Yuxan 6
6
Iysanıń bes mıń adamdı toyǵızıwı
(Mat 14:13-21; Mrk 6:30-44; Luk 9:10-17)
1Bunnan soń, Iysa Galila, yaǵnıy Tiberiya kóliniń arǵı jaǵasına ótti. 2Onıń awırıwlarǵa shıpa beriw arqalı islegen káramatlı belgilerin kórgenlikten, kóp xalıq izine erdi. 3Iysa tawǵa shıǵıp, shákirtleri menen birge sol jerde otırdı. 4Yahudiylerdiń Qutqarılıw bayramı jaqınlap qalǵan edi.
5Iysa basın kóterip, Ózine qaray kóp xalıqtıń kiyatırǵanın kórip, Filipten:
– Bul adamlardı awqatlandırıw ushın nandı qayaqtan satıp alamız? – dep soradı.
6Iysa bul gápti onı sınaw ushın ayttı. Sebebi Ol ne isleyjaq ekenin Ózi biletuǵın edi.
7Filip Oǵan:
– Olardıń hár birine az-maz bersek te, eki júz dinarlıq#6:7 Eki júz dinarlıq – bir dinar jumısshınıń bir kúnlik is haqısı. nan jetpeydi, – dep juwap berdi.
8Shákirtlerinen biri, Shimon Petrdiń tuwısqanı Andrey Iysaǵa:
9– Bul jerde bir balada bes arpa nanı menen eki balıq bar. Biraq usınshama adam ushın bular ne boladı? – dedi.
10Iysa:
– Xalıqtı jerge otırǵızıńlar, – dedi.
Ol jerde shóp kóp bolǵanlıqtan, bes mıńǵa shamalas er adam jerge jambasladı. 11Sonda Iysa nanlardı alıp, Qudayǵa shúkirlik etti de, otırǵanlarǵa úlestirip berdi#Yuxn 6:11 otırǵanlarǵa úlestirip berd – Bazı qoljazbalarda «shákirtlerine berdi, shákirtleri otırǵanlarǵa úlestirip berdi» delingen.. Sol sıyaqlı, olarǵa balıqlardı da qálegeninshe bólip berdi.
12Hámme jep toyǵanda, Iysa shákirtlerine:
– Awısqan bóleklerin jıynap alıńlar, hesh nárse zaya bolmasın, – dedi.
13Solay etip, shákirtler adamlar jegen bes arpa nanınan awısqan bóleklerdi jıynap, úlken on eki sebet toltırdı.
14Xalıq Iysa islegen káramatlı belgini kórip:
– Haqıyqattan da, Bul dúnyaǵa keletuǵın payǵambar eken, – desti.
15Iysa olardıń kelip, Ózin patsha qılıw ushın zorlıq penen uslayjaq ekenin bilgende, jáne jalǵız Ózi tawǵa shıǵıp ketti.
Iysanıń suwdıń ústi menen júriwi
(Mat 14:22-33; Mrk 6:45-52)
16Kesh bolǵanda, Iysanıń shákirtleri kólge bardı. 17Olar bir qayıqqa minip, kóldiń arǵı jaǵasındaǵı Kaparnahumǵa qaray jol aldı. Qarańǵı tússe de, Iysa ele olardıń qasına kelmegen edi. 18Kúshli samal esip, kól tolqınlana basladı. 19Shákirtler bes-altı shaqırımday júzgennen soń, kóldiń ústi menen júrip, qayıqqa jaqınlasıp kiyatırǵan Iysanı kórip, qorqıp qalıstı. 20Biraq Iysa olarǵa:
– Bul – Men, qorqpańlar! – dedi.
21Sonda olar Iysanı qayıqqa mindirmekshi boldı. Qayıq sol waqıtta-aq olar baratırǵan jaǵaǵa kelip toqtadı.
