Yʉanɨ 20

Yeso ʉjʉkana akʉ ingyo

(Mat 28:1-8; Mak 16:1-8; Luk 24:1-2)

1Akʉ ɓisi ɓʉ 'ʉkpanganɨa ɓʉ bɛlɛsɛ tʉkʉ akʉ igbandindi, umomo zʉ kʉ akɛsɨ, Malɨa Magadala ambʉka akʉ ɓʉnzaʉ. Ambʉna ikopi yɛɛ ɨja ngia ɓa꞉kuto nayɔ umongu wʉ ɓʉnzaʉ yi꞉nyeni tiga itite anambamba. 2Ambʉsa bangʉ akʉ ɔɔ Simoni Pɛtɛlɔ ɨzɔ nʉ 'ʉkpataka nga wɔmɔ uwa Yeso i꞉nye mʉkʉnda ɓʉkaɨ ɓi꞉nye‑ɛɛ, ambumusigio ɓɔ: « Ɓi꞉so Makʉʉɓɨɨ akʉ ɓʉnzaʉ isoo, kambʉkɔmʉ kʉmbɨa ɓɔ ɓʉ꞉mʉnapɨa gbanɨ. »

3Ɔɔ Pɛtɛlɔ ɨzɔ nʉ 'ʉkpataka nguʉnanɨ wɔmɔ ɓambʉsa akʉ ɓʉnzaʉ. 4Ɛɓɔ ɓapɨnɨ kʉ ɓuɓomu ɓa꞉sa tʉkʉ bangʉ, ɨkyɛmɨngana 'ʉkpataka nguʉnanɨ wɔmɔ wi꞉nye kʉgʉa bangʉ ɓʉmʉ kʉɓaa Pɛtɛlɔ, ɛyɔ ambʉɓʉya akʉ ɓʉnzaʉ pɛɛ. 5Iya a꞉tʉkʉma kunono amati ʉ ɓʉnzaʉ, ambʉna magba kʉ lɨpʉkʉ lɔɔ lɨta lɨta lɨnzɨɛ akɛsɨ, ɨkyɛmɨngana chʉkɔmʉ ambukumunio amati ɔngɔ. 6Kija, Simoni Pɛtɛlɔ a꞉ɓʉya tiga mbise angɔ, ambukumunio amati ʉ ɓʉnzaʉ, ambʉna magba kʉ lɨpʉkʉ ngilʉnanɨ ligbiche akɛsɨ. 7Ambʉna wagba wʉ ɨpʉkʉ ngua ɓa꞉sanga nawɔ Yeso 'ʉtʉ kʉ naa. Wagba wʉ ɨpʉkʉ nguʉnanɨ wambikinye ɨzɔ nʉ magba kʉ lɨpʉkʉ nga kɔmɔ, ɨkyɛmɨngana wi꞉nye uguɓoke akʉ izi nga yɛmɔ kʉ di. 8Kija 'ʉkpataka ngua wa꞉ɓʉya akʉ ɓʉnzaʉ pɛɛ, wa꞉kumunio tiga kʉ amati ɔngɔ, ambʉna, kija a꞉baya. 9Jʉ kʉndʉ wati nguʉnanɨ, ɓakpataka ɓi꞉nye ɓambʉpimisenikɔmʉ‑zʉ inyi yɨ moni ngia Mubio kʉ Asʉɓɨɨ ka꞉sigo‑ɔɔ ɓɔ ya꞉kwanana tʉkʉ ɓɔ Yeso ʉjʉkana akʉ ingyo jʉkanaa. 10Mbise ɔngɔ, ɓakpataka ɓapɨnɨ ngiɓʉnanɨ ɓambʉtʉa kʉ andaɓʉ.

Yeso ʉɓwanɨa Malɨa ʉ Magadala

(Mat 28:9-10; Mak 16:9-11)

