Génesis 26

Isaac ꞌimainun Rebeca Guerar kakë ëmanu kuan

1Usa ꞌain ka Isaac ax anu ꞌumpax ꞌikë anu tsóakëxa, ax ka anu tsókë kakë ꞌimainun an iskë kakin anëkë ꞌiakëxa, a rapasu ꞌaínbi ka Abraham anu tsótan ꞌiásaribiti a piti ꞌaíma ꞌinun ñu ꞌapákëxbi ꞌiruama ꞌikën. Usaia ꞌikëbë ka panani Isaac aín xanu Rebecabë kanankiani an ñumëmikë unikama ꞌimainun aín ñukamabi buani anua Abimélec filisteokaman ꞌapu ꞌikë Guerar kakë ëma anu kuankëxa. 2Anu ꞌikë ꞌain ami chikirakëkin ka Nukën ꞌIbu ësokin kakëxa: “Kamina Egipto menu kuantima ꞌain. Uinu karamina ꞌiti ꞌai ꞌën mi kakë anu kamina ꞌiti ꞌain, 3usa ꞌain kamina ënë menu pain tsóti ꞌain. ꞌËx kana mibë ꞌiti ꞌain ꞌimainun kana mi upíokin sinánxukin mi ꞌimainun min rëbúnki kamaribi ënë mekama ꞌinánti ꞌain. Usakin kana ꞌën min papa Abraham kásabiokin ꞌati ꞌain. 4ꞌAnan kana ꞌën min rëbúnkikamaribi naínua ꞌaisamaira ꞌispa iskësa usaribi ꞌitánun ꞌimiti ꞌain, ꞌimainun kana ënë me kamabi mi ꞌinánti ꞌain. ꞌInánan kana kamabi menu ꞌikë unikamaribi upíokin sinánxunti ꞌain, min rëbúnki kamasaribi ꞌinun, 5ësokinribi ꞌën kakëxun ka Abrahamnën ꞌën kakësokin ax kikësoibi ꞌiti banakama ꞌianan a tanti banakama ꞌën ꞌunánmikësabi okin ꞌakëxa.”

6Ësokian kakëx ka Isaac Guerar kakë ëma anu tsóti bërúakëxa, 7usai bërutankëx anu tsotia ka anu ꞌikë unikaman aín xanu Rebeca ñuikin Isaac ñukákankëxa, ñukákëxun ka aín xanu ka kixun kati sinani rakuë́kin ax ka ꞌën chirabakë ꞌikë kixun kakëxa. Rebeca upíira xanu ꞌain ka Isaacnën anu ꞌikë unikaman ꞌati sinani rakuë́kin paránti sinánxun kakëxa.

8Ësokin anu ꞌikë unikama katankëx ka anu basipain tsóti bërúakëxa. ꞌAínbi ka achúshi nëtën Abimélecnën aín xubu xëkuë chukúmanën iskëxunbi Isaacnën aín xanu Rebeca kuëënkin ꞌikútia isakëxa. 9Usakin ꞌaia istankëxun ka aín uni achúshi Isaac unun kixun katánun kamiakëxa:

—Kamikëxa ꞌaia ka ñukákëxa mibëa ꞌikë xanu ax kara min xanu ꞌik, ¿asérabi kat? Min xanu ꞌaínbi karamina, ¿ax isa min chirabakë ꞌanáka ꞌikë kiax këmëi kian?

—ꞌËn kana a kupían ënu ꞌikë unikaman ꞌë ꞌati sinánkin kana mi kan —kixun Isaacnën kakëxa.

10Kakëxunbi ka Abimélecnën kakëxa:

—¿Uisa kupín karamina nu ësokin an? ꞌËn mi iskëma ꞌain ka ënu ꞌikë uni min xanubë ꞌikë ꞌitsíanxa, usa ꞌain kamina min nu ꞌuchamikë ꞌitsían.

11Usakin katankëxun ka Abimélecnën kamabi anu ꞌikë unikama kakëxa:

—Uin kara ënë uni ꞌianan aín xanu ubioia, ax ka ꞌatima okin ꞌakë ꞌiti ꞌikën.

