तीन बारी इनकार करैगो। फेर बो बारै जा'गे भोत रोयो।

Currently Selected:

मत्ती 26: BGQ

Highlight

Copy