ปะทมมะกาน 22
22
พูซางอะตัองอับราฮัมออ์นทะวายอิซอัก
1เจออันตูนอะกีแอน พูซางอีลูองมิดอับราฮัม อันเลิดเวาปาย "อับราฮัมเอย!"
อับราฮัมก็ซะอัอยปาย "เฮอ? อังกอะอัอดปัอะไน"
2เจอพูซางก็เวาปาย "จะนูอกึอีออ์นไมเอดกอนนาก็ไมเบินมะนาะอะไนซัง กืออิซอักกอนคองไม นาก็ไมอะยอ์ะอะเลออะกี ออ์นไมเอดอันอะปัอะบอ์ฮทะวายออ์นกึ นึงกะแตะเคดโมรียา ตัอะบอนกีเจอ กึซีอะตัองออ์นไมด็างดัก กอ์ฮนาก็กึซีออ์นไมซอฮทะวายกอนคองไมออ์นกึอะกี"
3อับราฮัมเลิดยวลตีดัก เอดอานเซินจอ์ะกลงลา เจอก็ปีาทาดรับไซคองอันบาลนาะ กับอิซอักกอนคองอัน ลอฮปัอะกอฮอวยฮอะดอะ เพือซีอะปัอะบอ์ฮปะจีา เจออะไลก็อัมปรูอมปัอะจอ์ะบอนนาก็พูซางอะตัองออ์นปัอะอะกี 4เยิงอะรึก บอนนาก็อะไลซีปัอะอะกี อะไลตะยาฮปัอะจนตัอะไปจะไง จังซีตะป็างโฮมกอ์ฮอะกี
5อับราฮัมเลิดเวานึงทาดรับไซคองอันอะกีปาย "ออ์นอัมไปอะกันอัอดตีไนเดอ กับลาตอ์ไน กึกับกอนคองกึ ซีปัอะนบปัอะปะจีาพูซาง เจอก็ซีลับตัอะจอ์ะอัมไปแอน"
6เจออับราฮัมก็ออ์นอิซอักดอ์ลอวยฮอะปัอะ เจออันบัดอะเดิงทังลวยะอวยฮนาก็เบินอวยฮนืยะ กับอะโจ เจออะไลก็อัมปรูอมกันตะยาฮปัอะมะนืย 7นึงซวงนาก็อะไลกำลังตะยาฮปัอะอะกี อิซอักก็อะบลัฮอัมปูออันปาย "อัมปูอเอย!"
อัมปูออันก็ตอบปาย "อันเตริวมอะกอน?"
กอนเลิดเวาปาย "ลวยะอวยฮไฮก็เบิน อวยฮก็เบินเจอ ฮักกอนแกะนาก็ไฮซีทะวายออ์นพูซางอะกี อัอดปะลาะ?"
8เจออับราฮัมก็เวาปาย "กอนเอย พูซางฮักซีตีานออ์นไฮ แกะนาก็ซีออ์นไฮทะวายออ์นอันอะกี" อัมปูอกับกอนเลิดตะยาฮปัอะมะนืยตอปัอะ
9บัดอะไลปัอะตัอะบอนนาก็พูซางอะตัองเจอ อับราฮัมก็เอดโงลตะเมากออะซอฮตาะบอนปะจีาอะดอะ เจอก็เอดอวยฮกองอะดอะออ์นปันละเบียบ เจออันก็ซ็าดมัดกอนคองอัน เจอก็อะดอะปัองกะนองอวยฮอะกี 10เจอฮาไนอับราฮัมก็กอ์บเอดอะโจ อีตรายฮกอนคองอันเบิมเจอ 11ฮักพะดีเทวะดาคองเยโฮวา#22:11 อะไนปันกะตอ์พูซาง ค็านอันอีตัอะเวานึงกวยอันเตืออันก็ออ์นอะไลโฮมอันกือเทวะดา ก็อะโรจอ์ะอันตัอะตีมะลังปาย "อับราฮัม อับราฮัม!"
