YouVersion Logo
Search Icon

ปะทมมะกาน 39

39
โยเซบ​อัอด​นึง​ปะเทด​อียิบ
1เจอ​ฮาไน​ซี​เวา​เรือง​คอง​โยเซบ​แอน ‍ ตี​พอคา​กวย​อิซมาเอล ‍ เอด​โยเซบ​อะเดิง​อะปัอะ​ตายะ​นึง​ปะเทด​อียิบ​อะกี ‍ อะไล​ตายะ​ออ์น​โปทิพา ‍ โปทิพา​อะไน​ปัน​ฮัวนา​คอง​จุม​อะญา​นาก็​กรัว​กะซัด ‍  2เจอ​เยโฮวา​ก็​อัอด​นึง​โยเซบ ‍ อวยพอน​อัน ‍ ตัอ​ปาย​อัน​ตาะ​อันเตริว​ก็​เบิน​อะเลอ ‍ ก็าก​จน​ญิ ‍ เจอ​อัน​ก็​อัอด​นึง​ดง​คอง​นีาย​อัน ‍ นาก็​ปัน​กวย​อียิบ​อะกี​ออยะ ‍  3เจอ​นีาย​คอง​อัน​ก็​โฮม​ปาย​เยโฮวา​อัอด​นึง​โยเซบ ‍ อวยพอน​อัน ‍ ตัอ​ปาย​อัน​ตาะ​อันเตริว​ก็​เบิน​อะเลอ ‍ ก็าก​จน​ญิ ‍  4โปทิพา​เลิด​อะยอ์ะ​โยเซบ​อะเลอ ‍ อะจุฮ​มิด​จอ์ะ​อัน ‍ เจอ​ก็​แตงต็าง​ออ์น​อัน​ปัน​พู​นาก็​เฮะ​นาก็​กรัว​ดง ‍ กรัว​เวียะ​ฮอง​กู​เนว​แทน​อัน ‍ เจอ​ญิ​กู​เนว​นาก็​ปัน​คอง​นีาย​อัน ‍ นีาย​ก็​มูอบ​ออ์น​โยเซบ​ปัน​พู​เฮะ​พู​กรัว​จน​ญิ ‍  5กดตี​โยเซบ​เบิน​ปัน​พู​นาก็​กรัว​อันเตริวแม​คอง​นีาย​อัน​นาก็​ปัน​กวย​อียิบ​อะกี ‍ เยโฮวา​ก็​อวยพอน​ออ์น​นีาย​อัน​อะเลอ ‍ ตัอ​ปาย​นึง​ดง ‍ ตัอ​ปาย​นึง​นีา​นึง​ซวน ‍ ตัอ​ปาย​ญิ​กู​อัน​กู​เนว​คอง​นีาย​อัน ‍ พูซาง​ก็​อวยพอน​ออ์น​จน​ญิ ‍  6นีาย​เลิด​ญก​ญิ​กู​อัน​กู​เนว​นาก็​ปัน​คอง​อัน​อะกี ‍ ออ์น​โยเซบ​ปัน​พู​นาก็​เฮะ​นาก็​กรัว ‍ นีาย​ก็​เลย​ตุน​ญุง​ตุน​เกียว​นัง ‍ กับ​เวียะ​ฮอง​กู​เนว​นึง​ดง​คอง​อัน ‍ อัน​กึด​มัฮ​ก็​เรือง​เนว​จีา​คอง​อัน​ซัง ‍ กะนอฮ​กี​อัน​ตุน​กึด​ตุน​เกียว​นัง ‍ 
ละกวย​นีาย​คอง​โยเซบ​ม็าก​โยเซบ
