Juan 11
11
Lázaro bama
1Betania ëmanu ꞌicë uni Lázaro cacë, ax ca ꞌinsínñu ꞌiacëxa. Aín chirabacë rabëtax ca Marta ꞌimainun María ꞌiacëxa. 2María ax ca an Nucën ꞌIbu Jesús aín taë ꞌiníntisa ron chabóxun aín bun tatërë́ncë, a ꞌiacëxa. 3Usa ꞌixun ca aín chirabacë rabëtan —axa mibë nuibanancë uni ca ꞌinsíanxa —quixuan Jesús catánun uni xuacëxa. 4Xucëx cuanxuan unin cacëx ca Jesús quiacëxa:
—Ca ꞌinsíanxa ꞌaíshbi ca bamatima ꞌicën. Unían uisaira cara Nucën Papa Diosan cushi ꞌicë quixun ꞌunánan, uisaira cara aín Bëchicënën cushiribi ꞌicë quixun ꞌunánun ca a uni ꞌinsíanxa.
5-6Usa ꞌain ca —Lázaro ca ꞌinsíanxa —quixun ñuia cuaxbi Jesús, ax Marta, María, Lázaro acama nuibacë ꞌaíshbi, anua unin usaquin cacë ëma, anu rabë́ nëtën pain ꞌiacëxa. 7Rabë́ nëtë ꞌicëbëtan ca Jesusan aín ꞌunánmicë unicama cacëxa:
—Amiribishi Judea nëtënu cuanun ca cuan.
8Cacëxun ca aín ꞌunánmicë unicaman cacëxa:
—¿Anu ꞌicë judíos unicamaxa maxaxan mi ꞌacatsi quiax ꞌësë́naënxanbi caina amiribishi Judea nëtënu cuantëcëncatsi quin?
9Quixuan cacëxun ca Jesusan cacëxa:
—Achushi nëtëx ca doce horas ꞌicën, ¿usa cat? Barían pëcarupuncëbë xabá ꞌain ca unin upí oquin isquin chacáquinma upí oquin ñu mëëia. 10An pëcacëa ꞌaíma ꞌain ca imë́ nitsi chacánan unin ñu mëëima. Usaribiquin cana ꞌëx anun bamati nëtëma pan ꞌain ñu ꞌati ꞌain.
11Usaquin caquin ca Jesusan amiribishi aín ꞌunánmicë unicama cacëxa:
—Nuxnu abë nuibanancë Lázaro ca ꞌuxaxa. A bësuni cana cuanin.
12-13Asérabi ca Lázaro bamaxa quixun ꞌunánquinbi ca —ca ꞌuxaxa —quixun cacëxa. Usaquian Jesusan cacëx ca atux, asérabi ꞌuxcë ñuisa quia quixun sinani, quiacëxa:
—ꞌUxcë ꞌaish ca pëxcúti ꞌicën.
14Usai quia ca Jesusan atúan upí oquin ꞌunánun cacëxa:
—Lázaro ca bamaxa, ca ꞌaíma ꞌicën. 15Mitsúnmi ꞌën cushi isti cupí cana ꞌëx anuma ꞌian. Usa ꞌain cana anu ꞌëx ꞌicëma cupí cuëënin. Bërí anu cuanun ca cuan.
16Cacëxun ca rabë́ bacë́an ꞌicë Gemelo caquin anëcë, Tomás, an Jesusan ꞌunánmicë uni raíri cacëxa:
—Nuxribi abë bamai cuanun ca cuan.
Jesús ax, anun baísquianan anun Nucën Papa Diosbë uni ꞌiti bana
17Usai quiquiani cuani bëbaquinshi ca Jesusan, matá tëmú naëcënu mëníoëxancë ꞌaish Lázaro rabë́ ꞌimainun rabë́ nëtë ꞌicë ocëxa. 18Betania ax ca Jerusalénu bëbati tres kilometrosa ꞌiacëxa. 19Usa ꞌain ca judíos unicama Martacëñun María aín rarëbacë ñucë sinania, masá nuitutia isi riquianx raruai aín xubunu a rapasu bucüacëxa. 20Tsóxunbi Jesús isa aia quixun ñuia cuabiani María xubunua tsócë ëbiani cuanquin ca Martanën Jesús aia bëñaquin biacëxa. 21Biquin ca cacëxa:
—Mixmi ënu ꞌain ca ꞌën rarëbacë ñucëma ꞌitsíanxa. 22Usa ꞌaínbi cana añu caramina ñucati a ca Nucën Papa Diosan mi ꞌaxunti ꞌicë quixun ꞌunanin.
