Elshiler 7

Stepannıń sózi

1Sonda bas ruwxaniy Stepannan:

– Usı durıs pa? – dep soradı.

2Stepan bılay dep juwap berdi:

– Tuwısqanlarım hám aǵalarım, maǵan qulaq salıńlar! Babamız Ibrayım Xaranǵa kóship ornalaspastan burın Mesopotamiyada bolǵan waqtında ullı Quday oǵan kórinip: 3«Elińdi hám aǵayin-tuwǵanlarıńdı qaldırıp, Men saǵan kórsetetuǵın elge bar»#7:3 Jar 12:1., – degen edi.

4Solay etip, Ibrayım kaldeylerdiń elinen shıǵıp, Xaranǵa ornalastı. Ákesiniń óliminen keyin, Quday onı sol jerden alıp, házir sizler jasap atırǵan bul elge kóshirdi. 5Degen menen, Quday bul jerde oǵan hesh qanday iyelik, hátte, bir qarıs jer de bermegen edi. Biraq, sol waqıtta Ibrayımnıń balası joq bolsa da, Quday bul jerdi oǵan hám onıń urpaqlarına múlik qılıp beretuǵının wáde etken edi. 6Jáne de, Quday oǵan bılay degen edi: «Seniń urpaqlarıń jat jerde jat bolıp, tórt júz jıl qullıqta jasaydı hám zulımlıq kóredi. 7Biraq Men olardı qul etken xalıqtı jazalayman. Bunnan soń, olar sol jerden shıǵıp, Maǵan bul jerde sıyınadı»#7:6-7 Jar 15:13-14.. 8Sońınan Quday Ibrayım menen muxaddes kelisim dúzip, súnnetlew rásimin onıń belgisi qıldı. Solay etip, Ibrayım Ísaqtıń ákesi bolıp, onı segizinshi kúni súnnet#7:8 Jar 17:9-14. etti. Ísaq Yaqıptıń, Yaqıp on eki ullı atalarımızdıń ákesi boldı.

9Yusupti kúnlegen atalarımız onı Mısırǵa satıp jiberdi#7:9 Jar 37:28.. Biraq Quday onıń menen birge bolıp, 10barlıq qıyınshılıqlarınan qutqardı. Mısır patshası faraonnıń aldında oǵan danalıq berdi hám onıń miyrimine eristirdi. Faraon onı Mısırdıń hám sarayındaǵı barlıq adamlardıń ústinen basshı qılıp qoydı.

11Sońınan pútkil Mısır hám Qanan ellerinde ashlıq bolıp, úlken qıyınshılıqlar baslandı. Ata-babalarımız jewge awqat taba almay qaldı. 12Mısırda ǵálle bar ekenin esitken Yaqıp atalarımızdı sol jaqqa birinshi márte jolladı. 13Olar Mısırǵa ekinshi márte kelgende, Yusup tuwısqanlarına óziniń kim ekenin tanıttı hám faraonǵa onıń shıǵısı belgili boldı#7:13 Jar 41:54; 42:1-2; 45:3-4.. 14Yusup ákesi Yaqıptı hám barlıǵı jetpis bes adamnan ibarat bolǵan hámme aǵayin-tuwǵanların ózine shaqırtıp aldı. 15Solay etip, Yaqıp Mısırǵa kóship ketti. Onıń ózi de, ata-babalarımız da sol jerde qaytıs boldı. 16Olardıń súyegi Shexemge alıp kelinip, Ibrayımnıń sol jerde Xamordıń ullarınan gúmis aqshaǵa satıp alǵan qábirine qoyıldı.

17Qudaydıń Ibrayımǵa bergen wádesiniń orınlanatuǵın waqtı jaqınlaǵanda, Mısırdaǵı xalqımızdıń sanı júdá kóbeyip qalǵan edi. 18Sol waqıtta Mısır taxtına Yusupti tanımaytuǵın basqa bir patsha taxtqa otırdı. 19Ol xalqımızdan hiylekerlik penen paydalanıp, zulımlıq isledi hám olardıń jańa tuwılǵan balalarınıń tiri qalmawı ushın dalaǵa taslawǵa májbúrledi.

