Kyananaka 17

Ɓombi ɓʉ Tesalonika ɓʉchakanakaa

1Iya ɔɔ Pɔlɔ nʉ Sila ɓa꞉ɓaa gʉlʉ ʉ Amʉfɨpɔlɨ nʉ iya wʉ Apɔlɔnɨa, ɓambʉɓʉya tiga akʉ gʉlʉ ʉ Tɛsalonika akʉ ɨkáa yɨ nɨta ngia yɨ Ɓayuda yi꞉nye‑ɛɛ. 2Kʉkpatanakɨa nʉ ɨkyananakɨa ngia yɨ Pɔlɔ, i꞉nye sa nani kʉ gomu kʉgbʉka ɓombi ngiɓa ɓi꞉nye nani ambʉkwaa ɓabɛlɛsɛ ɓaatʉ. Makwaa kʉ humuo ngika kʉ Ɓayuda kʉ muɓomu i꞉nye kyɨa tʉkʉ kʉyakanaka naɓɔ ekoo Mubio kʉ Asʉɓɨɨ. 3Ɛyɔ naɓɔ kʉkwananakisio ɛkɔ, nʉ kʉpananiso nani amati ɔngɔ ɓɔ ya꞉kwanana jɛnɛ Masɨa ʉdya ikoko nʉ ʉjʉkana akʉ ingyo. Kija Pɔlɔ a꞉sigo ɓɔ: « Yeso ngiinanɨ maninu kʉɓɨakɨa ɨsaʉ yangɔ, ɛyɔ a Masɨa. »

4Ɓayuda ngana ngana ngiɓa ɓi꞉nye kʉkɔ moni ngikʉnanɨ, ɓa꞉baya ɓɔ moni ngikʉnanɨ ka kingono. Kija ɓa꞉ka kukumunio amati ʉ undindo ngua wʉ ɔɔ Pɔlɔ nʉ Sila. Ɓombi ɓaja ngiɓa ɓambikinye Ɓayuda iɓa ɓi꞉nye bibiso Asʉɓɨɨ ɨzɔ nʉ ɓoi ɓaja ɓɔɔ ɓʉmbɨanɨɛ, ɛɓɔ ɓa꞉kyɨa kʉ ɓwanɨ. 5Ɨkyɛmɨngana, Ɓayuda nga ɓɔmɔ ɓa꞉kwa tiga imi. Ɓambʉmʉmaka mikpekpe yɨ ɓombi ɓʉ ambɛlɛ‑mbɛlɛ akʉ ʉngyɛndʉ, ɓambuɓutitio ɓɔ ɓʉchakanaka ɓʉkaɨ amati ʉ gʉlʉ. Ɓambʉɓwanɨa akʉ ɨkáa ngia yɨ Yasɔnɨ kʉhata ɔɔ Pɔlɔ nʉ Sila, aka ekoo ngia ɓɔ ɓʉ꞉ka naɓɔ apɛɛ ʉ ungbutu wʉ ɓombi kʉ ɓuɓomu. 6Ndʉ ɓa꞉ɓʉnakɔmʉ nani, ɓambʉsa tii tʉkʉ titoko ɔɔ Yasɔnɨ nʉ mikpekpe yɨ ɓombi ɓʉ baya nga ɓɔmɔ. Ɓambʉsa naɓɔ apɛɛ ʉ ɓangama ɓʉ gʉlʉ ngiinanɨ, ɓambufaniso tʉɓɨa ɓɔ: « Ɓombi ngiɓaɓɛ ɓutambiso lɨkʉmbʉ tii kʉ liɓomu, nʉ ɨtakɨ‑takɨ ngiakɛ ɓʉɓwanɨa tiga aka kʉ ɓwanɨaa. 7Ʉna tɔ, Yasɔnɨ ambuɓuwuliso tiga andɔngɔ. Ɨkyananakɨa yɨ ɓombi ngiɓa ya kʉ di nʉ moni ngika ngama ɔɔ ʉja wʉ Ɓalɔma akʉmaiso engo. Ɛɓɔ ɓakusigo gʉ ngama nga kɔmɔ ʉnʉ ɓɔ Yeso. » 8Moni ngikʉnanɨ ɓa꞉sigo, ka꞉jʉka ungbutu wʉ ɓombi nʉ ɓangama ɓʉ gʉlʉ ɓʉkaɨ. 9Tiga ananɨ ɓangama ɓa꞉lipisa ɔɔ Yasɔnɨ nʉ ɓombi nga ɓɔmɔ falanga, kija ɓa꞉ɓuɓono.

