Lucas 18

Casunamëcë xanu ꞌimainun juez ñuicë bana

1Aín unix ca atsani, abë cana banatisama tani quixun sinanima, nëtë camabi Nucën Papa Diosbë banati ꞌicë quixun ꞌunánmiquin ca bana itsi ñuicësoquin, 2Jesusan ësaquin aín ꞌunánmicë unicama cacëxa:

—Ënëx ca ësa ꞌicën. Achúshi ëmanu ꞌicë uni an ca amia uni itsi manáncëxunbi ꞌaquinsama tanan Nucën Papa Diosmi sináncëma ꞌianan unicamaribi sinánquin ꞌaquincëma ꞌiaxa. 3ꞌImainun ca a ëmanu ꞌicë xanu achúshi casunamëcë, an a uninu cuanquin —ꞌë ubíoxunma ꞌanun camina axa ꞌëmi nishcë uni cati ꞌai —quixun caxa. 4Usaquian cacëxunbi ca ꞌitsa nëtën cuashiquin ꞌaquincëma ꞌicën. ꞌItsa nëtën cuashitancëxun ca ësaquin sinánxa, —ꞌëx cana Nucën Papa Diosmi sináncëma ꞌianan unicamaribi sináncëma ꞌain. 5Usa ꞌixunbi cana ënë casunamëcë xanúan ꞌë ubíoxunma ꞌanun, an ꞌë cacësabi oquin ꞌaxunti ꞌain. Usaquin ꞌacëma ꞌaish cana ꞌëa ubíocëx ꞌaisamaira atsánti ꞌain.

6Usaquin catancëxun ca ësaquinribi Nucën ꞌIbu Jesusan cacëxa:

—An amia uni itsi manáncëxunbi a xanu ꞌaquinsama tancë uni a ꞌën mitsu ñuixuncë ax aín sinan upíma ꞌaíshbia quicë bana, a camina sinánti ꞌain. 7¿An usaquin ꞌacë ꞌain cara Nucën Papa Diosan axa ainan ꞌinúan an caíscë aín unicama an nëtë́nbi, imë́bi a ñucácë, acama bërúanquin ꞌaquintima ꞌic? ¿Cara ꞌaquinquinma tënánpati ꞌic? Usama ca. 8ꞌËn cana mitsu cain, ca asérabi bënë́nquinshi acama ꞌaquinti ꞌicën. ¿Usa ꞌaínbi carana uni ꞌinux Nucën Papa Diosnuax uá ꞌaish anu cuantancëx, ꞌëx utëcënquin, unicama asérabi ꞌëmi sinani ꞌëmi catamëtia isti ꞌain? Uisai cara ꞌiti ꞌicë quixun cana isti ꞌain.

Fariseo ꞌimainun an ꞌapu buánmiti curíqui bicë uni ñuicë bana

9Uni raírinëxa —nuxbi cananuna Nucën Papa Dios quicësabi oi ꞌi —quixun sinani raíri unicama timai atumi nishia ꞌunánquin ca Jesusan bana itsi ñuicësoquin ësoquin cacëxa: 10—Uni rabëtax ca Nucën Papa Diosbë banai anuxun a rabiti xubunu cuanxa. Achúshinëxa fariseo uni ꞌimainun ca bëtsix an ꞌapu buánmiti curíqui bicë uni ꞌiaxa. 11Cuanx, nitsax abë banaquin ca fariseo unin ësaquin Nucën Papa Dios caxa: Nucën Papa Dios, ꞌëx uni raírisama ꞌixun cana mi, asábi ca cain. Raírinëx ca an uni paránquin aín curíqui bicë uni ꞌimainun upí sinánñuma uni ꞌimainun aín xanuma ꞌaínbia uni itsin xanubë ꞌicë uni, usa ꞌicën. Usa unicama ꞌaisama ꞌaínbi cana ꞌëx usai ꞌima. An ꞌapu buánmiti curíqui bicë, ënë uníxribia ꞌaisama ꞌaínbi cana ꞌëx usai ꞌiman. 12ꞌËx cana camabi semana rabë́ nëtën pima samatin. ꞌËn ñu mëëquin bicë curíquia mëcën rabë́ ꞌicëbi cana acama mësú, décima parte, a anuxun Nucën Papa Dios rabiti xubunu buánquin, sacerdote ꞌinanin. 13Fariseo uníxa usai quimainun ca an ꞌapu buánmiti curíqui bicë unin, ꞌuri niracëti manámi bësuima meuishi bësui, masá nuituquin aín nuitu mëëi abë banaquin, —Nucën Papa Dios, ꞌëx ꞌuchañu ꞌicë camina ꞌë nuibaquin ꞌën ꞌuchacama ꞌë tërë́nxunti ꞌai —quixun caxa. 14Usa ꞌain cana mitsu cain, fariseo unima, bëtsi uni a usaquin cacëxun aín ꞌuchacama tërë́ncë, ax ca aín xubunu cuani Nucën Papa Diosan iscëx upí ꞌiaxa. Usaribiquin ca an rabíquin —ꞌëx cana bëtsi unibëtan sënë́nma ꞌai —quixun sináncë uni a Nucën Papa Diosan aín uni raíribëtan sënë́nmara ꞌimiti ꞌicën. ꞌImainun ca axa rabícëma uni a cuni Nucën Papa Diosan cha ꞌimiti ꞌicën.

