लूका 7

सुबेदार कर बिस्वास

(मत्ती 8:5-13)

1जे घनी ईसू हर, मईनसे मन जग ए सब उपदेस ला सिखाए दारीस, त कफरनहूम गांव में गईस। 2उहां रोमी सेना कर सुबेदार कर एगोट दुलरुवा दास रहीस, जेहर बेमारी ले मरोईया रहीस। 3ओ सुबेदार हर ईसू कर बारे में सुईन के, यहूदी मन कर तनिक मुखिया मन ला, ओकर जग बिनती करे बर भेजीस, कि आए के मोर दास ला चंगा कएर दे। 4ओ यहूदी मुखिया मन ईसू कर ठांवें आईन, अऊ ईसू जग ढेरेच बिनती कएर के कहे लागीन, “ओहर तोर मदेत कर लाएक हवे, कि तंए ओकर बर एही कस कर, 5काबरकि ओहर हमर यहूदी मईनसे मन जग मया करथे, अऊ ओही हर, हमर धरम सभा कर घर ला बनवाईस हवे।” 6ईसू हर ओमन कर संगे गईस, बकिन जे घनी ईसू ओकर घर कर ठांवें पहुंच गए रहीस, त सुबेदार हर, अपन संगता मन ला ए कहे बर ओकर जग भेजीस, “ए परभू, तंए परेसान झईन हो, काबरकि मंए एकर लाएक नई हों, कि तंए मोर घरे आओ। 7एकरे ले कि मंए तोर जग आए कर लाएक नई हों, बकिन तंए सिरीप कएह दे, त मोर दास हर जरूर चंगा होए जाही। 8मंहू सासन कर अधीन में हों, अऊ सिपाहीयो मन मोर अधीन में हवें, अऊ एक झन ला कहथों, ‘जा’ त ओहर जाथे, अऊ दूसर झन ला कहथों, ‘आ’ त ओहर आथे, अऊ अपन कोनो दास ला कहथों, कि ‘एला कर’ त ओहर करथे।” 9एला सुईन के ईसू हर अचमहों होए गईस, अऊ ईसू हर फिर के अपन पाछू आवत भीड़ ला, कहीस, “मंए तुमन ला कहथों कि, ए गैर यहूदी में जे बिस्वास ला मंए देखें, अईसना बिस्वास ला इसराएल में भी कहों नई पाएं।” 10त भेजल मईनसे मन, ओ जग ले घरे फिर के, ओ दास ला चंगा होवल पाईन।

ईसू एगोट अदावेंन कर मरल बेटा ला जीयाथे

11तेकर पाछू, ईसू हर अपन चेला मन कर संगे, नाईन नांव कर एगोट गांव में गईस। अऊ एगोट बड़खा भीड़ हर ओकर संगे जात रहीस। 12जे घनी ईसू हर गांव कर दुरा में पहुंचीस, त देखीस कि, मईनसे मन एगोट मुरदा ला बाहरी माटी देहे बर ले जात रहीन। ओहर अपन दाई कर एकेच ठन बेटा रहीस। ओकर दाई हर अदावेंन रहीस, अऊ ओ सहर कर एगोट बड़खा भीड़ हर, ओकर दाई कर संगे रहीस। 13ओके देख के परभू हर, सोगे होईस अऊ ओके ला कहीस, “झईन रो।” 14तेकर ईसू हर ठांवें आए के, अरथी ला छुईस, अऊ कंधा देवईया मन ठड़होए गईन, तेकर ईसू हर कहीस, “ए जवान, मंए तोके कहथों, उईठ जा।” 15तेही घनी ओ मरल हर उईठ बईठीस, अऊ गोठियाए लागीस, ईसू हर ओके, ओकर दाई ला सोंएप देहीस। 16एला देख के ओ सब झन कर ऊपरे डर भीन गईस, अऊ ओमन परमेस्वर कर बड़ाई कएर के कहे लागीन, “हमर मझारे एगोट बड़खा अगमजानी हर उठीसे, अऊ परमेस्वर हर अपन मईनसे मन कर मदेत करे बर आईसे।” 17ईसू कर बारे में, ए खभेर हर सबेच एहूदिया जिला अऊ ओकर आस-पास कर सबेच गांव में फईल गईस।

यूहन्ना बतिस्मा देवईया कर सवाल

(मत्ती 11:2-19)