20Sol waqıtta Muwsa dúnyaǵa keldi. Ol júdá sulıw bala bolıp, úsh ay ákesiniń úyinde baǵıldı. 21Ol dalaǵa taslanǵanda, onı faraonnıń qızı tawıp alıp, óz balasınday qılıp tárbiyalap ósirdi. 22Muwsa mısırlılardıń barlıq bilim tarawlarınan tálim alıp, sózinde de, isinde de kúshli boldı.

23Ol qırıq jasqa tolǵanda, onıń kewlinde óz tuwısqanları bolǵan izraillılardıń jaǵdayın barıp kóriw niyeti payda boldı. 24Olarǵa barǵanda bir mısırlınıń izraillını jábirlep atırǵanın kórip, onı jaqladı hám mısırlını óltirip, zulımlıq kórgen adam ushın ósh aldı. 25Ol: «Qudaydıń men arqalı ózlerin qutqaratuǵının tuwısqanlarım túsiner», – dep oylaǵan edi. Biraq olar túsinbedi. 26Erteńine Muwsa tóbelesip atırǵan eki izraillını ushıratıp qalǵanda, olardı jarastırmaqshı bolıp:

– Jigitler, sizler tuwısqansız-ǵo. Nege bir-birińizge jábir berip atırsızlar? – dedi.

27Biraq, jaqınına jábir bergen adam Muwsanı iyterip jiberip:

– Kim seni bizlerdiń ústimizden basshı hám qazı qılıp qoydı? 28Keshe mısırlını óltirgenińdey, meni de óltirmekshimiseń?#7:27-28 Shıǵ 2:14. – dedi.

29Bul sózdi esitkende Muwsa Midyan eline qashıp ketip, Midyanda jat jerli bolıp jasadı. Ol sol jerde eki balalı boldı.

30Qırıq jıl ótkennen soń, Sinay tawınıń dógeregindegi shólde, janıp turǵan putanıń jalınında Muwsaǵa bir perishte kórindi. 31Muwsa bul kóriniske tań qaldı. Anıqlap kóriw ushın jaqınlaǵanda, Jaratqan Iyeniń: 32«Men seniń ata-babalarıńnıń Qudayıman, Ibrayımnıń, Ísaqtıń, Yaqıptıń Qudayıman»#7:32 Shıǵ 3:6., – degen dawısı esitildi. Muwsa qorqqanınan qaltırap, qarawǵa júreksine almadı. 33Sońınan Jaratqan Iye oǵan bılay dedi: «Ayaq kiyimińdi shesh, sebebi sen turǵan jer muxaddes. 34Men xalqımnıń Mısırda azap-aqıret shegip atırǵanın kórdim, onıń nalasın esitip, onı qutqarıw ushın aspannan tústim. Endi bar, Men seni Mısırǵa jiberemen»#7:33-34 Shıǵ 3:5, 7-8, 10..

35Bul: «Kim seni basshı hám qazı qılıp qoydı?» – dep adamlar tán almaǵan – sol Muwsa edi. Quday onı putada kóringen perishte arqalı basshı hám qutqarıwshı qılıp jiberdi. 36Mısırda, Qızıl teńizde hám qırıq jıl boyı shólde tań qalarlıq nárseler hám káramatlı belgiler kórsetip, xalıqtı Mısırdan shıǵarǵan usı Muwsa edi. 37Izrail ullarına: «Quday sizlerge óz tuwısqanlarıńızdıń arasınan men sıyaqlı bir payǵambardı shıǵaradı#Elsh 7:37 Bazı qoljazbalarda mına sózler de bar: «Oǵan qulaq salıńlar».»#7:37 Nzm 18:15., – degen de – usı Muwsa edi. 38Sinay tawında ózine sóylegen perishteniń sózlerin ata-babalarımızǵa jetkizgen hám shólde jıynalǵan Izrail xalqı menen birge bolǵan da sol edi. Ol bizlerge jetkiziw ushın Qudaydıń tiri sózlerin alǵan edi.