เจออันก็ซะอัอยปาย "เฮอ? อังกอะอัอดปัอะไน"
12เจอเทวะดาคองเยโฮวาก็เวาปาย "ไมซูตาะกอนไมได ซูตรายฮอันก็ไท พอะกึก็ด็างเจอฮาไนปาย ไมเจือไมทือพูซางลึ แมแตกอนคองไมมะนาะอะไนซัง ไมก็นังซีออ์นกึ"
13บัดอับราฮัมเงยอะซอฮ อันก็โฮมแกะตรอ์ยฮ ตะกอยอันกีางอัอดนึงปุมอะลูอง อับราฮัมเลิดกอ์บเอดแกะอะกีออยะ บอ์ฮทะวายออ์นพูซางแทนกอนคองอัน 14เจออับราฮัมเลิดอะโรบอนกีปาย "เยโฮวาตีานออ์น" เจออะไลก็เวาจนเตากูจะไงอะไนปาย "อัอดนึงกอ์ฮคองเยโฮวาอะกี นาวฮักซีตีานออ์น"
15เจอเทวะดาคองเยโฮวาอะกี ก็เวาอะลอฮตีมะลังแอนปาย 16"ญูอนนาก็ไมก็ตุนซะน็าง ตุนฮอ์งกอนปะลูอะมะนาะคองไมอะไน ไมญอมทะวายออ์นกึ กึเลิดซาบานปายกึซีอวยพอนไม เจอคำซาบานคองกึอะไน กึซีซาบานอะดอะนึงละมึฮคองกึเบิม 17กึซีอวยพอนไมออ์นเบินกอนเจาอับอะเลอ อับซำมันตอ์ลนาก็อัอดปัอะมะลัง อับซำกลองกะแตะจัวฮนาก็อัอดนึงปึฮทะเล เซือซายคองไมซีเปซัดตรู เปญิกูบอน เจอซีเบินยึดเอดเมืองคองอะไลจนญิ 18เจอกวยกูซนซาดตัวโลกอะไนก็ซีเบินรับพอนนึงกอนเจาคองไม พอะปายไมตาะตามเนวนาก็กึอะตัองออ์นไมตาะ" อังกิคำอวยพอนนาก็เยโฮวาซาบานอะดอะนึงอับราฮัมมือกี
19เจออับราฮัมก็ลับปัอะจอ์ะทาดรับไซคองอัน เจอก็ปีาอะไลจูจอ์ะเมืองนาก็เบินละมึฮปาย อันซางบอนซาบานนังนึ#ปะทมมะกาน 21:31 อะกีแอน เจออะไลก็อัอดตีกีตอปัอะ
เซือซายคองนาโฮ แซมคองอับราฮัม
20เจอดูนปัอะแอน เบินกวยนาก็ตัอะอะตัองอับราฮัมออ์นด็างปาย "นาโฮนาก็ปันแซมคองไมอะกี อันเบินกอนเบินเจาเจอ กับละกวยคองอันนาก็ละมึฮมิลคาอะกี 21กอนแก็ลคองอะไลละมึฮอูด เจอแซมอันละมึฮบูด แอนมะนาะละมึฮเคมูเอล เคมูเอลอะไนก็เบินกอนเจอ ละมึฮอารัม 22เจอแซมนาก็ทัดเคมูเอลปัอะแอนก็เบินเคเซด ฮาโซ ปิลดาด ยิดลาบ เจอก็เบทูเอล" 23เบทูเอลกอนละลอฮคองนาโฮกับมิลคาอะไน เบินกอนกะมอ์ลนาก็ละมึฮ เรเบคา (เรเบคาอะไนตอปัอะก็ซีปันละกวยคองอิซอัก) แปดคนอะไนออยะ นาก็ปันกอนกอ์นคองนาโฮกับมิลคา 24เจอนาโฮก็เบินละกวยเกยะนืยะ นาก็ละมึฮเรอูมา เจอก็เบินกอนกอ์นมะนืยโปนนาะ ละมึฮปาย เท-บา กาฮัม ทาฮาด กับมาอาคา
Currently Selected:
ปะทมมะกาน 22: Bru Bible
Highlight
Share
Copy
Want to have your highlights saved across all your devices? Sign up or sign in
- Ethnos360
