Génesis 20

Abraham ꞌimainun ꞌapu Abimélec ñui kikë bana

1Usa ꞌain ka anu pain ꞌikë me anuax Abraham Négueb kakë me, ami kikiani kuankëxa, kuantankëx ka Guerar kakë ëma ꞌimainua Cadés kakë ëman nëbëtsiokë me aín rëbumi ꞌikë me anu kuainbëkinishi bëtsi me kamanu tsókë uni ꞌaish usai ꞌiakëxa. 2A menuax ka Abraham kiakëxa aín, xanu Sara ñui, ënë xanux ka ꞌën xanuma ꞌikën, ax ka ꞌën chirabakë ꞌikën. Kixun a rabë́xunbi sinántankëxun ka, ꞌapu Abimélec paránkëxa, usakin kakian paránkëxun ka ꞌapu Guerarnu ꞌikë, an Sara aín xanu ꞌiti bënun kixun uni xuakëxa; 3ꞌaínbi ka a imë́bi ꞌapu Abimélec namámikin, Nukën ꞌIbu Diosan kakëxa: Mix kamina bamati ꞌain, xanumi bikë ax ka bënëñu ꞌikën. 4Usakin bitankëxbi, abë ꞌikëmapan ꞌixun ka ësokin kakëxa: ꞌËn ꞌIbu, ¿min karamina añu ñu ꞌatima ꞌakëmabi ꞌë bamamiti sinanin? 5Abrahamnënbi ka ꞌë kaxa ënë xanux ka ꞌën chirabakë ꞌikë kiax ka kiaxa, ꞌimainun ka xanuxunribi ꞌë kaxa ax ka ꞌën rarëbakë ꞌikën kixun. Usakian kakëxun kana upí ꞌiisa sinánkin ꞌën bian, ꞌaínbi kana uisabi okëma ꞌain. 6Usakian kakëxun ka Nukën ꞌIbun Diosan namámikin kakëxa: ꞌËn kana upíokin ꞌunan min kamina ñu ꞌatima ꞌakëma ꞌixun uisabi okëma ꞌain. Usa ꞌain kana a ꞌaimi ꞌëmi ꞌuchanun mi ꞌamikëma ꞌain. 7ꞌAínbi kamina bërí, a xanu aín bënë ꞌinántëkënti ꞌain, ax ka an Dios kikë bana ñuixunkë ꞌikën, usa ꞌixun ka an mi ꞌë ñukáxunti ꞌikën, ñukáxunkëx kamina mix upitax tsóti ꞌain; usa ꞌain kamina bëríbi a uni aín xanu ꞌinántëkënti ꞌain, ami ꞌinankëbëma ka min xanu ꞌimainun min xubunu ꞌikë unikamaribi këñuti ꞌikën.

8Usakin koónkëxa pëkarakëma ꞌaínshi nirukin ka ꞌapu Abimélecnën an ñumëmikë unikama kuënxun ñuixuankëxa, kamabi an namákin iskëkama. Usokian ñuixunkëxun kuati ka an ñumëmikë unikama ꞌitsaira rakuë́akëxa. 9Usokin aín unikama aín namákë ñuixuntankëxun ka ꞌapu Abimélecnën Abraham kuënxun kakëxa:

—¡Ka kuat, usakin ka achúshi unin ñu ꞌatima ꞌikën! ¿Uisakin karana ꞌën mi ꞌatimon, uisa kupín karamina ꞌë chaiira ꞌuchamisa tan ꞌimainun ꞌën xubunu ꞌikë unikamaribi ꞌuchamisa tankin ꞌë parán? Usakin ka achúshi unin ñu ꞌatima ꞌikën. 10¿Uisokin kaina min ꞌëmi sinan? Ësokin ka ꞌapu Abimélecnën Abrahambë banakin kakëxa, 11ësokian kakëxun ka Abrahamnën kakëxa:

—ꞌËn kana ënë menu ꞌikë unikaman Nukën ꞌIbu Dios kikësama oi ꞌikësa sinan, usa ꞌixun ka ꞌën xanu Sara bikin ꞌë ꞌakánti ꞌikë kixun. 12Asérabi kana ꞌëx kin ax ka ꞌën chirabakë ꞌikën: ax ka ꞌën papan bëtsi xanumi bëchia ꞌikën ꞌën titami ꞌakima; usa ꞌikë kana ꞌën xanu ꞌiti biakën. 13Usa ꞌain ka Nukën ꞌIbu Diosan ꞌë kakëxa kamina min aintsikamanuax chikiti ꞌain, kakëx chikíkin kana ꞌën uinu ꞌikë ëmanu karanuna bëbai, anuax kamina mix unin ñukákëx, ax ka ꞌën rarëbakë apan ꞌikën kiax kiti ꞌain kixun kakën.

14Usokian Abrahamnën kakëxun ka ꞌapu Abimélecnën aín xanu Sara Abraham ꞌinántëkëankëxa. ꞌInánkin ka aín ꞌarakakë ñuina ovejakama, vaca ꞌimainun an ñu mëëxunti uni ꞌimainun xanu an ñu ꞌaxúnti akamabi ꞌinánkëxa, 15ꞌinánkin ka kakëxa:

—Kamina isti ꞌain, ënëx ka ꞌën me ꞌikën; usa ꞌain kamina uinu kaina ꞌisatanin me baritankëx anu tsóti ꞌain. 16Usokin katankëxun ka aín xanu Sararibi kakëxa:

—ꞌËn kana min rarëbakë apan ꞌinainshia mil kuríki, usa ꞌain ka mibë ꞌikë unikaman ꞌunánti ꞌikën min kamina añu ñu ꞌaisamabi ꞌakëma ꞌain. Usa ꞌain ka uíxbi ꞌatimati mimi banatima ꞌikën. 17Usokian kakëxun ka Abrahamnën Nukën ꞌIbu Dios ñukáxuankëxa, ñukáxunkëxun ka Nukën ꞌIbu Diosan Abimélec aín xanukëñunbi pëxkuakëxa. Usokin ꞌanan ka an ñu ꞌaxunkë xanukamaribi tuánun ꞌimiakëxa, 18Nukën ꞌIbun ka Sara kupí, kamabi xanukama ꞌapu Abimélec aín xubunu ꞌikë kamaxa tuáñuma ꞌinun ꞌimiakëxa Sara aín xubunu buánkë kupí ka usakin Nukën ꞌIbu Diosan ꞌakëxa.

Currently Selected:

Génesis 20: cbrPB

Highlight

Copy