Tuácama Jesusan Nucën Papa Dios ñuixuan

(Mt 19.13-15; Mr 10.13-16)

15Usa ꞌain ca ainsa sinánxunquin ramënun quixun tuáratsucama Jesúsnu bëcancëxa. Bëia isquin ca Jesusan ꞌunánmicë unicaman an bëcëcama ñu caquin, —tuá xuracama ënu bëxunma ca buántan —quixun cacëxa. 16Caiabi ca Jesusan cacëxa:

—Cuantánun caxunma ca tuá xuracama ꞌënua unun ën. ꞌËmi catamëtia Nucën Papa Diosan ainan ꞌimicë unicamax ca ënë tuá xuracamasaribi ꞌicën. 17Asérabi cana ꞌën mitsu cain, uix cara tuá xuratsua an a bërúancë unimi catamëcësa usaribiti ꞌëmi catamëcëma ꞌicë ax ca Nucën Papa Diosnan ꞌitima ꞌicën.

Ñuñuira bëná uníxa Jesúsbë bana

(Mt 19.16-30; Mr 10.17-31)

18Aín cushi uni achúshinën ca Jesús ësoquin cacëxa:

—Mix camina asérabi upí uni ꞌain. Usa ꞌixun camina ꞌë ñuixunti ꞌain, ¿ꞌëx nëtë́timoi Nucën Papa Diosan nëtënu abë ꞌinuxun carana añu ꞌati ꞌai? quixun.

19Ñucácëxun ca Jesusan cacëxa:

—¿Uisati caramina ꞌëx isana upí ꞌai quixun ꞌë cain? Uinu ꞌicë uníxbi ca upíma ꞌicën. Nucën Papa Diosaxëshi ca asérabi upí ꞌicën. 20Uisai cara aín bana cuënëo quia quixun camina ꞌunanin. Ca quia: “Uni itsin xanubë camina ꞌitima ꞌain. Uni camina ꞌatima ꞌain. Uni itsin ñu camina mëcamatima ꞌain. Camina bëtsi unimi cëmëi manántima ꞌain. Min papa, min titan bana camina upí oquin cuaquin tanti ꞌain”.

21Usaquian cacëxun ca aín cushi unin cacëxa:

—Chamaratsu ꞌaíshbi minmi ꞌë cacë banacama quicësabi oi ꞌiá ꞌaish cana usabii ꞌin.

22Cacëxun cuaquin ca Jesusan cacëxa:

—Usari camina ꞌin. ꞌIxunbi camina achúshi ñuishi ꞌacëma ꞌain. Cuanxun camina min ñucama maruquin curíqui bixun ñuñuma unicama ꞌinánti ꞌain. Usotancëx camina ñuñushi ꞌiti sinanima ꞌëmi sinani ꞌëbë cuani uti ꞌain. Usaquin ꞌatancëx camina Nucën Papa Diosan nëtënu ꞌianan usaquin ꞌacë cupí anuax cuëëinra cuëënti ꞌain.

23Usaquian Jesusan cacëxun cuati ca aín ñua ꞌitsaira ꞌain, a uni masá nuituti utë́nbuacëxa. 24Utë́nbutia isquin ca Jesusan cacëxa:

—ꞌAisamaira ñuñu unix ca ainan ꞌiti ꞌaíshbi ñuñu ꞌitishi sinani Nucën Papa Diosnan ꞌitima ꞌicën. 25Camello, ax ca chaira ꞌaish, xumuxan quini chamaratsu ꞌain, anun atsínquiantima ꞌicën. A ñuina chaxa a quinin atsíncasmacësamaira oi ca ꞌaisamaira ñuñu unix Nucën Papa Diosnan ꞌitima ꞌicën.