39Biraq, ata-babalarımız oǵan boysınıwdı qálemedi hám onı tán almay, kewilleri Mısırǵa awdı. 40Olar Xaronǵa: «Bizlerdi baslap júretuǵın qudaylardıń músinlerin soǵıp ber, sebebi bizlerdi Mısır elinen shıǵarǵan sol Muwsaǵa ne bolǵanın bilmeymiz»#7:40 Shıǵ 32:1., – dedi. 41Sol kúnlerde olar tananıń músinin soǵıp, sol butqa qurbanlıq berdi. Olar óz qolları menen soqqan butqa quwanıp, kewil kóteristi. 42Sonlıqtan Quday olardan júzin teris burıp, olardı aspan denelerine tabınıwǵa taslap qoydı. Bul payǵambarlardıń kitabında jazılǵanınday boldı:

«Háy, Izrail xalqı!

Sizler shólde qırıq jıl boyı,

Maǵan qurbanlıq hám sıylar berdińiz be?

43Ózlerińiz tabınıw ushın islegen butlardı:

Moloxtıń shatırın hám qudayıńız Refannıń juldızın

Kóterip júrdińler-ǵo.

Sonlıqtan Men sizlerdi Babilonnıń arjaǵına súrgin qılaman»#7:42-43 Amo 5:25-27..

44Ata-babalarımızdıń shólde Kelisim shatırı bar edi. Muwsa onı ózine sóylegen Qudaydıń buyırǵanınday, kórgen úlgi boyınsha islegen edi. 45Shatır áwladtan-áwladqa ótip, ata-babalarımız Eshuanıń basshılıǵında Quday quwıp jibergen xalıqlardıń jerlerin iyelegende, onı ózleri menen birge alıp júrdi. Shatır Dawıttıń zamanına deyin boldı. 46Quday aldında miyrimge erisken Dawıt Yaqıptıń Qudayı ushın mákan qurıwǵa ruxsat soradı. 47Biraq, Quday ushın úy salǵan Sulayman boldı.

48Degen menen, Quday Taala adamnıń qolı menen salınǵan mákanlarda jasamaydı. Ol payǵambar arqalı bılay degen edi:

49«Aspan – Meniń taxtım,

Jer – ayaq basarım,

Sizler Maǵan qanday úy salıp bermekshisizler?

Meniń dem alatuǵın ornım qay jerde eken?

50Bulardıń hámmesin Meniń qolım jaratpadı ma?»#7:49-50 Iysh 66:1-2.

51Háy, ójetler, shın kewilden Qudayǵa boysınbaytuǵınlar, Onıń sózin tıńlamaytuǵınlar! Sizler ata-babalarıńızǵa uqsap, Muxaddes Ruwxqa bárqulla qarsı turasızlar. 52Ata-babalarıńız payǵambarlardıń qaysı birin quwdalamadı? Olar haq Adamnıń keliwin aldın ala boljaǵanlardı da óltirdi-ǵo. Sizler de endi Oǵan satqınlıq islep, Onı óltirdińler. 53Sizler perishteler arqalı berilgen Muxaddes Nızamdı alsańlar da, onı orınlamadıńlar!

Stepannıń óltiriliwi

54Keńes aǵzaları bul sózlerdi esitkende ashıwǵa minip, Stepanǵa qarsı tislerin qayradı. 55Al Muxaddes Ruwxqa tolǵan Stepan kózlerin aspanǵa tigip, Qudaydıń saltanatın hám Qudaydıń oń tárepinde turǵan Iysanı kórdi. 56Sonda ol:

– Qarańlar, aspannıń ashılǵanın hám Adam Ulınıń Qudaydıń oń tárepinde turǵanın kórip turman, – dedi.

57Al olar qulaqların jawıp, qattı qıshqırıstı. Hámmesi birden Stepanǵa topıldı da, 58onı qalanıń sırtına súyrep shıǵarıp, tas boran qıla basladı. Gúwalar óz kiyimlerin Shaul atlı bir jas jigittiń ayaǵınıń janına qoydı.

59Olar tas boran qılıp atırǵanda, Stepan: «Iyem Iysa, ruwxımdı qabıl et», – dep duwa etti. 60Sońınan ol dize búkti de, bálent dawıs penen: «O Iyem, bul gúnanı olardıń moynına júkleme!» – dedi. Usını aytıp bolıp, ol jan tapsırdı.

Currently Selected:

Elshiler 7: QrqMK22

Highlight

Copy