Lucas 20

Uin banan cara Jesusan ñu ꞌaia quixuan Jesús ñucácan

(Mt 21.23-27; Mr 11.27-33)

1Achúshi nëtën anuxun Nucën Papa Dios rabiti xubunuxun unicama bana ꞌunánmianan upí bana anúan uni Nucën Papa Diosnan ꞌiti ñuixunmainun ca judíos sacerdotenën cushicama ꞌimainun an Moisésnën cuënëo bana ꞌunáncë unicama ꞌimainun anpan caniacëcë unicama anu cuanxun 2ñucáquin Jesús cacëxa:

—¿Uin banan caramina min usa ñu ꞌain? ¿Uin cara ësoquinmi ñu ꞌanun mi cax? Ca nu ñuixun.

3Cacëxun ca Jesusan cacëxa:

—ꞌËnribi cana mitsu bana itsi ñucatin. ꞌË ca ñuixun, 4¿uin cara Juan unicama nashiminun cacëx? ¿Nucën Papa Diosan cara cacëx? ¿Unin cara usaquian ꞌanun cacëx?

5Usaquian Jesusan ñucáquin cacëxbi ca uisaquin cara cati ꞌicë quixun ꞌunanima atúxbi ñucacanani quicancëxa: ¿Uisaquin caranuna cati ꞌain? Nun nu, Nucën Papa Dios naínu ꞌicë an ca cacëxa, quixun cati ꞌaínbi ca usaquin nun cacëxun nu, usa ꞌain caramina uisa cupí aín bana cuama ꞌai quixun nu cati ꞌicën. 6Nun nu, unían unicama nashiminun cacë ca Juan ꞌiacëxa quixun cati, ꞌaínbi ca ꞌapuma unicaman nu maxaxan ꞌati ꞌicën. Acaman ca aín bana cuaquin, Nucën Papa Diosan ca asérabi aín bana unicama ñuixunun quixun Juan xuacëxa quixun sinania. 7Usari canantancëxun ca Jesús cacëxa:

—Uin xucë cara ꞌiacëxa quixun cananuna ꞌunániman.

8Cacëxun ca Jesusan cacëxa:

—Mitsúnmi ꞌën ñucácëxun ꞌë ñuixuncëxunma cana ꞌënribi uin banan carana ësaquin ñu ꞌai quixun mitsu caiman.

An naë bërúancë ꞌaisama unicama ñuiquin Jesusan cá bana

(Mt 21.33-44; Mr 12.1-11)

9Bana itsi ñuicësoquin ca Jesusan, a usoquin unin ꞌati ñuiquin, ënë banaribi unicama ñuixuancëxa:

—Ësa ca. Achúshi unin ca aín naënu uvas ꞌapáxa. ꞌApátancëxun bëtsi uni aín naëa bërúanxunun quixun ami ëbiani ca ꞌura menu ꞌi cuanxa. 10Cuantancëxun ca uvas bimicëbëtan abëa ꞌicë an ñu mëëmicë uni achúshi xuquin caxa:

—An naë bërúancë unicamanu cuantancëxun camina ꞌënan ꞌiti a mësúa ꞌë bëxúnun mi ꞌinánun cati ꞌain. Cacëx cuanxa bëbaiabi ca a uni an naë bërúancë unicaman mëëtancëxun ñuñuma cuantëcëntanun xuaxa. 11Usoquian ꞌan ca naë ꞌibun aín ñu mëëmicë uni itsi xutëcëanxa. Xucëxa bëbaiabi ca aribi an naë bërúancë unicaman mëëquin bëtsi bëtsi oquin masóxa. Usotancëxun ca ñuñuma cuantánun aribi xuaxa. 12Usocëbëtan ca bëtsiribi amiribishi xutëcëanxa. Xucëbi ca aribishi ꞌatimoxun, ënuaxma ca cuantan, quixun caxun xuaxa. 13Usoquian ꞌacëbëtan ca naë ꞌibun sinánxa: ¿Añu carana oti ꞌain? Cana ꞌëx amiira sináncë bacë bëchicë xuti ꞌain. A sapi ca cuania ꞌatimoquinma upí oquin biquin aín bana cuati ꞌicën. 14Usoquin sinánquin aira xucë́xa bëbaia isi ca an naë bërúancë unicamax canani quiaxa: Aín papáxa bamacëbë ca aín bëchicë ënëx naë ꞌibu ꞌiti ꞌicën. Usa ꞌain cananuna nux naë ꞌibu ꞌinuxun ënë ꞌati ꞌain. 15Canantancëxun naë ꞌuri buánxun ca ꞌaxa.

Usoquian aín bëchicë ꞌacë cara naë ꞌibun an naë bërúancë unicama uisoti ꞌicë quixun cana mitsu cain. 16Aín naënu cuanquin a unicama ꞌatancëxun ca bëtsi uni aín naëa bërúanxunun quixun cati ꞌicën.

