Mateo 25

Mëcën rabë́ xanu ñuia Jesus quiá bana

1Aín ꞌunánmicë unicama bana ñuixunquin ca Jesusan aín uti nëtë ñuiquin ësaquinribi cacëxa:

—ꞌËx anun ꞌën unicaman ꞌapu ꞌinux uti nëtë ca ësa ꞌiti ꞌicën: Achúshi unían xanu biti ꞌain ca an axa bënuti xanu nuibacë mëcën rabë́ xanucamax, an xanu biti uni ax aia bitsi, lamparín bibiani cuanxa. 2-4Mëcën achúshi xanucama ca sinánñuma ꞌixun xënisa ñu anun aín lamparín ërë́nti buáncëma ꞌicën. ꞌAínbi ca raíri mëcën achúshi xanu ainshi sinánñu ꞌixun aín lamparíncëñun xënisa ñuribi buánxa. 5Atúxa lamparín buani cuanbi ca an xanu biti uni panáxa. Panacëbë ca ꞌuxcënan tënáncëx ꞌuxcanxa. 6ꞌUxánbia imë́ naëx a uni aia isi ca raírinëx cuëncëni quiaxa: An xanu biti uni ca aia. Ca bitsi cuan. 7Quia sharatia bësuquin ca bënë́nquinshi a xanucaman aín lamparín mëníoxa. 8Usocëbëtan ca sinánñuma xanucaman raíri xanucama caxa: Nun lamparíncama ca bënaia. Mitsun xënisa ñu ꞌëísh ca nu ꞌinan. 9Cacëxunbi ca sinánñu xanucaman caxa: Nun xënisa ñu sapi ca mitsun lamparín ꞌimainun nun lamparínuribi ꞌaruti sënë́ntima ꞌicën. Mitsúnbi ca an xënisa ñu marucë uninu cuanxun bitan. 10Cacë́xa sinánñuma xanucama xënisa ñu bitsi cuancëbë ca an xanu biti uni uaxa. Aía atsíncëbë ca sinánñu xanucamaribi abëtan pinux xubunu atsíanxa. Atsíncëbëtan ca xëcuë xëocatëcëinsama oquin xëpuaxa. 11Usaía ꞌicëbë uquin ca sinánñuma xanucaman ëmánxun —nu ca xëócaxun —quixun caxa. 12Cacëxunbi ca caxa: Asérabi cana ꞌën ꞌunaniman, ui caramina mitsux ꞌain.

13Usaquin catancëxun ca Jesusan cacëxa:

—Mitsúnribi camina añu nëtë́inra ꞌianan uínsaran carana ꞌëx utëcënti ꞌai quixun ꞌunánquinmabi —ca uti ꞌicë —quixun sinani cuëënquin ꞌëx uti caínti ꞌain.

Bana itsi ñuicësaria Jesús curíqui ñui quia

14Anúan ax utëcënti nëtë ñuixuntëcënquin ca Jesusan ësaquin aín ꞌunánmicë unicama cacëxa:

—ꞌËx anun uti nëtë ca ësa ꞌiti ꞌicën. Amanu cuanuxun ca achúshi unin aín ñu mëëmicë unicama cuënxun aín curíqui anun ñu mëëquian curíqui itsiribi binun mëtícaquin ꞌinánxa, a curíquinën ñu ꞌatancëxuan an bicë curíqui a ꞌinántëcënun quixun.

15Uisoquin curíquinën ñu ꞌati cara ꞌunánxa usoquian anun ñu ꞌati sënë́inshi ca ꞌinánxa. Achúshi ca ꞌitsa, mëcën achúshi mil curíqui ꞌinánxa. Bëtsi uniribi ca ꞌitsatani, rabë́ mil curíqui ꞌinánxa. Bëtsiribi ca ꞌitsamashi achúshi mil curíqui ꞌinánxa. ꞌInántancëx ca amanu cuanxa. 16Cuancëbëtan ca an ꞌitsa, mëcën achúshi mil curíqui bicë uni an a curíquinën ñu bitancëxun maruquin bitëcënquin usaribi mëcën achúshi mil curíqui biaxa. 17Usaribi oquin ca an ꞌitsatani, rabë́ mil curíqui bicë uni an bëtsi rabë́ mil curíquiribi biaxa. 18Usa ꞌaínbi ca an ꞌitsamashi, achúshi mil curíquishi bicë uni an me naëtancëxun a curíqui maíanxa.

