Yuxan 20

Iysanıń qayta tiriliwi

(Mat 28:1-8; Mrk 16:1-8; Luk 24:1-12)

1Ekshembi kúni tań azanda, ele qarańǵı bolǵanda, magdalalı Máriyam qábirge keldi hám qábirdiń awzındaǵı tastıń alıp taslanǵanın kórdi. 2Ol juwırıp, Shimon Petrge hám Iysanıń jaqsı kóretuǵın sol shákirtine bardı da, olarǵa:

– Iyemizdi qábirden alıp ketipti. Onı qay jerge qoyǵanın bilmeymiz, – dedi.

3Sonda Petr menen basqa shákirt shıǵıp, qábirge qaray jol aldı. 4Olar juwırıp ketti. Biraq sol shákirt Petrden tezirek juwırıp, qábirge birinshi bolıp keldi. 5Ol ishke úńilip qaraǵanda, sol jerde jatırǵan zıǵır kepindi kórdi, biraq ishke kirmedi. 6Onıń izinen Shimon Petr jetip kelip, qábirge kirdi. Sol jerde jatırǵan kepindi hám 7Iysanıń basına oralǵan oramaldı kórdi. Oramal kepin menen birge emes, al bólek jerde búklenip turǵan edi. 8Sonda qábirge birinshi bolıp kelgen sol shákirt te ishke kirdi hám usılardı kórip, isendi. 9Sebebi olar Iysanıń ólimnen qayta tiriliwi tiyis ekenligi tuwralı aytılǵan Muxaddes Jazıwdı elege deyin túsinbeytuǵın edi. 10Bunnan soń, shákirtler úylerine qaytıp ketti.

Iysanıń magdalalı Máriyamǵa kóriniwi

(Mat 28:9-10; Mrk 16:9-11)

11Al Máriyam qábirdiń sırtında jılap turǵan edi. Jılap turıp, eńkeyip qábirdiń ishine qaradı 12hám aq kiyimli eki perishteni kórdi. Biri Iysanıń denesi jatqan jerdiń bas ushında, ekinshisi ayaq ushında otırǵan edi.

13Olar Máriyamnan:

– Hayal, sen nege jılap tursań? – dep soradı.

– Iyemdi alıp ketipti. Onı qay jerge qoyǵanın bilmeymen, – dedi ol.

14Usılardı aytıp bolıp, arqasına burıldı hám Iysanıń turǵanın kórdi. Biraq Onıń Iysa ekenin tanımadı.

15Iysa oǵan:

– Hayal, sen nege jılap tursań? Kimdi izlep júrseń? – dedi.

Máriyam Onı baǵman dep oylap, Oǵan:

– Mırza, eger Onı sen alıp ketken bolsań, qay jerge qoyǵanıńdı maǵan ayt, men Onı alıp qaytayın, – dedi.

16Iysa oǵan:

– Máriyam! – dedi.

Máriyam burılıp, evreyshelep:

– Rábbuniy! – dedi. Rábbuniy – «ustaz» degendi ańlatadı.

17Iysa oǵan:

– Maǵan qol tiygizbe! Sebebi Men ele Ákemniń janına kóterilmedim. Al sen tuwısqanlarıma barıp, Meniń Ákemniń hám sizlerdiń Ákeńizdiń, Meniń Qudayımnıń hám sizlerdiń Qudayıńızdıń aldına kóterilip baratırǵanımdı ayt, – dedi.

18Magdalalı Máriyam shákirtlerge barıp, olarǵa:

– Men Iyemdi kórdim! – dedi hám Iysanıń ózine ne aytqanların olarǵa xabarladı.

Iysanıń shákirtlerine kóriniwi

(Mat 28:16-20; Mrk 16:14-18; Luk 24:36-49)

19Ekshembi kúni keshte shákirtler birge jıynalǵan edi. Yahudiy basshılarınan qorqqanlıqtan, olar úydiń qapıların ilip qoyǵanda, Iysa keldi. Olardıń ortasında turıp, olarǵa:

– Tınıshlıq sizlerge yar bolsın! – dedi.

20Bunı aytıp, olarǵa qolların#Yuxn 20:20 Áyyemgi slavyansha awdarmada «hám ayaqların» degen sózler de bar. hám búyirin kórsetti. Shákirtler Iyemizdi kórip, qattı quwandı.

21Iysa olarǵa jáne bılay dedi:

– Tınıshlıq sizlerge yar bolsın! Ákem Meni jibergeni sıyaqlı, Men de sizlerdi jiberip atırman. 22Usılay dedi de, olarǵa qaray úplep:

– Muxaddes Ruwxtı alıńlar. 23Sizler kimniń gúnaların keshirseńler, Quday da onıń gúnaların keshiredi. Sizler kimniń gúnaların keshirmeseńler, Quday da onıń gúnaların keshirmeydi, – dedi.

Iysanıń Tomasqa kóriniwi

24On eki shákirttiń biri, Egiz dep atalǵan Tomas Iysa kelgende olardıń arasında joq edi. 25Sonlıqtan basqa shákirtler oǵan:

– Bizler Iyemizdi kórdik, – desti.

Biraq Tomas olarǵa:

– Onıń qollarındaǵı shege izlerin kórmegenimshe, barmaǵım menen shege izlerin hám qollarım menen Onıń búyirin uslap kórmegenimshe, isenbeymen, – dedi.

26Bir hápteden soń, Iysanıń shákirtleri jáne úyde jıynalǵan edi. Tomas ta olar menen birge edi. Úydiń qapıları ilik bolǵanda, Iysa kelip, olardıń ortasında turdı da:

– Tınıshlıq sizlerge yar bolsın! – dedi.

27Sońınan Tomasqa:

– Barmaǵıńdı berman soz. Qollarıma qara, qolıńdı sozıp, búyirimdi uslap kór. Gúmanlanbay, isen, – dedi.

28Tomas Oǵan juwap berip:

– Iyem meniń, Qudayım meniń! – dedi.

29Iysa oǵan:

– Sen Meni kórgenlikten isendiń. Biraq, kórmey isengenler qanday baxıtlı! – dedi.

Bul kitaptıń maqseti

30Iysa shákirtleriniń aldında bul kitapta jazılmaǵan basqa da kóp káramatlı belgiler isledi. 31Biraq bular sizlerdiń Iysanıń Masiyx, Qudaydıń Ulı ekenine iseniwińiz ushın hám isenip, Onıń atı menen ómirge iye bolıwıńız ushın jazıldı.

Currently Selected:

Yuxan 20: QrqMK22

Highlight

Copy