18ईसू हर जे जाएत ला करे रहीस, ओकर बारे में यूहन्ना कर चेला मन ओके ला बताईन। 19तेकर यूहन्ना हर, अपन दुई ठे चेला मन ला, ईसू जग ए पूछे बर भेजीस, “का अवईया मसीह तंही लागस, कि हमरे कोनो दूसर झन कर डगर देखी?” 20ओमन ईसू जग आए के कहीन, “यूहन्ना बतिस्मा देवईया हर, हमन ला तोर जग ए पूछे बर भेजीस हवे, कि का अवईया मसीह तंही लागस, कि हमन कोनो दूसर झन कर डगर देखी?” 21ओही घनी ईसू हर ढेरेच बेमरीहा, अऊ दुखलीहा मन ला चंगा करीस, अऊ दुस्टआत्मा धरल मईनसे मन ला छोंड़ाईस, अऊ ढेरेच अकन अंधा मन ला आंएख देहीस, 22अऊ ईसू हर ओमन ला कहीस, “जे जाएत ला तुमन देखेहा अऊ सुनेहा, ओला जाए के यूहन्ना ला बताए देआ, कि अंधा मन देखथें, लंगड़ा मन रेंगथें-बूलथें, कोढ़ी मन सुध करल जाथें, भईरा मन सुनथें, मरल मन ला जियाल जाथें, अऊ गरीब मन ला सुघर खभेर सूनाल जाथे।” 23धन्य हवें ओमन, जेमन बिस्वास करथें कि अवईया मसीह मंहीच लागों। 24जे घनी यूहन्ना कर भेजल चेला मन, ओजग ले चएल देहीन, त ईसू हर यूहन्ना कर बारे में, मईनसे मन जग कहे लागीस, “तुमन सुनसान जघा में का देखे बर गए रहा? का बईहर ले हिलत सन कर पौधा कस एगोट कमजोर मईनसे ला? 25त फेर तुमन का देखे बर गए रहा? का महंगा कपड़ा पहिरल मईनसे ला? सुना, जेमन महंगा कपड़ा पहिरथें, अऊ सूख-बीलास में रथें, ओमन सुनसान जघा में नहीं, बकिन राएज गढ़ी में रहथें। 26त फेर का देखे बर गए रहा? का कोनो अगमजानी ला? हओ, मंए तुमन ला कहथों, कि ओहर अगमजानीयो मन ले बड़खा हवे। 27एहर ओही लागे, जेकर बारे में परमेस्वर कर किताब में लिखल हवे, कि ‘सुन, मंए अपन खभरीहा ला तोर आगु-आगु भेजथों, जेहर तोर आगू में डगर ला तियार करही।’ 28मंए तुमन ला कहथों, कि अझेर ले जेतना झेमन, सवांगीन मन ले जनमीन हवें, ओमन में यूहन्ना ले बड़खा कोनो नईए, बकिन जेहर परमेस्वर कर राएज में सबले छोटे हवे, ओहर यूहन्ना ले बड़खा हवे।” 29ए गोएठ ला सुईन के, सब मईनसे मन अऊ लगान लेवईयो मन, यूहन्ना कर बतिस्मा लेके, परमेस्वर कर डगर ला सचा माएन लेहीन। 30बकिन फरीसी मन अऊ यहूदी कानहूंन कर सिखोईया मन, यूहन्ना जग बतिस्मा नई लेहीन, अऊ अपन बारे में परमेस्वर कर योजना ला नकाएर देहीन। 31“मंए, ए पीढ़ी कर मईनसे मन कर तुलना काकर संगे करों? कि एमन काकर कस हवें?#7:31 “ए जुग कर मईनसे मन” मनेकि यहूदी मन कर धरम गुरू मन। 32ओमन, ओ बजार में बईठल लईका मन कस हवें, जेमन एक दूसर ला चिकेर के कहथें, ‘हमरे तुमन बर बसुरी बजाएन, अऊ तुमन नई नाचा, हमरे दुख कर गीत गाएन, बकिन तुमन नई रोया।’#7:32 ईसू हर ए उदाहरन कर द्वारा, ओ जुग कर यहूदी मन कर धरम गुरू मन कर बारे में बताथे। ओमन अईसना मईनसे मन हवे, जेमन ककरो ठे खुस नईए, चाहे यूहन्ना चाहे ईसू। 33काबरकि यूहन्ना बतिस्मा देवईया हर, अंगूर कर रस ला कभों नई पीस, अऊ ओहर उपास करत रहीस। बकिन तुमन कहथा, कि ओकर ऊपरे दुस्टआत्मा हवे। 34मंए, मईनसे कर बेटा खात पीयत आए हों, अऊ तुमन कहथा, ‘देखा, एहर तो पेटहा अऊ पियकड़ मईनसे, लगान लेवईया अऊ आने पापी मन कर संगता लागे।’ 35बकिन जेमन परमेस्वर कर गियान कर पाछू चलथें, ओकर जिनगी कर चलते ओही गियान हर, सचा ठहराल गईसे।”#7:35 इबरानी भासा में एगोट कहावत हवे, ओकर मतलब हवे कि अगर कोनो मईनसे अखीर कोनो सिक्छा हर सच चाहे झूठ हवे, त तुमन ला तजबीजे बर हवे। त ओ मईनसे कर सिरीप बात ला नही, बलकि ओकर चाल सहूरो ला देखे बर चाही।