23Cacëxun ca Jesusan cacëxa:
—Min rarëbacë ca baísquiti ꞌicën.
24Usaquian cacëxun ca Martanën cacëxa:
—Ënë nëtë cëñúcëbë anun bama unicama baísquiti nëtën ca baísquiti ꞌicë quixun cana ꞌunanin.
25Cacëxun ca Jesusan cacëxa:
—ꞌËx cana an uni baísquimiti a ꞌain, ꞌianan cana anúan uni ainan ꞌaish Nucën Papa Diosbë ꞌiti a ꞌain. Axa ꞌëmi catamëcë uni, ax ca bama ꞌaíshbi tsónux baísquiti ꞌicën. 26Axa bamacëma pain ꞌaish ënë menu tsoti, aín ꞌucha cupí bamacësa ꞌaíshbi ꞌëmi catamëcë, acamax ca xënibua ꞌaínbi nëtë́timoi Nucën Papa Diosbë ꞌiti ꞌicën, bamatancëxbi. ¿Ësai ꞌëx quicë ënë caina asérabi ca quixun sinanin?
27Usaquian cacëxun ca Martanën cacëxa:
—Mix camina Nucën Papa Diosan Bëchicë, Cristo, axa utinu nun caíncë a ꞌai quixun cana ꞌunanin.
Anu Lázaro mëníoëxancënuaxa Jesús bëunan mëscúa
28Usaquin cabiani aín xubunu cuanquin ca Martanën aín xucën María amo nitsinaxun munu cacëxa:
—Unu ca Jesús ꞌicën, ca uaxa. Mi cuanun ꞌën mi canun ca quiaxa.
29Cacëxun cuati ca María bënëtishi niruquiani Jesúsnu cuancëxa. 30Jesúsa Betania ëmanu bëbacëma pain ꞌaish, anuxun Martanën mëracë anubi pain ꞌain, ca anu María cuancëxa. 31Bënëtishi niruquiania xubunuax cuania isquin ca axa abë xubunu bucucë judíos unicaman, —sapi ca anua aín rarëbacë maíncënuax rarumati cuania —quixun sinánquin María nuibiancëxa. 32Cuancëbë anua ꞌicë anu bëbai a tanáin tsóbuquin ca Maríanën Jesús cacëxa:
—Mixmi ënu ꞌain ca ꞌën rarëbacë ñucëma ꞌitsíanxa.
33María ini rarumamainuan abë ucë judíos unicamaxribi ini rarumatia isi ca Jesús masá nuituti nitë́xëacëxa. 34Nitë́xëquin ca Jesusan anu ꞌicë unicama cacëxa:
—¿Uinu caramina aín rarëbacë mëníoëxan?
Cacëxun ca cacëxa:
—Ca isi cuan.
35Cacëx cuani ca Jesús bëunan mëscúacëxa. 36Usai ꞌia isi ca judíos unicamax canancëxa:
—An ca Lázaro nuibairaxa, ca is. Usa ꞌaish ca anun rabanan bëunan mëscutia.
37Usaía quicëbë ca uni raírinëx quiacëxa:
—¿An uni bëxuñu bëpë́xcucë uni ënën cara ñucëma ꞌaínshi uxun Lázaro ië́micë ꞌitsíanx?
Jesusan Lázaro bamacëbi baísquimia
38Usaía quicëbë nitë́xëtëcëni ca Jesús anua Lázaro mëníoëxancancë anu bëbacëxa. Anu Lázaro mëníocë ax ca matá me naëcë ꞌaish maxax cha achúshinën xëpucë ꞌiacëxa. 39Anu bëbaquin ca Jesusan atu cacëxa:
—Maxax ca racanat.
Caiabi ca bamaëxancë uni aín chirabacë Martanën cacëxa:
—Anúan ñuëxancë nëtë ca rabë́ ꞌimainun rabë́ ꞌicën. Usa ꞌain ca anëia.
40Usaquian cacëxunbi ca Jesusan Marta cacëxa:
—ꞌËn cana mi can, asë́rabi ꞌëmi catamëquin camina Nucën Papa Diosan aín cushin ñu ꞌaia isti ꞌain. ¿Usa cat?
41Cacëbëtan ca anu ꞌicë unicaman maxax racanacëxa. Racanamainun ca Jesusan manámi bësuquin Nucën Papa Dios cacëxa:
—Papan, camina ꞌën bana cuan. Usa ꞌain cana mi asábi ca quixun cain. 42ꞌËn cana ꞌunanin, min camina camabi nëtën ꞌën cacëxun cuatin. ꞌAínbi cana min camina ꞌë asérabi xuacën quixuan ënë unicaman ꞌunánun, ësaquin mi cain.