12Usa ꞌain ka a barin ñu ꞌapáxun Isaacnën ꞌaisamaira ꞌinuan aín bimi upíbu ꞌikë biakëxa, Nukën ꞌIbu upiokin sinánxunkëxun. 13Usa ꞌaish ka ꞌaisamaira ñuñu ꞌianan ꞌitsaira manë panshíanñu ꞌiakëxa. 14ꞌImainun ka ꞌitsaira ovejañu ꞌianan, vaca ꞌimainun an ñu mëëxunkë uniñuribi ꞌiakëxa, usa ꞌain ka ax ñuñuira ꞌain, anu ꞌikë filisteo unikama nutsi ami nishkin ꞌatima okëxa. 15Usa ꞌain ka aín papa Abrahamnën anu pain tsókë ꞌixuan an ñumëmikë unikama amia anu ꞌumpax ꞌikë kini ax Abrahamnan ꞌiakëxa; usa ꞌikëbi ka filisteo unikaman a kini men bëtaskin natakakákë ꞌiakëxa. 16Usa ꞌain ka Abimélecnën Isaac ësokin kakëxa:

—Bëríbi kamina ënuax kuanti ꞌain, mix kamina ꞌaisamaira ñuñu ënu ꞌain nuxnu mix ꞌikësai ñuñuira ꞌaímabi.

17Ësokin kakëx ka anuax chikíkiani kuanx Isaac Guerar kakë ëmanu ꞌikë me sapan anu tsóti bërúakëxa. 18Anuxun ka Isaacnën an ñumëmikë unikama anu tsókian Abrahamnën anua ꞌumpax biti amia, kinikama ꞌikëbia ax ñukëbëtan filisteo unikaman men nataka ká ꞌikëbi, aín unikamabëtan amiribishi naëtëkëankëxa, usokin ꞌatankëxun ka aín papan anëasabi okin anëtëkëankëxa.

19Achúshi nëtën ka Isaacnën ñumëmikë unikama kini achúshi me sapan anu ꞌakinbi anua ꞌumpax upíira mërakëxa. 20Usakin ꞌumpax atun pain mërakë ꞌaínbi ka filisteo unikaman ꞌarakakë ñuina an bërúankë unikama, Guerar kakë me sapan anuax ainan isa ꞌumpax ꞌikë kiax Isaacnën ñuina an bërúankë unikamabë a ꞌumpaxan rabanan mëanani abë nishanankëxa. Usaia anun rabanan mëëanankë ka Isaacnën a ꞌumpax. “Anuax mëëanankë kakin anëakëxa.” 21Usai anuax ꞌitankëxun ka Isaacnën unikaman amiribishi kini itsi anua ꞌumpax biti ꞌatëkëankëxa, usokin ꞌakëbi ka filisteo unikaman amiribishi ubiotëkënkëx ka amiribishi atubë nishanankë ka Isaacnën anuax bëtsibë “nishanax isanainsama tankë usokin anëakëxa.” 22Usaia aín unikama ꞌitëkënkëbë ka anuax Isaac ꞌura kuani chikíakëxa, usai chikíkin ka aín unikama ꞌimainun kamabi aín ñuina kamabi buani kuankëxa, kuantankëxun ka anua tsóti me anu bëbaxun achúshi kini anua ꞌumpax biti aín unikama naëmiakëxa, usa ꞌain ka anuax ꞌumpax kupín mëëananiama iskin Isaacnën anuax mëanantëkënima upitax tsoti kakin anëakëxa, usakin ꞌatankëx ka ësai kiakëxa: Bërí ka Nukën ꞌIbu ënu nu ëanxa, usa ꞌain kananuna ënë menuax nishananima ñuñuira ꞌiti ꞌain.

23Usai anu pain ꞌitankëx ka amiribishi Isaac Beerseba kakë me anu kuantëkëankëxa.

24“Anu bëbaxa ñantabukë a imë́ ami mërakin ka Nukën ꞌIbun kakëxa:

ꞌËx kana min papa Abraham aín Dios ꞌain.