Ɓombi ɓʉ Bɛlɔya ɓʉjananɨa ɔɔ Pɔlɔ nʉ Sila

10Aka ekoo ʉ moni ngika ka꞉kyananakɨa anʉ Tesalonika, tʉkʉ nuɓutu ngiinanɨ, ɓombi ɓʉ baya ɓambuɓaiso ɔɔ Pɔlɔ nʉ Sila anʉ Bɛlɔya. Iya ɓa꞉ɓʉya nani, ɓambʉsa akʉ ɨkáa yɨ nɨta ngia yɨ Ɓayuda. 11Ɨkyɛmɨngana, Ɓayuda ngiɓʉnanɨ ɓi꞉nye kʉ di nʉ iɓa ɓʉ Tesalonika, jʉ ɓa꞉baya ʉpanʉ wʉ Asʉɓɨɨ nʉ 'ʉtʉma wɔɔ uɗo nadɨndɨ. Makwaa kʉ muɓomu ɓi꞉nye kukpingbikiso Mubio kʉ tine tine, kʉna ɓɔ ajʉ moni ngika Pɔlɔ i꞉nye kʉyaka ka kingono gʉ chʉkɔɔ. 12Ɓayuda ɓaja ɓa꞉baya ɨzɔ nʉ ɓoi ɓʉ Ɓagiliki ngiɓa ɓɔɔ ɓʉmbɨanɨɛ nʉ ɓugue ɓɔngɔ ɓaja. 13Ati ngia Ɓayuda ngiɓa ɓʉ Tesalonika ɓa꞉kɔ ɓɔ Pɔlɔ a tiga kʉ kʉɓɨakɨa Ɨsaʉ yɨ Asʉɓɨɨ anʉ Bɛlɔya, kija ɓa꞉ka ɓambufaniso titio ɓombi ɓɔ ɓʉchakanaka ɓambufaniso yaka ɓʉkaɨ. 14Kija ɓombi ɓʉ baya ɓambuɓaiso Pɔlɔ anʉ wagba wʉ ɨtɛtɛtɛ yɨ ɗei ngia ɔɔ 'ʉja. Ɨkyɛmɨngana, ɔɔ Sila nʉ Timɔtɛɔ ɓambutukuo yɨndaɓʉ tʉkʉ anʉ Bɛlɔya. 15Ɓombi ngiɓa ɓi꞉nye kʉkɨnda ɨzɔ nʉ Pɔlɔ ɓambʉɓʉya nayɔ kʉnapɨa tʉkʉ anʉ Atɛnɛ. Ati ngia ɓi꞉nye tiga‑ɔɔ kʉʉngwɨa kɨnda kʉtʉa anʉ Bɛlɔya, Pɔlɔ ambuɓunzo ʉpanʉ kusigo ɓɔ ɔɔ Sila nʉ Timɔtɛɔ ɓʉmʉkpata tʉkʉ gagaa.