Usai Jesús quia cuati ca an cuacë unicamax:

—Usaía ꞌinun cuëëanxma ꞌitibi ca Nucën Papa Dios ꞌiti ꞌicë —quiax quiacëxa.

17Quia ca Jesusan atumi bësuquin isquin cacëxa:

—¿Usai ꞌitima ꞌain cara uisai quicë ënë cuënëo bana ꞌic?, ësai quicë:

An maxax xubuacë unían biquinma racáncë ꞌaíshbi ca a maxax bërí amia xubu cushicë ꞌicën, itá upímia xubu cushicë usaribiti.

18A maxáxa an cuëëncëma unicama usaribi ca an ꞌë cuëëncëma uni ꞌicën. Maxáxmi tatiqui chacáquin ca maxáxmi rëracaquin aín namicama chacaia. ꞌImainun ca manánuax nipacëquin maxaxan uni chacaquin chëcaia.

Unían César curíqui ꞌinánuxun sinan

(Mt 21.45-46; 22.15-22; Mr 12.12-17)

19An naë bërúancë unicama ñuicëbë ca an Moisésnën cuënëo bana ꞌunáncë unicama ꞌimainun judíos sacerdotecamax atubi ñui isa quia quixun ꞌunani Jesúsmi nishacëxa. Nishquin ꞌatimonuxun biisa tanquinbi ca —ꞌitsa unin ca aín bana cuatia, usa ꞌain ca a unicamax numi nishti ꞌicë —quixun sinani atumi racuë́quin biama ꞌicën. 20Bitsíma ꞌixunbi ca Jesús bicatsi quiax ꞌësë́nantancëxun ami manánquin usai ca quiaxa quixun ꞌapu canuxuan, cëmëquin paránquin Jesús ñucátanun quixun uni raíri xuacëxa. 21Xucëx cuanxun ca Jesús cacëxa:

—Cananuna ꞌunanin, min banax ca asérabi ꞌicën, upí oquin camina unicama bana ñuixunin. Min sináncëx ca camabi uni bëtsibëtan sënën ꞌicën. Usaquin sinánquin camina camabi ñuñu ꞌimainun ñuñuma unicama ꞌimainun ꞌapuburibi uisai cara Nucën Papa Diosan uni ꞌiti ꞌicë quixun ñuixunin. 22Usa ꞌixun camina nu cati ꞌain, ¿Nucën Papa Diosax asérabi nun cushi ꞌain cara Romanu ꞌicë ꞌapu, César, a curíqui buánmiti asábi ꞌic? ¿Cara asábima ꞌic?

23Cacëxun ca Jesusan, —uisai caraisna qui quixun ꞌëmi manánuxun cuacatsi quixun ca ꞌë ñucatia —quixun ꞌunánquin ca Jesusan atu cacëxa:

—¿Uisa cupí caramina usoquin ꞌë cain? 24Uisa cara isnun ca ꞌapu buánmiti manë curíqui achúshi ꞌë bëxun. Cacëxuan bëia isquin ca Jesusan atu cacëxa:

—¿Uin bëmánan tanquin ꞌacë cara ënëx ꞌic? ¿Uin anë cara cuënëocë ënëx ꞌic?

Cacëxun ca atun cacëxa:

—Ax ca Romanu ꞌicë ꞌapu, Césarnën bëmánan tanquin ꞌacë ꞌimainun Césarnën anë ꞌicën.

25Usaquin cacëxun ca Jesusan cacëxa:

—Ami mitsun ꞌatia César cuëëncë a ñu camina ꞌati ꞌain, axa mitsun ꞌapu ꞌain. ꞌAnan camina ami mitsun ꞌatia Nucën Papa Dios cuëëncë a ñu ꞌati ꞌain, axa mitsun Papa Dios ꞌain.

26Usaía Jesús quia ca anu ꞌicë unicaman cuacëxa. Acamabëtan an a ñucácë unicamanribi cuacëx ca a ñui Jesúsmi manánti bana ꞌaíma ꞌiacëxa. —ꞌAíma ca —quixun sinánan —upitishi ca quiaxa —quixun sinánquin ca an ñucácë unicaman a ñucátëcëanma ꞌicën.

Unix cara bama ꞌaish baísquitima ꞌicë quicë bana

(Mt 22.23-33; Mr 12.18-27)

27Usacëbë ca Jesúsnu saduceo unicama cuancëxa. Saduceo unicaman ca —bama ꞌaish ca uni baísquitima ꞌicë —quixun sináncëxa. 28Usaquin sináncë ꞌaish anu cuanxun ca Jesús ñucáquin cacëxa:

