Maki 5

Iesua mukusai'a ta'angelo tamasua tavu'alo noxou itema vile

1 Sivo ilou kupa muai se'isisi laso anu Iesua oli'a tatisaipeliou milutu xo la milai xalevile no kupa toxoxu Xalili ne. La mixali no xale lia ne Xatala. 2Anu Iesua muili'e mulu'e no pouti tatila nesi ka itema vile angelo masua mukasou muxali noxou. Itema ne molu no lamatimati la mune'e noxou Iesua no kupa pa'umolu. 3Itema ane angelo masua mukasou ne mulavusou uxoxolu no lamatimati. Mo loxo tamitema itovonu so isakinu mo so uxolu se'isisi la uasi manina. Xe loxo itovonu no anu seni la pakia'u umomomo noxou uasi. 4Xo alaxu se'i ane'i misakinu avolu no anu aini mo miloilokisou no anu seni, ia loxo mulo'enu la alaxu vilesisi mupaxelelesousi. Itema vile umomomo so usavunoxu so uxolu se'isisi uasi. 5La no aso xe olovoxo utotomu anu muxixao no la'ola'olu xe no lamatimati. Muxixaoxao la mulavusou muungaunga mo muxotoxotosou vasimolu no anu lavolavo'o ana'anaxu.

6Xe no voxo anene la anu mumaisou Iesua nopaxasio la anu muiave mulai noxou. Muxali noxou mukalu la mutangatuluou. 7Mutangatuluou la anu muvikala tatila noxou lexe, “Iesua, Mosinge anu Mu'uli'uli Olu, nini nene'e so na'oxo ma'ia noxilo? Eni alinga pakia'u noxine no anu ualasou Mosinge lexe namasualeli mamu.” 8Anu mu'ava aloxone xo Iesua muvikalanu tei lexe “Nini angelo masua, naxexesou itema ne.”

9Laso Iesua mutali'isou lexe, “Ualasine axova?” La anu mukolinu lexe, “Ualasilo lexe Tavu'alo, xo nexi la'olunexe to.” 10La anu mulinga noxou Iesua alaxu tavu'alo lexe anu ukusai'a ta'angelo tamasua ne no xale lia anene uasi.

11Ioxe, tameme tavu'alo a mixoxolu mi'ani'ani no alaele vile se ne. 12La ane'i ta'angelo tamasua milinga noxou Iesua pakia'u aloxo 'o, “Napalusixe ta'unalai noxi'a tameme olele.” 13Laso Iesua muvikalane'i lexe, “Ioxe, ngalai.” Laso ta'angelo tamasua mixexesou itema ne mo mi'una'unalai noxi'a tameme. Tameme ne tavu'alo musuku, navasi'a loxo 2000. Ta'angelo tamasua mi'una'unalai sila tameme miiave milu'elai no maia la milapau no kupa mo mi'uo'uo avile.

14Ioxe, ane'i tamitema so isaxila'a tameme mimaisou mi ne la mi'ume miiave. Mi'ume miiave la milai avile no tualasi'a. Mixali la mia'aloi'a tamitema no tuala ne la a'alo muiaveiave no tuatuala no xale lia ne. La tamitema milailai no apu ne so imalei. 15Ane'i milutu xe mixali la Iesua muxoxolusio. Xe mimaisou itema e ta'angelo tamasua tapiena mikasou tei, a muxoxolu kalumo. Mimaisou la anu uxovulaulau loxo tei la uasi, xavutalaou mulamana. Mo tei la anu mulavusou uxoxolu vasimolu vitanisi ia anu a musakinu lavalava. La tamitema mimaisou aloxo ne la mimama'u manina. 16La ane'i tamitema ane mixolu mimaisou mi ane muxali noxou itema ne la mia'aloi'a tamitema e milasilasi mine'e ne. Xe mia'aloi'a so mi ane muxali noxi'a tameme kalumo. 17La ane'i tamitema latala milinga pakia'u noxou Iesua e lexe uxexesou xale lia noxi'a.

18Ioxe, la Iesua mutelai no pouti tatila la oli'a tatisaipeliou so ilutu. Ane'i so ilutu la itema e ta'angelo tamasua mikasou tei la mulinga noxou lexe, “Umomomo so nenge nengea talai?” 19La Iesua muvikala lexe, “Uasi. Nini nalai no tualasine mo noxi'a laili noxine. Mo naa'aloi'a no anu su'uli lailaixe mo iaiama tatila noxou Tatananenge e muxali noxine 'o.” 20Laso itema ne mulai no tualasou ne Tekapolisi. La anu mua'aloxu su'uli lailaixe noxou Iesua muxali noxou. Xe tamitema latala milomusou la tane'ilili.