एक झन पपहीन सवांगीन हर परभू ईसू कर ऊपरे आंतर तेल लगाथे

36फेर कोनो फरीसी मईनसे हर, ईसू ला अपन घरे खाए बर नेवता देहीस अऊ ईसू हर ओ फरीसी कर घरे जाए के, खाए बर बईठीस। 37ओ सहर में एगोट पपहीन सवांगीन रहीस, ओके ए पता चलीस कि, ईसू हर ओ फरीसी कर घरे खाए बर बईठीसे, तेकर ओहर संगमरमर#7:37 संगमरमर मनेकि ढेरेच महंगा उजर रंग कर पखना। कर सीसी में आंतर तेल ला लानीस, 38त ओहर ईसू कर पाछू, ओकर गोड़ जग रोवत ठड़होए गईस। अऊ अपन आंसू ले ईसू कर गोड़ ला भिजाए लागीस, अऊ अपन चुंदी ले पोंछीस अऊ ओकर गोड़ ला चुम-चुम के आंतर तेल ला लगाईस। 39एला देख के, ओ फरीसी जेहर ईसू ला बलाए रहीस, अपन मन में सोंचे लागीस, “अगर एहर अगमजानी होतीस, त जाएन जातीस कि एहर, जेहर ओके छुअथे, ओहर कोन अऊ कईसना सवांगीन हवे, काबरकि ओहर तो पपहीन हवे।” 40ईसू हर ओके जबाब देहीस, “ए समोन, मोके तोर जग कांही कहे बर हवे।” ओहर कहीस, “ए गुरूजी, कह।” 41ईसू हर ओके ला कहीस, “कोनो सेठ हर, दुई झन मईनसे ला करजा देहे रहीस, एक झन ला पांच सौ दिनार, अऊ दूसर झेला पचास दिनार#7:41 एक दिनार एक दिन कर मजदूरी कर बरोबर हवे। । 42जे घनी ओमन दुनो झन ठे करजा पटाए बर कांही नई रहीस, त ओहर दुनो झन ला छमा कएर देहीस। एकरले ओमन में ले, कोन ओकर जग ढेरेच मया करही?” 43ओ समोन फरीसी हर जबाब देहीस, “मोर समझ में ओहर, जेकर ढेरेच करजा हर माफ होईस।” ईसू हर ओके ला कहीस, “तंए ठीकेच कहे।” 44अऊ ईसू हर ओ सवांगीन कती ला देख के समोन ला कहीस, “का तंए ए सवांगीन ला देखत हस? मंए तोर घरे आएं, बकिन तंए मोके गोड़ धोए बर पानी नई देहे, अऊ एहर मोर गोड़ ला अपन आंसू में भिजाए के, अपन चुंदी ले पोंछीस। #7:44 यहूदी मन कर रिती-रिवाज रहीस कि कोनो पहुना मन ओमन कर घरे आथें, त ओमन कर माएन-मरजाद करे बर गोड़ ला धोवत रहीन। धनी मन कर घरे कोनो पहुना आथें, त ओकर दास हर पहुना मन कर गोड़ ला पानी ले धोए के सांफी ले पोंछत रहीस। बकिन समोन कर घरे ईसू हर आईस, त समोन अखीर ओकर दास हर ईसू कर गोड़ ला नई धोईस। एजग ए सवांगीन हर दासोच ले छोटे बएन के अपन आंसू ले ईसू कर गोड़ ला धोईस अऊ अपन चुंदी ले पोंछीस। 45तंए मोके नई चुमहे, बकिन जब ले मंए आए हों, तब ले एहर मोर गोड़ ला चुमहत हवे। #7:45 एहर यहूदी मन कर रीती-रीवाज रहीस कि जब ओमन आपस में भेंटाथें, त एक दूसर कर गाल अखीर कपार ला चुमथें। एही कस दास मन अपन मालीक कर मरजाद करे बर हाथ ला चुमथें। यहूदी मन कर चेला मन अपन गुरू कर हाथ ला चुम के ओकर आदर करत रहीन। अगर कोनो हर दूसर कर गोड़ ला चुमथे, त हाथ कर चुमहाई ले ढेरेच आदर अऊ नरम सुभाव ला देखाथे। 46तंए मोर मूड़े तेल नई चुपराए, बकिन एहर मोर गोड़ में आंतर तेल चुपराईस हवे। 47तेकर ले मंए तोर जग कहथों, कि एकर पाप जेहर ढेरेच रहीस, ओहर छमा होईस, एकर बर एहर ढेरेच मया करीस, बकिन जेकर थोरहें छमा होईसे, ओहर थोरहें मया करथे।” 48अऊ ईसू हर सवांगीन ला कहीस, “तोर पाप हर छमा होईस।” 49तेकर जेमन ओकर संगे खाए बर बईठे रहीन, ओमन अपन-अपन मन में सोंचे लागीन, “एहर कोन लागे, जेहर पापोच छमा करथे?” 50बकिन ईसू हर सवांगीन ला कहीस, “तोर बिस्वास हर, तोके पाप कर दंड ले बचाए लेहीस हवे, सूघरे-सूघर चएल जा।”

Currently Selected:

लूका 7: SGJ

Highlight

Copy