—Nun ꞌunánun ca Moisésnën ësai quicë bana cuënëocëxa, uni achúshinëxa bëchicëñuma ꞌaish bamacëbëtan ca aín xucënan aín casunancë xanu bixun, ami bacë bëchiti ꞌicën. Usoquian ꞌacëx ca aín bëchicëx aín xucënan bëchicësa ꞌiti ꞌicën. 29Usa ꞌain cananuna mi ñucatin. Uni achúshinëx ca mëcën achúshi ꞌimainun achúshi ꞌanácañu ꞌiacëxa. Usa ꞌixun ca atun apan an xanu biacëxa. Biaxbi ca bacë bëchiaxmabi bamacëxa. 30Baman aín xucënan casunancë xanu biaxbi ca aín xucën axribi bacë bëchiaxmabi bamacëxa. 31Usaribiti ca a xanu biaxbi aín xucën bëtsíxribishi bamacëxa. Usa ꞌain ca xucën camáxbi a xanu biaxbi bacë bëchicëñuma ꞌinun bamacëxa. 32Acamaxa bamai cëñúan ca a xanúxribi bamacëxa. 33Camaxunbi ca a xanu biacëxa. ¿Usa ꞌain cara anun unicamax baísquiti nëtën acama uinu ꞌicë́xira aín bënë ꞌiti ꞌic?

34Cacëxun ca Jesusan cacëxa:

—Ënë menuxun ca unin xanu bitsia, bimainun ca unin aín ini bëchicë bënumia. 35Usa ꞌaínbi ca bama ꞌaish baísquitancëxun Nucën Papa Diosan nëtënu ꞌicë unicaman xanu bitima ꞌicën, aín ini bëchicëbi ca bënumitima ꞌicën. 36Bama ꞌaish baísquitancëx ca Nucën Papa Diosan bëchicë ꞌaish bamatëcëntimoi tsóti ꞌicën, ángelcamaxa ꞌicësaribiti. 37Uni bama ꞌaish ca baísquiti ꞌicë quixun nun ꞌunánun ca Moisésnën imaxu nëëmëtia iscë ñuiquin ësaquin cuënëocëxa, Nucën ꞌIbu Dios ax ca Abraham, Isaac, Jacob acaman rabicë Dios ꞌicë quixun. 38A bana cuënëo isquin cananuna ꞌunanin, Nucën Papa Dios ax ca bama ꞌaísha baísquitima unicaman Diosma ꞌicën. Ax ca camabi aín unicaman rabicë Dios a ꞌicën. An iscëx ca aín uni camáxbi tsotia.

39-40Usoquian cacëxun cuaxun ca saduceo unicaman amiribishi a ñucatëcëanma ꞌicën. Usaria isquin ca an Moisésnën cuënëo bana ꞌunáncë unicama raírinën —upí oquin camina nu ñuixuan —quixun cacëxa.

Uin rëbúnqui cara Cristo ꞌicë quixun ñuicë bana

(Mt 22.41-46; Mr 12.35-37)

41Cacëxun ca Jesusan cacëxa:

—¿Uisa ꞌaish cara uni quia, Cristo, ax ca Davitan rëbúnqui ꞌicë quiax? 42-43David anbi ca Salmos quirica ꞌaquin ësoquin cuënëocëxa:

Nucën ꞌIbu Diosan ca ꞌën ꞌIbu caxa, axa mimi nishcë unicama ꞌën mi ꞌibuamimainun camina mix ꞌëbë ꞌApu ꞌaish ꞌën mëqueu ꞌiti ꞌain.

44Usai qui ca David ax, Cristo, ax ca ꞌën ꞌIbu ꞌicë quiax quiacëxa. ¿Ësaia quiá ꞌain cara Cristo uisax Davitan rëbúnqui ꞌiti ꞌic?

An Moisésnën cuënëo bana ꞌunáncë unicama Jesusan ñuia

(Mt 23.1-36; Mr 12.38-40; Lc 11.37-54)

45Usoquin canan ca anu ꞌicë unicaman cuanun, Jesusan ësaquin aín ꞌunánmicë unicama cacëxa: 46—An usaía judíos unicama ꞌinun Moisésnën cuënëo bana ꞌunáncë unicamax ꞌicësaribiti camina ꞌitima ꞌain. Atux ca chupa chaxcë́ pañuax niti cuëëanan anuxun ñu marucë anuxuan unin, ax ca nun cushi ꞌicë, quixun sinánquin mëcën ꞌinánquin biti cuëënia. Usai ꞌianan ca anu judíos unicama timë́ti xubunu unicamabë timëti anua aín cushicamax tsóti anu tsótishi cuëënia, ꞌianan ca pi timë́xun anu aín cushicamax tsóti anu tsónuxun caisia, atusaribi ꞌicatsi quixun. 47Usai ꞌianan ca casunamëcë xanun ñu bicuanquin cëñuia. Cëñuanan ca ax isa upí ꞌicë quixuan unin sinánun quiax, ꞌuran pain Nucën Papa Diosbë banaia. Usa unicama ca Nucën Papa Diosan, axa usai ꞌicëma uni ꞌacësamaira oquin ꞌuchoquin castícanti ꞌicën.

Currently Selected:

Lucas 20: cbrPB

Highlight

Copy