Elshiler 9

Shauldıń táwbe etiwi

(Elsh 22:6-16; 26:12-18)

1Al Shaul Iyemizdiń shákirtlerine ele ólim qáwpin tuwdırıp júrdi. Ol bas ruwxaniyge bardı da, 2Damasktegi májilisxanalarǵa#9:2 Májilisxana – grekshe «sinagoga». Yahudiylerdiń Qudayǵa xızmet etetuǵın hám Qudaydıń sózin úyrenetuǵın ornı. xatlar jazıp beriwin soradı. Sol jerde Iysanıń jolı menen júrgen erkek bolsın, hayal bolsın, tapsa olardı uslap, Erusalimge alıp keliw niyetinde edi. 3Ol jol júrip Damaskke jaqınlaǵanda, tosattan aspannan túsken bir nur onıń átirapın jarqıratıp jiberdi. 4Shaul jerge jıǵıldı hám:

– Shaul, Shaul, sen nege Meni quwdalap atırsań? – degen dawıstı esitti.

5Shaul:

– Sen kimseń, Iyem? – dep soradı.

– Men – sen quwdalap atırǵan Iysaman#Elsh 9:5 Áyyemgi bazı awdarmalarda 5 ayattıń aqırında hám 6 ayattıń basında mına sózler de bar: «Seniń qáwipke qarsı turıwıń qıyın boladı. 6 Shaul qaltırap hám qorqınısh ishinde: „Iye, meniń ne islewimdi qáleyseń?“ – dedi. Iysa oǵan:».. 6Al endi ornıńnan turıp, qalaǵa bar. Neni islew tiyis ekenligi saǵan aytıladı, – degen dawıs esitildi.

7Shaul menen kiyatırǵanlardıń tilleri tutılıp, toqtap qaldı. Sebebi olar dawıstı esitse de, hesh kimdi kórmegen edi. 8Shaul jerden turdı. Biraq kózlerin ashqanda, hesh nárse kóre almadı. Sonlıqtan olar onıń qolınan uslap, Damaskke jeteklep apardı. 9Onıń kózleri úsh kún boyı kórmey qalıp, hesh nárse iship-jemedi.

10Damaskte Xananiya atlı Iysanıń shákirti bar edi. Iyemiz oǵan kórinip:

– Xananiya, – dedi.

– Lábbáy, Iyem! – dep juwap berdi ol.

11Iyemiz oǵan:

– Ornıńnan tur da, «Tuwrı kóshe» degen kóshege barıp, Yahudanıń úyindegi Shaul atlı bir tarsuslı adamdı sora. Ol házir duwa etip atır. 12Ol ózine kórsetilgen ayanda janına Xananiya atlı bir adamnıń kelip, kózleriniń qaytadan kóriwi ushın ústine qolların qoyıp duwa etkenin kórgen edi, – dedi.

13Xananiya juwap berip:

– Iyem! Bul adamnıń Seniń Erusalimdegi muxaddeslerińe#9:13 Muxaddesler – Iysaǵa iseniwshiler. qansha jamanlıq islegenin men kóp adamlardan esitken edim. 14Bul jerge de ol Seniń atıńa sıyınatuǵınlardıń hámmesin tutqınǵa alıw ushın, bas ruwxaniylerden biylik alıp kelgen, – dedi.

15Iyemiz oǵan:

– Bar! Óytkeni Men bul adamdı atımdı basqa milletlerge, patshalarǵa hám Izrail ullarına jetkiziw ushın tańladım. 16Meniń atım ushın qanshama azap shegetuǵının Ózim oǵan kórsetemen, – dedi.

17Solay etip, Xananiya bardı da, sol úyge kirdi hám qolların Shauldıń ústine qoyıp:

– Tuwısqanım, Shaul! Saǵan kiyatırǵan jolıńda kóringen Iyemiz Iysa kózlerińniń ashılıp, Muxaddes Ruwxqa tolıwıń ushın meni jiberdi, – dedi.

18Sol waqıtta-aq kózlerinen perde túskendey bolıp, Shaul jáne kóre basladı. Ol ornınan turıp, suwǵa shomıldırıldı hám 19awqat jep, kúshke endi.

Shaul Damaskte hám Erusalimde

Shaul bir neshe kún Damasktegi shákirtlerdiń janında qaldı. 20Ol dárhal Iysanıń Qudaydıń Ulı ekenligin májilisxanalarda járiyalay basladı. 21Onı esitkenlerdiń hámmesi tań qalısıp: «Mınaw Erusalimde usı Iysanıń atına sıyınatuǵınlardı qırǵan adam emes pe? Ol bul jerge de sonday adamlardı tutqın etip, bas ruwxaniylerge aparıw ushın kelgen joq pa edi?» – desti.

