Genesi 23

Abrahaʌ̃ba Sara tʌb̶ari carea ẽjũã nẽdod̶a

1Abrahaʌ̃ quima Sarara 127 poa b̶asia. 2Maʌ̃ne Arbá purud̶e Canaaʌ̃ druad̶e jaid̶asia. Arbá purura idjab̶a Hebroʌ̃ abadaa. Abrahaʌ̃ra Sara carea jĩã b̶ʌba sopua ewarira wagasia.

3Mãwã b̶ʌd̶e Abrahaʌ̃ra idji quima jaid̶ad̶amaʌba hititarãmaa bed̶ead̶e wãsia. Ãdjirãa nãwã jarasia:

4–Mʌ̃ra drua ãĩbema bẽrã bãrã tãẽna ẽjũã neẽ́ b̶ʌa. Mʌ̃a quĩrĩã b̶ʌa bãrãba mʌ̃́a ẽjũãda nẽdobued̶ida mʌ̃ quima tʌb̶ari carea.–

5Maʌ̃ne hititarãba Abrahaʌ̃a panusid̶aa:

6–Dai boro, ũrĩdua dai bed̶eara. Ãcõrẽba bʌra dairã tãẽna dji dromada b̶ʌsia. Maʌ̃ bẽrã bʌ quimara tʌb̶aridua daiba coro eropanʌ uria dji biara b̶ʌd̶e. Dairãba wãgad̶aẽ́a.–

7Maʌ̃ne Abrahaʌ̃ra ʌ̃ta nũmeped̶a quĩrã ed̶aa b̶arrusia hititarã quĩrãpita bia quiruad̶a ai carea. 8Maʌ̃be jarasia:

–Bãrãmaa mʌ̃ quimara nama tʌb̶arida wãrãda bia b̶ʌbʌrʌ, mʌ̃ djuburia Zohar warra Eproʌ̃ ume bed̶ead̶adua. 9Iwid̶id̶adua bẽwãrã joubada uria Macpela abadara mʌ̃́a nẽdobuemãrẽã. Maʌ̃ uriara idji ẽjũã icawa b̶ʌa. Maʌ̃ uria carea mʌ̃a diaya idjia iwid̶ibʌrʌ quĩrãca. Mãwãra naʌ̃ druad̶e ẽjũãda erob̶aya mʌ̃ ẽberãrã tʌb̶ari carea.–

10Maʌ̃ Eproʌ̃ra hitita basía. Idjira arima chũmasia. Maʌ̃ne idji ẽberãrã quĩrãpita, purud̶e ed̶a wãbʌdarã quĩrãpita bid̶a idjia Abrahaʌ̃a nãwã jĩgua jarasia:

11–Mãwãẽ́a, mʌ̃ boro, ũrĩdua. Mʌ̃ ẽberãrã quĩrãpita mʌ̃a maʌ̃ ẽjũãra dji uria sid̶a bari diaya bʌ quima tʌb̶arimãrẽã.–

12Maʌ̃ne Abrahaʌ̃ra hititarã quĩrãpita waya quĩrã ed̶aa b̶arrusia. 13B̸arruped̶a jũmarã quĩrãpita Eproʌ̃a nãwã jĩgua jarasia:

–Mʌ̃ quĩrã djuburia waya ũrĩdua. Dji ẽjũãbari bʌa parata iwid̶ibʌrʌ quĩrãca mʌ̃a diaya. Mʌ̃a jara b̶ʌra ĩjãdua. Mãwãbʌrʌ mʌ̃ quimara maʌ̃ ẽjũãne tʌb̶ariya.–

14Eproʌ̃ba panusia:

15–Mʌ̃ boro, ũrĩdua. Dji ẽjũãra nẽdobueida b̶ʌa cuatrociento parata torrobari, baribʌrʌ ¿dadjimaarã maʌ̃da parataca? Bʌ quimara tʌb̶aridua.–

16Eproʌ̃ba jarad̶ara Abrahaʌ̃ba bia ũrĩsia. Ara maʌ̃da hititarã quĩrãpita cuatrociento parata torroda juachaped̶a Eproʌ̃a jũma daucha diasia. 17-18Maʌ̃ juachad̶ara hititarãba, purud̶e ed̶a wãbʌdarã bid̶a unusid̶aa. Mãwã cawasid̶aa Abrahaʌ̃ba Eproʌ̃ ẽjũã Macpela abadara nẽdosida. Maʌ̃ ẽjũãra Mamred̶eba ʌ̃mãdau odjabariare b̶ʌa. Abrahaʌ̃ba nẽdosia dji ẽjũãra, dji joubada uriara, bacuru dji ẽjũãne b̶ea sid̶a.

19Mãwãnacarea Abrahaʌ̃ba idji quima Sarara idjia nẽdod̶a uriad̶e tʌb̶arisia. Maʌ̃ uriara ẽjũã Macpela abadad̶e b̶ʌa. Maʌ̃ ẽjũãra Mamred̶eba ʌ̃mãdau odjabariare b̶ʌa. Mamrera idjab̶a Hebroʌ̃ abadaa. Hebroʌ̃ra Canaaʌ̃ druad̶e b̶ʌa. 20Mãwã Macpela ẽjũã, dji uria sid̶a hititarãne bad̶ada Abrahaʌ̃ba jũma edasia.

Currently Selected:

Genesi 23: emp

Highlight

Copy