19Usaquian ꞌan ca ꞌitsa ꞌuxë ꞌicëbë an a unicama ñu mëëmicë unix utëcëanxa. Utëcënquin ca uisaquin cara aín unicaman a curíquinën ñu ꞌaxa quixun istisa tanxa. 20Istisa tancëbë uquin ca an ꞌitsa, mëcën achúshi mil curíqui bicë unin an bicë curíquicama bëxun caxa: Min camina mëcën achúshi mil curíqui ꞌë ꞌinan. Usa ꞌaínbi cana anun ñu bixun marutancëxun bëtsi mëcën achúshi mil curíquiribi bian. Acama ca ënëx ꞌicën. 21Cacëxun ca an a ñu mëëmicë unin caxa: Camina upí oquin ꞌën curíquinën ñu ꞌan. Minmi ꞌitsamashi ꞌaínbi a curíquinën upí oquin ꞌacë cupí cana mi ꞌitsaira anúnmi ꞌë ñu ꞌaxúnun ꞌinánti ꞌain. Usa ꞌaish camina ꞌëx cuëëncësaribi oi ꞌëbë cuëënti ꞌain.

22Usaquian cacëbë uquin ca an rabë́ mil curíqui bicë uni an bicë curíquicama bëquin caxa: Min camina ꞌë rabë́ mil curíqui ꞌinan. Usa ꞌaínbi cana anun ñu bixun marutancëxun bëtsi rabë́ mil curíquiribi bian. Acama ca ënëx ꞌicën. 23Cacëxun ca an a ñu mëëmicë unin caxa: Camina upí oquin ꞌën curíquinën ñu ꞌan. Minmi ꞌitsamashi ꞌaínbi a curíquinën upí oquin ꞌacë cupí cana mi ꞌitsaira anúnmi ꞌë ñu ꞌaxúnun ꞌinánti ꞌain. Usa ꞌaish camina ꞌëx cuëëncësaribi oi ꞌëbë cuëënti ꞌain.

24Usaquian cacëbë uquin ca an achúshi mil curíqui bicë unin caxa: Mixmi unimi nishcësa ꞌicë cana mi ꞌunan. Uni itsin ñu ꞌapámitancëxun camina a bimi mináinshi ꞌinun min unicama bimin. 25Usa ꞌain cana racuë́quiani cuanxun nëtë́miti rabanan me naëxun anu maínquin min curíqui unëan. Min curíqui ami ꞌë ꞌináncë a ca ënëx ꞌicën, camina biti ꞌain. 26Cacëxun ca an ñu mëëmicë unin caxa: Mix camina ꞌaisama ꞌianan chiquish ꞌain. Uni itsi ñu ꞌapámitancëxun a bimi ꞌënáinshi ꞌinun ꞌën unicama bimicë cana ꞌai quixun camina sinanin. 27Usaquin ꞌë ꞌunánquin camina ꞌën curíqui a banconu nanti ꞌian. Anu nancë ꞌain cana ꞌëx utëcënquin ꞌën curíqui ꞌimainun curíqui itsiribi bitsían. 28Caxun ca aín uni itsi caxa: Mil curíqui ꞌën ꞌinan, a camina a uninua bixun axa mëcën rabë́ mil curíquiñu uni a ꞌinánti ꞌain. 29Uisa ñu cara a ꞌináncë ꞌicë anúan an cacësabi oquin ñu ꞌacë uni a ca aín ꞌibun ꞌinántabaquin ꞌináncësamaira oquin ꞌinántëcënti ꞌicën. Usonan ca anúan aín ꞌibu ñu ꞌaxuncëxunma a ꞌináncë ñu a aín ꞌibun bicuanti ꞌicën. 30Usa ꞌain camina bicuanxun a curíqui bëtsi uni ꞌinánan an curíquinën upí oquin ñu ꞌacëma uni a ëman bëánquibucë anua ꞌinun niti ꞌain. Anuax ca anu ꞌicë unicamax paë tani tëmërai bënëti inti ꞌicën.

Camabi menu ꞌicë unicama Jesucristonën uisa cara oti ꞌicë usoquin ꞌati bana

31Usaquin catancëxun ca Jesusan aín uti nëtë ñuixuntëcënquin ësaquinribi aín ꞌunánmicë unicama cacëxa:

