ปะทมมะกาน 36
36
เซือซายคองเอซาว
1ฮาไนตอปัอะ ซีปันเรืองเซือซายคองเอซาว (นาก็เบินแอนมูละมึฮปาย เอโดม) 2เอซาวอะไนอันเบินละกวยซะเอยนาะ ละกวยอันปันกวยคานาอันบาลนาะ กืออาดานาก็ปันกอนคองเอโลนกวยฮิดไท เจอก็โอโฮลีบามานาก็ปันกอนคองอานา เจาคองซิเบโอนกวยฮีไว 3เจอละกวยคองเอซาวแอนมะนาะ ตัอมีนกวยคานาอัน ปันกอนคองอิซมาเอล ละมึฮอันบาเซมัด อายคองบาเซมัดอะไนละมึฮปาย เนบาโยด
4เจอละกวยคองเอซาวนาก็ละมึฮปาย อาดาเบินกอนละมึฮ เอลีพัด ละกวยนาก็ละมึฮ บาเซมัดเบินกอนละมึฮ เรอูเอล 5เจอละกวยนาก็ละมึฮ โอโฮลีบามาอะกีเบินกอนละมึฮ เยอูด ยาลาม เจอก็โครา กวยจุมไนออยะปันกอนปะลูอะคองเอซาว นาก็กัอดนึงซวงนาก็อันอัอดนึงกะแตะคานาอันอะกี
6เจอฮาไนเอซาวก็ปีากอนปีาละกวยคองอันญิกูนาะ กับกวยนาก็อัอดมะนืยกับอัน ทังซัดซาวาซิงกับโกรกรูอะกูเนวคองอัน นาก็อันอะรอ์ะอะรอ์มอะดอะนึงกะแตะคานาอันอะกี เจอก็อัมปรูอมกันปัอะอัอดแอนมูบอน ตุนอัอดมะนืยนัง กับแซมคองอันนาก็ละมึฮยาโคบอะกี 7พอะอะไลมังก็เบินอันเตริวแมอับอะเลอ ซีตัอปันอัอดมะนืยนัง เจอบ็าดบายแทวกี ก็ตัอปูอซีออ์นซัดซาวาซิงคองอะไลจีานัง 8-9เอซาวเลิดญีายปัอะอัอดปัอะกอ์ฮ นาก็อัอดนึงกะแตะเซอี เอซาวอะไน อะไลอะโรละมึฮคองอันแอนมะเนวปาย เอโดม กวยเลิดอะโรเจากับแจคองอันปายปันกวยเอโดม เวาตะปูนละมึฮตะไมคองอัมปูอคองอะจวยฮอะไลอะกีออยะ
เจอฮาไนซีเวาเรืองเซือซายคองเอซาวลือเอโดม นึงซวงนาก็อะไลปัอะอัอดนึงกอ์ฮปัอะกะแตะเซอีอะกีแอน 10-13ละกวยคองเอซาวนาก็ละมึฮปาย อาดา เบินกอนกอ์นละมึฮ เอลีพัด เอลีพัดอะไนเอดละกวยเจอก็เบินกอนกอ์นละมึฮ เทมาน โอมา เซโพ กาทาม เจอก็เคนัด เจอเอลีพัดเบินละกวยเกยะนืยะ ละมึฮ ทิมนา ทิมนาอะไนเบินกอนกอ์นมะนาะละมึฮ อามาเลก กวยจุมไนปันกอนเจาคองเอซาวนาก็อันเบินกับอาดา
เจอละกวยคองเอซาวนาก็ละมึฮปาย บาเซมัดเบินกอนกอ์นละมึฮ เรอูเอล เรอูเอลอะไนเอดละกวยเจอก็เบินกอนคือกัน กอนกอ์นคองอันละมึฮ นาฮาด เซ-รา ซัมมา เจอก็มิซซา กวยจุมไนปันกอนเจาคองเอซาว นาก็อันเบินกับบาเซมัด
14เจอกอนคองเอซาวนาก็เบินกับโอโฮลีบามาละมึฮ เยอูด ยาลาม เจอก็โครา โอโฮลีบามาละกวยคองเอซาวอะไน อัมปูออันละมึฮ อานา เจออะจวยฮอันละมึฮ ซิเบโอน
15-16เจอฮาไนซีเวาละมึฮกอนเจาคองเอซาวนาก็อะไลเบินปันเจาปันนายแอน เอซาวเบินละกวยแก็ลนาก็ละมึฮอาดา เจอกอนคองอะไลละมึฮเอลีพัด เอลีพัดอะไนเอดละกวยเจอก็เบินกอน กอนคองอันนาก็เบินปันเจาปันนายนึงกะแตะเอโดมละมึฮเทมาน โอมา เซโพ เคนัด โครา กาทาม เจอก็อามาเลก
17เจอละกวยคองเอซาวแอนมะนาะละมึฮบาเซมัด เจออะไลเบินกอนมะนืยนาก็ละมึฮเรอูเอล เรอูเอลอะไนเอดละกวยเจอก็เบินกอน กอนคองอันนาก็เบินปันเจาปันนายนึงกะแตะเอโดมละมึฮนาฮาด เซ-รา ซัมมา เจอก็มิซซา
18เจอละกวยคองเอซาวตูมะนาะแอนละมึฮโอโฮลีบามา เจอกอนคองอะไลนาก็เบินปันเจาปันนายละมึฮเยอูด ยาลาม เจอก็โครา โอโฮลีบามาอัมเปะคองอะไลปันกอนกะมอ์ลคองอานา
19ญิกูนาะนาก็เวาอะไน ปันกวยนึงเซือซายคองเอซาว นาก็เบินปันเจาปันนาย เอซาวอะไนเบินแอนมูละมึฮปาย เอโดม
จุมเจือซายกวยเซอี