22Erteńine kóldiń arǵı jaǵasında qalǵan xalıq ol jerde tek bir qayıq bolǵanın, Iysanıń Ózi shákirtleri menen birge bul qayıqqa minbegenin, al tek shákirtleriniń ózleri ketkenin bildi. 23Sonda Iyemiz shúkirlik etip bergen nandı xalıq jegen jerdiń jaqınına Tiberiyadan bir neshe qayıqlar keldi. 24Iysanıń da, shákirtleriniń de ol jerde joq ekenin kórgen xalıq qayıqlarǵa mindi hám Iysanı izlep, Kaparnahumǵa ketti.
Iysa – ómir nanı
25Olar Iysanı kóldiń arǵı jaǵasınan tawıp, Onnan:
– Ustaz, Sen bul jerge qashan keldiń? – dep soradı.
26Iysa olarǵa juwap berip:
– Sizlerge shının, haqıyqatın aytaman: sizler Meni káramatlı belgiler kórgenińiz ushın emes, al nan jep toyǵanıńız ushın izlep atırsızlar. 27Sizler ótkinshi azıq ushın emes, al máńgilik ómirge jeteleytuǵın azıq ushın miynet etińler. Onı sizlerge Adam Ulı beredi. Óytkeni Quday Áke Oǵan Óz mórin basıp, biylik berdi, – dedi.
28Olar Iysadan:
– Qudayǵa unaytuǵın islerdi islewimiz ushın ne qılıwımız kerek? – dep soradı.
29– Qudayǵa unaytuǵın is – Onıń Jibergenine iseniw, – dep juwap berdi Iysa.
30Olar Iysaǵa:
– Bizler kórip, Saǵan iseniwimiz ushın, qanday káramatlı belgi kórsetejaqsań? Ne isleyjaqsań? 31«Jew ushın olarǵa aspannan nan berdi»#6:31 Shıǵ 16:4-5; Zab 77:24., – dep jazılǵanınday, ata-babalarımız shólde manna#6:31 Manna – Izrail xalqı Mısırdan shıǵıp shólde júrgende, Quday aspannan bergen azıq. jegen, – dedi.
32Iysa olarǵa:
– Sizlerge shının, haqıyqatın aytaman: sizlerge aspannan nan bergen Muwsa emes, al aspannan haqıyqıy nandı sizlerge berip turǵan – Meniń Ákem. 33Sebebi Qudaydıń nanı aspannan kelip, dúnyaǵa ómir beredi, – dedi.
34Xalıq Iysaǵa:
– Mırza, bizlerge bunday nandı hámme waqıt berip tur, – dedi.
35Iysa olarǵa bılay dedi:
– Men – ómir nanıman. Maǵan kelgen adam hesh qashan ash bolmaydı hám Maǵan isengen adam hesh qashan shóllemeydi. 36Biraq Men sizlerge: «Meni kórdińler, sonda da Maǵan ele isenbey atırsızlar», – dedim. 37Ákemniń Maǵan bergenleriniń hámmesi Maǵan keledi. Maǵan kelgenlerdi hesh qashan quwıp shıǵarmayman. 38Óytkeni Men Óz erkimdi emes, al Meni Jibergenniń erkin orınlaw ushın aspannan keldim. 39Onıń Maǵan bergenleriniń hesh birin joytpawım, al aqırǵı kúnde hámmesin tiriltiwim – bul Meni Jibergenniń erki. 40Ákemniń erki – Onıń Ulın kórip, Oǵan isengen hár bir adamnıń máńgilik ómirge iye bolıwı. Men onı aqırǵı kúni tiriltemen.
41Sonda: «Men aspannan kelgen nanman», – degeni ushın, yahudiyler Iysaǵa narazılıq bildire basladı.
42– Bul – Yusuptiń ulı Iysa emes pe? Bizler Onıń ata-anasın tanıymız-ǵo. Endi qalay Ol: «Aspannan keldim», – dep aytıp otır? – desti olar.