โยเซบ​อะไน ‍ ปัน​กวย​นาก็​มายะ​อะเลอ ‍ มายะ​ญิ​ทัง​ตอ์​ทัง​มินมุฮ ‍  7เจอ​โยเซบ​ก็​อัอด​นึง​ดง​คอง​นีาย​อัน ‍ จน​เบิน​ปัน​ปูด​อัอด​ตี​กี ‍ เจอ​ฮาไน ‍ ละกวย​คอง​นีาย​อัน​ก็​กึด​ม็าก​โยเซบ ‍ ม็าก​เรง​อะเลอ ‍ จน​จวน​โยเซบ​มูด​บายะ​นึง​อัน ‍  8ฮัก​โยเซบ​บัด​ตัอ​ญอม ‍ อัน​เวา​นึง​ละกวย​นีาย​คอง​อัน​ปาย ‍ "ตะนาะ ‍ นาก็​อังกอะ​อัอด​นึง​ดง​อะไน ‍ นีาย​คอง​อังกอะ​ก็​เจือ​มิด​อังกอะ​อะเลอ ‍ จน​ตุน​ฮวง​อันเตริว​นัง ‍ นึง​ดง​คอง​อัน ‍ อันเตริว ๆ นาก็​ปัน​คอง​อัน ‍ อัน​ก็​ญก​ออ์น​อังกอะ​ปัน​พู​เฮะ​พู​กรัว​จน​ญิ ‍  9อัน​มูอบ​ออ์น​อังกอะ​เบิน​ซิด​ญิ​กู​เนว​นึง​ดง​อะไน ‍ จน​อี​ตูอ​กัน​กับ​อัน ‍ อันเตริว ๆ อัน​ก็​มูอบ​ออ์น​อังกอะ​ปัน​พู​นาก็​กรัว​จน​ญิ ‍ มะนาะ​ไม​อะไน​ออยะ ‍ อัน​ตุน​มูอบ​ออ์น​อังกอะ ‍ พอะ​ไม​ก็​ปัน​ละกวย​คอง​อัน ‍ เจอ​ตะนาะ​อังกอะ​จัง​ซี​ตาะ​เนว​โลยฮ​เนว​ไล​พิลึก​ซำ​ไน? ‍ อังกอะ​ซี​ตัอ​ปัน​ดัก ‍ ตาะ​โลยฮ​พะเจา​คอง​อังกอะ" ‍  10ฮัก​ละกวย​คอง​นีาย​อัน​อะกี ‍ ก็​นัง​จวน​ออ์น​โยเซบ​มูด​บายะ​นึง​อัน​กู​จะไง ‍ ฮัก​โยเซบ​บัด​ตัอ​ญอม​ตะมึง​อัน ‍ ตัอ​ญอม​ตาะ​กือ​นาก็​อัน​จวน​อะกี ‍ โยเซบ​เลิด​เพะ​อี​เลก ‍ ตัอ​อี​อัอด​แจะ​อัน​ไง ‍ 
11เบิน​มู​จะไง ‍ โยเซบ​ก็​มูด​ปัอะ​ตาะ​งาน​อัอด​นึง​ดง​อะกี ‍ ฮัก​กวยไซ​ซะเอย​นาะ​นาก็​เกย​ตาะ​งาน​อัอด​นึง​ดง​อะกี ‍ ปะซบ​ตัอ​เบิน​มะเลอ​อัอด​พาตี​นาะ ‍  12ละกวย​คอง​นีาย​อัน​เลิด ‍ ตี​ซะแร​คอง​โยเซบ​อะดอะ ‍ เจอ​ก็​เวา​จวน​อัน​แอน​ปาย ‍ "ตัอะ​ลาะ ‍ ตัอะ​บายะ​นึง​กึ" ‍ ฮัก​โยเซบ​บัด​ตะลุฮ​ลอฮ ‍ ตาฮ​ฮัก​ซะแด​คอง​อัน ‍ พอะ​อะยาะ​อะกี​นัง​ตี​อะดอะ​อัอด ‍  13ฮัก​บัด​อะยาะ​อะกี​โฮม​ปาย ‍ โยเซบ​ตาฮ​ซะแร​คอง​อัน​อะดอะ ‍ อัน​เลิด​ตะลุฮ​ลอฮ​จอ์ะ​นูอะ ‍  14เจอ​ก็​แฮล​อะโร​อันจูอยะ​กวยไซ​กอ์น​นาก็​เกย​ตาะ​งาน​นึง​ดง​คอง​อัน​อะกี ‍ บัด​อะไล​ตัอะ​เจอ ‍ อัน​ก็​เวา​นึง​อะไล​ปาย ‍ "อะเฮะ​เดอ ‍ นีาย​คอง​อัมไป ‍ เอด​ทาดรับไซ​นาก็​ปัน​กวย​กะนอฮ​อะตัอะ#39:14 พะซา​อะไล​อะไน​อัน​เวา​ปาย ‍ "กวย​ฮีบรู" ‍ คำ​ตู​ไน​ปัน​คำ​นาก็​อัน​เวา​พะมาด​เวา​เยียดยาม​อัน ‍ ออ์น​อัน​ตัอะ​อัอด​ปัอะ​ไน ‍ เพือ​ซี​ตาะ​เนว​ไล​ตาะ​เนว​ตัอ​ออ​จอ์ะ​ไฮ ‍ อัน​มูด​จอ์ะ​กึ ‍ ปาย​อี​ตัอะ​บายะ​นึง​กึ ‍ ฮัก​กึ​บัด​แฮล ‍  15บัด​อัน​ซัง​กึ​แฮล​ญิ​เรง​เจอ ‍ อัน​เลิด​ตะลุฮ​ลอฮ ‍ ตาฮ​ฮัก​ซะแร​คอง​อัน" ‍ 
16เจอ​อะยาะ​อะกี​ก็​เอด​ซะแร​คอง​โยเซบ ‍ อะดอะ​มะนืย​กับ​อัน​ตี​กี ‍ จน​เตา​กะยาก​อัน​ซี​ลับ​ตัอะ ‍  17บัด​กะยาก​อัน​ตัอะ​เจอ ‍ อัน​ก็​เวา​ออ์น​กะยาก​อัน​ตะมึง​แอน ‍ ปาย ‍ "ทาดรับไซ​คอง​ไม ‍ นาก็​ไม​จัอง​อะตัอะ​ตี​กะนอฮ​อะกี ‍ อัน​มูด​ตัอะ​จอ์ะ​กึ ‍ อี​ตาะ​ไล​ตาะ​ตัอ​ออ​จอ์ะ​กึ ‍  18ฮัก​บัด​กึ​แฮล​ญิ​เรง ‍ อัน​ก็​ตาฮ​ฮัก​ซะแร​คอง​อัน ‍ เจอ​ก็​ตะลุฮ​ลอฮ​จอ์ะ​นูอะ" ‍ 
โยเซบ​เบิน​อัอด​นึง​กุก
19บัด​นีาย​คอง​โยเซบ​ซัง​ละกวย​อัน​อะตัอง​ปาย ‍ "ทาดรับไซ​คอง​ไม​ตาะ​กับ​กึ​แบบ​ไน​แบบ​กี" ‍ นีาย​ก็​ฮึน​อะเลอ​รีาย​อะเลอ ‍  20นีาย​คอง​โยเซบ​เลิด ‍ เอด​โยเซบ​อะปัอะ​ค็าง​อะดอะ​นึง​กุก กุก​บอน​นาก็​อัน​ค็าง​โยเซบ​อะกี ‍ ปัน​กุก​นาก็​อะไล​ค็าง​อะดอะ​กวย​นาก็​ตาะ​โลยฮ​กะซัด ‍ โยเซบ​เลิด​เบิน​อัอด​นึง​กุก​อะกี​ออยะ ‍  21ฮัก​เยโฮวา​ตุน​ตาฮ​โยเซบ ‍ พูซาง​อวยพอน​อัน ‍ เจอ​พูคุม​กวย​กุก​อะกี​ก็​อะยอ์ะ​อัน ‍ ตาะ​บาบ​อัน ‍  22เจอ​เวียะ​งาน​กู​เนว​นึง​กุก​อะกี ‍ โยเซบ​เลิด​ปัน​พู​นาก็​เฮะ​กรัว​แทน​อะไล​จน​ญิ ‍  23พูคุม​อะกี​เลิด ‍ ตุน​ตุฮ​ตุน​นะนุฮ​อันเตริว​นัง ‍ นึง​กุก​อะกี ‍ พอะ​อัน​ก็​มูอบ​ออ์น​โยเซบ​ปัน​พู​เฮะ​พู​กรัว ‍ เจอ​ตัอ​ปาย​เวียะ​ฮอง​อันเตริว ๆ นาก็​โยเซบ​ตาะ​อะกี ‍ อัน​ก็​ปัน​เนว​นาก็​ก็าก​เนว​นาก็​ออ​จน​ญิ ‍ พอะ​เยโฮวา​อัอด​นึง​อัน ‍ 

Highlight

Share

Copy

None

Want to have your highlights saved across all your devices? Sign up or sign in