20-21เจอฮาไนซีเวาเรืองตะกูนคองกวยโฮรี กวยนาก็เกยอัอดนึงกะแตะแทวกี ญวงนาก็เอซาวกับกอนเจาคองอันซีปัอะอัอด กวยจุมไนปันเซือซายคองเซอี เจอเซอีเบินกอนซะเอยนาะ ละมึฮโลทาน โซบาล ซิเบโอน อานา ดีโซน เอเซอ เจอก็ดีซาน กอนคองเซอีจุมไน มังก็ปันเจาปันนายอัอดนึงกะแตะเอโดม เจอซีเวาละมึฮกอนคองอะไลแตละนาะแอน
22กอนกอ์นคองโลทานละมึฮปาย โฮรีกับเฮมาน เจอโลทานเบินแซมกะมอ์ลมะนาะนาก็ละมึฮ ทิมนา
23กอนกอ์นคองโซบาลละมึฮ อัลวาน มานาฮาด เอบาล เซโพ เจอก็โอนัม
24กอนกอ์นคองซิเบโอนละมึฮ อัยยากับอานา อานาอะไนอันปัอะละมอ์ฮดัอะนำบอนาก็ปันดัอะกะเตา ละมอ์ฮอัอดนึงบอนกะแฮง นึงซวงนาก็อันอัอดเลียงลา นาก็ปันคองซิเบโอนอัมปูอคองอันอะกี 25เจออานาอะไนเบินกอนปะลูอะละมึฮ ดีโซน เจอก็เบินกอนกะมอ์ลละมึฮ โอโฮลีบามา
26กอนกอ์นคองดีโซนละมึฮ เฮมดาน เอซบาน อิดราน เจอก็เคราน
27กอนกอ์นคองเอเซอละมึฮ บิลฮาน ซาวาน เจอก็อาคาน
28กอนกอ์นคองดีซานละมึฮ อูดเจอก็อารัน
29ซีเวาแอนมูตูอเดอ ละมึฮคองกวยโฮรีนาก็ปันเจาปันนายคองอะไล เบินโลทาน โซบาล ซิเบโอน อานา 30ดีโซน เอเซอ เจอก็ดีซาน กวยจุมไนมังก็ปันเจาปันนายคองกวยโฮรีนาก็อัอดนึงกะแตะเซอี เวาตามละมึฮตามตะกูนคองอะไล
จุมกะซัดนาก็ปกครองปะเทดเอโดม
31เจอตอปัอะอะไน ซีปันละมึฮคองกะซัด นาก็ปกครองปะเทดเอโดม ซวงไนกวยอิซราเอลนังตัอเบินกะซัดอัมปิน
32กะซัดเบ-ลาเบินปกครองปะเทดเอโดมญวงมู อันก็ปันกอนคองเบโอ เจออันก็อัอดนึงเมืองดินฮาบา
33เจออันตูนปัอะกะซัดเบ-ลาก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ โยบับ โยบับอะไนปันกอนคองเซ-รา อันปันกวยเมืองโบซรา
34เจออันตูนปัอะกะซัดโยบับก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ ฮุซาม ฮุซามอะไนตัอะตีกะแตะคองกวยเทมาน
35เจออันตูนปัอะกะซัดฮุซามก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ ฮาดัด ฮาดัดอะไนปันกอนคองเบดัด เจออันก็อัอดนึงเมืองอาวีด กะซัดฮาดัดอะไน อันเกยแต็นเปกวยมีเดียนนึงปะเทดโมอับ
36เจออันตูนปัอะกะซัดฮาดัดก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ ซัมลา ซัมลาอะไนปันกวยเมืองมัซเรคา
37เจออันตูนปัอะกะซัดซัมลาก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ ซาอูล ซาอูลอะไนปันกวยเมืองเรโฮโบด เมืองเรโฮโบดอะกีอัอดเกมอัมเปะดัอะยูเพรติด
38เจออันตูนปัอะกะซัดซาอูลก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ บาอัลฮานัน บาอัลฮานันอะไนปันกอนคองอักโบ
39เจออันตูนปัอะกะซัดบาอัลฮานันก็กะเจด เลิดเบินกวยตะไมแอน นาก็เบินปันกะซัดปกครองปะเทดเอโดมอะกี กะซัดตะไมอะไนละมึฮ ฮาดา ฮาดาอะไนอัอดนึงเมืองปาอู เจอละกวยคองอันละมึฮ เมเฮทาเบล อัมเปะคองเมเฮทาเบลอะไนละมึฮ มัดเรด นาก็ปันกอนคองเมซาฮับ
40ตอปัอะฮาไนซีปันละมึฮคองกอนเจาคองเอซาว นาก็อะไลปันเจาปันนาย เวาตามตะกูน ตามบอนอัอด ตามละมึฮคองอะไล เบินทิมนา อัลวา เยเทด 41โอโฮลีบามา เอลา ปิโนน 42เคนัด เทมาน มิบซา 43มักดีเอล เจอก็อิราม กวยจุมไนมังก็ปันเจาปันนาย นึงเซือซายคองกวยเอโดม เวาตามบอนนาก็อะไลอัอดนึงกะแตะนาก็ปันกำมะซิดคองอะไลอะกี (ปันเอซาวอะกีออยะ นาก็ปันอัมปูอปันอะจวยฮคองกวยเอโดมอะไน)
Currently Selected:
ปะทมมะกาน 36: Bru Bible
Highlight
Share
Copy
Want to have your highlights saved across all your devices? Sign up or sign in
- Ethnos360
