Yʉanɨ 13
13
Yeso ʉjaɓa ɓakpataka ngiɓangɔ mɨtɨndɨ
1Ʉmbɔ wʉ Pasɨka wi꞉nye tiga kʉ tinene. Yeso i꞉nye tiga kʉmbɨa ɓɔ wati nguangɔ kʉʉngwa akʉ ɨtaka kʉtʉa ɔɔ Ɨsɛ wʉndana tiga ndanaa. Yeso i꞉nye nʉ ɓʉkʉnda nʉ ɓaandɔngɔ iɓa ɓi꞉nye akʉ ɨtaka, ambʉsanaka nʉ ɓʉkʉnda ngiɓʉnanɨ kʉɓʉya tʉkʉ akʉ 'upipio. 2Ati ngia ɔɔ Yeso nʉ ɓakpataka ngiɓangɔ ɓi꞉nye tiga‑ɔɔ kʉdyakaka nɨpasɨ, Abɨa i꞉nye upitikieni Yuda mwana ʉ Simoni Ɨsɨkalɨɔta ɓɔ ʉgaba Yeso. 3Yeso i꞉nye kʉmbɨa ɓɔ Ɨsɛ Asʉɓɨɨ i꞉nye ʉnapɨeni moni kʉ muɓomu ɛsɨ ʉ ʉpanʉ nguangɔ. Nʉ i꞉nye kʉmbɨa kʉ ɓɔ, ɛyɔ a꞉ʉngwa ɔɔ Asʉɓɨɨ nʉ a꞊tʉa kʉ ɔɔ Asʉɓɨɨ, 4Yeso ambʉmáa na akʉ ɓi꞉nye‑ɔɔ kʉdyakaka, ambiso ɨpʉkʉ ngiangɔ yɨ ɨkʉʉ, ambʉsanga wagba wʉ ɨpʉkʉ akʉ ɨɓʉnɨ. 5Mbise ɔngɔ, ambuto mepo amati ʉ mwanʉ basini, ambufaniso jaɓa ɓakpataka ngiɓangɔ mɨtɨndɨ. Iya a꞉ɓʉjaɓa ɓʉ gba, ambʉɓʉbɨaka nʉ wagba wʉ ɨpʉkʉ ngua a꞉ʉsanga akʉ ɨɓʉnɨ.
6Ati ngia i꞉nye tiga‑ɔɔ kʉkʉnda kʉjaɓa Simoni Pɛtɛlɔ, kija Pɛtɛlɔ a꞉musigio ɓɔ: « Makʉʉɓɨɨ, ajʉ tii tʉkʉ ɔwɛ kʉ wa꞊najaɓa ɛmɛ mɨtɨndɨ ɓiɛ? » 7Yeso ambumutisio ɓɔ: « Ɨtakɨ‑takɨ ngiakɛ wambʉkɔmʉ kupimiso ɨkyɛmɛ ngia makʉkyɨa engo, ɨkyɛmɨngana mbise wa꞊ipimiso pimisoo. » 8Kija Pɛtɛlɔ a꞉mʉɓɨa ɓɔ: « Gʉkʉ ɗɛkɛkɛ! Wambʉkʉnajaɓa ɛmɛ mɨtɨndɨ kpa! »
Yeso ambumutisio ɓɔ: « Ndʉ mambʉkʉnajaɓa mɨtɨndɨ, ambʉ kambʉkɔmʉ nɔwɛ akʉ ɓayo. »
9Simoni Pɛtɛlɔ ambumusigio ɓata ɓɔ: « Ndʉ yaɓio tɔ ɓwanɨ Makʉʉɓɨɨ, wɔɔnajaɓakɔmʉ tʉkʉ mɨtɨndɨ, ɨkyɛmɨngana najaɓa lɨkɔndɔ nʉ 'ʉtʉ kʉtaa. »
10Yeso ambumusigio ɓɔ: « Mombi ngia aakyɨa ʉ꞉jaɓaneni ndʉtʉ, a tii tʉkʉ 'ʉjaɓanakɨɛ, yakʉnɨta ʉjaɓana tii tʉkʉ mɨtɨndɨ. Inu na tiga ɓʉjaɓanakɨɛ, ɨkyɛmɨngana chʉkɔmʉ inu kʉ ɓuɓomu. » 11Yeso i꞉nye ʉmbɨeni mombi ngia i꞉nye kʉsa nayɔ kʉgaba mbɨaa, iikwa a꞉sigo‑ɔɔ ɓɔ: « Inu kʉ ɓuɓomu nambʉkɔmʉ ɓʉjaɓanakɨɛ. »
12Iya Yeso a꞉pipo naɓɔ kʉjaɓa mɨtɨndɨ ɓʉ gba, ambʉpɨnya ɓata ɨpʉkʉ ngiangɔ yɨ ɨkʉʉ, ambuwulo ɨsɨ kʉtɔ kʉdyakaka. Kija a꞉ɓuɓukuo ɓɔ: « Ajʉ nu꞉pimiso‑zʉ moni ngika mʉ꞉nɨkyɨa akɛ kʉ pimisoni ɓiɛ? 13Ya tʉkʉ kingono inu nɛmɛ kusoko ɓɔ: ‹ Mʉpananakɨa › nʉ ɓɔ ‹ Makʉʉɓɨɨ › jʉ ɛmɛ ma tʉkʉ ndʉ ananɨ. 14Ndʉ ɛmɛ Makʉʉɓɨɨ nʉ Mʉpananakɨa wʉndɛnʉ, mʉ꞉nɨjaɓa mɨtɨndɨ, kʉ ɓwanɨ, yɨtanɨa ɓɔ inu ɓieni kʉjaɓana mɨtɨndɨ ati ʉndɛnʉ ngbanga kʉ ɓwanɨ. 15Ɛmɛ mʉ꞉nɨpana tʉkʉ isisinio, iiya ɓɔ inu kyɨeni ngbanga kʉndʉ ɛmɛ mʉ꞉nɨkyɨa inu. 16Tʉkʉ kingono maninu kusigio ɓɔ, bayo ambakakyɨa nʉ ʉpanʉ ekoo ʉ makʉangɔ, gʉ ɓɔ titima kuɓio nʉ ʉpanʉ ekoo mombi ngia ʉ꞉mʉtʉma. 17Ɨtakɨ‑takɨ ngiakɛ nupimiso tiga inyi yɨ moni ngikakɛ pimisoo. Ɨgyagya ninu ndʉ na꞊kʉkyananakɨa tʉkʉ ndʉ ananɨ.