Pɔlɔ ʉɓɨa ɓombi ɓʉ Atɛnɛ moni ekoo Asʉɓɨɨ

16Ati ngia Pɔlɔ i꞉nye‑ɔɔ kusiɓo ɔɔ Sila nʉ Timɔtɛɔ anʉ Atɛnɛ, a꞉dya ikoko nadɨndɨ, kʉna ɓɔ gʉlʉ ngiinanɨ anʉ ɓamʉngʉ ɓʉ yakanaka ɓaja. 17Amati ʉ ɨkáa yɨ nɨta ngia yɨ Ɓayuda, Pɔlɔ i꞉nye kʉyakana nʉ Ɓayuda ɨzɔ nʉ ɓombi ngiɓa ɓambikinye Ɓayuda iɓa ɓi꞉nye bibiso Asʉɓɨɨ. Nʉ ɓata i꞉nye yakanaka nʉ ɓombi ngiɓa ɓi꞉nye junikio naɓɔ akʉ ɨmbaa makwaa kʉ muɓomu. 18Ɓombi ɓʉ mbɨmbanaka ngana ngana amati lɨtanda lʉ Ɓapukulio nʉ Ɓasitoiko,#17:18 Ya ɨtanda yɨ ɓombi ɓʉ mbɨmbanaka ɓambufaniso wai nayɔ. Ɓɔmɔ ɓambuɓukuo ɓɔ: « Mombi ɔɔ pimise moni ɔɔ ɓiɓonoke ngia a‑zʉ kʉkʉnda kusigo tanɨ? » Ɓɔmɔ ɓambusigo ɓɔ: « Yakʉnyɨa ndʉ akʉɓɨakɨa ɨsaʉ yɨ ɓamʉngʉ nga ɓɔmɔ. » Jʉ Pɔlɔ i꞉nye kʉɓɨakɨa ɨsaʉ yɨ Yeso nʉ ekoo ʉ jʉkana akʉ ingyo. 19Kʉ ɓwanɨ, ɓambʉchɨka Pɔlɔ ɓambʉsa nayɔ akʉ ubua ngua wi꞉nye junikio akʉ mʉa ngua ɓi꞉nye soko ɓɔ Aɨlɔpagɔ,#17:19 Gʉ kʉ ɓɔ, izi yɨ ubua ɓambusigo ɓɔ: « Kakʉkʉnda kʉmbɨa moni kʉ ɨtakɨ‑takɨ ngika waakyɨa kina kʉyaka engo. 20Moni ngikʉnanɨ wanisu kʉngakɨa engo kakʉkɔ nʉ muchwei ngikʉndɛsʉ ndʉ moni nga nanɨ kʉ di. Ka piɛ kʉkʉnda kʉmbɨa ɓɔ moni ngikʉnanɨ inyi yɛngɔ yakusigo tanɨ. » 21(Moni ngikʉnanɨ ka꞉kyananakɨa ɓwanɨ jʉ ɓombi ɓʉ gʉlʉ ʉ Atɛnɛ nʉ ɓɛɛka ngiɓa ɓi꞉nye nanɨ, ɓinye ɓaiso wati nguʉndaɓʉ kʉ uɓomu tʉkʉ kʉchwa muduɓa nʉ nɨkɔ masaʉ kʉ ɨtakɨ‑takɨ.)

22Kija Pɔlɔ a꞉maa akʉ ubua nguʉnanɨ, ambusigo ɓɔ: « Inu ɓombi ɓʉ gʉlʉ ʉ Atɛnɛ! Makʉna ɓɔ inu naakpata moni kʉ ɓamʉngʉ nadɨndɨ amati ʉ lɨngbaa lʉ ɓamoni kʉ liɓomu. 23Kʉ ɓwanɨ, ati ngia ma꞉ɓaa bɛ‑ɔɔ amati ʉ gʉlʉ ngiʉndɛnʉ, ma꞉na bɛ ɓamoni ɓʉ lɨtanda ngilʉndɛnʉ, mambuchwio bɛ izi mɨngana ngia ɓaaya‑ɔɔ 'ʉtʉmbɨa ɓa꞉tɨndakɨa‑ɔɔ ɓɔ: ‹ Akʉ mʉngʉ ngia ambakambɨanɨa ›. Moni ngika naabibiso chʉkɔmʉ nʉ mbɨa, ɨkɔ mʉngana tʉkʉ ika maninu kʉɓɨakɨa engo ɨtakɨ‑takɨ ngiakɛ.

24Asʉɓɨɨ ngia a꞉kyɨa ʉɓɨɨ nʉ kumbo kʉ ɓuɓomu ngia a amati ɔngɔ a Makʉʉ ʉ ɓisi nʉ ɨtaka, nʉ ambakawulo ɨkʉmbʉ amati ʉ ɨkáa yɨ Asʉɓɨɨ ngia ɓombi ɓa꞉ɨtɨa nʉ lɨkɔndɔ. 25Nʉ ɓata ambakanangyɨa nʉ mombi gʉkʉ mʉngana, gʉkʉ ɓɔ mombi ʉmʉkyananakɨa. Jʉ ɛyɔ kʉ aanzo ɓombi kʉ ɓuɓomu ʉɓɨɨ, angu wʉ humuo nʉ kumbo kʉ 'uɓomu. 26Nʉ kʉ ɛyɔ a꞉kyɨa mababa kʉ ɓombi kʉ ɓuɓomu kʉʉngwa akʉ mombi mʉngana,#17:26 Gʉ ɓɔ, Adamu ambuɓunapioko kuwulo ɨkʉmbʉ akʉ ɨtaka kʉ iɓomu. Ambʉɨpaka lɨjɔ nʉ tinyoko mangɔnɔ yɨ ɓagɨpa ngiɓa ɓombi ɓa‑ɔɔ.

