Yuxan 10
10
Iysa – jaqsı shopan
1– Sizlerge shının, haqıyqatın aytaman: kim qoy qoraǵa qapıdan kirmey, basqa jerden asırılıp tússe, ol – urı hám basqınshı. 2Al qapıdan kirgen adam qoylardıń shopanı. 3Qarawıl oǵan qapını ashıp beredi. Qoylar shopannıń dawısına qulaq saladı, ol óz qoyların atpa-at shaqırıp, olardı sırtqa alıp shıǵadı. 4Ol óz qoylarınıń hámmesin sırtqa shıǵarǵannan soń, olardıń aldında júredi. Qoylar da onıń izine eredi, óytkeni olar shopannıń dawısın tanıydı. 5Olar jat adamnıń izine ermeydi, al onnan qashıp ketedi. Sebebi jat adamnıń dawısın tanımaydı.
6Iysa olarǵa usı tımsaldı aytıp berdi. Biraq olar Iysanıń ne aytpaqshı bolǵanın túsinbedi.
7Sonlıqtan Iysa jáne bılay dedi:
– Sizlerge shının, haqıyqatın aytaman: Men qoylar ushın qapıman. 8Mennen burın kelgenlerdiń hámmesi urılar hám basqınshılar edi, qoylar olarǵa qulaq aspadı. 9Men – qapıman. Kim de kim Men arqalı kirse, qutqarıladı. Ol kiredi, shıǵadı hám jaylaw tabadı. 10Urı tek urlaw, óltiriw hám nabıt qılıw ushın keledi. Biraq Men olar ómirge iye bolıwı ushın, dáwletli ómirge iye bolıwı ushın keldim.
11Men – jaqsı shopanman. Jaqsı shopan qoyları ushın janın beredi. 12Al jallanǵan adam qoylardıń shopanı hám iyesi emes. Sonlıqtan ol qasqırdıń kiyatırǵanın kórse, qoylardı taslap qashıp ketedi. Al qasqır qoylarǵa shabıwıl jasap, tarqatıp jiberedi. 13Óytkeni ol jallanǵan adam bolǵanlıqtan, qoylardı qayǵırmay qashıp ketedi.
14-15Men – jaqsı shopanman. Ákemniń Meni biletuǵını hám Meniń Ákemdi biletuǵınım sıyaqlı, Men de qoylarımdı bilemen, olar da Meni biledi. Men qoylarım ushın janımdı beremen. 16Meniń bul qoradan bolmaǵan basqa da qoylarım bar. Olardı da alıp keliwim tiyis. Olar Meniń dawısımdı esitedi, sonda bir shopanı bar bir súriw boladı. 17Men janımdı qaytıp alıw ushın beremen. Sonlıqtan Ákem Meni súyedi. 18Janımdı Mennen hesh kim tartıp ala almaydı. Biraq Men onı Ózim beremen. Mende onı beriwge de, qaytıp alıwǵa da biylik bar. Bul buyrıqtı Men Ákemnen aldım.
19Usı sózler sebepli, yahudiyler arasında jáne bóliniw payda boldı. 20Olardıń kóbisi:
– Onı jin urǵan, Onıń esi durıs emes. Nege Onı tıńlap tursızlar? – dedi.
21Al basqaları:
– Bul jinli adamnıń sózleri emes. Jin soqırdıń kózlerin asha ala ma? – dedi.
Basshılardıń Iysadan bas tartıwı
22Sol waqıtta Erusalimde Ibadatxananı baǵıshlaw bayramı#10:22 Ibadatxananı baǵıshlaw bayramı – b. e. sh. 164 jılǵı Qudaydıń úyiniń jańadan baǵıshlanıwın eske alıw bayramı. boldı. Qıs edi. 23Iysa Ibadatxanada, Sulaymannıń aywanında júrgen edi. 24Yahudiy basshıları Onıń átirapına jıynalıp:
– Qashanǵa deyin bizlerdi túsinbewshilikke salasań? Eger Sen Masiyx bolsań, bizlerge ashıǵın ayt, – dedi.
25Iysa olarǵa juwap berip bılay dedi:
– Men sizlerge ayttım, biraq sizler isenbey atırsızlar. Ákemniń atı menen qılǵan islerim Men tuwralı gúwalıq berip atır. 26Biraq ta, sizler isenbey atırsızlar. Sebebi sizler Meniń qoylarım emessizler. 27Meniń qoylarım dawısıma qulaq asadı. Men olardı bilemen, olar Meniń izime eredi. 28Men olarǵa máńgilik ómir beremen hám olar hesh qashan nabıt bolmaydı. Hesh kim olardı Meniń qolımnan tartıp ala almaydı. 29Olardı Maǵan bergen Ákem – hámmeden ullı. Ákemniń qolınan olardı hesh kim tartıp ala almaydı. 30Men hám Ákem birmiz.
31Sonda yahudiy basshıları Onı tas boran qılıw ushın, jerden jáne tas aldı. 32Iysa olardan:
– Men sizlerge Ákem tapsırǵan kóp jaqsı islerdi kórsettim. Olardıń qaysı biri ushın, Meni tas boran qılmaqshısız? – dep soradı.
33Yahudiy basshıları Iysaǵa juwap berip:
– Seni jaqsı isleriń ushın emes, al Qudayǵa til tiygizgeniń ushın, tas boran qılmaqshımız. Sen adam bola tura, Ózińdi «Qudayman», – dep atırsań, – dedi.
34Iysa olarǵa bılay dedi:
– «Men: sizler qudaylarsız, dedim»#10:34 Zab 81:6., – dep Muxaddes Nızamıńızda jazılǵan emes pe? 35Quday Óz sózin jibergen adamlardı qudaylar dep ataǵan. Muxaddes Jazıwdı biykarlawǵa bolmaydı.
36Áke Meni Ózine ajıratıp alıp, dúnyaǵa jiberdi. Solay eken, «Qudaydıń Ulıman», – degenim ushın, nege Maǵan «Qudayǵa til tiygizip atırsań», – deysizler? 37Eger Ákemniń islerin qılmay atırǵan bolsam, Maǵan isenbeńler. 38Biraq Onıń islerin qılıp atırǵan bolsam, Maǵan isenbeseńler de, qılǵan islerime isenińler. Sonda Ákeniń Mende, Meniń Ákede ekenimdi túsinip, bilip alasızlar.
39Sol waqıtta olar Iysanı uslap alıwǵa jáne háreket qıldı, biraq Iysa olardıń qollarınan qutılıp qaldı.
40Iysa jáne Iordan dáryasınıń arǵı jaǵasına, burın Yaqıyanıń adamlardı shomıldırıp júrgen jerine barıp, sol jerde qaldı. 41Oǵan kóp adamlar kelip:
– Yaqıya hesh qanday káramatlı belgi islemegen edi. Biraq onıń bul Adam haqqında aytqanlarınıń hámmesi durıs shıqtı, – dedi.
42Sol jerde kóp adamlar Iysaǵa isendi.
Currently Selected:
Yuxan 10: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