18Moni ngika mʉyaka akɛ kambʉkɔmʉ akʉ inu kʉ ɓuɓomu. Ɛmɛ makʉmbɨa ɓombi ngiɓa ma꞉ɓʉchwa. Ɨkyɛmɨngana, yɨkwanana ɓɔ wagba wʉ Mubio nguawɛ wʉkyananakɨa kusigo ɓɔ: ‹ Mombi ngia akʉdyakaka ɨzɔ nɛmɛ ʉ꞉nʉnɨtanɨa nɨtanɨaa. › 19Mʉ꞉nɨngakɨa moni ngikʉnanɨ pɛɛ ngia kambʉkyananakɨakɔmʉ‑ɔɔ, aka ekoo ngia ɓɔ mbɨeni mbɨaa, ambʉ ati ngia ka꞊kyɨanɨa‑ɔɔ, bayeni kusigo ɓɔ ‹ Ɛmɛ ma kuɓioni. › 20Maninu kusigio tʉkʉ kingono ɓɔ, mombi ngia ajananɨa mombi ngia ɛmɛ manayɔ kʉtʉma, ambʉ ʉnajananɨa kʉ ɛmɛ makʉɔngɔ. Nʉ mombi ngia anajananɨa ɛmɛ, ʉjananɨa mombi ngia a꞉natʉma kʉ jananɨaa. »
Yeso ʉɓɨa ɓɔ Yuda anayɔ kʉsa kʉgaba
(Mat 26:20-25; Mak 14:17-21; Luk 22:21-23)
21Iya Yeso a꞉pipo kusigo moni ngikʉnanɨ ɓʉ gba, ambʉdya ikoko nadɨndɨ akʉ 'ʉtʉma, ambusigo ɓɔ: « Tʉkʉ kingono, mombi mʉngana ati ʉndɛnʉ a ɓisi nɛmɛ kʉgaba. » 22Ɓakpataka ɓambʉkangana mesu ati ʉndaɓʉ, chʉkɔmʉ ɓambupimiso ɓɔ Yeso a pɛpɛ‑zʉ kʉyakɨa anɨ ɓʉ kpɛ a ati ʉndaɓʉ. 23Mʉngana ʉ ɓakpataka ngiɓangɔ, iya Yeso i꞉nye mʉkʉnda nadɨndɨ, a꞉wulo kʉ anambamba angɔ ɓʉ sɛkɛ ati ngia ɓi꞉nye‑ɔɔ kʉdyakaka. 24Simoni Pɛtɛlɔ ambuɓinyo 'ʉkpataka nguʉnanɨ nʉ mesu ɓɔ u꞊ɓukuo Yeso ɓɔ akʉyaka moni ngikʉnanɨ ekoo anɨ ɓʉ kpɛ. 25Kija 'ʉkpataka nguʉnanɨ a꞉nakambanɨa Yeso akʉ ɨgʉngʉ, ambumuɓukuo ɓɔ: « Makʉʉɓɨɨ, ya‑zʉ anɨ pɛpɛ ɓʉ kpɛ? »
26Yeso ambutisio ɓɔ: « Makuno igbiti yɨ mukati amati ʉ supu. Mombi ngia ma꞊munzo igbiti yɨ mukati nguʉnanɨ ambʉ mombi ɔngɔ iinanɨ. » Kʉ ɓwanɨ, Yeso ambuno igbiti yɨ mukati amati ʉ supu, ambunzo Yuda mwana ʉ Simoni Ɨsɨkalɨɔta. 27Iya Yuda a꞉chɨka nayɛ igbiti yɨ mukati nguʉnanɨ, Sɨtanɨ ambumukumunio. Yeso ambumusigio ɓɔ: « Moni ngika wʉkwaisio kʉkyɨa engo, kʉkyɨa gagaa! » 28Mombi gʉkʉ mʉngana ati ʉ ɓombi ngiɓa ɓi꞉nye kʉdyakaka nanɨ a꞉pimisokɔmʉ jʉtanɨ Yeso a꞉musigio ɓwanɨ. 29Ɓombi nga ɓɔmɔ ɓi꞉nye kuyo ɓɔ Yeso u꞉mutitio kʉsa kʉkʉaka kumbo wʉ ʉmbɔ, gʉ ɓɔ kʉsa kunzo ɓombi ɓʉ ɓanangyɨa kumbo, jʉ kʉ ɛyɔ Yuda i꞉nye pɨmakɨa ikpoko yɨ falanga. 30Iya Yuda a꞉chɨka nayɔ igbiti yɨ mukati nguʉnanɨ, kʉ nɨma ngiinanɨ ambʉɓʉa aɓei. Ati ngiinanɨ ɓisi ɓi꞉nye tiga ɓuweni woni.