27Asʉɓɨɨ a꞉kyɨa moni ngikʉnanɨ aka ekoo ngia ɓɔ ɓombi ɓuɓio nayɔ kʉhata, nʉ tiga ɓa꞊muchwio ati ngia ɓaɓio‑ɔɔ kʉkpʉa mʉa nayɔ kʉhata. Ʉna tɔ, Asʉɓɨɨ ambʉkɔmʉ danga nʉ ɓombi kʉ nangana nangana ati ʉndɛsʉ. 28Ya ngbanga ndʉ iya mombi ʉ mbɨmbanaka mʉngana a꞉sigo‑ɔɔ ɓɔ, isu ka amati angɔ, nʉ kaakɨndanaka nʉ ka kʉkʉʉ tʉkʉ amati angɔ. ‹ Ya ɓwanɨ, isu ka ɓana ɓangɔ. › 29Jʉ Asʉɓɨɨ a꞉tɨkyɨa isu kʉ ɓuɓomu, yɨkwananakɔmʉ ɓɔ kʉmʉchɨka ndʉ mʉngʉ ngia ɓa꞉mutuo nʉ ɔlɔ, gʉ ɓɔ nʉ uko, gʉ ɓɔ nʉ ikopi iya ɓombi ɓʉ ɨtaka ɓa꞉mʉkyɨa nʉ mbɨmbanaka ngiindaɓʉ. 30Ʉna tɔ, Asʉɓɨɨ ambʉkɔmʉ ɓata kʉkpata moni ngika ɓombi ɓa꞉kyɨa akʉ ɓujangi‑jangi, ɨkyɛmɨngana ɨtakɨ‑takɨ ngiakɛ, akusoko ɓombi kʉ ɓuɓomu, akʉ mʉa kʉ uɓomu ɓɔ ɓunicho mɨtʉma. 31Jʉ a꞉napɨa ɓisi mʉngana iɓa a꞊tɨna sina‑ɔɔ 'ʉkɔmbɔ ngua wʉ ɓombi ɓʉ ɨtaka ngbingbii 'upi akʉ mombi ngia a꞉mʉchwa. Asʉɓɨɨ a꞉pananiso moni ngikʉnanɨ apɛɛ ʉ ɓombi kʉ ɓuɓomu ɨngbaa akʉ jʉkaniso mombi ngiinanɨ akʉ ingyo. »

32Iya ɓa꞉kɔ Pɔlɔ kʉyaka moni ekoo ʉ ɓombi ngiɓa ɓa꞉dʉka ɓɔ ɓa꞊jʉkana sina akʉ ingyo tʉkʉ jʉkananɨ, ɓombi ɓɔmɔ ati ʉndaɓʉ ɓambufaniso nayɔ kʉnʉa. Ɨkyɛmɨngana, ɓɔmɔ ɓambusigo ɓɔ: « Ka꞊kɔ ɓisi ɓata‑zʉ moni ngikʉnanɨ tʉkʉ kɔɔ. » 33Mbise ngiinanɨ, Pɔlɔ ambʉʉngwa ambʉsa yangɔ. 34Ɨkyɛmɨngana, ɓombi ngana ngana nga ɓɔmɔ ati ʉndaɓʉ ɓa꞉ka nayɔ kʉgbʉka, ɓambʉbaya Yeso. Ati ʉ ʉndaɓʉ yi꞉nye nʉ Dionisi, mʉngana ʉ ɓombi ɓʉ ubua ngua wʉ Aɛlɔpagɔ nʉ mwana ɔɔ moi mʉngana ino ɓɔ Damali, ɨzɔ nʉ ɓombi nga ɓɔmɔ.

Currently Selected:

Kyananaka 17: BudKoya

Highlight

Copy