लूका 4:9-12

तब् शैतान येशूहे यरुशलेम शहरमे लैजाके मन्दिरके टिप्पामे ठरह्वाइल और हुँकिन्हे कहल, “अप्नि परमेश्वरके छावा हुइती कलेसे यहाँसे तरे कुदुकके साबित करी। काकरेकी पवित्र शास्त्रमे असिक लिखल बा, ‘ऊ अपन स्वर्गदूतनहे तोहाँर रक्षा करक लग आज्ञा दिहीँ। और जब तुँ गिर्बो ते ओइने अपन हाँथेलेके तुहिन्हे थामलिहीँ, ताकि तोहाँरिक गोरामे पठरालेके चोट ना लागे।’” येशू उहिहे जवाफ देलाँ, “पवित्र शास्त्रमे असिके फेन लिखल बा, ‘तैँ अपन परमप्रभु परमेश्वरके परीक्षा ना करिस।’”