43Iysa olarǵa bılay dep juwap berdi:
– Óz ara narazı bolmańlar. 44Eger Meni Jibergen Ákem alıp kelmese, hesh kim Maǵan kele almaydı, al Maǵan kelgendi aqırǵı kúni tiriltemen. 45Payǵambarlardıń Jazıwlarında: «Hámmesi Qudaydan tálim aladı»#6:45 Iysh 54:13., – dep jazılǵan. Ákemnen esitip, Onnan úyrengen hár bir adam Maǵan keledi. 46Qudaydan Kelgennen basqa hesh kim Ákeni kórgen emes, Ákeni tek ǵana Ol kórgen. 47Sizlerge shının, haqıyqatın aytaman: isengen adam máńgilik ómirge iye. 48Men – ómir nanıman. 49Ata-babalarıńız shólde manna jese de, ólip ketti. 50Bul jerde aspannan kelgen bir nan bar, onı jegen adam ólmeydi. 51Men – aspannan kelgen tiri nanman. Eger kim de kim bul nandı jese, máńgi jasaydı. Dúnyaǵa ómir beriw ushın, Men beretuǵın bul nan – Óz denem.
52Sonda yahudiyler:
– Ol qalay bizlerge Óz denesin jewge bere aladı? – dep óz ara tartısa basladı.
53Iysa olarǵa bılay dedi:
– Sizlerge shının, haqıyqatın aytaman: Adam Ulınıń denesin jep, qanın ishpeseńler, sizlerde ómir bolmaydı. 54Meniń denemdi jep, qanımdı ishken adamda máńgilik ómir bar hám Men onı aqırǵı kúni tiriltemen. 55Sebebi Meniń denem – haqıyqıy azıq, qanım – haqıyqıy ishimlik. 56Denemdi jep, qanımdı ishken adam Mende jasaydı, Men onda jasayman. 57Meni tiri Ákem jibergendey hám Meniń Ákem arqalı jasap atırǵanımday, Meniń denemdi jegen adam da Men arqalı jasaydı. 58Aspannan túsken nan, mine – usı. Bul nan ata-babalarıńız jegen mannaǵa uqsamaydı. Olar ólip ketti, al bul nandı jegen adam máńgi jasaydı.
59Iysa bul sózlerdi Kaparnahumdaǵı májilisxanada tálim bergende ayttı.
Máńgilik ómir sózleri
60Shákirtleriniń kóbisi bunı esitip:
– Qanday qıyın sózler! Bunı kim qabıllay aladı? – dedi.
61Shákirtleriniń buǵan narazı bolǵanın bilip, Iysa bılay dedi:
– Bul sózler iseniwińizge tosqınlıq qılıp atır ma? 62Eger Adam Ulınıń burın bolǵan jerine kóterilgenin kórseńiz she? 63Ruwx ómir beredi, al dene payda keltirmeydi. Sizlerge aytqan sózlerim ruwx hám ómir. 64Biraq arańızda isenbeytuǵınlar bar.
Óytkeni Iysa kimlerdiń isenbeytuǵının hám kimniń Ózine satqınlıq isleytuǵının burınnan-aq biletuǵın edi. 65Iysa jáne:
– «Ákem jol qoymasa, hesh kim Maǵan kele almaydı», – dep sol sebepli aytqan edim, – dedi.
66Sol waqıttan baslap, Iysanıń shákirtleriniń kóbisi ketip qalıp, endi Onıń menen júrmeytuǵın boldı.
67Sonda Iysa on eki shákirtinen:
– Sizler de ketpekshimisiz? – dep soradı.
68Shimon Petr juwap berip:
– Iyem, bizler kimge baramız? Sende máńgilik ómir sózleri bar. 69Bizler Seniń Qudaydıń Muxaddesi#Yuxn 6:69 Qudaydıń Muxaddesi – Bazı qoljazbalarda «Masiyx, tiri Qudaydıń Ulı». ekenińe isenemiz hám bunı bilemiz, – dedi.
70Iysa olarǵa:
– Sizlerdi, on ekini tańlap alǵan Ózim emes pe? Biraq arańızdaǵı birińiz – shaytan, – dedi.
71Ol Shimon ulı Yahuda Isqariot haqqında aytqan edi. Sebebi Yahuda on ekiniń biri bolsa da, keyin Iysaǵa satqınlıq isledi.
Currently Selected:
Yuxan 6: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
