Malɨkɔ 16

Yeso ʉjʉkana akʉ ingyo

(Mat 28:1-8; Luk 24:1-12; Yʉa 20:1-10)

1Iya ɓisi ɓʉ humuo ngiɓa ɓʉ Ɓayuda ɓa꞉ɓaa nayɔ, ɔɔ Malɨa Magadala, nʉ Salɔmɛ nʉ Malɨa inye ʉ Yakɔbɔ, ɓambʉkʉa malazi ɓɔ ɓatioko nawɔ ndʉtʉ yɨ Yeso. 2Tʉkʉ kʉɓa ɓʉ kpi akʉ ɓisi ɓʉ bɛlɛsɛ, aka ɨpá yaakyɨa‑ɔɔ kʉɓʉa, ɓoi ngiɓʉnanɨ ɓambʉsa akʉ ɓʉnzaʉ. 3Ɓi꞉nye kʉndɨana ati ʉndaɓʉ ɓɔ: « Anɨ tɔ atitutio ikopi ngia ya akʉ umongu wʉ ɓʉnzaʉ nambamba? » 4Ɨkyɛmɨngana, iya ɓa꞉tɨna waja, ɓambʉna ikopi yɛɛ ɨja ngiinanɨ tiga itutue anambamba. 5Iya ɓa꞉kumunio nayɔ amati ʉ ɓʉnzaʉ, ɓambʉna mwana ʉ ɓandambʉ mʉngana ɓuwei akʉ ɨkɔndɔ yɨ guɔngɔ, ʉpɨnyeni kanzʉ ɔɔ tu. Ɓambʉkwa ʉɓa. 6Ambuɓusigio ɓɔ: « Nɔɔkwakɔmʉ ʉɓa. Na tʉkʉ kʉhata Yeso ʉ Najalɛtɛ iya ɓa꞉mʉɓakaka bɛ ekoo ʉ mʉsalaba. Ʉ꞉jʉkana akʉ ingyo jʉkananɨ, ambʉkɔmʉ tii ɓata aka. Ʉneni‑zʉ izi ngia ɓa꞉mʉnapɨa pongo‑ɔɔ. 7Ɨkyɛmɨngana, seni kʉɓɨa ɓakpataka ngiɓangɔ nʉ Pɛtɛlɔ ɓɔ, ɛyɔ akʉsa apɛɛ ninu kusiɓo anʉ Galilaya. Nabi nayɔ kʉna tiga nani kʉndʉ aka a꞉nisigio jɛnɛ‑ɔɔ. » 8Kija ɓa꞉ɓʉa bangʉ na akʉ ɓʉnzaʉ, ndʉtʉ yi꞉nye naɓɔ kʉnda ɓʉ kya kya kya, jʉ moni ngikʉnanɨ ki꞉nye naɓɔ kʉmbangɨa tʉkʉ ɨsʉkʉɓwanɨ. Ɓa꞉ɓɨakɔmʉ mombi gʉkʉ mʉngana ɨsaʉ ngiinanɨ jʉ ɓi꞉nye ɓuhueni nʉ ʉɓa.

Yeso ʉɓwanɨa Malɨa ʉ Magadala

(Mat 28:9,10; Yʉa 20:11-18)

[9Iya Yeso a꞉jʉkana nayɔ akʉ ingyo akʉ ɓisi ɓʉ bɛlɛsɛ, ambʉɓwanɨa Malɨa ʉ Magadala ngia i꞉nye umiseni mɨtʉma yɨ ɓabɨa ʉmalɨanɨka. 10Ɛyɔ ambʉsa tiga kʉɓɨakɨa ɓombi ngiɓa ɓi꞉nye kyɨa nʉ ɔɔ Yeso ɨsaʉ ngiinanɨ. Ʉna tɔ, ɛɓɔ ɓombi ngiɓʉnanɨ ɓi꞉nye tʉkʉ amati ʉ didima nʉ ndɨa. 11Ati ngia ɓa꞉kɔ‑ɔɔ ɓɔ Yeso a kʉkʉʉ, nʉ ɓɔ ɛyɔ ʉ꞉mʉna nʉ mesu, chʉkɔmʉ ɓambʉbaya moni ngikʉnanɨ gʉkʉ ɗɛkɛkɛ.

