Marcos 10
10
Uníxa aín xanubë ënanántima
(Mt 19.1-12; Lc 16.18)
1Capernaúmnuax cuanx ca Jesús Judea me, Jordán cacë baca ꞌucë manan, Perea cacë, bëbacëxa. Usaxun ca anua ꞌaisamaira uni timë́tëcënia an ꞌacësabi oquin bana ñuixuancëxa. 2Usa ꞌain ca fariseo unibunën anu timë́xun Jesús uisai caraisa quia ami manánuxun cuacatsi quixun ñucáquin cacëxa:
—¿Unin aín xanu ënti cara asábi ꞌic?
3Cacëxun ca Jesusan cacëxa:
—¿Uisaími mitsux ꞌinun cara Moisés quiacëx?
4Cacëx ca quiacëxa:
—Moisésnëan cuënëo banax ca ësai quin, “ënquin ca unin —ënë xanu ca bërí ꞌën xanuma ꞌicë —quixun quirica ꞌatancëxun ꞌinánquin aín xanu ënti ꞌicë” quiax.
5Cacëxun ca Jesusan cacëxa:
—Judíos unicamaxa mitsusaribi masáquin sináncë ꞌain ca Moisésnën usai quiquin a bana cuënëocëxa. 6Usa ꞌaínbi ca camabi ñu unioquin Nucën Papa Diosan bëbu ꞌimainun xanu uniocëxa. 7Usoquin unio ꞌixun ca unin aín xanu biquin aín titacëñun aín papa ëni, aín xanubë ënananquinma ꞌiquinti ꞌicën. 8Usa ꞌain ca uni aín xanubë rabë́ ꞌaíshbi achúshisa ꞌicën. 9Usaía achúshishi ꞌinúan Nucën Papa Diosan ꞌimia ꞌaish ca uni aín xanubë ënanantima ꞌicën, uni itsínribi ca ënananmitima ꞌicën.
10Usaquian cacë ca xubunuxun aín ꞌunánmicë unicaman amiribishi unin cara aín xanu ënti ꞌicë quixun ñucátëcëancëxa. 11Ñucácëxun ca Jesusan cacëxa:
—Aín xanu ënxuan an xanu itsi bicë uni ax ca a ëncë xanumi ꞌuchaia, aín xanuma ꞌaínbi xanu itsibë ꞌia ꞌicësaribiti. 12Usaribiti ca xanúxribi, aín bënë ënxun uni itsi bitsi ꞌuchaia, axa aín bënë ꞌaímabi bëtsi unibë ꞌi ꞌicësaribiti.
Tuácama Jesusan Nucën Papa Dios ñucáxuan
(Mt 19.13-15; Lc 18.15-17)
13Usa ꞌain ca ainsa sinánxunquin nuibaquin ramënun quixun tuá xuracama Jesúsnu bëcancëxa. Bëiabi ca aín ꞌunánmicë unicaman an bëcëcama ñu caquin cacëxa:
—Ënu tuá xurácama bëxunma ca buántan —quixun.
14Usaquian caia isi nishquin ca Jesusan cacëxa:
—Cuantánun caxunma ca tuá xuracama ꞌënua unun ën. ꞌËmi catamëtia Nucën Papa Diosan ainan ꞌimicë unicamax ca ënë tuá xuracamasaribi ꞌicën. 15Asérabi cana ꞌën mitsu cain, uix cara tuá xuratsua an bërúancë unimi catamëcësa usaribiti ꞌëmi catamëcëma ꞌicë ax ca Nucën Papa Diosnan ꞌitima ꞌicën.
16Usaquin caquin ca tuácama ꞌicúquin biquin ramëquin Nucën Papa Dios ñucáxuancëxa.
Ñuñuira bëná uni ñuicë bana
(Mt 19.16-30; Lc 18.18-30)
17Baían Jesús cuancëbëbi ca achúshi uni abácuatsini uacëxa. Ai rantin puruni tsóbuquin ca ñucáquin cacëxa:
—Mix camina asérabi upí uni ꞌain. Usa ꞌixun camina ꞌë ñuixunti ꞌain, ¿ꞌëx nëtë́timoi Nucën Papa Diosan nëtënu abë ꞌinuxun carana añu ꞌati ꞌain?