Usa ꞌain kamina rakuë́tima ꞌain; ꞌëx kana mibë ꞌain.

Usa ꞌain kana ꞌën uni Abraham a kupín upíokin sinánxunkin,

min rëbúnkinëxa ꞌaisamaira ꞌuákamë ꞌëonun ꞌimiti ꞌain.”

25Ësokian kakëxun ka Isaacnën anuxun rabiti maxax maburukin ꞌatankëxun, asábi ka kakin Nukën ꞌIbu rabiakëxa. Usokin ꞌatankëx ka a menubi ꞌi bërúakëxa, bërúkin ka anu achúshi kini anua ꞌumpax biti an ñu mëëmikë unikama ꞌamiakëxa.

Isaac ꞌimainun Abimélec mënionan ñuikë bana

26Usa ꞌain ka achúshi nëtën, Abimélec Guerar kakë ëma anuax Isaacbë banai ubakëxa. Usaia ukëbë ka an ꞌunánkë unikama an bana ñuixunkë Ahuzat, ꞌimainun suntárunën kushi Ficol akamaribi abë ubakëxa. 27Usai kuanx anu bëbaia ka Isaacnën kakëxa:

—Mitsun kamina ꞌë chikiankën, usa ꞌixun kamina mitsubë ꞌiabi ꞌë min ëmanua chikían, ¿uisakatsi karamina ꞌë isi aín?

28Ësokian kakëxunbi ka atun kakëxa:

—Nun kananuna mi isan mix kamina Nukën ꞌIbu abë ꞌain, usa ꞌikë an mi ꞌakinia kananuna unan, usa ꞌain kananuna nukaman achúshi ñu mibëtan ꞌati ain. A achúshi ñu ꞌati ax ka ꞌikën: 29min kamina nukama uisabi otima ꞌain, nunribi kananuna mi uisabi okëma ꞌain. ꞌAtima okinma, kananuna nun mi upíokin nuibakin ꞌakian, ꞌimainun kananuna upíokin mixmi ꞌën menuax chikiti ꞌaia mi xuan, usa ꞌikë ka bërí Nukën ꞌIbu mi upíokin sinánxunkin ꞌakinia. 30Usakian kakëxun ka Isaacnën achúshi fiesta chaiira ꞌati sinánxun, a pitikama pain aín unikama ꞌamitankëxun kuëënkin atubëtan pianan xëakëxa. 31Usai ꞌiónx pëkarakëma ꞌaínshi nirui ka sinanatëkëntima oi atúxbi kánani kiakëxa. Usai kanantankëxun ka Isaacnën bërúanx kamina kuanti ꞌain kixun amiribishi atubë isanantëkëxuma kakëxa, kakin ka upíokin aín ꞌunánkë uni ꞌakësokin kuantanun xuakëxa.

32A nëtënbi ka an ñu mëëmikë unikama Isaac kai ubakëxa, ukin ka ꞌumpax kananuna me kini ꞌati naëkinbi anua mëran kixun kakëxa. 33Usakian mërakë ka Isaacnën anua ꞌumpax ꞌikë kini a Sebá kakin anëakëxa. Usa ꞌain ka a ëma Beerseba kakin anëkë ꞌiakëxa.

34Usa ꞌain ka Esaú an cuarenta baritiañu ꞌixun Judit biakëxa, aín xanu ꞌinun ax ka Beerí kakë hitita ꞌain bëchikë xanu ꞌiakëxa. ꞌImainun ka bëtsi xanu Basemat kakë aribi biakëxa, ax ka Elón hitita uni aín bëchikë xanu ꞌiakëxa. 35Usokian a xanu rabë́ aín tuá Esaúnën bian ka Rebeca ꞌimainun Isaac a kuëënima uisa kupín kara usakin bëtsi unibunën xanu ꞌën tuákën biaxa kiax masá nuituti nishi tsóakëxa.

Currently Selected:

Génesis 26: cbrPB

Highlight

Copy