22Biraq Shaul kúnnen-kúnge ruwxıy kúshke tolısıp bardı. Iysanıń Masiyx ekenligi haqqında dáliller keltirip, Damaskte jasaytuǵın yahudiylerdi tań qaldıratuǵın edi.

23Aradan kóp kúnler ótkende, yahudiyler Shauldı óltiriwge til biriktirdi. 24Biraq, olardıń bul niyeti Shaulǵa belgili bolıp qaldı. Yahudiyler onı óltiriw ushın kúni-túni qalanıń dárwazasın ańlıdı. 25Degen menen, Shauldıń shákirtleri bir kúni túnde onı sebetke saldı da, qalanıń diywalınan túsirip jiberdi.

26Shaul Erusalimge kelip, sol jerdegi shákirtlerge qosılıwǵa tırıstı. Biraq onıń Iysanıń shákirti bolǵanına isenbey, olardıń hámmesi onnan qorqatuǵın edi. 27Sonda Barnaba onı elshilerge ertip keldi. Ol Shauldıń jolda Iyemizdi qalay kórgenin, Iyemizdiń onıń menen sóyleskenin hám onıń Damaskte qalay Iysanıń atı menen batıl túrde waz aytqanın olarǵa aytıp berdi. 28Solay etip, Shaul Erusalimde olar menen birge aralasıp, Iyemizdiń atı menen qorqpastan waz aytıp júrdi. 29Ol grekshe sóyleytuǵın yahudiyler menen sóylesip, tartısatuǵın edi. Al olar Shauldı óltiriwge háreket etti. 30Tuwısqanlar bunı bilgende onı Kesariyaǵa aparıp, sol jerden Tarsusqa jiberdi.

31Solay etip, pútkil Yahudiya, Galila hám Samariya boylap iseniwshiler tınıshlıqqa eristi. Iyemizden qorqıp jasaǵan jámáát bekkemlenip, Muxaddes Ruwxtıń qollap quwatlawı menen sanı óse berdi.

Eneydiń shıpalanıwı

32Sonda Petr el aralap júrip, Liddada jasaytuǵın muxaddeslerdi kóriwge keldi. 33Ol sol jerde láń bolıp segiz jıldan beri tósek tartıp jatırǵan Eney atlı bir adamdı kórdi. 34Petr oǵan:

– Eney, Iysa Masiyx saǵan shıpa beredi. Ornıńnan turıp, tósegińdi jıyna, – dedi.

Eney sol waqıtta-aq ornınan turdı. 35Lidda hám Sharonda jasaytuǵınlardıń derlik hámmesi bunı kórip, Iyemizdiń jolına tústi.

Petrdiń Tabitanı tiriltiwi

36Ioppada Iysanıń shákirti bolǵan Tabita atlı bir hayal bar edi. Tabita – grekshe «Dorkas», yaǵnıy «jeyran» degendi ańlatadı. Ol hámme waqıt jaqsılıq islep, jarlılarǵa qayır-sadaqa beretuǵın edi. 37Sol kúnleri Tabita awırıp, qaytıs boldı. Adamlar onıń denesin juwıp, joqarıdaǵı bólmege qoydı. 38Lidda Ioppaǵa jaqın bolǵanlıqtan, Petrdiń sol jerde ekenin esitken shákirtler oǵan eki adamdı jiberip: «Tezirek bizlerge kel», – dep ótinish etti.

39Petr ornınan turıp, olar menen birge ketti. Úyge kelgende, onı joqarıdaǵı bólmege alıp bardı. Barlıq jesir hayallar Petrdiń átirapına jıynaldı. Olar jılap turıp, Dorkastıń ózleri menen birge jasaǵan waqtında tikken ishki kiyimleri menen kóyleklerin oǵan kórsetti.

40Petr hámmeni sırtqa shıǵarıp jiberdi de, dize búgip, duwa etti. Sońınan ólige burılıp:

– Tabita, ornıńnan tur! – dedi.

Hayal kózlerin ashtı da, Petrdi kórip, tikeyip otırdı. 41Petr qolın berip, onı ornınan turǵızdı. Sońınan muxaddesler menen jesir hayallardı shaqırdı da, tirilgen Tabitanı olarǵa kórsetti. 42Bul waqıya tuwralı xabar pútkil Ioppaǵa málim bolıp, kóp adamlar Iyemizge isendi. 43Petr kóp kún Ioppada, Shimon atlı teri iylewshiniń úyinde qaldı.

Currently Selected:

Elshiler 9: QrqMK22

Highlight

Copy