43Usaquin catancëxun ca munuma banaquin cacëxa:
—Lázaro, anuax ca chiquit.
44Usaquian cacë́xëshi ca axa bamacë uni tatanianan mëtanicë ꞌianan aín bëmánanribi chupan bërábuncë ꞌaish nirui quininuax chiquícuatsiancëxa. Chiquícuatsincëbëtan ca Jesusan abë ꞌicë unicama cacëxa:
—Cuantánun ca aín taë tubuanan aín mëcën tubuanan anun aín bëmánan rabúncë chuparibi mabit.
Jesús ꞌacatsi quixuan sináncan
(Mt 26.1-5; Mr 14.1-2; Lc 22.1-2)
45Usoquian ꞌaia isquin ca axa Maríabë cuancë judíos unicaman, Jesús ca asérabi Nucën Papa Diosnuaxa uá ꞌicë quixun sináncëxa. 46Usaía ꞌimainun ca anu cuanxun raírinën fariseo unicama —Jesusan ca uni bamacë baísquimiaxa —quixun ñuixuancëxa. 47Ñuixuncëx abë timë́xun ca sacerdotenën cushicama ꞌimainun fariseo unicaman judíos cushibunën ꞌapucama cacëxa:
—Ënë unin ca uni itsían ꞌacëma ñu ꞌitsaira ꞌaia. ¿Usa ꞌain caranuna uisa oti ꞌain? 48Nun nu an usoquin ñu ꞌaia isëshicëbëtanbi ca camabi unin ami catamëquin aín bana cuati ꞌicën. Usocëbë uxun ca Romanu ꞌicë unin anuxun nun Nucën Papa Dios rabiti xubu rurupanan nu bëtsi bëtsi oquin nun aintsicamaribi bëtsi bëtsi nëtënua cuanun tsuáquirumiti ꞌicën.
49Cacëxun ca Caifás caquin anëcë uni, ax a barin sacerdotenën cushicaman ꞌapu, an axa timë́cë unicama cacëxa:
—Mitsun camina bana sinaniman. 50Nua unin bëtsi bëtsi oquin ancëcëxnu ꞌura ꞌicë nëtëcamanu cuani tsuáquiti ca ꞌaisama ꞌicën. Usai ꞌimanu nux upitax bucuti cupía uni achúshi bamati ca asábi ꞌiti ꞌicën. Usai ca ꞌiti ꞌicë quixun camina mitsun sinaniman.
51Usai qui ca anbi sinani quiáma ꞌicën; ax a barin judíos sacerdotenën cushicaman ꞌapu ꞌixun ca Nucën Papa Diosan sinánmicëxun —judíos unicamaxa asábi ꞌinun ca Jesús bamati ꞌicë —quixun judíos ꞌapucama cacëxa. 52Judíos unicamaxëshima bëtsi bëtsi nëtënuaxa ax Nucën Papa Diosmi sináncë unicamaxribia ainan ꞌaish achúshisa ꞌinúan Jesús bamati ñuiquin ca usaquin cacëxa. 53Usaquian cacëx ca a nëtën judíos ꞌapucamax Jesús ꞌacatsi quiax ꞌësë́nancëxa.
54Usa ꞌain ca Jesús judíos unicaman istin rabanan Judeanuax anua uni ꞌicëma menu ꞌurama ꞌicë ëma Efraín cacë, anu cuancëxa. Anua ꞌain ca abë aín ꞌunánmicë unicama ꞌiacëxa.
55Pascua, anúan judíos unicaman carnero ꞌati nëtëa ꞌurama ꞌain ca axa a ꞌurama unicamax Jerusalénu cuancëxa, anuax judíos unicama ꞌicësaribiti Pascua nëtën pinux Nucën Papa Diosan aín nuitu upí isnun mëníocati. 56Cuantancëx bëbax ca Jesús bari, anuxun Nucën Papa Dios rabiti xubunu riquianx, a isímabi atúxbi ñucacánani ësai quiacëxa:
—¿Mitsun sináncëx cara Pascua nëtë ꞌain, Jesús utima ꞌic?
57Usa ꞌain ca sacerdotenën cushicamabëtan fariseocamanribi anu ꞌicë unicama —Jesús mëraquin camina nun nu binun nu cati ꞌai —quixun cacë ꞌiacëxa.
Currently Selected:
Juan 11: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.
