Matta 25

On qız tuwralı tımsal

1– Sol kúni Aspan Patshalıǵı shıraların alıp, kúyewdi qarsı alıwǵa shıqqan on qızǵa uqsaydı. 2Olardıń besewi aqılsız, al besewi aqıllı bolıptı. 3Aqılsız qızlar shıraların alıptı da, biraq awısıq may almay shıǵıptı. 4Al aqıllı qızlar shıraları menen qosa may quyılǵan ıdısların da alıp shıǵıptı. 5Kúyew keshikkennen soń olardıń hámmesi qalǵıp, uyıqlap qalıptı. 6Biraq tún ortası bolǵanda: «Kúyew kiyatır, onı qarsı alıwǵa shıǵıńlar», – dep baqırǵan dawıs esitilipti. 7Sonda qızlardıń hámmesi turıp, ózleriniń shıraların tayarlaptı. 8Aqılsız qızlar aqıllılarǵa: «Bizlerge maylarıńızdan az-maz berińler, shıralarımız sónip atır», – depti. 9Al aqıllı qızlar: «Bizlerge de, sizlerge de jetpey qalıwı múmkin, jaqsısı, satıwshılarǵa barıp satıp alıńlar», – dep juwap beripti. 10Olar may satıp alıwǵa ketken waqıtta kúyew kelipti. Tayar turǵan qızlar onıń menen birge toyxanaǵa kirgennen soń, qapı bekitilipti. 11Sońınan qalǵan qızlar da kelip: «Iyem! Iyem! Bizlerge qapını ash!» – dep jalınıptı. 12Biraq ol: «Sizlerge shının aytıp turman: men sizlerdi tanımayman!» – dep juwap qaytarıptı.

13Solay etip, sergek bolıńlar, sebebi Adam Ulınıń keletuǵın kúnin hám waqtın bilmeysizler.

Amanat etilgen talant tuwralı tımsal

(Luk 19:11-27)

14– Aspan Patshalıǵı bir adamnıń saparǵa ketpesinen burın xızmetshilerin shaqırıp alıp, olarǵa óziniń mal-múlkin amanat etkenine uqsaydı. 15Olardıń uqıbına qaray, birewine bes, ekinshisine eki, úshinshisine bir talant berip, jolǵa atlanıptı. 16Bes talant alǵanı dárriw barıp, aqshanı sawdaǵa aylandırıp, jáne besewin arttırıptı. 17Eki talant alǵanı da solay islep, jáne ekewin arttırıptı. 18Bir talant alǵanı barıp, xojayınınıń aqshasın jerge kómip jasırıptı.

19Aradan kóp waqıt ótkennen soń xızmetshilerdiń xojayını qaytıp kelip, olardan esap talap etipti. 20Sonda bes talant alǵanı jáne besewin ákelip: «Xojayın, maǵan bes talant bergen edińiz, minekey, men jáne besewin arttırdım», – depti. 21Xojayını oǵan: «Bárekella, jaqsı hám isenimli xızmetshim! Kishkene iste isenimli boldıń, men saǵan úlken is tapsırmaqshıman. Júr, meniń quwanıshıma sherik bol!» – depti. 22Eki talant alǵanı da kelip: «Xojayın, siz maǵan eki talant bergen edińiz, minekey, men jáne ekewin arttırdım», – depti. 23Xojayını oǵan: «Bárekella, jaqsı hám isenimli xızmetshim! Kishkene iste isenimli boldıń, men saǵan úlken is tapsırmaqshıman. Júr, meniń quwanıshıma sherik bol!» – depti.