18Cacëxun ca Jesusan cacëxa:
—¿Uisati caramina ꞌëx isana upí ꞌai quixun ꞌë cain? Uinu ꞌicë uníxbi ca upíma ꞌicën. Nucën Papa Diosaxëshi ca upí ꞌicën. 19Uisai cara aín bana cuënëo quia quixun camina ꞌunanin. Ca quia: “Uni camina ꞌatima ꞌain. Uni itsin xanubë camina ꞌitima ꞌain. Uni itsin ñu camina mëcamatima ꞌain. Camina bëtsi unimi cëmëi manántima ꞌain. Camina uni parántima ꞌain. Min papa, min titan bana camina upí oquin cuaquin tanti ꞌain”.
20Usaquian cacëxun ca unin cacëxa:
—Chamaratsu ꞌaíshbi minmi ꞌë cacë banacama quicësabi oi ꞌiá ꞌaish cana usabii ꞌin.
21Cacëxun ca Jesúsan a isquin nuibaquin cacëxa:
—Usari camina ꞌin. ꞌIxunbi camina achúshi ñuishi ꞌacëma ꞌain. Ca cuantan. Cuanxun camina min ñucama maruquin curíqui bixun ñuñuma unicama ꞌinánti ꞌain. Usotancëx camina ñuñushi ꞌiti sinanima ꞌëmi sinani ꞌënan cupí bamanuxbi ꞌëbë cuani uti ꞌain. Usaquin ꞌatancëx camina Nucën Papa Diosan nëtënu ꞌianan usaquin ꞌacë cupí anuax cuëëinra cuëënti ꞌain.
22Usaquian Jesusan cacëxun cuabiani ca aín ñua ꞌitsaira ꞌain, a uni masá nuituti utë́nbuax cuancëxa.
23Usai ꞌicëbëtan ca Jesusan ñachaquin isquin aín ꞌunánmicë unicama cacëxa:
—ꞌAisamaira ñuñu unix ca ainan ꞌiti ꞌaíshbi ñuñu ꞌitishi sinani Nucën Papa Diosnan ꞌitima ꞌicën.
24Usai quicëbëa ratutiabi ca aín ꞌunánmicë unicama amiribishi catëcëancëxa:
—ꞌAisamaira ñuñu unix ca ainan ꞌiti ꞌaíshbi —ñuñu ꞌaish cana asábi ꞌai —quixun sinani Nucën Papa Diosnan ꞌitima ꞌicën. 25Camello, ax ca chaira ꞌaish, xumuxan quini chamaratsu ꞌain, anun atsínquiantima ꞌicën. A ñuina chaxa a quinin atsíncasmacësamaira oi ca ꞌaisamaira ñuñu uni Nucën Papa Diosnan ꞌitima ꞌicën.
26Usaía quia cuati ca aín ꞌunánmicë unicama, a banax ca asérabi ꞌicë quixun sináncasmai canancëxa:
—Asérabi a bana ꞌain ca ui uníxbi Nucën Papa Diosnan ꞌinux ië́tima ꞌicën.
27Usai quia isquin ca Jesusan cacëxa:
—ꞌAisamaira ñuñu uníxa ië́tisama ꞌaínbi ca Nucën Papa Diosan ꞌacasmati ñu ꞌaíma ꞌicën. Usa ꞌixun ca ainshi ñuñu uniribi ainan ꞌinun ië́miti ꞌicën.
28Quia ca Pedronën Jesús cacëxa:
—Nun cananuna mibë ninuxun nun ñucama ëan.