Iesua mupamauline vuanga vile misoli xe mupaipoune sema vile sialuxe munixinixi

21Ioxe, mune'e la Iesua mutelo no anu pouti mo mulivu mulai xalevile no kupa. Mulai muxali xalevile xe muxolu no tasiisio la tamitema latala e latala mine'e mipita noxou. 22La tatila vile so tasou lavuloto no tuala ne ualasou lexe Tiailusi mune'e. Mune'e xe mumaisou Iesua la mulalusi no tava'u. 23Mulalusi no tava'u la mulinga pakia'u noxou Iesua lexe, “Maulao, alixeli sema so isoli. Nane'e namulaxu avone noxie so laixene mo imauli.” 24Iesua mulomusou linga noxou laso ilou milai. Milai la tamitema latala ne mimulinu Iesua la mivelisi mo mikapikapinu.

25Ioxe, no taine'i tamitema latala ne la sema vile a oli'a. La sema ne utotomu sialu munixinixi noxie. Mi ne muxolu noxie maxuveni mumomomo no anu tau ie 12. 26La ane milai noxi'a tatokota tavu'alo mo mitavulenu navunavu tatila no avo'a. Mo mipapunu lamoliie mukalusi so milotone'i ia ino'u su'uli sevile uasi, mi ne muxolu mo mutilasi. 27Xe mune'e la sema ne milomusou a'alo so Iesua laso maixene ane mine'e mo mi'una no taine'i tamitema ane miveli noxou. La ane mine'e alai noxou mo mikalanu avole so mikasou lasiotiou veveni. 28Xo mivikala no opone lexe, “Ai, loxo akasou mimiou sevile la masi laixeleli ane.” 29Mikasou lasiotiou sila alaxu vilesisi sialuxe mumasasa. La mixamulinu vasimele lexe laixene avile. 30Ia alaxu vilesisi Iesua mulavu lexe xavinu sevile mulutu noxou. Laso anu muxiu mo mutali'isi'a tamitema latala ne lexe, “Ena'ei mukasou mimixeli?” 31Mutali'i axone la tatisaipeliou mivikalanu lexe, “Uo, namaisi'a ane'i tamotu latala iveli noxinesi. Loxova so natali'i lexe ena'ei mukasine ne?” 32Ia Iesua iou muititisi'a so utongone sema e mikasou ne. 33La sema ne milavu no anu mi e muxali noxie la mi'ume mo mi'olo'olo. Sila mine'e milalusi no tava'u Iesua mo mipala'anixu mi ne avile. 34Ia Iesua muvikalane lexe, “Alixeli, nini nelopalaleli laso laixeneni 'o. Nalai mo oponeni uai se'isisi xo tu'umaxu ne mukalu.”

35Ioxe, Iesua a uvikalanesio la se'i so laili noxou tatila no anu tasou lavuloto a mixali. La mivikalanu itema ne lexe, “Iline ne misoli mukalu. Laso tava'u so na'au'ausou Tisamenge la uasi, vote'i so usu'ulinela uasi.” 36La Iesua mulomusou vaikalai'a ne ia muvikalanu tila so tasou lavuloto lexe, “Oponeni tu'umaxu uasi, nalopalasi.” 37La tamitema latala e mimulimulinu ne mu'apixa'a, lexe ixolu. Ia Pita xe Tiemisi xe Tioni e Tiemisi vimou ane'i tatalusi muvikalane'i lexe imulinu. 38Mimulinu xe oli'a mixali no tasou tila ne. La Iesua mumaisi'a tamitema lexe mielieli no anu tama toxoxu. 39Xe Iesua mu'unalai la muvikalane'i lexe, “Loxova so ngaelieli no anu tama toxoxu ne? Molomolo ne isoli uasi, ane miaisi ane.” 40La tamitema mikekeu vaikalaou, ia anu mukusai'a so milala mukalusi. Milalala mukalu la anu mu'avali'a molomolo ne mamie xe nenie oli'a tatisaipeli tatalusi. Laso anu oli'a mi'unalai no ngiou e molomolo miai no anu. 41Mi'unalai la Iesua mutila'e no avole mo muvikalane no anu vaikalai'a Taiuta lexe, “Talita kumi!” Laxu vaikala ne lexe, “Aliku se 'o, avikalaneni lexe natulu.” 42Sila alaxu vilesisi molomolo ne mitulu mo mimuamua'i. Mimuamua'i xe ane'i mimaisie la mikuluke avile. Sema ne tau iexe 12 'osi. 43La Iesua muvikalane'i lexe ipalea ilosie la'ilali sevile. Mukalu la muvikala pakia'u noxi'a lexe su'uli e mu'oxonu noxie molomolo ne la mamu so ipala'anixu.

Currently Selected:

Maki 5: ATA

Highlight

Copy