11Ʉna tɔ, Malɨa i꞉nye yangɔ ɓʉmaɨ tʉkʉ aɓei, anambamba ʉ ɓʉnzaʉ ɛyɔ tii tʉkʉ amati ʉ ndɨa. Ati ngia i꞉nye‑ɔɔ kʉndɨa, ambʉtʉkʉma nʉ nono amati ʉ ɓʉnzaʉ. 12Ambʉna ɓamalaika ɓapɨnɨ ɓʉpɨnyɛ nʉ lɨpʉkʉ lɔɔ tu, ɓuwei akʉ izi ngia ɓi꞉nye ɓʉ꞉kwaiseni‑ɔɔ ndʉtʉ yɨ Yeso. Malaika mungono wa꞉wulo mesu akʉ 'ʉtʉ, uwa wɔmɔ wambuwulo mesu akʉ mɨtɨndɨ. 13Ɓamalaika ngiɓʉnanɨ ɓambumuɓukuo ɓɔ: « Moi ngia, wakʉndɨa ɨmanɨ? » Ambuɓutisio ɓɔ: « Makʉndɨa jʉ ɓʉ꞉ungwiso ndʉtʉ yɨ Makʉasɛmɛ, nʉ mambʉkɔmʉ kʉmbɨa ɓɔ ɓʉ꞉ɨnapɨa gbanɨ! »

14Iya a꞉sigo nayɔ ɓwanɨ, ambʉtɨna waja ambise, ambʉna tiga Yeso 'ʉmaɨ kʉ ananɨ, ɨkyɛmɨngana chʉkɔmʉ ambupimiso ɓɔ Yeso iinanɨ. 15Yeso ambumuɓukuo ɓɔ: « Inoo, wakʉndɨa ɨmanɨ? Wakʉhata anɨ? »

Malɨa i꞉nye kuyo ɓɔ mombi ʉ kuu wʉ mʉa nguʉnanɨ. Ambumusigio ɓɔ: « Tidoo‑ee, ndʉ yaɓio ɓɔ kʉ ɔwɛ wʉ꞉ungwiso ndʉtʉ ngiangɔ, naɓɨa ɓaka ɓɔ wʉ꞉ɨnapɨa gbanɨ, mʉsa nayɔ kʉchɨka. » 16Yeso ambumusigio ɓɔ: « Malɨa! » Ambʉnɨtana mesu akʉ Yeso i꞉nye‑ɛɛ, ambumusigio nʉ 'ʉɗaɗa wʉ Ɓaɨbalanɨa ɓɔ: « Laboni, » iya yakusigo ɓɔ: « Mʉpananakɨa. » 17Yeso ambumusigio ɓɔ: « Wɔɔnaɓotokɔmʉ nʉ ndʉtʉ, jʉ mambuɗitokɔmʉ ekoo ɔɔ Tidoo. Sa kʉɓɨa ɓambinoo ɓɔ: ‹ Makuɗito kʉsa ɔɔ Tidoo ngiasɛmɛ, iya akʉ Atɔ ʉndɛnʉ. Makuɗito kʉsa ɔɔ Asʉɓɨɨ ngiasɛmɛ iya akʉ Asʉɓɨɨ ngiʉndɛnʉ. › » 18Tiga nanɨ, Malɨa ʉ Magadala ambʉsa kʉɓɨa ɓakpataka ɨsaʉ ɓɔ: « Mʉ꞉na Makʉʉɓɨɨ nanɨ. » Ambʉɓʉɓɨa moni ngika a꞉mʉngakɨa.

Yeso ʉɓwanɨa ɓakpataka ngiɓangɔ

(Mat 28:16-20; Mak 16:14-18; Luk 24:36-49)

19Nɨpasɨ, kʉ isiinanɨ ɓisi ɓʉ bɛlɛsɛ, ɓakpataka ɓa꞉junikio ambɛnɨ ɓambʉdɨkpanaka mimongu tʉkʉ kʉ iɓomu ɓʉ kpɨ kpɨ kpɨ, jʉ ɓi꞉nye kukumo Ɓayuda. Kʉ nɨma ngiinanɨ, Yeso ambʉɓʉɓwanɨa ɓʉ fata, ambʉmaa akati ʉndaɓʉ ɓʉ gba, ambuɓusigio ɓɔ: « Majɨɔ kuɓio ɨzɔ ninu! » 20Iya Yeso a꞉sigo nayɔ ɓwanɨ, ambʉɓʉpana lɨtakpa lʉ lɨkɔndɔ ngilangɔ, nʉ ambamba ʉ ʉngaja nguangɔ. Kija ɓakpataka ɓa꞉kwa ɨgyagya nadɨndɨ ati ngia ɓa꞉na‑ɔɔ Makʉʉɓɨɨ. 21Yeso ambuɓusigio ɓata ɓɔ: « Majɨɔ kuɓio ɨzɔ ninu! Ngbanga kʉndʉ iya Tidoo a꞉natʉma ɛmɛ, ɛmɛ mʉnɨtʉma inu kʉ ɓwanɨ. » 22Iya a꞉pipo naɓɔ kusigio moni ngikʉnanɨ, ambuɓuhuo nʉ ʉhʉ, ambuɓusigio ɓɔ: « Nyɨeni nʉ 'Ʉtʉma wɔɔ Tu. 23Mombi kʉ uɓomu ngia na꞊mʉpɨa ɓʉɓɨɓɨ, Asʉɓɨɨ a꞊mʉpɨa kʉ pɨaa. Nʉ mombi kʉ uɓomu ngia nambʉkʉmʉpɨa ɓʉɓɨɓɨ, Asʉɓɨɨ ambʉkʉmʉpɨa kʉ ɓwanɨ. »