29Cacëxun ca Jesusan aín ꞌunánmicë unicama cacëxa:
—Asérabi cana mitsu cain, uinu ꞌicë unin cara camabi uníxa ꞌëmi catamëti Nucën Papa Diosnan ꞌinun ꞌaquinuxun aín xubu, aín xucën, aín chirabacë, aín tita, aín papa, aín bëchicë, aín naë ëanxa, 30a unix ca bëráma ꞌicësamairai ënë nëtënu aín xubu, aín xucën, aín chirabacë, aín tita, aín bëchicë, aín naë a ñucamañu ꞌiti ꞌicën, bëtsi unían ami nishquin ꞌatimomainun. Usai ꞌianan ca Nucën Papa Diosan nëtënu abë nëtë́timoi ꞌiti ꞌicën. 31Usa ꞌaínbi ca bëría unin —cha ca a uni ꞌicë —quixun sináncë uni a Nucën Papa Diosan aín nuitu ꞌunánquin ñuumara isti ꞌicën. ꞌImainun ca bërí unin iscë́xa ñuuma ꞌicë uni a Nucën Papa Diosan aín sinan upí ꞌunánquin a uníxa cha ꞌicë isti ꞌicën.
Jesusan —ꞌëx cana unin ꞌacëx bamati ꞌai —quixun catëcëan bana
(Mt 20.17-19; Lc 18.31-34)
32Anuax cuanx bain Jerusalénu cuani ca aín ꞌunánmicë unicamaxa uisai cara ꞌiti ꞌicë quixun sináncasmai racuëti tsiánmainun Jesús rëcuë́nquiancëxa. Rëcuë́nquiania ꞌitsa unin a nuibiancëxun ca Jesusan abëa cuanun aín ꞌunánmicë unicama mëcën rabë́ ꞌimainun rabë́ cuënquin, usai cana ꞌiti ꞌai quixun ñuixunquin, ësaquin cacëxa: 33—Mitsúnbi camina isin, bërí cananuna Jerusalénu cuanin. Anuxun ca uni ꞌinux Nucën Papa Diosnuax uá, ꞌë unin ꞌinánti ꞌicën, judíos sacerdotenën cushicamacëñun an Moisésnën cuënëo bana ꞌunáncë unicama. ꞌInáncëxun ca atun —a uni ca bamati ꞌicë —quixun catancëxun judíosma unicaman ꞌanun ꞌë ꞌinánti ꞌicën. 34ꞌInáncëxun ca ꞌëmi cuaianan tushucanan mëëtancëxun ꞌë ꞌati ꞌicën. Usoquian ꞌacëx bamatancëx cana rabë́ ꞌimainun achúshi nëtë ꞌicëbë baísquiti ꞌain.
Zebedeonën bëchicë rabëtan Jesús ñucá
(Mt 20.20-28)
35Usa ꞌain ca Zebedeonën bëchicë rabë́, Jacobo ꞌimainun Juan, an anu cuanxun Jesús cacëxa:
—Nux cuëëncësa oquinmi nun ñucácëxun min nu ꞌaxúnti cananuna cuëënin.
36Cacëxun ca Jesusan cacëxa:
—¿Añu ñu ꞌën mitsu ꞌaxúnti caramina cuëënin?
37Cacëxun ca cacëxa:
—Mixmi ꞌapu ꞌaish, min nëtë upínu tsotan, ꞌën xucënaxa min mëcën amo tsómainun ꞌëx min mëcën amo tsóti cana cuëënin.
38Cacëxun ca Jesusan cacëxa:
—Sinánquinmaishi camina usaquin ꞌë cain. ¿ꞌË ꞌacësaribi oquian unin mitsu bëtsi bëtsi ocëxun caramina tanshiti ꞌain? ¿ꞌËx ꞌicësaribiti tëmëraquinbi caina tanshiti ꞌain?
39Quia ca cacëxa:
—Usaribi oquin cananuna tanshiti ꞌain.