Yeso ʉɓwanɨa ɓakpataka ɓapɨnɨ

(Luk 24:13-35)

12Mbise ɔngɔ, Yeso ambʉɓwanɨa tiga ɓakpataka ɓapɨnɨ nɨngbaa yɛɛ sɛ akʉ ɨkʉmbʉ yɨ ndei. Ɛyɔ i꞉nye tiga kʉnyɨa ndʉ mombi nga nanɨ kʉ di. 13Ɛɓɔ ɓakpataka ngiɓʉnanɨ, ɓambʉka ɓata kʉ kʉɓɨa ɓangɛ ɨsaʉ ngiinanɨ. Ɨkyɛmɨngana, chʉkɔmʉ ɓambʉɓʉbaya kʉ ɓwanɨ.

Yeso ʉɓwanɨa ɓakpataka kumi nʉ mʉngana

(Mat 28:16-20; Luk 24:36-49; Yʉa 20:19-23; Kya 1:6-8)

14Ambʉsa kʉɓwanɨa tiga ɓakpataka kumi nʉ mʉngana ɓinyeni kʉdyakaka. Ambʉɓʉgʉmʉa ɓɔ jʉtanɨ ɓʉya baya, nʉ jʉtanɨ ɓa tʉkʉ nʉ 'ʉtʉ wɔɔ ɓʉmʉ nguʉndaɓʉ. Jʉ ɓa꞉bayakɔmʉ moni kʉ ɓombi ngiɓa ɓa꞉mʉna nʉ mesu mbise ʉ jʉkana akʉ ingyo. 15Ambuɓusigio tiga ɓɔ: « Seni akʉ ɨtaka kʉ iɓomu, nambʉɓɨakɨa ɓombi kʉ ɓuɓomu Ɨsaʉ yɛɛ Iɗo. 16Mombi ngia a꞊baya, ɓambumuɓatiso, a꞊nyɨa nʉ ɓʉhɨa. Ɨkyɛmɨngana, mombi ngia ambʉkʉbaya a꞊kumunio akʉ 'ʉkɔmbɔ. 17Mombi ngia a꞊nabaya ɛmɛ, a꞊mbɨanɨa 'upi akʉ ɓakɔkɔ kʉ di di di ngiɓa aɓio kʉkyɨa engo akʉ ino ngiɨsɛmɛ. A꞊iso mɨtʉma yɨ ɓabɨa, a꞊yaka maɗaɗa nga kɔmɔ kʉ ɨtakɨ‑takɨ. 18Abana uɓoteni zɨɨ nʉ ɨkɔndɔ, yɛmɔ ɓɔ ʉmwa sʉmʉ, iinanɨ kʉ iɓomu ya꞊mbʉkʉmʉkyɨa ɨkyɛmɛ gʉkʉ ɗɛkɛkɛ. Ʉ꞊napɨeni lɨkɔndɔ ekoo ʉ ɓombi ɓʉ ɓakwisikiso, ɓa꞊hɨa tʉkʉ hɨaa. »

Yeso uzununio kʉsa ekoo ʉ ɓisi

(Luk 24:50-53; Kya 1:9-11)

19Iya Makʉʉɓɨɨ Yeso a꞉pipo naɓɔ kusigio moni ngikʉnanɨ, ambuzununio ekoo ʉ ɓisi, ambʉsa kuwulo akʉ ɨkɔndɔ yɨ guɔngɔ ngia yɨ Asʉɓɨɨ. 20Ɓakpataka ɓambʉsa kʉɓɨakɨa Ɨsaʉ yɛɛ Iɗo ngiinanɨ mʉa kʉ 'uɓomu. Makʉʉɓɨɨ ambʉɓʉsalɨa amati ʉ kuu ngiindaɓʉ, ambunzo mapanʉ ngikʉndaɓʉ angu ɨngbaa kʉkyɨa ɓakɔkɔ kʉ di di di.]

Currently Selected:

Malɨkɔ 16: BudKoya

Highlight

Copy