Yeso ʉɓwanɨa Tʉma

24Ʉna tɔ, Tʉma ngia ɓi꞉nye musoko ɓɔ « Ipiyó » i꞉nye mʉngana ʉ ɓakpataka kumi nʉ ɓapɨnɨ. Ɛyɔ ambikinye izi mɨngana nʉ ɓangɛ ati ngia Yeso a꞉ɓʉɓwanɨa‑ɔɔ. 25Ɓakpataka nga ɓɔmɔ ɓambʉmʉɓɨa ɓɔ: « Isu kʉna Makʉʉɓɨɨ nanɨ. » Tʉma ambuɓusigio aka ɓɔ: « Mʉnenikɔmʉ tʉkʉ lipokoi akʉ lɨtakpa lʉ lɨkɔndɔ ngilangɔ aka ɓa꞉mʉɓakaka‑ɔɔ nʉ misumani, nʉ mʉnapɨenikɔmʉ tʉkʉ kpɛngbɛ ngiasɛmɛ ekoo ipokoi akʉ ɓa꞉ɓaka‑ɔɔ misumani, nʉ kuɓoto ʉngaja nguangɔ, mambʉkʉbaya gʉkʉ ɗɛkɛkɛ. » 26Mbise ʉ bɛlɛsɛ mʉngana, ɓakpataka ngiɓʉ Yeso ɓambʉmʉmanakɨa ɓata kʉ izi mɨngana ambɛnɨ. Tʉma i꞉nye kʉ ɨzɔ naɓɔ. Mimongu kʉ iɓomu yi꞉nye ɨdɨkpakɛ ɓʉ kpɨ kpɨ kpɨ. Yeso ambʉɓwanɨa ɓata tʉkʉ ɓʉ fata. Gʉ ɛyɔ ɓʉ gba ati ʉndaɓʉ, ambuɓusigio ɓɔ: « Majɨɔ kuɓio ɨzɔ ninu. » 27Kija a꞉sigio Tʉma ɓɔ: « Ɨka nʉ kpɛngbɛ ngiasɔɔ. Ʉna lɨkɔndɔ ngilʉsɛmɛ. Yumo ɨkɔndɔ ngiisɔɔ wambuɓoto wagba wʉ ʉngaja nguʉsɛmɛ. Sɨa wai, ɨkyɛmɨngana na꞊baya tʉkʉ ɛmɛ. » 28Kija Tʉma a꞉musigio ɓɔ: « Makʉasɛmɛ nʉ Asʉɓɨɨ ngiasɛmɛ! » 29Yeso ambumusigio ɓɔ: « Wʉbaya tiga jʉ wʉ꞉nana nʉ mesu ɓiɛ? Ɨgyagya nʉ ɓombi ngiɓa ɓaabaya moni ɓunenikɔmʉ nʉ mesu! »

Ba꞉tɨndakɨa ɨtaɓʉ ngia akʉ moni kʉ ɨmanɨ

30Yeso ambʉkyɨa ɓata ɓakɔkɔ ɓɔɔ ɓʉmbangɛ nga ɓɔmɔ ɓaja apɛɛ ʉ ɓakpataka ngiɓangɔ, iɓa ɓa꞉tɨndakɨakɔmʉ moni kɔngɔ kʉ muɓomu amati ʉ ɨtaɓʉ ngia. 31Ɨkyɛmɨngana, ɓa꞉tɨndakɨa ɓamoni ngiɓaɓɛ tʉkʉ aka ekoo ngia ɓɔ bayeni ɓɔ Yeso a Klisito, nʉ a Mwana ʉ Asʉɓɨɨ. Nʉ mombi ngia a꞊mʉbaya a꞊nyɨa nʉ ʉɓɨɨ akʉ ino ngiangɔ.

Currently Selected:

Yʉanɨ 20: BudKoya

Highlight

Copy