Yeso unzo ʉpanʉ wʉ ɨtakɨ‑takɨ
31Iya Yuda a꞉ɓʉa nayɔ aɓei, kija Yeso a꞉sigo ɓɔ: « Ɨtakɨ‑takɨ ngiakɛ Mwana ngia ʉ Mombi ʉchɨka ɨbɨba chɨkaa, nʉ Asʉɓɨɨ anʉ ɨbɨba kʉ 'upi akʉ ɛyɔ. 32Nʉ ndʉ Asʉɓɨɨ aɓio ʉchɨkeni ɨbɨba 'upi akʉ ɛyɔ, kʉ ɓwanɨ Asʉɓɨɨ akwanana kʉ kubibiso Mwana 'upi akʉ ɛyɔ makʉɔngɔ, nʉ a꞊mubibiso kʉ nɨma ngiinanɨ. 33Inu ɓana ɓʉsɛmɛ, makwaa ngikʉsɛmɛ kuɓio ɨzɔ ninu kutukuo tii tʉkʉ ɗɛkɛkɛ, kija na꞊faniso nɛmɛ hata. Ɛmɛ maninu kusigio kʉndʉ aka ma꞉sigio pongo‑ɔɔ Ɓayuda ɓɔ, akʉ ma‑ɛɛ kʉsa inu nambʉkʉɓʉya‑ɛɛ gʉkʉ ɗɛkɛkɛ. 34Ʉpanʉ wʉ ɨtakɨ‑takɨ ngua maninu kunzo wa ɓɔ, ɓieni nʉ ɓʉkʉnda ati ʉndɛnʉ. Ngbanga kʉndʉ ɛmɛ ma꞉nɨkʉnda, inu kʉndaneni kʉ kʉndanaa. 35Ndʉ naɓio nʉ ɓʉkʉnda ati ʉndɛnʉ, ɓombi kʉ ɓuɓomu ɓa꞊mbɨa kusigo ɓɔ kingono na ɓakpataka ɓʉsɛmɛ. »
Yeso ʉɓɨa kʉpɛɛ ɓɔ Pɛtɛlɔ a꞊mʉtata tatanɨ
(Mat 26:31-35; Mak 14:27-31; Luk 22:31-34)
36Simoni Pɛtɛlɔ ambumuɓukuo ɓɔ: « Makʉʉɓɨɨ, wakʉsa gbanɨ? »
Yeso ambumutisio ɓɔ: « Wambʉkʉnakpata‑zʉ ɨtakɨ‑takɨ ngia akʉ ma‑ɛɛ kʉsa, ɨkyɛmɨngana mbise wa꞊nakpata kpataa. » 37Pɛtɛlɔ ambumuɓukuo ɓɔ: « Makʉʉɓɨɨ, jʉtanɨ mambʉkʉnakpata ɨtakɨ‑takɨ ngiakɛ? Ɛmɛ maʉndanɛ kunzo ʉɓɨɨ nguʉsɛmɛ ekoo asɔɔ! » 38Yeso ambumutisio ɓɔ: « Ajʉ wa tʉkʉ ʉndanɛ kingono kunzo ʉɓɨɨ nguʉsɔɔ ekoo asɛmɛ ɓiɛ? Tʉkʉ kingono manɔwɛ kusigio ɓɔ, pɛɛ ngia gue ʉ kɔɓɔ a꞊natɨa‑ɔɔ, waɓio wʉpanatateni nɨsɨ kaatʉ. »
Currently Selected:
Yʉanɨ 13: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
