Mataio 16
16
1Ege Faresaio giz pako Sadukaio giz abim tabakeuare, a uiaba abi mirem, kega, Ma keribi detomertare nerute atamelam kotorlam.
2E etkalu uiabim, kega, Mena kikem a uaba mer, kega, Debe lem barki: abelelam kotor ge au mam mam.
3Abele kebi gereger a uaba mer ko, kega, Peirdi au irmir abele gereger: abelelam au mam mam dali, pako au kuba abele kotor ge. Uaba bes le giz, uaba umele etage kotor ra tonar, nako uaba nole umer kak urut atamelam?
4Abele nosik le adud, pako kogem le giz, uaba karim deraimerare nerute atamelam; umer kak nerute atamelam uabi nakuarare, a tepteb Iona perofeta ra atamelam. E dikaerlu uiabim, a adem bakeamulu.
5Ege abara kaimeg giz tabarki abele nerute apek, a uiaba okataprik ko areto ais.
6Iesu uiabim detager, Uaba au derarati adem abele Faresaio giz ra leuen, pako Sadukaio giz ra leuen.
7Ege uiaba mer atager, kega, Abara merlam, abelelam meriba nole areto tais.
8Epe Iesu opasereret, E uiabim detager, Nalu uaba mer atager, uaba kebikebi oituli, abelelam uaba nole areto tais?
9Nako uaba mena asor kak, a uaba nole dikiapor faife areto, pako faife thausan le, naket epei arota?
10A ko sefen areto, pako foa thausan le, naket epei arota?
11Nako uaba mena nole asor kak, nole abele areto kaka uabi detager? Epe ua au derarati adem abele Faresiao giz ra leuen, pako Sadukaio giz.
12Ege uiaba umele, nole areto ra leuen E uiabi detager au derarti adem, epe Faresaio giz ra giz mer, pako Sadukaio giz.
13Iesu bakeamulu abele Kaisaria Filipo ra nener, E itimerare abara kaimeg giz, kega, Nalu gaire le la mer, karim nete?
14Uiaba abi detagerare, Uader le la mer, mama Ioane Bapataiso; a uader le, mama Elia; a uader le, Ieremia, pako nerute perofeta.
15E uiabim detager, Nako uaba, nalu uaba mer, karim nete?
16Ege Simona Peteru abi detaut, kega, Mama Keriso, Ade ra Uerem eded.
17Ege Iesu etkalu abim, kega, Mama uerkab Simona Ba‐Jona: abelelam nole le mari etomeret, epe kara Aba dali kotor ge.
18Kaka mari detager, Mamanali Peteru, ka ko emoare kara ekalesia tumem abele neide ge; umer kak ur aseamur kak ra te abi tum ge
19Kaka keubu mari nakuar kotor baselaia ra ki; ese nerute lu ma didibari abele geseb ge, a ko didibari abele kotor ge; ese nerute lu ma detue abele geseb ge, a ko detue abele kotor ge.
20E uiabi daraisumdarare abara kaimeg giz nole ko atomeret kak nerute le E Iesu Keriso dali.
21Abele kerker Iesu ditimedlu ko natomertare abara kaimeg giz abkoreb E Ierusalemaem bakeamulu, ko gaire lu aiasi ikeli abim gaire aule giz pako zogozogo le giz pako aotale giz, uiaba abim ipitare eumida, E ko eded akaida thri gerger.
22Ege Peteru abi datkimalu, a abi daisumdalu, kega, Opole ae, muriz ge marielam abele lu, umer kak bakedida marim abele lu.
23Ege E egeremalu Peteruim, a abim, kega, Satana ae, ma bakeam kara sor ge: ma mokakalam lu kari bamsili; abelelam ma nole lakak Ade ra lu, epe mamor le la lu.
24Iesu uiabi detager abara kaimeg giz, Ese le lagelag kari narmili, nole abkoreb ko irmili tabara lag, debele E ko ais tabara satauro, a kari narmili.
25Abelelam ese le omare tabara eded, E abi: epe abele le dedkoli tabara eded karielam, E ko nagri.
26Abelelam nalu lu abkoreb, ese abele le nagri geseb ge uridili, a ko dedkoli abara eded? a nalu lu ikuar abele le ko bodomalam abara eded?
27Abelelam Le la Uerem tabarki kemem pako abara angela taba Aba ra zorom ge; epe E bodomalam le giz abkoreb uiaba dorge.
28Ageakar kaka uabi detagereda, Uader le ike nole eud kak, mena dasmerare Le la Uerem ko tabarki abara baselaia ge.
Currently Selected:
Mataio 16: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
