Hebru 8
8
Iisa mee satkinte ka tatiko
1Cokiyoŋ, an baat ta kaawor : gi gin *mee satkiner ka tatko ar kaak gi kaawtu ɗak ko biy. Ŋa daktu goy ka samaaner ɗo meeday ta ŋaar kaak gin gudurre pakgig gamin okin̰co. 2Ɗo wiktin ta Muusa, ŋu siy *kuraarin ta Buŋdi. Kar diŋ gay, mee satkiner ka tatko-ak gina riyoy ɗo kuraarin ta taɓ. Kuraarin taar-at, *Rabbin meen̰ji kat siyta, yampa, ŋu geenno.
3Ay mee satkiner ka tatko, ŋu diyig a ŋaa iye gamin ku berindi ɗo Buŋdi ho ŋaaji gine *satkine. Ampa-ak, kante oki, illa ŋaa gine maan ka berindi. 4Kar ya mee satkinte ka tatiko-ak kat goy ɗo kiɗar, ŋa ginaaɗo tak-tak riy ta gay satkiner, asaan kuuk gina riy ta satkiner ar taat *gaanuun kaawtu-ak, ŋuur goy ko. 5Ar gem taliy kelmoy ɗo sawwapa, riy ta gay satkiner-ak sa, taar ar kelim ta riy ta taɓ ŋu giniy ɗo wer kaak Buŋ goyiyo. Ŋaar-aŋ ar maan kaak kuuniyji ɗo Muusa ɗo wiktin taat ŋa siyiy kuraarin ɗo Buŋdi. Ɗo wiktin taar-at, Buŋ kaawji aman : « Ya ki siya kuraarne, zeeɗu kii siyin ar taat nu bayniiji ka dambar-aka. »#8.5 Wer ka gase kaawor ɗo Ekzood 25.40. 6Diŋ gay, riy taat Buŋ gaariiji ɗo Iisa Masi-at, taar pakgit taat awalle serek. Kar jamaw taat ŋu diyig Iisa Masi ɗatik ta geemir iŋ Buŋ gay, taar oki pakgit taat awalle serek. Asaan iŋ jamaw-at, maan kaak Buŋ kaawtu a ŋaa gine pakgig ŋaar kaak ŋa kaawtu awalle ɗo gaanuundi.
Jamaw ta awalle iŋ ta marbinto
7Ka seener, ya jamaw ta awalle-at kat necit ko riyti, maman Buŋ yaa obe jamaw ta pey ? 8Kar sando, Buŋ leesco ɗo geen̰ji aman :
« Nun *Rabbin kat kaawaw :
ɗo menaw kuuk yaa ase-aku,
naa obe jamaw ta marbinto
iŋ gee ku Israyeel ho iŋ ku Zuuda.
9Jamaw taar-at arro taat nu obtu iŋ aginiyco
wiktin taat nu imiliig min darre ta Meser ho nu ogiriico.
Uudin taat ŋu bal karmiyin jamaw-ata,
nun Rabbin kat kaawaw, nun oki newsico kopo.
10Nu kaawa pey aman :
ɗo jamaw taat naa obe iŋ gee ku Israyeel-an,
ya menaw ŋuur-ak bire,
naa un̰jin̰ gaanuundu ɗo kaƴco
ho naa diyin̰ ɗo gelbinco.
Naa gine Buŋco
ho ŋuur gay yaa gine geendu.
11Yoo waan minninco ucaaɗo inde giji wal siŋji
a ŋaaji gaare botol taat ŋaan ibinindu.
Asaan okin̰co, ŋuun ibinindu,
min kuuk aginda yoo kuuk n̰aaɗa.
12Naaco saamiyin̰ nigin̰co okin̰ji
ho zunuubinnico gay, nu icaaɗo pey bico tak-tak. »#8.12 Wer ka gase kaawor ɗo Zeremi 31.31-34.
13Ya Buŋ kolaat jamaw-at a ta marbinto, ŋaar-ak, ar ŋa ginit taat awalle-at maan kaak taay ko. Kar sando, maan kaak taaye ho zaɓ-ak, ŋaar baay gaay ko bire.
Currently Selected:
Hebru 8: daa
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