24Sońınan bir talant alǵanı da kelip: «Xojayın, siziń qatal adam ekenińizdi bilemen. Siz ózińiz ekpegen jerińizden orıp, shashpaǵan jerińizden jıynaysız. 25Sonlıqtan men sizden qorqıp, talantıńızdı jerge kómip jasırǵan edim. Minekey, aqshańız, alıń», – depti. 26Al xojayını oǵan juwap qaytarıp bılay depti: «Háy, jaman hám jalqaw xızmetshim! Meniń ózim ekpegen jerden orıp, shashpaǵan jerden jıynaytuǵınımdı biledi ekenseń, 27meniń aqshamdı aylanısqa jiberetuǵın adamǵa beriwiń tiyis edi, qaytıp kelgenimde ózimdikin paydası menen alar edim. 28Endi onnan talanttı alıńlar da, onı on talantı barǵa berińler! 29Óytkeni kimde bar bolsa, oǵan jáne de mol etip beriledi, al kimde joq bolsa, onıń barı da tartıp alınadı. 30Al mına jaramsız xızmetshini sırtqa, qarańǵılıqqa shıǵarıp taslańlar. Sol jerde ol jılap, pushayman jeydi#Mat 25:30 Bazı qoljazbalarda mına sózler de bar: «Usılardı aytıp turıp, Iysa bılay dedi: „Qulaǵı bar adam jaqsılap esitip alsın!“».».

Aqırzamandaǵı húkim

31– Adam Ulı Óz saltanatı ishinde barlıq perishteleri menen birge kelgende, Óziniń saltanatlı taxtına otıradı. 32Sonda barlıq xalıqlar Onıń aldına jıynaladı hám Ol shopannıń qoylardı eshkilerden ayırǵanı sıyaqlı, olardı ayırıp bóledi. 33Qoylardı oń jaǵına, eshkilerdi sol jaǵına qoyadı. 34Sonda Patsha oń jaǵındaǵılarǵa: «Kelińler, Ákemnen jarılqanǵanlar, dúnya jaratılǵannan beri sizler ushın tayarlap qoyılǵan patshalıqtı miyras etip alıńlar. 35Sebebi Men ash bolǵanımda, sizler Maǵan awqat berdińler, shóllegenimde, suw berdińler, jat jerde júrgenimde, Meni qabıl aldıńlar. 36Jalańash bolǵanımda, kiyim berdińler, nawqas bolǵanımda, ǵamxorlıq qıldıńlar, qamaqta bolǵanımda, Maǵan keldińler», – deydi. 37Sonda haq adamlar Oǵan: «Iyem! Bizler qashan ash bolǵanıńdı kórip, Saǵan awqat berdik, qashan shóllegenińdi kórip, suw berdik? 38Qashan jat jerde júrgenińdi kórip, Seni qabıl ettik, qashan jalańash bolǵanıńda, kiyim berdik? 39Qashan nawqas yamasa qamaqta bolǵanıńdı kórip, Saǵan bardıq?» – deydi. 40Patsha olarǵa juwap berip: «Sizlerge shının aytıp turman: sizlerdiń usı islerdi Meniń mına eń qarapayım tuwısqanlarımnıń birewine islegenińiz – Maǵan islegenińiz boladı», – deydi. 41Sonnan keyin, Ol sol jaǵındaǵılarǵa: «Háy, ǵarǵıs alǵanlar! Meniń qasımnan arman, shaytan hám onıń perishteleri ushın tayarlap qoyılǵan máńgilik otqa ketińler! 42Óytkeni Men ash bolǵanımda, sizler Maǵan awqat bermedińler, shóllegenimde, suw bermedińler. 43Jat jerde júrgenimde, Meni qabıl almadıńlar, jalańash bolǵanımda, kiyim bermedińler, nawqas bolǵanımda, qamaqta bolǵanımda, Maǵan kelmedińler», – deydi. 44Sonda olar juwap berip: «Iyem! Bizler Seniń qashan ya ash bolǵanıńdı, ya shóllegenińdi, ya jat jerde júrgenińdi, ya jalańash, ya nawqas, ya qamaqta bolǵanıńdı kórip, Saǵan xızmet etpedik?» – deydi. 45Sonda Patsha juwap qaytarıp: «Sizlerge shının aytıp turman: sizlerdiń usı islerdi mına eń qarapayım birewine islemegenińiz – Maǵan islemegenińiz boladı», – deydi.

46Solay etip, olar máńgilik azapqa jiberiledi, al haq adamlar máńgilik ómirge erisedi.

Currently Selected:

Matta 25: QrqMK22

Highlight

Copy