Cacëxun ca Jesusan cacëxa:
—ꞌËn ꞌacësaribi oquin camina bëtsi bëtsi ocë ꞌianan paëira tanti ꞌain. 40Usa ꞌaínbi cana ꞌën, mix camina ꞌën mëqueu tsónan ꞌën mëmiu tsóti ꞌai quixun ui unibi caiman. Nucën Papa Diosan cuni ca cati ꞌicën, uix cara anu tsóti ꞌicë quixun, an mëníosabi oía ꞌinun.
41Usaquian a rabëtan Jesús caia cuati ca Jesusan ꞌunánmicë uni raíri, mëcën rabë́, ax Jacobo ꞌimainun Juanmi nishacëxa. 42Usaria isquin ca cuënxun Jesusan cacëxa:
—Mitsun camina ꞌunanin, judíosma ꞌapucaman ca aín unicama ax cuëëncësabi oquian tëmëraquinbi ñu mëënun ꞌamia. Aín cushi unin ca aín unicama ax quicësabi oquian ꞌanun ꞌamia. 43Usa ꞌaínbi camina mitsux usai ꞌitima ꞌain. Uix cara bëtsi unisama ꞌiisa tania, an ca mitsúxmi upitax bucunun ñu mëëquin ꞌaquinti ꞌicën. 44Uinu ꞌicë micamax cara mitsun cushi ꞌiisa tania an ca mitsúxmi chuámarua upitax bucunun mitsu ñu ꞌaxúnti ꞌicën, ꞌën mitsu ꞌacësaribi oquin. 45Uni itsían ñu mëëxunun cana ꞌëx uni ꞌinux Nucën Papa Diosnuax uáma ꞌain. ꞌËx cana unicamaxa upí ꞌianan upitax bucuti oquin ꞌaquini uacën. ꞌËx ꞌuchañuma ꞌaish bamatsianxmabi cana camabi uníxa Nucën Papa Diosbë upí ꞌinun atun ꞌucha ꞌënansa ꞌain bamai uacën.
Jesusan bëxuñu uni Bartimeo bëpëxcüa
(Mt 20.29-34; Lc 18.35-43)
46Usaquiani Jericó ëmanu bëbatancëx ca anuax aín ꞌunánmicë unicama ꞌimainun ꞌaisamaira uni Jesúsbë cuantëcëancëxa. Cuania ca bëxuñu uni, Bartimeo cacë, Timeonën bëchicë, an uni curíqui ñucácë, an bai amo tsóxunbi 47—Nazaretnu ꞌicë Jesús ca aia —quiáxa quicania cuati cuëníshquin cacëxa:
—Davitan rëbúnqui, Nucën ꞌIbu Cristo, nuibaquin ca ꞌë ꞌaquin.
48Usaía quia oquin ca anu ꞌicë unicaman banaxma isa nëtë́nun quixun cacëxa. Cacëxbi ca nëtëtima ax ꞌicësamaira oi ñunshínrui munuma cuëníshtëcëni quiacëxa:
—Davitan rëbúnqui, Nucën ꞌIbu Cristo, nuibaquin ca ꞌë ꞌaquin.
49Usaía quia cuati niracëquin ca Jesusan —ꞌënu unun ca cat —quixun cacëxa. Cacëxun ca unicaman bëxuñu uni cacëxa:
—Masá nuituáxma ca ꞌit. Mi ca cuënia, niruquiani ca anu cuantan.
50Cacëxëshi niruquin anúan mapúcë chupa pëxun nibiani ca Jesúsnu cuancëxa. 51Usaria aia ca Jesusan cacëxa:
—¿ꞌËn mi uisoti caina cuëënin?
Cacëxun ca cacëxa:
—Isnúnmi ꞌë bëpë́xcuti cana cuëënin.
52Usaquian cacëxun ca Jesusan cacëxa:
—Camina cuanti ꞌain. ꞌËn mi bëpë́xcuti sinani ꞌëmi catamëti camina bëpë́xcüan.
Usaquian cacëxëshi bëpë́xcuquin ca isacëxa. Bëpë́xcucëxun isi cuëënquiani ca Jesúsbë cuancëxa.
Currently Selected:
Marcos 10: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.