26Usai quia cuaquin ca anu ꞌicë unicaman cacëxa:

—Asérabi a bana ꞌain ca ui uníxbi Nucën Papa Diosnan ꞌinux ië́tima ꞌicën.

27Cacëxun ca Jesusan cacëxa:

—Axbi ië́tisama ꞌicëbi ca Nucën Papa Diosan usa uniribi ië́miti ꞌicën.

28Usaquian atu cacëxun ca Pedronën Jesús cacëxa:

—Nun xubucama ꞌimainun nun ñu camabi cananuna mibë ninuxun ëan.

29Cacëxun ca Jesusan aín ꞌunánmicë unicama cacëxa:

—Asérabi cana ꞌën mitsu cain, uinu ꞌicë unin cara camabi uníxa ꞌëmi catamëti Nucën Papa Diosnan ꞌinun ꞌaquinuxun, aín xubu, aín xucë́antu, aín papa, aín tita, aín xanu, aín bëchicëcama ëbianxa, 30a unix ca a ëncë ñuñu ꞌicësamaira oi ñuñu ꞌiti ꞌicën. Usai ꞌianan ca Nucën Papa Diosan nëtënu ꞌaish abë nëtë́timoi ꞌiti ꞌicën.

Jesusan —ꞌëx cana unían ꞌacëx bamati ꞌai —quixun aín unicama catëcëan

(Mt 20.17-19; Mr 10.32-34)

31Bain cuanquin ca ꞌitsa uni anu ꞌaínbi Jesusan aín ꞌunánmicë unicama abëa ninun quixun cuënbianquin cacëxa:

—Bërí cananuna Jerusalénu cuanin. Cuanx bëbaxnu anu ꞌain ca an Nucën Papa Dios quicë bana uni ñuixuncë unían ꞌë ñui quiásabi oi ꞌiti ꞌicën. 32Judíos unibunën ca judíosma unibunëan binun ꞌë ꞌinánti ꞌicën. ꞌInáncëxun bixun ca ꞌëmi cuaiquin bëtsi bëtsi onan ꞌë tushucati ꞌicën. 33Usoquin bëtsi bëtsi oquin mëëtancëxuan ꞌacëx cana bamatancëx rabë́ nëtë ꞌiónxa pëcaracëbë baísquiti ꞌain.

34Jesusan usaquin cacëxunbi ca aín ꞌunánmicë unicaman uisai cara quia quixun cuama ꞌicën. Uisai qui cara usai quia quixunbi ca ꞌunánma ꞌicën.

Jericónuxuan Jesusan bëxuñu uni bëpë́xcüa

(Mt 20.29-34; Mr 10.46-52)

35Cuanía Jericó ëma ꞌurama ꞌain ca bëxuñu uni achúshi bai amo anuxun uni curíqui ñucátinu tsoócëxa. 36Tsóxunbi ca ꞌaisamaira unían ratábiancëxun cuaquin —¿añu ñu cat? ¿Uisai caina ꞌicanin? —quixun unicama ñucácëxa. 37Ñucácëxun ca cacancëxa:

—Nazaretnu ꞌicë uni, Jesús, ax ca uaxa, a cënë cuania.

38Usai quia cuati cuëníshquin ca cacëxa:

—Jesús, Davitan rëbúnqui, nuibaquin ca ꞌë ꞌaquin.

39Usaía quia oquin ca ax paían rëcuë́nquiani cuancë unicaman banaxma isa nëtë́nun quixun cacëxa. Cacëxbi ca nëtëtima axa ꞌicësamaira oi munuma cuëníshtëcëni quiacëxa:

—Davitan rëbúnqui, nuibaquin ca ꞌë ꞌaquin.

40Usaía quia cuati niracëquin ca Jesusan —ꞌënua unun ca bët —quixun anu ꞌicë unicama cacëxa. Cacëx aia ca Jesusan ñucáquin cacëxa: 41—¿ꞌËn mi uisoti caina cuëënin?

Cacëxun ca cacëxa:

—Isnunmi ꞌë bëpë́xcuti cana cuëënin.

42Cacëxun ca Jesusan cacëxa:

—Ca bëpë́quit. ꞌËn mi bëpë́xcuti sinani ꞌëmi catamëti camina bëpë́xcüan.

43Usaquian cacëxëshi ca bëpë́xcüacëxa. Bëpë́xcucëxun isi cuëënquiani ca Nucën Papa Dios rabibiani Jesúsbë cuancëxa. Jesusan a uni bëpë́xcutia isquin ca anu ꞌicë unicamanribi Nucën Papa Dios rabiacëxa.

Currently Selected:

Lucas 18: cbrPB

Highlight

Copy