—Uni ꞌinux Nucën Papa Diosnuax uá ꞌaish ꞌën cushínbi utëcëanx cana ꞌApuira ꞌinuxun ꞌain. Usa ꞌain ca ꞌëbë ꞌën ángelcamaribi ꞌiti ꞌicën. 32ꞌËx usa ꞌain ca camabi menu ꞌicë unicama ꞌën ángelcaman bëcëx ꞌënu timë́cë ꞌiti ꞌicën. Anua timë́cë isquin cana ꞌën unicama amo sëtënánan ꞌënanma unicama amoribi sëtënati ꞌain, an ꞌaracacë ñuina unin aín carnerocama amo bucunanan aín chivocama amo bucunacësaribi oquin. 33Ñuina ꞌibun ca aín carnero aín mëqueua ꞌinun ꞌimia. ꞌImianan ca aín chivo aín mëmiua ꞌinun ꞌimia. Usaribi oquin cana ꞌën unicama ꞌën mëqueuqa ꞌinun ꞌimianan ꞌënanma unicama ꞌën mëmiua ꞌinun ꞌimiti ꞌain. 34Usai ꞌitancëxun cana ꞌëx ꞌApuira ꞌixun axa ꞌën mëqueu ꞌicë unicama cati ꞌain: ꞌËn Papa Diosan ca mitsu upí oquin sinánxunia. Mecama ꞌimainun anu ꞌicë ñucama unioquin ca an mitsu sinánxunquin anu mitsux abë ꞌiti mëníocëxa. Ax quiásabi oi camina bërí anu ꞌiti ꞌain. 35ꞌËx ꞌacëñuma ꞌicë camina ꞌë piti ꞌináncën. ꞌËx ꞌumpax ꞌaisa tani shimaia camina ꞌë ꞌináncën. Amanu nitsi cuanx ꞌëx anu ꞌiti ꞌaíma ꞌain camina ui cara quixun ꞌunánquinmabi ꞌëx anu ꞌiti ꞌë ꞌináncën. 36Chupañuma ꞌicë camina ꞌë chupa ꞌináncën. ꞌInsíncë ꞌain camina ꞌë isi cuancën. Sipuacë ꞌain camina ꞌë isi cuancën. 37Cacëxun ca ꞌën unicaman ꞌë cati ꞌicën: ¿Uisa nëtën caranuna mixmi ꞌacëñuma ꞌicë, nun piti mi ꞌináncën? ¿Uisa nëtën caranuna mixmi shimacë, nun mi ꞌumpax ꞌináncën? 38¿Uisa nëtën caranuna amanu nitsi cuanxmi anu ꞌitiñuma ꞌicë mi anu ꞌiti ꞌináncën? ¿Uisa nëtën caranuna chupañuma isquin mi chupa ꞌináncën? 39¿Uisa nëtën caranuna mixmi ꞌinsíncë ꞌianan sipuacë ꞌicë mi isi cuancën? 40Cacëxun cana ꞌëx ꞌApuira ꞌixun ꞌën unicama cati ꞌain: ꞌËn cana asérabi mitsu cain, mitsun ꞌën xucë́ncama achúshi, uni raíribë sënë́nmara ꞌicëbi ꞌaquinquin camina ashi ꞌaquincëma ꞌain, camina ꞌëribi ꞌaquian.

41Usaquin catancëxun cana axa ꞌën mëmiu ꞌicë unicama cati ꞌain: Mitsux ꞌën unibuma ꞌaish ca ꞌë ꞌura cuantan. Cuanx ca manë tsi anua aín ꞌapubë ñunshin ꞌatimacama ꞌinun mënío anu ꞌitan. 42ꞌËx ꞌacëñuma ꞌicë camina ꞌë piti ꞌinánma ꞌain. ꞌËx shimacë camina ꞌë ꞌumpax ꞌinánma ꞌain. 43Amanu nitsi cuanx ꞌëx anu ꞌiti ꞌaíma ꞌain camina ꞌëx anu ꞌiti ꞌinánma ꞌain. Chupañuma ꞌicë camina ꞌë chupa ꞌinánma ꞌain. ꞌInsíncë ꞌianan sipuacë ꞌain camina ꞌë isi cuanma ꞌain. 44Cacëxun ca atun ꞌë cati ꞌicën: ¿Uisa nëtën caranuna mixmi ꞌacëñuma ꞌianan shimacë ꞌianan amanu nitsi cuancë anu mi ꞌiti ꞌaíma ꞌain mi ꞌaquianma ꞌain? ¿Uisa nëtën caranuna mixmi chupañuma ꞌicë mi chupqa ꞌinanima ꞌianan mixmi ꞌinsíncë ꞌianan sipuacë ꞌain mi isi cuanma ꞌain? 45Cacëxun cana ꞌëx ꞌApuira ꞌixun acama cati ꞌain: ꞌËn cana asérabi mitsu cain, ꞌën unicama achúshi, uni raíribë sënë́nmara ꞌicëbi, ꞌaquinquinma camina mitsun ꞌëribi ꞌaquincëma ꞌain. 46Usaquin ꞌën cacëx ca acamax anuxuan xënibua ꞌaínbi tëmërati anu cuanti ꞌicën. Cuancëbë ca ꞌën unicamax Nucën Papa Diosan nëtënu xënibua ꞌaínbi ꞌëbë ꞌi cuanti ꞌicën.

Currently Selected:

Mateo 25: cbrPB

Highlight

Copy