Mark 16

Iysanıń qayta tiriliwi

(Mat 28:1-8; Luk 24:1-12; Yuxn 20:1-10)

1Shabbat kúni ótkennen soń, magdalalı Máriyam, Yaqıptıń anası Máriyam hám Salomiya Iysanıń denesine jaǵıw ushın xosh iyisli may satıp aldı. 2Olar ekshembi kúni quyash shıǵıwdan tań azanda qábirge keldi. 3Óz ara:

– Qábirdiń awzındaǵı tastı bizlerge kim domalatıp berer eken? – dep sóylesti.

4Biraq basların kóterip qarap, tastıń domalatıp taslanǵanın kórdi. Tas júdá úlken edi. 5Qábirdiń ishine kirgen olar oń tárepte otırǵan aq kiyimli bir jas jigitti kórip, qorqıp ketti.

6Jigit olarǵa:

– Qorqpańlar! Sizler atanaq aǵashqa shegelengen nasıralı Iysanı izlep júrsizler-ǵo. Ol qayta tirildi, Ol bul jerde joq. Mine, Onıń qoyılǵan jeri. 7Endi barıp, Onıń shákirtlerine hám Petrge: «Ol sizlerden burın Galilaǵa baradı. Óziniń aytqanınday, Onı sol jerde kóresizler», – dep aytıńlar, – dedi.

8Hayallar qattı qorqısıp hám qaltırasıp, qábirden shıǵıp qashıp ketti. Qorqqanlıqtan, hesh kimge hesh nárse aytpadı.

Iysanıń magdalalı Máriyamǵa kóriniwi

(Mat 28:9-10; Luk 24:13-35; Yuxn 20:11-18)

9Iysa ekshembi kúni erte tańda qayta tirilip, birinshi bolıp magdalalı Máriyamǵa kórindi. Iysa burın onnan jeti jindi quwıp shıǵarǵan edi. 10Máriyam barıp, bunı Iysa menen birge bolǵanlarǵa xabarladı. Olar jılap, qayǵırıp otırǵan edi. 11Biraq olar Iysanıń tiri ekenin hám Máriyamnıń Onı kórgenin esitse de, isenbedi.

Iysanıń eki shákirtine kóriniwi

12Sońınan Iysa awılǵa baratırǵan olardıń ekewine basqasha túrde kórindi. 13Olar qaytıp kelip, basqa shákirtlerge xabarlaǵanda, olarǵa da isenbedi.

Iysanıń shákirtlerine tapsırması

(Mat 28:16-20; Luk 24:36-49; Yuxn 20:19-23; Elsh 1:6-8)

14Sońınan Iysa awqatlanıp otırǵan on bir shákirtine kórinip, olardı isenbewshilikte hám qaysarlıqta ayıpladı. Óytkeni olar Onıń tirilgenin kórgenlerge isenbegen edi. 15Iysa olarǵa bılay dedi:

– Pútkil dúnya boylap júrińler hám barlıq adamlarǵa Xosh Xabardı járiyalańlar. 16Kim de kim isenip shomıldırılsa, qutqarıladı, al kim de kim isenbese, húkim etiledi. 17Isengenler menen mınaday káramatlı belgiler birge boladı: Meniń atım menen jinlerdi quwıp shıǵarıp, jańa tillerde sóyleydi. 18Qolları menen jılanlardı uslap alsa da hám uwlı zat ishse de, olarǵa zıyan kelmeydi. Awırıwlardıń ústilerine qolların qoyǵanda, olar shıpa tabadı.

Iysanıń aspanǵa alınıwı

(Luk 24:50-53; Elsh 1:9-11)

19Iyemiz Iysa olarǵa usılardı aytıp bolǵannan soń, aspanǵa alındı hám Qudaydıń oń tárepine otırdı. 20Al shákirtleri barıp, hámme jerde Xosh Xabardı járiyalap júrdi. Iyemiz olar menen birge islep, Óz sózin káramatlı belgiler arqalı tastıyıqlaytuǵın edi.

Currently Selected:

Mark 16: QrqMK22

Highlight

Copy